Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sesampun liwat jelo Sabat, lẽq jelo Ahad kelẽmaq aru, Mariam Magdalena dait Mariam saq lain lumbar ojok makam nike.

² Selung-selung araq lindur saq belẽq gati. Sopoq malaẽkat Tuhan turun lẽman sorge alih batu pengimpet lawang makam nike dait melinggih lẽq atasne.

³ Muen malaẽkat nike maraq kisap dait kelambine putẽq gati.

⁴ Tentere pengawal saq bejage lẽq derike jari takut gati jangke ie pade ngijik dait jari maraq dengan matẽ.

⁵ Malaẽkat nike bebase lẽq dengan-dengan nine nike, "Ndaq takut! Tiang taoq side pade boyaq Deside Isa saq sampun tepakuq lẽq kayuq salib nike.

⁶ Ie ndẽq araq lẽq deriki. Ie sampun idup malik maraq saq sampun Ie manikang laẽq. Silaq serioq taoq-Ne tesarẽang.

⁷ Mangkin, becat side pade lumbar, kabarang tipaq pengiring-pengiring-Ne, 'Deside Isa sampun idup malik, dait Ie sampun senjuluq side pade lumbar ojok Galilea. Lẽq derike side pade gen serioq Ie!' Ingetang napi saq sampun tiang sampẽang lẽq side."

⁸ Sesampun nike, dengan-dengan nine nike becat-becat bilin makam nike. Siq perasaan takut awor seneng ie pade pelai ngabarang selapuq hal nike lẽq pengiring-pengiring Deside Isa.

⁹ Selung-selung Deside Isa bedait kance ie pade, dait bemanik, "Salam umaq side pade!" Beterus ie pade ngerapetin Deside Isa terus kapong cokor-Ne dait sujut nyembah Ie.

¹⁰ "Ndaq takut," manik Deside Isa lẽq ie pade, "silaq side pade lumbar kabarang lẽq selapuq sanak Tiang adẽqne lumbar ojok Galilea. Lẽq derike ie pade gen bedait kance Tiang."

¹¹ Sewaktu dengan-dengan nine nike lumbar, araq pengawal-pengawal saq bejage lẽq makam nike lumbar ojok kote, dait ngelaporang peristiwe nike lẽq imam-imam kepale.

¹² Imam-imam kepale nike mupakat kance pemimpin-pemimpin Yahudi, terus ie pade ngebẽng luwẽq kẽpẽng lẽq pengawal-pengawal nike,

¹³ dait bepesen, "Side pade harus badaqang bahwe pengiring-pengiring Deside Isa dateng lẽq tengaq kelem dait paling jenazah-Ne sewaktu side pade kenyeke tindoq.

¹⁴ Dait lamun gubernur pireng hal nike, tiang pade gen badaq ie adẽq side pade ndẽq ndait masalah."

¹⁵ Jari, pengawal-pengawal nike bait kẽpẽng nike, terus ngelaksaneang maraq saq tepesen siq imam-imam nike. Nike lantaranne cerite niki nyebar lẽq antare dengan-dengan Yahudi jangke jelo niki.

¹⁶ Kesolas pengiring Deside Isa nike lumbar ojok sopoq bukit lẽq Galilea sesuai kance manik Deside Isa tipaq ie pade.

¹⁷ Sewaktu ie pade serioq Deside Isa lẽq derike, selapuqne sujut nyembah Ie, laguq araq lẽq antarene saq masih bimbang.

¹⁸ Deside Isa ngerapetin ie pade, dait bemanik, "Selapuq kuase saq araq lẽq sorge dait lẽq gumi sampun teserahang lẽq Tiang.

¹⁹ Keranaq nike, silaq side pade lumbar ojok selapuq bangse lẽq dunie, dait jariang ie pade pengiring-pengiring Tiang, dait baptis ie pade lẽq dalem pesẽngan Bapa dait Bije dait Roh Suci.

²⁰ Ajah ie pade taat lẽq selapuq saq Tiang prẽntahang tipaq side pade. Dait pade inget bahwe Tiang gen tetep bareng kance side pade jangke ahir jaman."

Matius

Video Matius 28

Ikuti Kami:

KONTAK | PARTISIPASI | DONASI