Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tapi sanggah mulai ope marlangat-langat ari, bani ari parlobei dob salpu Sabat, roh ma si Maria Magdalena ampa si Maria na sada nari manonggor tanoman ai.
2 Anjaha tonggor ma, masa do lalou bolon, ai tuad do Malekat ni Tuhan hun nagori atas, idohori ma batu ai, iguling ma ai lanjar hundul i atasni.
3 Ia rupani songon hilap do, anjaha pakeianni putih songon salju.
4 Jadi hitir-hitir ma parjaga ai ibahen biar ni uhur ni sidea, hira na matei do.
5 Tapi nini malekat ai ma dompak naboru ai, “Ulang mabiar nasiam! Ai hubotoh do, Jesus, na dob pinarsilangkon, ai do na pinindahan nasiam.
6 Seng ijon be Ia, ai domma puho Ia, songon na hinatahon-Ni hinan. Padohor nasiam ma, tonggor nasiam ge ianan hatibalan-Ni on!
7 Podas ma nasiam laho hubani susian-Ni patugahkon na dob puho Ia humbani na matei. Lobeian-Ni do nasiam laho hu Galilea, anjaha ijai ma idahon nasiam Ia. Tonggor ma, domma hupatugah ai bani nasiam.”
8 Jadi podas ma sidea misir hun tanoman ai, mabiar anjaha marmalas ni uhur tumang, marlintun do sidea laho patugahkon ai bani susian-Ni.
9 Tapi roh ma Jesus manjumpahkon sidea, nini ma, “Damei ma bani nasiam.” Jadi idohori sidea ma Ia, irohop sidea ma nahei-Ni lanjar manrogop i lobei-Ni.
10 Jadi ihatahon Jesus ma hubani sidea, “Ulang nasiam mabiar, laho ma nasiam patugahkon bani susian-Ku, ase laho sidea hu Galilea. Ijai ma idahon ni sidea Ahu!”
11 Sanggah na misir ai sidea, tonggor ma, roh ma piga-piga parjaga ai hu huta, ibaritahon sidea ma haganup na masa ai bani sintua ni malim.
12 Jadi martumpu ma sidea rap pakon pangintuai-pangintuai ai, anjaha dob manriah, ibere sidea ma buei duit bani tentara ai,
13 nini sidea ma, “Hatahon nasiam ma, ʻBorngin, sanggah tarpodom hanami, roh do susian-Ni manangko-Si.ʼ
14 Anjaha anggo tarbotoh on bani panggomgomi, hanami pe marsahap pakonsi, ase ulang susah nasiam.”
15 Jadi ijalo sidea ma duit ai, anjaha ibahen sidea ma songon na hinatahon ai bani sidea. Rarat do barita on i tongah-tongah ni halak Jahudi ronsi sadari on.
16 Ia susian na sapuluh sada ai laho do hu Galilea, hu sada dolog, na dob ipatuduh Jesus hinan bani sidea.
17 Anjaha dob ididah sidea Ia, isombah sidea ma Ia, tapi adong ope na sangsi.
18 Jadi roh ma Jesus hun dohor bani sidea, nini ma, “Domma ondos Bangku sagala kuasa na i nagori atas ampa na i tanoh on.
19 Laho ma hanima, podahi hanima ma sagala bangsa, ase gabe susian-Ku sidea, anjaha didi hanima ma sidea hubagas goran ni Bapa, Anak ampa Tonduy Na Pansing.
20 Ajari hanima ma sidea mangkorjahon sagala na dob Hutitahkon bennima. Tonggor ma, sai na hasomanan-Ku do hanima ganup ari, ronsi roh ujung ni dunia on.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA