Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Waktu rani Sabat radu liwat, waktu rani Minggu pagi-pagi nihan, Maria Magdalena rik Maria sai bareh ano mik ngeliak kuboran ano.

² Tiba-tiba tejadi kukuk sai hibat. Sai malaikat Tuhan regah jak surga raduni ngegulingko batu penyalok udi, rik mejong di atasni.

³ Pudak malaikat udi sebagai kilap, rik kawaini handak nihan.

⁴ Tentera pengawal sai ngejaga di dudi rabai nihan sampai tian gegoran, rik jadi injuk ulun mati.

⁵ Malaikat udi cawa jama bebai-bebai ano, "Dang rabai! Nyak pandai keti nyepok Isa sai radu disalibko ano.

⁶ Ia mak ngedok di dija. Ia radu bangkit injuk sai radu diucakko-Ni tumbai. Ija liak rangni Ia dipedamko.

⁷ Tano, mikdo geluk-geluk, keni pandai jama jelma-jelma sai nutuk Ia, 'Ia radu bangkit, rik tano Ia mik lebih mena jak keti mik Galilea. Di dudi keti haga ngeliak Ia!' Ingokdo api sai radu kucawako jama niku."

⁸ Geluk-geluk bebai-bebai udi ninggalko kuboran udi. Jama perasaan rabai campor riang, tian tegar-tegar untuk ngeni pandai hal udi jama jelma-jelma sai nutuk Isa.

⁹ Tiba-tiba Isa ratong nungga bebai-bebai ano, rik cawa, "Salam!" Raduni tian ratong ngeredik Ia, kak raduni nekap cukut-Ni rik nyumbah Ia.

¹⁰ "Dang rabai," ani Isa jama tian, "mik keni pandai jama puari-puari-Ku in tian mik Galilea; di dudi tian haga ngeliak Nyak."

¹¹ Sementara bebai-bebai udi mik, pira-pira jak tentera pengawal sai ngejaga kuboran udi muloh mik kota, rik ngelaporko jama imam-imam kepala sunyinni sai radu tejadi.

¹² Imam-imam kepala udi berunding jama jelma-jelma sai mimpin Yahudi, raduni ngeni duit lamon jama tentera pengawal udi,

¹³ rik cawa, "Keti haga ngucakko bahwa jelma-jelma sai nutuk Isa ratong di bingi, rik maling mayat-Ni waktu keti sedang pedom.

¹⁴ Rik kik gubernur ngedengi hal seno, sekam haga ngebujuk ia in keti mak mansa kesulitan api-api."

¹⁵ Maka tentera pengawal udi ngakuk duit udi, rik ngelakuko sebagai sai diluhotko jama tian. Ulihni seno cerita ano masih tesiar di hantara ulun Yahudi sampai rani inji.

¹⁶ Kesebelas jelma sai nutuk Isa udi mik di Bukit Galilea nutuk sai diperintahko Isa jama tian.

¹⁷ Waktu tian ngeliak Isa di disan, tian sujud nyumbah Ia. Kidang wat di hantara tian sai ragu-ragu.

¹⁸ Isa ngeredik tian, rik cawa, "Seluruh kuasa di surga rik di bumi radu diserahko jama Nyak.

¹⁹ Ulihni seno mikdo jama sunyinni bangsa di seluruh dunia, jadiko tian jelma-jelma sai nutuk Nyak. Baptisko tian jama nyebut gelar Bapa, rik Anak, rik Ruh Allah.

²⁰ Ajarko tian menaati sunyinni sai radu Kuperintahko jama niku. Rik ingokdo Nyak haga selalu menyertai keti sampai akher zaman."

Matius

Video Matius 28

Ikuti Kami:

KONTAK | PARTISIPASI | DONASI