Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ene sarạeng ěllon Sabatẹ̌ e nal᷊iu, tangu su kalongeng ěllo Misa e, i Maria Magdalena ringangi Maria lai wal᷊ine natamaịe němpẹ̌dal᷊inge němpamanda l᷊ěbing ene.
2 Sěngkianu piạ linuhẹ̌ maihạ. Sěngkatau malaekat'u Mawu e limintụ bọu sorga kụ nělungging batu lahěpinge; kụ kimaiangke su wowone.
3 Gahịu malạekatẹ̌ e kere kilạ, pakeange mawira pal᷊usẹ̌.
4 Sordado měndal᷊ukadẹ̌ e měmpẹ̌lěhapa sene měngkatewe něngkawintogẹ̌ sarang i sire nahungkende, kụ tabidạu kere taumata nate.
5 Malạekatẹ̌ e nẹ̌bera su manga wawine ene, "Abe kěngkatakụ! Iạ masingkạ i kamene mědědeạ si Yesus nạung seng nikuruisẹ̌ ene.
6 I Sie tawẹdise sini. I Sie kai seng nẹ̌bangung kerẹewe seng nihabar'E kal᷊amona. Mahịe pěmpẹ̌kakělla ěnnạ u rẹ̌dal᷊okaěnge.
7 Ene, rakọe lighạ pěhabarẹ̌ su manga murit'E, 'U i Sie kai seng nẹ̌bangung bọu tal᷊oaran taumata nate, kụ i Sie kai seng natamai něngal᷊imona si kamene sol᷊ong Galilea. Sene i kamene sarung makasilo si Sie!' Tahěndungeko apang seng takụ nịbawera si kamene."
8 Měngkatewe masahawụ manga wawine ene němpaněntang u l᷊ěbing ene. I sire nahuntal᷊ang mědeạu měhabaru hal᷊ẹ̌ nariadie su manga murit'u Mawu Yesus, dingangu takụ nẹ̌dal᷊aụ u ral᷊uasẹ̌.
9 Sěngkianụe Mawu Yesus naněnsomahẹ̌ manga wawine ene, kụ něhengetang, "Tabeạ!" Kụ i sire himaungke si Sie mase limahěkụe laede ringangu němpẹ̌suba si Sie.
10 "Abe kěngkatakụ," angkuěng i Yesus si sire, "dakọe pěmpěhabarẹ̌ su manga anạ u sěmbaụku e mẹ̌deạu i sire makoạ sol᷊ong Galilea kụ sene i sire sarung makasilo Siạ."
11 Piạ e manga wawine ene kạpahundal᷊enge, pirang katau sordado apang měmpělẹ̌hapa l᷊ěbinge němpẹ̌bal᷊ị sol᷊ong soa, kụ němpěhabar'u patikụ apan nariadie su manga těmbonangu imang.
12 Manga imang těmbonange němpẹ̌dal᷊ahintau ringangu manga matatimad'u tau Yahudi, mase nangonggọen doitẹ̌ lawọ su sordado měndal᷊ukadẹ̌ e,
13 kụ nẹ̌bera, "I kamene harusẹ̌ pěmpaul᷊ị u manga murit'u Mawu Yesus e riměnta hěbi, kụ němpẹ̌tako maiet'u Mawu Yesus piạ i kamene kạpahuntikịe.
14 Kụ kereu ikaringihu guběrnurẹ̌ hal᷊ẹ̌ ene ute, i kami hědowe měloke si sie tadeạu i kamene tawe mẹ̌sombangu sungkal᷊ene apa."
15 Tangu sordado měndal᷊ukadẹ̌ e rimaẹ doitẹ̌ ene, kụ nẹ̌koạewe apan nạung nitanata si sire. Ual᷊ingu ene tangu wěke ene wědangben nasěsahẹ̌ su tal᷊oaran tau Yahudi e sarang ěllo ini.
16 Murit'E mapul᷊o ěsa e simaka sol᷊ong bul᷊ude su Galilea, kerẹewe nạung pakịděntaing Yesus si sire.
17 Piạ i sire nakasilo Mawu Yesus sene, i sire němpẹ̌suba si Sie. Maning kerene kai mang piạ u mẹ̌děndapatẹ̌ bọu tal᷊oaran sire.
18 Mawu Yesus himaung si sire, apid'u nẹ̌bera angkuěng, "Patikụ kawasa su sorga ringangu su dunia e seng nisarakang si Siạ.
19 Ual᷊ingu ene ute, dakọe pěmpahundal᷊eng, kụ patikụ umatẹ̌ su kasěllah'u dunia e koạko muritẹ̌-Ku. Sahaniko i sire su areng i Amange ringangu Ahusẹ̌ dingangu Rohkẹ̌ u Ruata e.
20 Těntiroiko i sire mẹ̌sempị kěbị apan takụ nioro si kamene. Kụ pẹ̌tahěndungu Iạ e mang maněntanudẹ̌ si kamene sarạeweng kasueěngu dunia e."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA