Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani ari ai itadingkon Jesus ma rumah ai, lanjar hundul ma Ia i topi ni tao ai.
2 Jadi martumpu ma buei halak hu lobei-Ni, gabe inaiki Jesus ma sada parau laho hundul ijai, anjaha ganup halak na mabuei ai jongjong do i pasir ai.
3 Anjaha buei do ihatahon bani sidea marhitei limbaga, nini ma, “Tonggor ma, laho do sada panabur manabur bonih.
4 Jadi sanggah na manabur ai ia, adong ma deba na madabuh hu dalan, dob ai roh ma manuk-manuk mamaguti.
5 Deba bonih ai madabuh do bani tanoh na batuon, bani na so sadiha hapal tanohni, jadi mintor tubuh ma, halani na so bagas ai tanohni.
6 Tapi sanggah na lambin gijang mata ni ari melus ma lanjar matei, halani na so marurat ai.
7 Anggo na deba, hu parhupihupian do madabuh, lanjar tubuh do hupihupi ai, gabe ipisat ma bonih ai.
8 Tapi na deba madabuh do bani tanoh na madear, gabe saud ma marbuah, saratus lompit do na deba, onom puluh lompit na deba, anjaha na deba nari tolu puluh lompit.
9 Barang ise na marpinggol, itangar ma ai!”
10 Jadi roh ma susian-Ni ai manungkun-Si, “Mase ma marlimbaga Ham marsahap bani sidea?”
11 Ibalosi ma sidea, nini ma, “Hu bennima ibere do habotohon pasal rusia ni Harajaon nagori atas ai, tapi bani sidea lang ibere.
12 Ai barang ise na marnadong, bereon do bani, ase marlobih-lobih ia. Tapi barang ise na so marnadong, na adong bani ai hinan pe buaton do hun bani.
13 Ai do halani ase marlimbaga Ahu marsahap bani sidea, halani marmata pe sidea seng marpangidah, anjaha marpinggol pe sidea seng marpambogei anjaha seng iarusi.
14 Ase jumpah ma bani sidea panjahaion ni Nabi Jesayas, na mangkatahon, ʻBogeion ni pinggol nasiam do in namin, tapi seng arusan nasiam, idahon ni mata nasiam do in namin, tapi seng tandaon nasiam.ʼ
15 Ai na dob hengkeng do uhur ni bangsa on, pinggolni hurang marpanangar anjaha ipapitpit matani, ase ulang marpangidah matani, ulang marpambogei pinggolni, ulang marpangarusion uhurni, ase ulang mulak anjaha malum sidea bahenon-Ku.
16 Tapi martuah do matanima halani marpangidah, ampa pinggolnima halani marpambogei.”
17 Tapi sintong do na Huhatahon on bennima, “Buei do nabi pakon halak parpintor na sihol mangidah na dob nididahnima, tapi seng ididah, anjaha na sihol mambogei na dob binogeinima, tapi seng ibogei.
18 Ai pe, tangar hanima ma limbaga pasal panabur ai!
19 Anggo adong na manangar hata pasal Harajaon ai, tapi seng iarusi, jadi roh ma parjahat ai manrampas na dob sinaburhon ai hubagas uhurni, ai ma na sinaburhon bani dalan ai.
20 Tapi na sinaburhon bani tanoh na batuon ai, ai ma na mambogei hata ai, anjaha mintor malas do uhurni manjalosi,
21 tapi seng marurat ibagas dirini, parsatongkinan do hansa ai. Anggo sogop hasunsahan atap pangarsik-arsikon halani hata ai, mintor sangsi do uhurni.
22 Ia na sinaburhon bani parhupihupian ai, ai ma na mambogei hata ai, tapi tarpisat do hata ai anjaha seng saud marbuah, halani pangkolsohkon ni uhurni bani na i dunia on ampa halani habayakon sipanipu in.
23 Ia na sinaburhon bani tanoh na lambutan ai, ai ma na mambogei hata ai anjaha iarusi gabe saud marbuah, adong na saratus, adong na onom puluh, adong na tolu puluh lompit.”
24 Dob ai ihatahon ma use limbaga na legan bani sidea, nini ma, “Usih do Harajaon nagori atas ai bani sada halak na manaburhon bonih na madear hu jumani.
25 Tapi sanggah na modom halak ai, roh ma munsuhni manaburhon simaromei-omei hu holangkolang ni omei ai, lanjar laho hunjai.
26 Tapi domma marbuhu tanoh anjaha sihol boltok omei ai, tanda ma simaromei-omei ai.
27 Jadi roh ma siparhorja ai bani tuanni, nini sidea ma, ʻTuannami, ai lang bonih na madear do isaburhon ham hu jumamu? Hunja do simaromei-omei ai?ʼ
28 Tapi nini ma dompak sidea, ʻMunsuh do na mambahen ai.ʼ Nini parhorja ai ma hu bani, ʻDear do ninuhurmu laho hanami patumpuhon ai?ʼ
29 Jadi nini ma, Lang, tarihut holi omei ai iorbat hanima, sanggah na patumpu simaromei-omei ai hanima.
30 Paturut hanima ma ai rap tubuh paima jumpah sabion. Bani panorang sabion ai huhatahon pe bani sipanabi, ʻPatumpu nasiam ma lobei simaromei-omei in, sangkuti nasiam sasamborkos ase itutung, tapi anggo omei in, patumpu nasiam ma hubagas sopouhu.ʼ”
31 Dob ai ihatahon ma use limbaga na legan bani sidea, nini ma, “Usih do Harajaon nagori atas ai bani batu ni loharum, na ibuat sada halak laho manaburhonsi hu jumani.
32 Ai do sada silumatan humbani masam ni bonih, tapi dob tubuh, gabe banggalan do ai humbani sagala lowoh simaratah, pala do songon hayu, anjaha marrohan do manuk-manuk na i awang-awang marasar bani rantingni.”
33 Dob ai ihatahon ma use limbaga na legan bani sidea, “Usih do Harajaon nagori atas ai bani ragi, na ibuat sada parinangon, laho mangaguhon ai bani tolu tumba nitak paima migar haganup.”
34 Haganupan ai ihatahon Jesus marhitei limbaga bani halak na mabuei ai, seng marsahap Ia bani sidea anggo seng marhitei limbaga,
35 ase jumpah na hinatahon ni nabi ai, na mangkatahon, “Ungkabon-Ku do pamangan-Ku mangkatahon limbaga, sahapkonon-Ku do na ponop humbani tombei ni dunia on.”
36 Dob ipalaho halak na mabuei ai, misir ma Ia hu rumah. Jadi roh ma hu Bani susian-Ni ai mangkatahon, “Patorang Ham ma bennami limbaga pasal simaromei-omei na i juma ai!”
37 Jadi nini ma mambalosi, “Ia na manaburhon bonih na madear ai, ai ma Anak ni Jolma in.
38 Dunia on do juma ai, ia bonih na madear ai, ai ma anak ni Harajaon ai, tapi anggo simaromei-omei ai, ai ma anak ni parjahat.
39 Munsuh na manaburhon ai, ai ma sibolis, pariama ai, ai ma ajal ni dunia on, anjaha malekat ni Naibata do sipanabi ai.
40 Ase songon na ipatumpuni ai simaromei-omei ai anjaha itutung, sonai do masa bani ajal ni dunia on.
41 Ai suruhon ni Anak ni Jolma in do malekat-Ni, jadi patumpuon ni sidea ma humbani harajaon ai sagala sibahen parsangsian pakon sihorjahon na ulang,
42 gabe idabuh ma sidea hubagas liang pamurunan, ijai ma masa partangison ampa na patungosngoson.
43 Tapi anggo halak parpintor marsinalsal do songon mata ni ari ibagas Harajaon ni Bapa ni sidea. Barang ise na marpinggol, itangihon ma!”
44 “Usih do Harajaon nagori atas ai bani arta na ponop ibagas sada juma, na jumpah sada halak gabe iponopkon. Dob ai laho ma ia ibagas malas ni uhurni manjuali na dong bani, jadi iboli ma juma ai.
45 Usih do use Harajaon nagori atas ai bani sada halak partiga-tiga, na mangindahi mutiara na maharga.
46 Jadi dob jumpahsi sada mutiara na maharga tumang, laho ma ia manjual haganup na dong bani, lanjar iboli ma ai.”
47 “Usih do homa Harajaon nagori atas ai bani jala na sinampakkon hubagas laut, gabe ipatumpu bagei-bagei ni dengke.
48 Dob gok, itarik ma ai hu darat. Dob ai hundul ma sidea mamilihi, na madear inahkon hubagas raga, tapi na so madear iambukkon do.
49 Sonai do masa bani ajal ni dunia on. Laho do malekat-malekat manirang halak parjahat humbani halak parpintor,
50 lanjar idabuh ma sidea hubagas liang pamurunan, ijai ma masa partangison ampa na patungosngoson.
51 Domma iarusi hanima haganupan ai?” Nini sidea ma hu Bani, “Domma.”
52 Jadi nini ma dompak sidea, “Halani ai, ganup sibotoh surat, na dob niajaran pasal Harajaon nagori atas ai, usih ma ai bani sada tuan rumah, na boi padaratkon humbani artani na baru ampa madokah.”
53 Jadi dob ipaujung Jesus pasal limbaga ai, laho ma Ia hunjai.
54 Jadi das ma Ia hu huta hagodangan-Ni, anjaha iajari ma sidea ibagas rumah parguruan ni sidea. Longang do sidea, nini ma, “Hunja do dapot Halak on hapentaran pakon hagogohon na sonin?
55 Ai lang Ia do anak tukang kayu in? Ai lang si Maria do goran ni inang-Ni, anjaha anggi-Ni ai ma si Jakobus, si Josep, si Simon ampa si Judas?
56 Anjaha botou-Ni, ai lang haganup do i tongah-tongahta? Hunja do dapot-Si haganupan in?”
57 Ase sangsi do sidea pasal-Si. Tapi nini Jesus ma dompak sidea, “Seng dong nabi na so ihormati, sobali i huta hagodanganni ampa i rumahni.
58 Anjaha seng buei tarhorjahon-Si ijai horja hagogohon, halani na so porsaya, ai sidea.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA