Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Di ari tu juwo Isa Almasih barangkek dari rumah tu, Baliau payi ka tapi danau, tibo disinan Baliau duduak.

² Sambuah urang nan bi tagak di sakuliliang Baliau, dek karano itu, payilah Baliau duduak ka ateh parawu, samantaro itu urang nan banyak bi tagak di tapi danau.

³ Banyaklah pangajaran nan di ajakan dek Isa Almasih kabake urang-urang tu, sacaro jo mamakai kato-kato ibaraik. "Ado surang urang paladang payi manyerakkan baniah," baitulah Baliau mamuloi curito-Nyo.

⁴ "Kutiko urang tu sadang manyerakkan baniah, ado baniah tu nan jatuah di tapi jalan. Tibolah unggeh mamakan baniah tu sampai abih.

⁵ Ado pulo nan jatuah di tanah nan babatu-batu, nan tanahnyo tipih. Bijo tu layi capek tumbuahnyo, tapi tanah tampaik tumbuahnyo tipih.

⁶ Kutiko matoari lah muloi nayiak, mako tuneh-tuneh tu pun muloi pulo layua, sudah tu masiak, mati kakeh, dek karano ureknyo indak ma unjam masuak ka tanah.

⁷ Ado pulo baniah tu nan jatuah di tangah samak baduri. Samak baduri tu tumbuah, inyo ma ambek tuneh-tuneh tu nak tumbuah, sampai tuneh tu mati.

⁸ Tapi ado pulo baniah tu nan jatuah di tanah nan rancak, sudah tu inyo babuwah; ado nan saratuih, ado nan anam puluah, ado pulo nan tigo puluah kali lipek buwahnyo."

⁹ Sasudah mancuritokan parumpamoan-parumpamoan nan bakcando itu, Isa Almasih bakato, "Kok lai batalingo, dangakanlah kecek Ambo ko!"

¹⁰ Sasudah tu pangikuik-pangikuik Baliau tibo bi batanyo kabake Baliau, "Baa mangkonyo Angku bakato ba ibaraik, jikok mangecek jo urang nan banyak tu?"

¹¹ Isa Almasih manjawab, "Dek karano kabake angku-angku lah dibari karunia untuak mangatawui tantang rasiyo Karajaan Sarugo, sadangkan kabake urang-urang tu indak.

¹² Dek karano, satiyok urang nan lah ado mampunyoi, kabake inyo ditambahkan, di agiah nan labiah banyak lai, sampai inyo bakalimpahan. Tapi bagi urang nan indak punyo apo-apo, nan ado saketek dinyo tu pun ka di ambiak.

¹³ Itulah sababnyo mangko Ambo bakato ba ibaraik, jikok mangecek jo urang banyak, inyo layi bi maliyek, tapi samo jo urang nan indak maliyek; inyo layi bi mandanga, tapi samo jo urang nan indak mandanga, sarato indak mangarati.

¹⁴ Dek nan baitu, mako basuwoanlah apo nan lah dinubuatkan dek Nabi Yesaya, 'Allah bakato: Urang-urang tu layi ka taruih juwo mandanga, tapi inyo indak ka bi mangarati; inyo layi ka taruih juwo mamparatikan, tapi inyo indak tawu apo nan tajadi.

¹⁵ Dek karano utak urang-urang ko lah mada talingonyo lah pakak, matonyo lah dibutokan. Mangko tajadi nan bakcando itu, matonyo jan maliyek, talingonyo jan mandanga, pikierannyo jan tabukak, supayo inyo jan babaliak kabake Den, untuak mintak dicegakkan.'"

¹⁶ "Tapi baralah kamujuanyo angku-angku," kecek Isa Almasih kabake pangikuik-pangikuik-Nyo, "dek karano angku-angku lah sabana-bana maliyek sarato jo mandanga.

¹⁷ Kana-ilah nan Ambo katokan ko, banyak nabi sarato jo urang-urang saliah, nan nak maliyek apo nan lah angku-angku liyek kiniko, tapi inyo indak dapek doh maliyeknyo. Inyo ma arokkan nak mandanga, apo nan lah angku-angku danga kiniko, tapi inyo indak dapek lai mandangakan."

¹⁸ "Dangakanlah apo aratinyo parumpamoan tantang urang nan manyerakkan baniah.

¹⁹ Baniah nan jatuah di tapi jalan, ibaraiknyo sarupo jo urang-urang nan lah mandanga kaba tantang Karajaan Sarugo, tapi inyo indak mangarati. Mako tibolah si Jahek (ubilih) ma ambiak apo nan lah diserakkan di tanah atinyo tu.

²⁰ Baniah nan jatuah di tampaik nan babatu-batu, ibaraiknyo sarupo jo urang-urang nan lah mandangakan firman Tuhan tu, inyo lansuang manarimonyo jo sanang ati.

²¹ Tapi firman Tuhan tu indak ba urek dalam atinyo, dek karano itu indak dapek batahan lamo. Jikok inyo mandapek kasusahan, atau jikok inyo di aniayo dek karano di firman Tuhan tu, mako inyo lansuang maninggakan imannyo.

²² Baniah nan jatuah di tangah samak baduri, ibaraiknyo sarupo jo urang-urang nan layi mandangakan firman Tuhan tu, tapi inyo cameh tantang iduiknyo, sarato inyo nak iduik basanang-sanang. Dek karano itu firman Allah tu, ta impik di dalam atinyo sainggo indak babuwah.

²³ Baniah nan jatuah di tanah nan rancak, ibaraiknyo sarupo jo urang-urang nan layi mayakini sarato mamahami firman Tuhan tu. Urang-urang tu sarupo jo tanaman nan babuwah labek, ado nan saratuih, ado nan anam puluah, ado nan tigo puluah kali lipek asienyo."

²⁴ Isa Almasih mancuritokan pulo ciyek lai parumpamoan kabake urang nan banyak tu, Baliau bakato, "Parkaro Karajaan Sarugo tu, ka adaannyo sarupo jo parumpamoan nan bakcando iko: Surang urang paladang payi manyerakkan baniah nan rancak di ladangnyo.

²⁵ Pado suatu malam, kutiko kasadonyo urang sadang lamak lalok, tibo pulolah musuah urang paladang tu manyerakkan bijo ilalang di antaro rumpun gandun tu, sudah tu inyo payi.

²⁶ Kutiko tanam-tanaman tu lah muloi tumbuah, tuneh-tunehnyo lah muloi kaluwa, mako tampak pulolah tuneh-tuneh ilalang.

²⁷ Samantaro itu tibolah anak buwah urang paladang tu, batanyo kabake inyo, 'Angku, kan baniah rancak nan lah angku tanam di ladang angku tu? Baa kok kiniko ado pulo ilalang nan tumbuah disinan?'

²⁸ Nan punyo ladang tu manjawab, 'Musuah ambo tu nan punyo karajo.' Sudah tu anak buwahnyo tu batanyo pulo, 'Layi buliah di angku, jikok kami bokek ilalang tu?'

²⁹ 'Jan,' keceknyo, 'Dek karano, jikok ilalang tu dibokek, mako gandun tu sato pulo tabokek.

³⁰ Padiyakan sajolah ilalang tu tumbuah samo-samo jo gandun tu, sampai tibo masonyo kito manuwai. Kudian ambo ka mangecek kabake urang-urang nan ka manuwai: Kampuangkanlah dawulu nama nan ilalangnyo, sudah tu kabek lansuang baka. Lah salasai itu barulah dikampuangkan pulo nama nan gandun, sudah tu bawoklah masuak lumbuang.'"

³¹ Isa Almasih mancuritokan pulo ciyek lai parumpamoan kabake urang banyak, Baliau mangatokan, "Parkaro Karajaan Sarugo tu, ka adaannyo sarupo jo parumpamoan nan bakcando iko: Sa incek bijo sasawi di ambiak dek surang urang paladang, sudah tu ditanamnyo di ladangnyo.

³² Bijo sasawi tu adolah bijo nan sangaik aluih. Tapi jikok inyo lah tumbuah, inyo ka manjadi nan paliang gadang di antaro tanam-tanaman. Inyo ka manjadi batang kayu gadang, sainggo bi tibo lah unggeh mambuwek sarang di sangkak-sangkaknyo."

³³ Ado pulo ciyek lai parumpamoan lain, nan dicuritokan dek Isa Almasih kabake urang nan banyak tu. "Parkaro Karajaan Sarugo, ka adaannyo sarupo jo ragi nan di ambiak dek surang urang padusi, sudah tu di aduaknyo jo ampek puluah liter tapuang tarigu, mako manjadi kambanglah tapuang tu kasadonyo!"

³⁴ Kasadonyo nan di ajakan dek Isa Almasih kabake urang nan banyak, Baliau tatap mamakai kato ba ibaraik.

³⁵ Dek nan baitu, mako basuwoanlah firman Tuhan, nan lah disampaikan dek nabi, "Aden bakato ba ibaraik, jikok mangecek kabake urang-urang tu; Aden ka mambaritokan parkaro-parkaro nan ta andok sajak dunie dijadikan."

³⁶ Sasudah tu Isa Almasih masuak ka dalam rumah, Baliau tinggakan urang nan banyak tu. Pangikuik-pangikuik-Nyo bi tibo sambia bakato, "Cubolah Angku jalehkan kabake kami, apo aratinyo tantang parumpamoan ilalang di antaro gandun."

³⁷ Baliau bakato, "Urang nan manyerakkan baniah nan elok tu, adolah Anak Manusia.

³⁸ Nan dikatokan ladang, adolah dunia ko. Baniah nan elok tu adolah urang-urang nan lah manjadi umaik Allah. Ilalang tu iyolah urang-urang nan bapihak kabake ubilih.

³⁹ Musuah nan mananam ilalang tu iyolah ubilih. Maso manyabik iyolah Ari Kiamaik, urang-urang nan manuwai tu iyolah malekaik-malekaik.

⁴⁰ Bakcando ilalang tu dikumpuakan sarato dibaka dalam api, baitu pulolah nan ka tajadi isuak di Ari Kiamaik.

⁴¹ Anak Manusia ka manyuruah malekaik-malekaik-Nyo untuak mangumpuakan kasadonyo umaik-Nyo, jikok ado nan dek ulah umaik-Nyo tu, urang lain mampabuwek doso, kok indak, dek ulah umaik-Nyo tu sadonyo urang bi mampabuwek karajo nan jahek.

⁴² Mako kasadonyo umaik-Nyo nan ba ulah tu, ka di ambuangkan masuak tungku barapi nan manyalo-nyalo; mako disinanlah inyo ka bi maratok, sarato ka di ajab, jo ajab nan padiah.

⁴³ Satiyok urang nan layi mangarajokan apo nan katuju dek Allah, mako isuak inyo ka bacahayo bakcando matoari dalam Karajaan Bapaknyo. Jadi, kok angku-angku layi batalingo, inok manuangkanlah kecek Ambo ko!"

⁴⁴ "Parkaro Karajaan Sarugo tu, sa umpamo jo arato nan takubua dalam tanah, tasuwo dek surang urang, sudah tu inyo kubuakan baliak arato tu. Dek karano kagadangan atinyo basuwo jo arato tu, mako payilah inyo manjuwa sagalo aratonyo, sudah tu inyo babaliak, mako inyo balilah tanah tampaik arato tu dikubuakan."

⁴⁵ "Baitu pulo, parkaro Karajaan Sarugo tu, sa umpamo jo surang urang panggaleh, nan payi mancari mutiara-mutiara nan ba arago.

⁴⁶ Kutiko inyo basuwo jo sa incek mutiara nan sangaik rancak, mako bagagehlah inyo payi manjuwa sagalo aratonyo, sudah tu inyo balilah mutiara nan sa incek tu."

⁴⁷ "Parkaro Karajaan Sarugo tu, sa umpamo jo pukek nan dirantangkan ka danau, mako bi masuaklah bamacam-macam ikan.

⁴⁸ Dek karano pukek tu lah panuah, mako di elolah pukek tu ka darek, dek tukang-tukang pukek. Sasudah tu inyo bi duduak sambia mamiliah-miliah ikan: Nama nan rancak dimasuakkannyo ka dalam karanjang, nama nan buruak dicampakkannyo.

⁴⁹ Baitu pulolah ka adaannyo isuak di Ari Kiamaik, malekaik-malekaik ka mampasisiahkan urang-urang nan jahek, dari urang-urang nan patuah mangarajo parentah Allah.

⁵⁰ Sasudah tu urang-urang nan jahek tu, di ambuangkan masuak tungku nan barapi garang. Disinanlah inyo ka maratok, sarato di ajab jo ajab nan padiah."

⁵¹ Isa Almasih batanyo, "Layikoh angku-angku mangarati kasadonyo, tantang parkaro nan lah Ambo kecekkan tu?" "Layi Ngku!" kecek urang-urang tu.

⁵² Sudah tu Baliau bakato, "Itulah sababnyo, satiyok guru agamo Yahudi nan lah manjadi umaik Karajaan Sarugo, inyo sarupo jo surang urang punyo rumah, nan mangaluwakan aratonyo nan baru, sarato jo aratonyo nan lamo dari dalam gudangnyo."

⁵³ Sasudah Isa Almasih salasai mancuritokan sagalo parumpamoan tu, mako Baliau barangkek dari tampaik tu,

⁵⁴ Baliau taruih pulang ka kampuang-Nyo. Tibo disinan Baliau payi ma aja ka rumah ibadaik, urang-urang nan ado disinan sabana tacangang mandangakan pangajaran Baliau. Urang-urang tu bi mangecek, "Dari ma Inyo ko mandapek pangatawuan nan sarupo itu? Dari ma Inyo mandapek kuwaso untuak mampabuwek mukjizat?

⁵⁵ Indak koh Inyo ko anak tukang kayu? Indak koh Siti Maryam tu mandeh-Nyo; indak koh si Yakobus, si Yusuf, si Simon, sarato jo si Yudas, nan kasadonyo tu adolah dunsanak-Nyo?

⁵⁶ Indak koh dunsanak-dunsanak-Nyo nan padusi bagai bi tingga disiko juwo? Dari ma Inyo padapek kasadonyo tu?"

⁵⁷ Mako urang-urang tu indak manarimo Isa Almasih di sinan. Sudah tu Baliau bakato kabake urang-urang tu, "Salain daripado di kampuangnyo atau di rumahnyo, satiyok nabi tu di aromaik-i dima-dimanyo."

⁵⁸ Dek karano itu Baliau indak banyak mampabuwek mukjizat disinan, dek karano urang-urang tu indak bi picayo.

Matius

Video Matius 13

Ikuti Kami:

KONTAK | PARTISIPASI | DONASI