Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq jelo nike ẽndah Deside Isa bilin balẽ nike, beterus melinggih lẽq sedin danao.

² Luwẽq gati dengan saq bekumpul lẽq sekelining Deside Isa, keranaq nike Ie margi dait taẽk ojok sopoq perau, dait dengan luwẽq nike nganjeng lẽq pesisi.

³ Beterus Deside Isa mulai ngajahang luwẽq hal lẽq dengan-dengan nike kadu perumpamean. Deside Isa bemanik, "Araq sopoq dengan lumbar sawur binẽq

⁴ Sewaktu dengan nike kenyeke sawur binẽq nike, araq binẽq saq geriq lẽq langan. Beterus dateng kedit ngaken binẽq nike jangke bis.

⁵ Araq ẽndah binẽq saq geriq lẽq taoq saq bebatu-batu saq sekediq tanaqne. Binẽq-binẽq nike becat tiwoq sẽngaq tanaqne sekediq.

⁶ Laguq sesampun panjeng jelo, suli-suli saq tiwoq nike mulai layu beterus gero dait matẽ sẽngaq ndẽq berakah.

⁷ Araq ẽndah binẽq saq geriq lẽq tengaq bebenes beduwi. Bebenes nike sayan belẽq dait gepit suli-suli nike jangke matẽ.

⁸ Laguq araq ẽndah binẽq saq geriq lẽq tanaq saq subur, terus bebuaq; araq saq satus, araq enem dase, dait araq ẽndah saq telung dase kali lipet luwẽqne."

⁹ Sesampun nyeriteang perumpamean nike, Deside Isa bemanik, "Sai-sai bedowẽ kentok, harus ie dengahang!"

¹⁰ Beterus pengiring-pengiring Deside Isa parek dait metakẽn lẽq Deside Isa, "Kembẽq Pelungguh kadu perumpamean lamun Pelungguh bebaos kance dengan luwẽq nike?"

¹¹ Jawab Deside Isa, "Side pade sampun teicanin paice jari nenaoq rahasie Kerajaan Sorge, laguq dengan-dengan nike ndẽq.

¹² Sẽngaq dengan saq sampun bedowẽ gen teican luwẽqan malik, dait ie gen bekelimpahan. Laguq dengan saq ndẽq bedowẽ napi-napi, make napi juaq saq araq lẽq ie gen tebait.

¹³ Nike alasan Tiang kadu perumpamean lamun Tiang ngajahang lẽq dengan luwẽq, sẽngaq ie pade setetune nyerioq, laguq maraq dengan ndẽq nyerioq; Ie pade dengah laguq maraq dengan ndẽq dengah dait ndẽq ngerti.

¹⁴ Siq care nike make telaksane napi saq sampun tenubuatang siq Nabi Yesaya, 'Allah bemanik: Side pade gen dengah laguq side pade ndẽq ngerti; side pade gen serioq laguq ndẽq paham.

¹⁵ Sẽngaq pikiran dengan-dengan nike sampun kongol, kentok ie pade sampun kedok dait penenteng ie pade sampun tepedemang. Hal niki telaksane adẽq penenteng ie pade ndaq nyerioq, kentok ie pade ndaq dedengah, pikiran ie pade ndaq ngerti, terus bebalik, sehingge Tiang nyelahang ie pade.'"

¹⁶ "Laguq side pade bahagie," manik Deside Isa lẽq pengiring-pengiring-Ne, "sẽngaq side pade tetu-tetu nyerioq dait dengah.

¹⁷ Keranaq nike Tiang badaq side: Setetune luwẽq nabi dait dengan saq taat lẽq Allah melẽt serioq napi saq side pade serioq mangkin, laguq ie pade ndẽq serioq. Ie pade melẽt dengah napi saq side pade dengah mangkin, laguq ie pade ndẽq dengah."

¹⁸ "Dengahang napi arti perumpamean penyawur binẽq nike.

¹⁹ Binẽq saq geriq lẽq langan nike ibarat dengan-dengan saq dengah manik mengenai Kerajaan Sorge, laguq ie pade ndẽq ngerti. Beterus Si Jahat nike dateng ngerampas napi saq sampun tesawur lẽq dalem atẽ dengan-dengan nike.

²⁰ Binẽq saq geriq lẽq tanaq saq luwẽq batune, ibarat dengan-dengan saq dengah manik nike, dait langsung nerimaq siq senengne.

²¹ Laguq manik nike ndẽq berakah lẽq dalem atẽ ie pade, sehingge ndẽq tahen ngonẽq. Sewaktu dateng penyusah atao penganiayean lantaran manik nike, ie pade langsung murtat.

²² Binẽq saq geriq lẽq tengaq bebenes beduwi ibarat dengan-dengan saq dengah manik nike, laguq kuatir mengenai idupne dait mẽlẽ idup mẽwah. Keranaq nike manik lẽman Allah tegepit lẽq dalem atẽne sehingge ndẽq iniq bebuaq.

²³ Dait binẽq saq geriq lẽq tanaq saq subur ibarat dengan-dengan saq dengah dait paham lẽq manik nike. Ie pade bebuaq luwẽq, araq saq satus, enem dase dait telung dase kali lipet hasilne."

²⁴ Deside Isa nyampẽang malik sopoq perumpamean lẽq dengan luwẽq, manik-Ne, "Hal Kerajaan Sorge maraq perumpamean niki: Sopoq petani sawur binẽq saq solah lẽq lendangne.

²⁵ Sewaktu selapuq dengan kenyeke mesarẽ, musuh petani nike dateng sawur binẽq rẽ lẽq antare gandum nike, beterus ie lumbar.

²⁶ Sewaktu binẽq-binẽq nike tiwoq dait buaq-buaq mayangne mulai sugul, lolo-lolo rẽ nike ẽndah penggitan.

²⁷ Beterus buruh-buruh tani saq teupaq nike dateng ojok petani nike dait bebase, 'Paq, tekan binẽq solah saq pelungguh talet lẽq lendang niki? Berembẽ jangke lolo rẽ nike araq lẽq derike?'

²⁸ Jawab petani nike, 'Nike pegawẽan musuh.' Beterus buruh-buruh tani nike beketuan malik, 'Napi pelungguh kayun tiang pade embot lolo rẽ nike?'

²⁹ 'Ndaq,' jawab ẽpẽn dowẽ lendang nike, 'sẽngaq lamun lolo rẽ nike tembot laun gandumne milu kerembotan.

³⁰ Alurang deduaqne belẽq bareng-bareng jangke dateng waktune tepataq. Laun tiang gen badaq dengan-dengan saq mataq nike: Kumpulang juluq lolo-lolo rẽ, taliq, dait sedut. Beterus kumpulang gandumne dait toloq lẽq dalem lumbung.'"

³¹ Deside Isa nyampẽang malik perumpamean lẽq dengan luwẽq, manik-Ne, "Hal Kerajaan Sorge nike seumpame tolang sawi saq tebait siq dengan terus tesawur lẽq lendangne.

³² Tolang sawi nike binẽq saq paling kodẽq. Laguq lamun ie sampun tiwoq, ie gen jari saq paling belẽq lẽq antare taletan-taletan saq lain. Ie jari lolo, sehingge kedit-kedit dateng miaq kesebu lẽq pẽmpang-pẽmpangne."

³³ Araq sopoq perumpamean lain saq tesampẽang siq Deside Isa, lẽq dengan luwẽq. "Hal Kerajaan Sorge keadaanne pade maraq ragi ruti saq tebait siq sopoq dengan nine, terus teadon kance petang dase liter tepung terigu, jangke mbal selapuqne!"

³⁴ Selapuqne teajahang siq Deside Isa lẽq dengan luwẽq kadu perumpamean, dait ndẽq araq sopoq juaq saq Ie ajahang tipaq ie pade ndẽq kadu perumpamean.

³⁵ Siq care nike telaksane napi saq tesampẽang siq nabi, "Tiang kadu perumpamean lamun ngeraos kance ie pade; Tiang gen nyampẽang hal-hal saq teseboqang mulai lẽman dunie niki tecipteang."

³⁶ Sesampun nike Deside Isa margi bilin dengan luwẽq nike, terus tame ojok sopoq gedẽng. Pengiring-pengiring-Ne parek beterus ie pade matur, "Tunas Pelungguh jelasang lẽq tiang pade napi arti perumpamean lolo rẽ lẽq antare gandum nike."

³⁷ Beterus jawab Deside Isa, "Dengan saq sawur binẽq saq solah nike, Bije Manusie.

³⁸ Lendang nike dunie niki. Binẽq saq solah nike, bije-bije Kerajaan. Lolo rẽ nike, anak-anak Belis.

³⁹ Musuh saq sawur binẽq lolo rẽ nike, Belis. Waktu mataq nike, ahir jaman, dait dengan-dengan saq mataq nike malaẽkat-malaẽkat.

⁴⁰ Pade maraq lolo-lolo rẽ tekumpulang terus tesedut lẽq dalem api, maraq nike ẽndah ẽraq lẽq ahir jaman.

⁴¹ Bije Manusie gen ngutus malaẽkat-malaẽkat-Ne dait ie pade gen ngumpulang selapuq hal saq nyesatang dait selapuq dengan saq gawẽq jahat, dait nyugulang ie pade lẽman dalem Kerajaan-Ne.

⁴² Ie pade selapuq gen tetetẽh ojok jangkih saq apine begelaur; lẽq derike ie pade gen nangis dait menderite.

⁴³ Lẽq waktu nike dengan-dengan saq solẽh gen becahaye maraq sinar jelo dalem Kerajaan Bapa ie pade. Jari, sai bedowẽ kentok, harus ie dengahang!"

⁴⁴ "Hal Kerajaan Sorge pade maraq perumpamean niki: Araq harte karun lẽq dalem tanaq terus tedait siq dengan, laguq tetamaqang malik ojok dalem tanaq. Dengan nike cemoh gati beterus ie lumbar jual selapuq dowẽne, terus ie tulak beli tanaq nike."

⁴⁵ "Hal Kerajaan Sorge pade maraq perumpamean niki: Araq sopoq pedagang boyaq mutiare-mutiare saq mahel ajine.

⁴⁶ Sewaktu ie ndait sopoq mutiare saq luar biase solahne, ie becat lumbar dait jual selapuq dowẽne, beterus beline mutiare saq sopoq nike."

⁴⁷ "Hal Kerajaan Sorge pade maraq perumpamean jaring saq tepencar lẽq segare, beterus mauq empaq macem-macem ruene.

⁴⁸ Sesampun jaring nike penoq siq empaq, jaring nike teangkat ojok darat siq nelayan-nelayan nike. Beterus ie pade tokol dait kelinne empaq-empaq nike: Saq solah toloqne lẽq dalem keranjang terus saq ndẽq solah tetẽhne.

⁴⁹ Maraq nike ẽndah ẽraq lẽq ahir jaman, malaẽkat-malaẽkat gen lumbar kelin dengan-dengan jahat lẽman dengan-dengan saq taat ngelaksaneang pekayunan Allah.

⁵⁰ Beterus dengan-dengan jahat tetetẽh ojok dalem jangkih saq araq apine, lẽq derike ie pade gen nangis dait menderite."

⁵¹ "Napi side pade ngerti selapuqne niki?" Deside Isa beketuan lẽq pengiring-pengiring-Ne. "Ngerti!" jawab pengiring-pengiring-Ne.

⁵² Beterus manik Deside Isa tipaq ie pade, "Keranaq nike sebilang ahli Taurat saq nerimaq perajahan mengenai hal Kerajaan Sorge nike, pade maraq ẽpẽn balẽ saq nyugulang barang-barang baru dait laẽq lẽman tangkaq dowẽne."

⁵³ Sesampun Deside Isa selesẽ nyampẽang perumpamean-perumpamean nike, Ie margi bilin taoq nike,

⁵⁴ beterus Ie tulak ojok kampung asal-Ne. Lẽq derike Ie ngajahang lẽq balẽ ibadah, dait dengan-dengan saq dengahang Ie bengaq gati terus ie pade bebase, "Lẽman mbẽ Ie mauq hikmat dait lẽman mbẽ Ie mauq kuase jari miaq muqjizat-muqjizat nike?

⁵⁵ Tekan Ie nike bije tukang kayuq? Tekan Mariam nike mamiq bini-Ne, dait sanak-sanak-Ne: Yakub, Yusup, Simon dait Yudas?

⁵⁶ Dait sanak-sanak-Ne saq nine araq ndot lẽq deriki ẽndah? Jari lẽman mbẽ Ie mauq selapuqne nike?"

⁵⁷ Make ie pade ndẽq nerimaq Deside Isa. Beterus Deside Isa bemanik lẽq ie pade, "Sopoq nabi tehormatin lẽq mbẽ-mbẽ kecuali lẽq kampung asalne dait lẽq balẽne mẽsaq."

⁵⁸ Jari, Deside Isa nẽnten miaq luwẽq muqjizat lẽq derike, sẽngaq ie pade ndẽq percaye.

Matius

Video Matius 13

Ikuti Kami:

KONTAK | PARTISIPASI | DONASI