Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kareb aco sineh, Yésus neremuat rat bang ruma' ineh idi netudo tangeb Takung Galilia.
2 Idi pelaba ula' lemulun nepamung iné' Neneh, pad Ieh netemaleb bang aceh alud idi netudo, idi lun mula' netuped tangeb abpa'.
3 Idi Ieh nemada' nedeh dengan luk pinginud. KebalaNeh, "Inan selemulun luk iné' ngisak padé pimara.
4 Idi kareb ieh nengisak, sebuang ilung padé nebpeh iring dalan, idi suit-suit nacing idi nekuman ilung ineh.
5 Inan teh luk nebpeh luun tana' luk metekura', luk masi' tana'neh, idi petacu ilung ineh temubu' ngaceku tana'neh na medalem.
6 Kareb mét idang idi ieh mekarang peh. Ngaceku ieh na uat, ieh petacu melayuh.
7 Idi inan teh luk nebpeh arang tabpa', idi tabpa' ineh pana' netemubu', idi libutneh mapet pad ieh na mulun.
8 Iamo' inan teh luk nebpeh luun tana' luk mebaleng, pad ieh nengeruat bua', sebuang meratu ula'neh, idi sebuang anem ngepulu' ula'neh, idi sebuang teluh ngepulu' ula'neh."
9 Idi kebala Yésus, "Lemulun luk inan lalid, do' ieh ninger!"
10 Idi anak-anak sekola' Yésus iné' Neneh, kebaladeh, "Ngudeh Iko mada' nedeh dengan luk pinginud?"
11 Idi kebala Yésus, "Tuhan pangeh nemaré nemuyuh do' kali' ratnan luk inalum ratnan Imet surga, iamo' na Ieh nemaré kuandeh.
12 Ngaceku idé-idé luk inan anun-anun, idi kuanneh miak barén teh, idi ieh miak ngalap dengan mela; iamo' idé-idé luk na luk idi anun-anun, idi rat neneh teh miak lapen anun-anun luk ieh kuan.
13 Ngaceku ineh Ui mada' nedeh dengan luk pinginud; ngaceku sagan pana' ideh nier, na ideh nier, idi sagan pana' ideh ninger, na ideh ninger, idi na ideh kali' ilungneh.
14 Idi bala Nabi Yesaya pangeh nacing nedeh, keburi'neh, 'Muyuh miak ninger idi ninger, iamo' muyuh na kali' ilungneh. Muyuh miak nier idi nier, iamo' na muyuh kali' luk siren muyuh.
15 Ngaceku lemulun ini na mileh ngerawé; laliddeh musam ninger, idi matehdeh medacep. Kudeng na pieh kudeng ineh, ideh nier dengan matehdeh idi ninger dengan laliddeh, idi do' kali' bang niatdeh, idi ideh lumi Negku, kebala Allah, pad Ui miak ngedo' nedeh.'
16 "Iamo' samal kuan muyuh, ngaceku mateh muyuh nier, idi lalid muyuh ninger.
17 Ngerawé do'-do', mula' nabi idi lemulun luk matu geregan nier luk siren muyuh, idi na ideh nenier neneh; idi ninger luk pedingeren muyuh ineh, iamo' na ideh neninger ineh.
18 "Do' muyuh ninger pinginud lun luk ngisak padé pimara.
19 Kareb lemulun ninger bala ratnan Imet ineh, idi na kali' ilungneh, idi petacu Seluk Dat macing, idi ngaro padé pimara luk pangeh inisak bang niatneh, ini ieh luk inisak iring dalan.
20 Iamo' luk inisak luun tana' luk metekura', ieh ineh lemulun luk ninger bala idi petacu ngalap neneh dengan mawang niat.
21 Iamo' na luk idi uat bang bururneh sebuleng, idi ieh tuman segageh mo'. Idi kareb susa' idi dereh macing ngaceku bala ineh, petacu ideh lemubed.
22 Idi luk inisak arang tabpa', ieh ineh lemulun luk ninger bala ineh; idi rapang luk ratnan tana' ini, idi saluk ratnan mula' binaweh, nebpek bala ineh, pad ieh na kebua'.
23 Idi luk inisak luun tana' mebaleng, ieh ineh lemulun luk ninger bala, idi do' kali' ilungneh; idi ieh kebua' idi ngeruat mula' uli', sebuang meratu ula'neh, sebuang anem ngepulu' ula'neh, idi sebuang teluh ngepulu' ula'neh."
24 Yésus nemada' kuandeh aceh luk pinginud luk baken teh, kebalaNeh, "Imet surga mepad kudeng selemulun luk nengisak padé pimara luk do' bang lati'neh.
25 Iamo' kareb lemulun rudap, bunu'neh nacing idi nengisak bua' budud arang padé ineh, idi neburo peh.
26 Iamo' kareb padé ineh mulun idi kebua', budud ineh pana' melagan teh.
27 Idi demulun-demulunneh nacing idi pebala kuan tuan luk kuan lati' ineh, 'Tuan, naké iko nengisak padé pimara luk do' bang lati'mu? Rat iapehké budud ineh lek?'
28 Idi kebalaneh nedeh, 'Ini kekamen bunu'.' Idi keburi' demulunneh neneh, 'Sikalké iko kai amé' mubpun budud ineh?'
29 Idi kebalaneh nedeh, 'Aganeh, ngaceku kian kareb muyuh mubput budud ineh padé ineh pana' mebubput teh meperapu denganneh.
30 Do' nima' dueh-duehneh mulun pad macing kareb ngeranih. Idi kareb ngeranih ui sikal ngecuk nelun luk ngeranih mubput amung-amung budud atun idi ngangel neneh idi ngeseb neneh, iamo' padé ineh uen ngamung bang lepoku.'"
31 Yésus nemada' aceh luk pinginud luk baken teh kuandeh, kebalaNeh, "Imet surga mepad kudeng aceh ngilung sesawi' luk ilap seburur lemulun idi inisak luun lati'neh.
32 Ilung sesawi' ineh meluun isuut ratnan amung-amung ilung luk baken, iamo' kareb ieh mulun ieh meluun rayeh ratnan amung-amung irin. Idi ieh mangun ku aceh lawa kayuh pad suit-suit rat arang gawa' macing idi ngarar luun angat-angatneh."
33 Yésus nemada' nedeh aceh pinginud luk baken teh, "Imet surga mepad udeng lamud, luk ilap seburur decur idi rirengneh bang teluh uad banak pad amung-amungneh mepuar peh."
34 Amung bala ini bila Yésus nelun mula' dengan luk pinginud mo'. Idi na Ieh nepebala anun-anun kuandeh baken ratnan luk pinginud,
35 pad ngacing luk bila nabi, kebalaneh, "Ui sikal ngukab tangKu dengan luk pinginud; Ui sikal mada' ratnan luk inapung rat pun tana' ini pinudut."
36 Pangeh ineh Yésus nenecan lun mula', idi nesemuet bang ruma'. Idi anak-anak sekola'Neh iné' Neneh,keburi'deh, "Mada' nekai ratnan ilung pinginud budud luk bang lati' ineh."
37 Idi kebala Yésus, "Ieh luk nengisak ilung luk do' ineh, ieh ineh pinginud Anak-Lemulun.
38 Idi lati', ieh ineh pinginud tana' ini. Idi ilung luk do', ieh ineh pinginud anak-anak Imet ineh. Idi budud, ieh ineh pinginud anak-anak Luk Dat ineh;
39 idi bunu' luk nengisak budud, ieh ineh pinginud Iblis; idi kareb ngeranih, ieh ineh pinginud kareb kekiped tana' ini; idi lun ngeranih, ieh ineh pinginud melaikat-melaikat.
40 Mepad kudeng budud ineh pangeh pimung idi iseb ku apui, kudeng ineh teh kareb kekiped tana' ini.
41 Anak-Lemulun sikal ngecuk melaikat-melaikatNeh, idi ideh miak mubput amung-amung luk ngesabeng ratnan ImetNeh, dengan amung-amung lemulun luk ngakem luk dat.
42 Idi ideh sikal nala' nedeh bang tetel apui. Su ineh lemulun tangi'-tangi' idi pekatep lipen.
43 Kareb ineh amung-amung lemulun luk matu miak merasat kudeng mateh aco bang Imet Tamandeh. Lemulun luk inan lalid, do' ieh ninger!
44 "Imet surga mepad kudeng aceh binaweh luk meraga luk inapung bang tana', luk ilap lemulun idi ieh nengapung neneh teh. Ngaceku ieh pelaba awang niat, idi ieh nemasui amung-amung luk ieh kuan, idi iné' melih tana' ineh.
45 "Idi teh Imet surga mepad kudeng seburur lemulun luk pepua' luk nakap bau mutiara luk do'.
46 Kareb ieh nengalap aceh ngilung bau mutiara luk meraga ineh, idi ieh iné' idi nemasui amung-amung luk ieh kuan idi nemelih bau ineh.
47 "Idi teh Imet surga mepad kudeng aceh rabat teh, luk pipet bang abpa' rayeh, pad ngalap raput-raput lawid.
48 Kareb rabat ineh mepanu', ideh ngeruid neneh macing tangeb abpa'; idi ideh tudo mili', ieh ineh luk do' ruendeh bang buandeh, iamo' luk dat talandeh.
49 Kudeng ineh teh kareb kekiped tana' ini: amung-amung melaikat remuat amé' matad lun luk dat ratnan lemulun luk matu,
50 idi nala' nedeh bang tetel apui. Su ineh lemulun tangi'-tangi' idi pekatep lipen."
51 Kebala Yésus nedeh, "Pangehké muyuh kali' amung-amung ilung ini?" Kebaladeh Neneh, "Mo, kali'."
52 Idi kebalaNeh nedeh, "Ngaceku ineh anid-anid guru Ukum luk pangeh mangun ku anak sekola' ratnan Imet surga, mepad kudeng aceh tuan ruma' luk ngeruat ratnan binawehneh luk meraga, do' binaweh luk mebaruh idi luk mon pana'."
53 Idi pangeh Yésus nemada' nedeh ratnan luk pinginud-pinginud ini idi Ieh nenalan rat déi',
54 idi nuli' iné' bawangNeh sebuleng. Ieh nemada' nedeh bang ruma' sembayangdeh pad macing ideh mawa, keburi'deh, "Rat iapehké lemulun ini nengalap ilehNeh? Siruh, kekamenNeh ini luk melalud teh!
55 Bakenké Ieh ini anak lun ngakem kayuh? Bakenké tinanNeh luk ngadanneh Mariam, idi kinanak-kinanakNeh Yakub, Yusup, Simun, idi Yudas?
56 Idi kinanak-kinanakNeh luk decur pana', bakenké ideh idi dengan tau tungé'? Rat iapeh Ieh nengalap amung ileh ini lek?"
57 Idi ideh nesabeng ku Ieh. Kebala Yésus nedeh, "Seburur nabi kali' rungen ruen ngedita', iamo' bang bawangneh idi ruma'neh sebuleng na lun ngedita' neneh."
58 Idi su ineh na Ieh nenganau' mula' kekamen luk melalud ngaceku ideh na manu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA