Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Me luo da'õ, mofanõ Yesu moroi ba nomo mõi Ia ba zinga mbaw̃a ba dumadao Ia ba da'õ.
2 Ato niha sowulo samasui Yesu. Andrõ mõi Ia yaw̃a ba dundraha; dumadao Ia, ba niha sato andrõ muzizio ba zinga mbaw̃a.
3 Oya Ifahaõ ira faoma amaedola. "So samõsa zohalõw̃õ ba danõ samazaewe tanõmõ," si manõ wamõbõrõ nidunõdunõ Yesu.
4 "Me ifazaewe danõmõ andrõ, so zaekhu ba lala, ba tohare wofo, i'a danõmõ andrõ irege ahori.
5 So gõi zaekhu ba zokarakara, si lõ awe'ewe'e tanõ. I'anema'õ motalinga danõmõ, bõrõ me lõ abakha danõ.
6 Ba me itugu alaw̃a luo, ibõrõtaigõ aleu dalinga danõmõ andrõ, okõli ba mate, bõrõ me lõ arõu bakha ikhamõ w̃a'ania.
7 So gõi danõmõ saekhu ba gotalua za'asa'a mao. Tumbu za'asa'a mao ba ilazi'õ danõmõ andrõ irege mate.
8 Ba so gõi zaekhu ba danõ satabõ. Mowua danõmõ andrõ, ba so zi otu kali fabali mbuania, ba so zi õnõ ngafulu, ba so gõi zi tõlu ngafulu."
9 I'etu'õ nidunõdunõ-Nia andrõ Yesu wanguma'õ, "Na so dalingami, ba mifondrondrongo!"
10 Aefa da'õ tohare ndra nifahaõ Yesu ba lasofu khõ-Nia, "Hana wa oya Õfake gamaedola na fahuhuo Ndra'ugõ ba niha sato andrõ?"
11 Itema li Yesu, "Bõrõ me no tebe'e khõmi mbuala ba wangi'ila si tobini sanandrõsa khõ Lowalangi ba amatõrõw̃a-Nia, ba ba khõra ba lõ'õ.
12 Ba niha si no so, ba tebe'e nasa khõnia, ena'õ fahõna. Ba ba niha si lõ'õ, ba laheta na'i khõnia zi so khõnia andrõ.
13 Da'õ mbõrõ wa U'oguna'õ gamaedola na fahuhuo Ndra'o ba niha sato andrõ. Hew̃a'ae lafaigi, ba hulõ niha si lõ mamaigi; larongorongo ba hulõ niha si lõ mamondrongo, ba lõ aboto ba dõdõra.
14 Ba zi manõ alua nifa'ele'õ Yesaya andrõ sanandrõsa khõra, 'Mirongo dania faoma tõgi dalingami, ba lõ aboto ba dõdõmi; mifaigi dania faoma hõrõmi, ba lõ mi'ila.
15 Bõrõ me no afuru gera'era dõdõ niha da'e, no afiso dõgi dalingara, ba hõrõra no lakifu'õ. Na tenga si manõ, tatu la'ila hõrõra, ba larongo tõgi dalingara, ba aboto ba dõdõra. Imane Lowalangi, mõi ira dania khõ-Gu, ba Ufadõhõ ira.'"
16 Itohugõ wanguma'õ Yesu khõ ndra nifahaõ-Nia, "Ba ha wa'amoharazaki ami! Bõrõ me mi'ila hõrõmi, ba mirongo tõgi dalingami.
17 Mitõngõni da'e! No ato zama'ele'õ fõna samosumange Lowalangi, somasi mangila ni'ilami andre. Ba hiza lõ lakhamõ wangila. Omasi sibai ira larongo nirongomi andre, ba hiza lõ fakhamõ lafondrondrongo."
18 "Mihaogõ wamondrondrongo eluaha gamaedola zamazaewe tanõmõ andrõ.
19 Tanõmõ saekhu ba lala, no amaedola niha samondrondrongo turia Lowalangi ba famatõrõ-Nia, ba lõ aboto ba dõdõnia. Tohare Gafõkha ba irabu zi no mufazaewe andrõ bakha ba dõdõra.
20 Tanõmõ saekhu ba zokarakara, amaedola niha samondrongo turia andrõ ba itema tõdõnia si fao fa'omuso dõdõ.
21 Lõ abakha ba dõdõra duria andrõ, irege lõ anau gõlõ. Na gõna ira famakao ba fa'afõkhõ bõrõ duria andrõ, i'anema'õ mangawuli furi.
22 Tanõmõ saekhu ba gotalua za'asa'a mao, hulõ niha samondrondrongo turia andrõ, ba hiza la'abusi tõdõ wa'aurira bõrõ me omasi ira fahõna khõra. Bõrõ da'õ turia si otarai Lowalangi andrõ tolazi bakha ba dõdõra irege tebai mowua.
23 Ba tanõmõ saekhu yaw̃a ba danõ satabõ, amaedola niha samondrongo turia andrõ ba aboto ba dõdõnia. Ba oya mowua ira, so zi otu kali fabali, so zi õnõ ngafulu kali, ba so gõi zi tõlu ngafulu kali fabali mbuania."
24 Idunõdunõ zui gamaedola Yesu ba niha sato. Imane Yesu, "Na mamatõrõ Lowalangi andrõ, no amaedola zohalõw̃õ ba danõ samazaewe tanõmõ si sõkhi ba nowinia.
25 Samuza bongi, me no mõrõ fefu niha, ba so zi fa'udu khõ zohalõw̃õ ba danõ andrõ mõi mutanõgõ go'o ba gotalua gandru andrõ, aefa da'õ ba mofanõ ia.
26 Me ibõrõtaigõ tumbu gandru andrõ, oroma dalingania, ba oroma gõi tumbu go'o.
27 Mõi zohalõw̃õ khõ zokhõ nowi andrõ wanguma'õ khõnia, 'He Tuha, hadia tenga no õtanõ danõmõ si sõkhi ba nowiu? Hewisa wa so go'o bakha?'
28 Itema li sonowi andrõ, 'Si fa'udu zolau si manõ.' Latohugõ wanofu sohalõw̃õ khõnia, 'He Tuha, da mõi ndra'aga wondrõni o'o andrõ?'
29 Imane, 'Lõ'õ! Bõrõ na midõni go'o andrõ, ma fao dania gandru ba wondrõnimi.
30 Akha auri go'o andrõ si fao ba gandru irugi wamasi. Ba awena dania uw̃a'õ ba zamasi: Mi'owuloi go'o, mibõbõ, ba mitunu. Aefa da'õ awena mi'owuloi gandru, ba mi'irõ'õ bakha ba halasa.'"
31 Itutunõ nasa gamaedola Yesu ba niha sato. Na mamatõrõ Lowalangi andrõ, Iw̃a'õ Yesu, "Hulõ danõmõ geu saw̃i nihalõ niha, ba itanõ ba nowinia.
32 No tanõmõ side'ide sibai danõmõ geu saw̃i andrõ. Ba na tumbu ia, tobali sinanõ sebua ba gotalua zinanõ sombuyu tõla. Tobali ia hulõ geu, irege manuge wofo wangazuni ba ndrahania."
33 Sambua tõ gamaedola nitutunõ Yesu ba niha sato andrõ. Imane Yesu, "Na mamatõrõ Lowalangi andrõ, hulõ laru nihalõ ndra alawe, nifaruka ba zi õfa wulu lite darigu, irege oi kamba ma'afefu!"
34 Fefu wamahaõ Yesu ba niha sato oi nifo'amaedola.
35 Ba zi manõ alua niw̃a'õ zama'ele'õ, "U'oguna'õ gamaedola na fahuhuo Ndra'odo khõra; U'ombakha'õ dania zi lõ mu'ila i'otarai mbõrõta gulidanõ andre."
36 Mofanõ Yesu, Irõi niha sato andrõ. Aefa da'õ la'ondrasi Ia ira nifahaõ-Nia lamane khõ-Nia, "Tandraigõ ombakha'õ khõma geluaha gamaedola go'o ba gotalua gandru andrõ."
37 Imane Yesu, "Samazaewe tanõmõ si sõkhi andrõ ya'ia Nono Niha.
38 Bolo nowi ya'ia gulidanõ andre. Tanõmõ si sõkhi ya'ia niha si no tobali ono mbanua Lowalangi. O'o ya'ia niha si fao khõ Gafõkha.
39 Ba si fatiu tõdõ samazaewe tanõmõ go'o andrõ ya'ia Gafõkha. Inõtõ wamasi ya'ia Ngaluo Safuria, ba samasi andrõ ya'ia ndra mala'ika.
40 Si mane fangowuloi o'o andrõ nitunu ba galitõ, si manõ gõi dania ba Ngaluo Safuria.
41 Ono Niha zamatenge mala'ika-Nia ba wangowuloi fefu samazõkhi horõ, ba fefu danõ bõ'õ samalua si lõ sõkhi.
42 Latibo'õ ira dania fefu ba mbaho galitõ si holahola; ba da'õ mege'ege ira ba tefakao.
43 Ba samalua somasi Lowalangi, muhaga ira hulõ haga luo bakha ba Mbanua si Bohou khõ Lowalangi. Andrõ, mihaogõ wamondrondrongo, na so dalingami ba mifondrondrongo!"
44 "Na mamatõrõ Lowalangi andrõ, hulõ gana'a sebua bõli si no teko'o ba danõ, nisõndra niha, ba ifuli zui iko'o ba danõ. Ba bõrõ wa'omuso dõdõnia, andrõ maoso ia i'amawa fefu zi so khõnia, ba ifuli ia wowõli tanõ andrõ."
45 "Na mamatõrõ Lowalangi andrõ, hulõ niha saniaga, sangalungalui manimani sebua bõli.
46 Me isõndra sambua manimani si sõkhi sibai, maoso ia mõi mu'amawa manimani si so khõnia, ba i'õli manimani andrõ si sõkhi sibai."
47 "Na mamatõrõ Lowalangi andrõ, hulõ ndriala nilau ba mbaw̃a, ba musõndra oya ngawalõ gi'a.
48 Me no afõnu ndriala, ladõni yaw̃a ndriala ira si fandriala. Mudadao zi fandriala andrõ ba wamõfõ'õ i'a; si sõkhi la'irõ'õ ba garaw̃a, ba si lõ sõkhi latibo'õ.
49 Si manõ gõi ba Ngaluo Safuria, mõi baero mala'ika ba wamõfõ'õ niha si lõ sõkhi ba niha samalua somasi Lowalangi.
50 Niha si lõ sõkhi latibo'õ ba mbaho galitõ. Ba da'õ dania mege'ege ira ba lataõgõ wa'afõkhõ."
51 "Hadia, aboto ba dõdõmi fefu da'e?" Imanõ wanofu Yesu. "Aboto ba dõdõma, Ama!" latema li.
52 Aefa da'õ Imane Yesu, "Da'õ mbõrõ wa dozi sangila amakhoita si no tobali ono mbanua amatõrõw̃a Lowalangi, hulõ zatua baomo sanao'õ baero gamagama si bohou ba sara moroi ba nahia wangirõ'õ."
53 Me no aefa Itutunõ gamaedola andrõ Yesu, maoso Ia irõi nahia da'õ,
54 mangawuli ba mbanua-Nia. Ba da'õ mamahaõ Ia ba gosali, ba samondrongo huhuo-Nia oi ahõli dõdõra. Lamane, "Heza moroi niha andre sokhõ fa'atuatua si mane? Heza moroi Isõndra wa'abõlõ ba wamalua tandra sahõlihõli dõdõ?
55 Hadia tenga ono duka geu Ia andrõ? Hadia, tenga ina-Nia Maria, ba ira talifusõ-Nia ndra Yakobo, Yosefo, Simoni ba Yuda?
56 Ba hiza, hadia tenga talifusõ-Nia ndra alawe si torõi ba da'e khõda? Heza moroi Isõndra da'õ fefu?"
57 Ba lõ latema Yesu niha andrõ. Imane khõra Yesu, "Lafosumange zama'ele'õ gofu heza, baero ba mbanuania ba ba nomonia."
58 Andrõ wa lõ oya Ifalua dandra sahõlihõli dõdõ ba da'õ Yesu bõrõ me lõ faduhu dõdõra.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA