Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu i Yesu mampokio pasi mampasiromunaka anaguruNya to sampuyu pei dua. Tempo sira siromu etu, Ia mangawaika sira kuasa damangarubak samparia measa yako resi tau. Pasi Ia mangawaika seja resi sira kuasa damampakatao muni panyaki ntau.”
2 Roo see Ia mampokau sira yau mampakarebaka resi tau mangkonong ewa wimba i Pue Allah mawali Makole ri lino. Pasi Ia manganto’oka seja sira mampakatao muni tau to masaki.
3 Ia manganto’oka sira, “Tempo komi yau, ne’e mangkeni bara kesaa. Ne’e mangkeni toko, tas, pangkoni, bara doi. Pasi ane pake ngkomi ne’e mangkeni yabinya yako to re’e ri koro.
4 “Wali ri raya mpalinja ngkomi, ane ratamo nja’u lipu ntau, imbare banua ntau to mampalinggona komi, nja’u ria semo danukaroo-roo ngkomi sampe rata temponya komi polas yako ri lipu etu.
5 Pei ane re’e lipu tau to bo’onya mangantima komi, ane ewa see, ane polas komi yako nja’u ria, tantamaka awu ntana to re’e ri witi ngkomi. Wali palaong etu mawali tondong resi tau etu komi taa kojo singkonong pei sira.” Etu semo gombo i Yesu resi anaguruNya to sampuyu pei dua.
6 Wali yako etu sira mayoko pei malinja njo’u lipu-lipu ntau. Ri raya mpalinja nsira etu sira mampakarebaka resi tau kareba matao pasi sira mampakatao muni tau to masaki nja’u samparia lipu nakarata nsira etu.
7 Wali i Makole Herodes re’e mangandonge mangkonong samparia palaong to naika i Yesu etu. See naka ia tamo mangansani bara kesaa to danapobuuka, apa re’e tau to manganto’o, “Tau to mangika palaong etu, etu semo i Yohanes to Pombaptis rawangu muni yako ri kapatenya.
8 Pasi re’e seja tau to yusa to manganto’o, “Si’a, tau etu to pantuntu tuntu i mPue Allah, i Elia, to masuwu muni.” Pei re’e wo’u tau to manganto’o, “Ia samba’a to pantuntu tuntu i mPue Allah yako tempo owi to mambangu muni yako ri kapatenya.”
9 Pei i Herodes manganto’o, “Aku roomo mampu’ak yau wo’o i Yohanes, wali bara i sema tau to nasaritaka ntau resi aku etu?” Wali yako etu i Herodes rani kojo mangkita i Yesu.
10 Wali yako etu pomakau i Yesu rata muni resi Ia. Tempo sira rata muni etu, sira mangansaritaka resi Ia mangkonong samparia palaong to naika nsira ri raya mpalinjanya. Roo see i Yesu mangkeni sira njo’u lipu to tare tau mangkaroos to mosu ri kota Betsaida. Tempo sira yau etu, ojo sira sampuyu pei togo to yau.
11 Pei ojo pangandonge ntau boros i Yesu yau, sira mangalulu. Wali tempo sira rata resi i Yesu, Ia mangantabea sira, panewa Ia mampogomboka sira mangkonong i Pue Allah mawali Makole nto lino. Pasi Ia mampakatao muni sira to masaki.
12 Wali yako etu ojo kawenginya rao, anaguru i Yesu to sampuyu pei dua sira ma’i resi Ia panewa sira manganto’oka Ia, “Pokau tau boros etu yau njo’u lipu ntau pasi kampu-kampu to ri awenya si’i damangoli pangkoni pasi damangarata tampa rakayore. Apa lipu si’i tare tau darapangoli pangkoni pasi tare seja banua darakayore.”
13 Pei i Yesu mangansono, Ia manganto’o, “Komi semo mangawaika sira pangkoni.” Wali anaguru i Yesu manganto’o, “Gete! Pangkoni to re’e resi kita jamo lima mpa’i roti pasi dua mba’a bau. To etu taa kojo gana ane kami taa yau damangolika tau boros si’i pangkoni.”
14 Naka pei sira manganto’o ewa see apa tau to nja’u ria kaborosinya bara lima nsowu owo to langkai. Pei i Yesu manganto’oka anaguruNya, “To’oka tau boros patundamo makalompok-kalompok to bara lima mpuyu kaborosinya tau.”
15 Wali anaguru i Yesu mangika ewa wimba Ia manganto’oka sira etu, wali samparia tau matunda.
16 Yako etu i Yesu mangoko roti lima mpa’i pasi bau dua mba’a etu, panewa Ia matingoa pei makai-kai manganto’oka i Pue Allah tarima matao. Ojo karoonya Ia makai-kai Ia mangampesu-mpesutimo roti pasi bau etu panewa mangawaika anaguruNya. Wali sira mangoko pangkoni etu panewa mangampapookoka resi tau boros.
17 Wali sira samparia mangkoni paka mabosu. Ojo karoonya sira mangkoni, anaguru i Yesu mangamporomung toro mpangkoni etu. Wali toro mpangkoni to naporomung nsira etu dasampuyuwa pei dua karanji nabuke.
18 Wali yako etu re’e seore i Yesu makai-kai nja’u tampa to tare tau mangkaroos. Tempo etu nja’u seja anaguruNya nja’u ria. Wali i Yesu mampotanaka resi sira, Ia manganto’o, “Ane ewa panto’o ntau boros, sema Aku si’i?”
19 Wali sira mangansono, “Re’e sangga’a tau manganto’o i Yohanes to Pombaptis. Pei re’e seja to manganto’o i Elia. Pasi re’e seja tau to manganto’o samba’a to pantuntu tuntu i mPue Allah tempo owi to tuwu muni yako ri kapatenya.”
20 Pei i Yesu mampotanaka wo’u resi sira, “Pei ane ewa panto’o ngkomi, sema Aku si’i?” Wali i Petrus mangansono, “Komi semo i Kerisitu, Makole parajanji pasi napokau i mPue Allah.”
21 Wali yako etu i Yesu mampatiendoka kojo sira, manganto’o, “Monso pu’u ewa nuto’o ngkomi etu, pei ne’e kojo manganto’oka sa’e Aku semo i Kerisitu, Makole parajanji i mPue Allah.”
22 Wali yako etu i Yesu manganto’oka wo’u anaguruNya, “Aku, Wiyaa nto Lino, damangarata boros kasesa. Pasi Aku danapobo’o ntau tu’a nto Yahudi pasi kepalakepala nto pampue pasi tau to mampoguru porenta i Musa. Wali Aku darapopate yau, pei yako etu, ri rayanya togo eo Aku darawangu muni yako ri kapatengKu.”
23 Wali roo see, i Yesu manganto’oka wo’u sira, Ia manganto’o, “I sema tau to rani mangaluluka Aku, tau etu taa maya taa mamposaka yau pamporani ndaya to si ia. Wali ponto-ponto eo ia nempo darapopate yau saba mangalulu Aku, ia tiroowa mangaluluka Aku.
24 Pei re’e tau to mampobuuka katuwunya semo to bae kojo batuanginya see naka sira taa mangalulu Aku naka ne’e nasesai ntau. Pei tau etu nempo taa napopate ntau apa saba mangalulu Aku pei tiroo darata temponya sira damate yau. Pei i sema tau to buya rayanya nempo mate yau apa saba ia mangaya Aku, tau etu damangarata katuwu to monso.
25 Apa kesaa batuanginya resi tau nempo kasuginya ri lino samparia paka ia puenya pei ane ia taa mangarata katuwu to singkasaenya pei ojo mangarata huku? Tare batuanginya!
26 Wali lulu Aku apa Aku, Wiyaa nto Lino, dama’i muni ri lino si’i. Tempo etu bae kuasangKu pasi keyawangKu, pasi re’e seja kuasa pasi keyawa i mPue Allah, Pa’a, resi Aku, pasi re’e seja kuasa pasi keyawa mpomakau to i Pue Allah puenya. Wali i sema tau to mea mangalulu Aku pasi gombongKu, Aku damea seja mampongakung tau etu Aku puenya tempo Aku dama’i etu.
27 Wali Aku manganto’oka komi, monso pu’u re’e tau ri oyo ngkomi to damangkita i Pue Allah mawali Makole ri lino si’i ri katawanya sira mate yau.”
28 Wali yako etu, ojo kagananya bara wayu mbengi yako panto’o i Yesu gombo etu, Ia mangansale i Petrus, i Yohanes pasi i Yakobus panewa Ia mangkeni sira togo nto’u tongku damakai-kai.
29 Wali rata ndate ria i Yesu makaikai pasi tempo Ia makai-kai etu ta’a nu lioNya mambali pasi pakeNya mawali buya makilo.
30 Wali tempo etu kodi majoli re’e seja dua mba’a tau to magombo-gombo pei i Yesu. Tau dua etu i Musa pasi i Elia to tempo owi.
31 Wali sira dua bae kojo seja kayawanya. Pasi sira dua mampogomboka i Yesu mangkonong kapateNya to damawali nda’a kota Yerusalem singkonong pei songka i mPue Allah.
32 Wali tempo sira togo magombo etu i Petrus pasi yununya tongo ngkayorenya apa yore kojo matanya. Pei roo see sira naendo muni pei mangkita keyawa i Yesu pasi mangkita seja tau dua to makore ri awe i Yesu.
33 Yako etu tau dua etu damampiyaikamo i Yesu. Wali tempo sira dayau etu i Petrus manganto’oka i Yesu, to’onya, “Guru, masanang kojo kita apa re’i rire. Ane maya kami damangika togo kandepe. Samba’a raikaka Komi, pasi samba’a raikaka i Musa pasi samba’a wo’u raikaka i Elia.” Naka pei i Petrus manganto’o gombo etu apa ia ojo magombo mpangkewanya, ia tamo mangansani anu to masipato rato’o.
34 Pei tempo i Petrus tongo mpagombonya etu, tempo etu, re’e limu tudu mangangkumuti yau sira. Wali anaguru i Yesu meka kojo raya nsira tempo nakumuti nu limu etu.
35 Roo see re’e loo to magombo yako ri raya nu limu. Loo etu manganto’o, “Si’imo anangKu. Aku roomo mangampilis Ia. Wali padongeka kojo gomboNya.”
36 Wali ojo karoonya loo etu magombo, anaguru i Yesu mangalo’a, jamo i Yesu to nakita nsira. Tamore tau to yusa. Wali sira togo tawa mangansaritaka resi sa’e mangkonong palaong to nakita nsira etu. Tare pasi samba’a tau to nasaritaka nsira ri tempo etu.
37 Wali yako etu, ojo kaeonya wo’u rao, sira opo malonso muni yako ri rapa ntongku etu. Ojo karata nsira ri pu’u ntongku etu, boros kojo tau to ma’i mangantomu i Yesu.
38 Wali re’e samba’a tau langkai ri oyo ntau boros etu to maroso loonya kaboo manganto’o, “Pa’a Guru! Kuporapika kojo resi Komi mangalo’a anangku to langkai, apa ojo samba’aja see anangku.
39 Pei mandudu ngkani ia naposuak measa. Tempo ia raposuak etu, kodi majoli ia kakijo. Pasi measa etu mangika see ia kanjonjo-njonjo pei jamo wura ngujunya. Pasi measa etu taa kojo rani mampiyaika anangku, pei ane re’e temponya measa masuwu yako resi ia, ia mangansesai kojo ruyu.
40 Wali aku mamporapika resi anaguruMu mangarubak measa etu, pei sira taa nakurang.”
41 Wali i Yesu mampogomboka tau boros etu Ia manganto’o, “Gete komi to tuwu ri tempo si’i! Komi taa kojo mangaya. Pasi komi pusa, taa mangalulu jaya to monso. Pei nempo masaemo Aku maroo resi komi pei komi tiroowa taa mangaya. Wali masusa rayangKu mampobuuka komi taa kojo mangaya Aku!” Wali yako etu i Yesu manganto’oka ngkai to naposuak measa ananya etu, to’oNya, “Kenika Aku anamu etu.” Wali ngkai etu mangkeni ananya.
42 Pei tongo-tongonya ana etu mangampago i Yesu, kodi majoli measa to re’e ri raya nu ana etu mangika see ia tisiba yau ri wawo ntana pasi kanjonjo-njonjo. Pei i Yesu manganseko measa etu see naka ia miyai, roo see Ia mampakatao muni ana etu panewa mangawaika muni resi pa’anya.
43 Wali samparia tau to mangkita palaong etu paka ipu kojo raya nsira mampobuuka kuasa i mPue Allah bae kojo. Wali tempo tau boros etu tiroo ipu rayanya mampobuuka palaong to naika i Yesu etu, tempo etu i Yesu manganto’oka anaguruNya,
44 Ia manganto’o, “Ne’e mangkalingan gombo to daKuto’oka komi si’i: Aku, Wiyaa nto Lino, daraposora yau resi tau.” Etu semo to nato’oka i Yesu anaguruNya.
45 Pei sira taa mangansani batuanginya gombo i Yesu etu, apa batuanginya ewa rawuni yako resi sira. See naka sira taa mangansani, pasi sira tare kakoje ndaya mampotanaka resi i Yesu mangkonong batuang nu gomboNya etu.
46 Wali yako etu anaguru i Yesu mula masibanta mangkonong to imba sira to bae kojo angganya.
47 Wali i Yesu mangansani pampobuuka nsira, see naka Ia mangoko samba’a ana kodi pei mampapokore ana etu ri aweNya.
48 Roo see Ia manganto’o, “Ane tau manga’angga nempo ojo ana kodi to ewa si’i apa saba ia mangalulu Aku, ane ewa see batuanginya tau etu manga’angga seja Aku. Pasi i sema tau to manga’angga Aku, batuanginya ia manga’angga i Pue Allah to nampokau Aku. Apa tau to kodi kojo angganya ri oyo ngkomi, kamonsonya tau etu semo to bae kojo angganya ane ri pangkita i mPue Allah.”
49 Wali i Yohanes manganto’oka i Yesu, “Pa’a Guru, kami re’e mangkita samba’a tau to mangarubak measa yako kuasa ngKomi. Pei tempo kami mangkita etu kami manganto’oka ia ne’e mangika palaong to etu, apa ia si’a yunu to si kita.”
50 Pei i Yesu manganto’o, “Ne’e mangamparas tau etu apa tau to taa mangewa kita, tau etu mampasimbalika kita.”
51 Wali yako etu mosumo temponya i Yesu datiokotaka nto’u saruga, wali Ia mampakaroso dayau ndeku kota Yerusalem ri propinsi Yudea.
52 Pei jaya dayau ndeku Yerusalem etu liu ri propinsi Samaria, pasi tau Samaria taa masingkatao pei tau Yahudi. Pei nempo ewa wetu, i Yesu mampokau sawei mba’a pomakauNya damampatiruyu pei Ia njo’u samba’a kota to nja’u Samaria, damangaliwuka yami Ia tampa rakayore ri kota etu. Wali pomakauNya yau damangika palaong to nato’oka i Yesu sira etu.
53 Pei ojo karata nsira nja’u kota etu, tau to maroo nja’u ria manganto’o sira bo’onya mampalinggona i Yesu, apa Ia to Yahudi pasi Ia mangampago Yerusalem. Wali pomakau i Yesu etu yau mamporataka resi Ia gombo ntau etu.
54 Wali tempo anaguru i Yesu, i Yakobus sira dua i Yohanes, mangandonge gombo mpomakau etu manganto’o tau etu bo’onya mampalinggona i Yesu, sira mampotanaka resi i Yesu, sira manganto’o, “Pue, ane Komi singkonong, kami damamporapika resi i Pue Allah see Ia damantudumaka apu yako ndate yangi see mampakaja’aka yau sira.”
55 Pei i Yesu mangandolika tangoNya resi sira dua pei manganseko sira, Ia manganto’o, “Komi taa mangansani yako resi sema kamonsonya pampobuuka ngkomi etu.
56 Apa naka pei Aku, Wiyaa nto Lino, nama’i si’a ma’i damampakaja’aka yau katuwu ntau. Kasimbalinya yako etu, Aku ma’i damampalaes tau.” Etu semo gombo i Yesu manganseko tau dua etu. Yako etu i Yesu pasi anaguruNya polas wo’u njo’u kota to yusa.
57 Wali ri raya mpalinja nsira dayau njo’u kota etu, re’e samba’a ngkai to manganto’oka i Yesu, ia manganto’o, “Aku kuporani mawali yau anaguru ngKomi, wali aku damangalulu Komi nempo imbanjo danukayako.”
58 Wali i Yesu manganto’oka ia, “Ane asu maila, re’e wayau mbatu to nakaroo nsira, pasi ane tonsi, sira re’e seanya. Pei ane Aku, Wiyaa nto Lino, tare tampa to Akuja puenya daKukayore. Wali Aku mangepe korom bara taa nukurang mangalulu Aku apa taa todo.” Ewa wetu naika i Yesu mangansono tau etu.
59 Yako etu, i Yesu manganto’oka tau to yusa, “Yau lulu Aku.” Pei ngkai etu manganto’o, “Pue, aku damangalulu seja Komi, pei waika aku yau muni ruyu mangampeas kapate mpa’angku. Ane ia roomo namate yau pei aku room mampongkeli ia panewa aku dama’i wo’u damangalulu Komi.”
60 Pei i Yesu manganto’o, “Biakamo tau to taa mangaluluka songkangKu, to raporapaka ewa tau mate, sira semo mampongkeli yunu nsira to matemo. Pei ane korom, inta pei pakarebaka mangkonong ewa wimba i Pue Allah mawali Makole nto lino.”
61 Wali yako etu re’e wo’u tau to yusa to manganto’o, “Aku damangalulu seja Komi, Pue, pei waika aku yau masimang ruyu resi ja’ingku.”
62 Pei i Yesu mangansono mangampake rapa, Ia manganto’o, “Ane tau mampojeko, ane ia sangkani mangalo’a ri payunya, taa magaya palaonginya saba ia taa madota mapalaong. Pasi ewa see seja tau to rani mawali tau to i Pue Allah Makolenya, taa masipato ane ia taa madota mangalulu Aku.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA