Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Isa Almasih ma imbau kaduwo baleh urang pangikuik-Nyo, sudah tu Baliau mambarikan kuwaso kabake pangikuik-Nyo tu untuak ma usie roh jahek, sarato ma agiah kuwaso untuak mancegakkan panyakik urang.

² Kudian Baliau manyuruah pangikuik-Nyo tu payi mancegakkan urang sakik, sarato malewakan barito tantang Injil Karajaan Allah.

³ Baliau bakato kabake pangikuik-Nyo tu, "Angku-angku jan mambawok apo-apo, dalam pajalanan mambaritokan Injil. Jan mambawok tungkek, atau kampia sidakah, atau makanan, atau pitih, baju cukuik sado nan lakek di badan.

⁴ Dima sajo angku-angku layi ditarimo dek urang, mako tinggalah disinan sampai angku-angku barangkek pulo dari kota tu.

⁵ Jikok dima angku-angku indak ditarimo dek urang, mako dikutiko angku-angku ka barangkek dari kota tu, kipehkanlah abu dari tapak kaki angku, sabagai paringatan kabake urang-urang nan disinan."

⁶ Mako bi barangkeklah pangikuik-pangikuik Isa Almasih ka kampuang-kampuang, untuak mambaritokan Injil sarato jo untuak mancegakkan urang nan sakik, dibabagai-bagai tampaik.

⁷ Kutiko Herodes, nan mamarentah di Galilea, mandanga kaba tantang sadonyo kajadian tu, inyo mati kacamehan. Dek karano ado urang nan mangatokan, baraso Nabi Yahya Pambaptis lah iduik baliak.

⁸ Ado urang nan mangatokan baraso Nabi Elia nan lah tibo baliak. Urang nan lain bi mangatokan pulo, baraso surang nabi dari nabi-nabi jaman sa isuak, nan lah iduik baliak.

⁹ Herodes bakato, "Ambo lah manyuruah urang untuak mamancuang kapalo Yahya Pambaptis. Tapi, Urang nan kiniko sadang manjadi buwah muncuang dek masarakaik, siya Inyo tu nan sabananyo? Lah sambuah kaba nan ambo danga tantang diri-Nyo." Mako Herodes ba usawo bana supayo dapek basuwo jo Isa Almasih.

¹⁰ Rasul-rasul Isa Almasih lah babaliak dari pajalanannyo, mako inyo bi mancuritokan kabake Baliau sagalo apo nan lah inyo karajokan. Baliau ma ajak rasul-rasul-Nyo tu untuak payi ma asiangkan diri ka kota Betsaida.

¹¹ Tapi, kutiko urang nan banyak mangatawui baraso Isa Almasih lah payi, mako inyopun bi payi pulo manuruikkan Baliau. Baliau pun layi niyo manarimo kadatangannyo, sudah tu Baliau mangecek kabake urang-urang tu tantang parkaro Karajaan Allah. Baliau pun mancegakkan pulo urang nan sakik di antaro urang nan banyak tu.

¹² Kutiko matoari lah muloi tabanam, kaduwo baleh urang pangikuik Isa Almasih datang kabake Baliau, mangecekkan, "Ngku, tampaik ko tapancie. Labiah elok Angku suruah urang nan banyak ko payi, untuak mancari makanan sarato jo mancari tampaik bamalam di kampuang-kampuang, kok indak di jorong-jorong nan di sakuliliang ko."

¹³ Tapi Baliau bakato, "Angku-angku sajolah nan ka mambari makan urang-urang tu." Pangikuik-pangikuik Baliau tu bi manjawab, "Tapi nan ado di kami, hanyo roti limo buwahnyo Ngku, sudah tu ikan duwo ikua. Apokoh kami musti payi mambali makanan untuak kasadonyo urang ko?"

¹⁴ (Kutiko tu ado kiro-kiro limo ribu urang laki-laki nan ado disinan.) Isa Almasih bakato kabake pangikuik-pangikuik-Nyo, "Suruahlah urang-urang ko bi duduak ba umpuak-umpuak, kiro-kiro limo puluah urang sa umpuak."

¹⁵ Pangikuik-pangikuik Isa Almasih tu mangarajokan sagalo apo nan dikatokan dek Baliau kabake inyo.

¹⁶ Sudah tu Baliau ma ambiak roti nan limo buwah, sarato jo ikan nan duwo ikua tu, kudian Baliau maningadah ka langik, sarato batarimo kasih kapado Allah. Sasudah tu Baliau mambalah-balah roti, sarato manguduang-nguduang ikan tu jo tangan-Nyo, kudian baru Baliau barikan kabake pangikuik-Nyo untuak dibagi-bagikan kabake urang nan banyak.

¹⁷ Urang tu bi makan sampai kanyang kasadonyo. Sudah tu pangikuik-pangikuik Baliau mangumpuakan makanan nan balabiah, sabanyak duwo baleh katidiang labiahnyo.

¹⁸ Pado suatu ari, kutiko Isa Almasih sadang badowa surang-Nyo, pangikuik-pangikuik-Nyo bi tibo kabake Baliau. Baliau batanyo kabake pangikuik-Nyo tu, "Jikok manuruik kecek urang, Ambo ko siya?"

¹⁹ Pangikuik-Nyo tu bi manjawab, "Ado urang nan mangatokan, baraso Angku adolah Nabi Yahya Pambaptis. Ado pulo nan mangatokan Nabi Elia, nan lain bi mangatokan, salah surang dari nabi-nabi jaman sa isuak nan lah iduik baliak."

²⁰ "Tapi jikok manuruik pandapek angku-angku sandiri, Ambo ko siya?" tanyo Isa Almasih. Si Petrus manjawab, "Angku adolah Rajo Panyalamaik nan lah dijanjikan dek Allah."

²¹ Sudah tu Isa Almasih bakato ka pangikuik-pangikuik-Nyo, "Jan dicuritokan siya Ambo ko kabake siya-siyanyo."

²² Baliau mangatokan pulo, "Anak Manusia iyo musti banyak ka manangguangkan sansaro, sarato ka dilawan dek pamimpin-pamimpin, dek imam-imam kapalo, sarato dek guru-guru agamo. Inyo ka dibunuah, tapi di ari nan katigo, Inyo ka di iduikkan baliak."

²³ Kudian Isa Almasih mangecek kabake sadonyo urang nan ado disinan, "Urang nan baniyaik nak ka manuruikkan Ambo, inyo musti malupokan sagalo kapantiangan dirinyo, namuah mamikua salib satiyok ari, sambia taruih juwo ma iriangkan Ambo.

²⁴ Dek karano, urang nan bamukasuik nak mampatahankan nyawonyo, mako nyawonyo tu ka ilang. Tapi urang nan layi namuah mangarobankan nyawonyo untuak kaparaluan Ambo, ba arati inyo tu lah samo jo manyalamaikkan nyawonyo.

²⁵ Apolah labonyo dek urang, biyapun kasadonyo isi dunia ko inyo nan punyo, tapi inyo binaso, sarato indak mandapek iduik nan sajati?

²⁶ Jikok ado urang nan maraso malu ma akui Ambo, sarato malu pulo jo pangajaran Ambo, mako Anak Manusia ka malu pulo ma akui urang tu isuak, dikutiko Inyo datang jo kuwaso-Nyo, sarato jo kuwaso Bapak, di iriangkan dek malekaik-malekaik-Nyo nan suci!

²⁷ Katawuilah: di antaro angku-angku nan disiko ko, ado nan indak ka mati sabalun inyo maliyek Karajaan Allah."

²⁸ Kiro-kiro sapakan sasudah Isa Almasih ma ajakan sagalo pangajaran tu, mako Baliau mambawok si Petrus, si Yahya, sarato jo si Yakobus ka ateh sabuwah gunuang untuak badowa.

²⁹ Samantaro Baliau sadang badowa disinan, rono muko Baliau barubah, sarato pakaian Baliau manjadi putiah sumarak bakilauan.

³⁰ Indak disangko-sangko tibolah urang baduwo, urang tu iyolah Nabi Musa jo Nabi Elia manampakkan diri jo cahayo dari sarugo. Inyo mangecek jo Isa Almasih mambicarokan tantang kamatian Baliau, nan indak ka lamo lai ka dijalani dek Baliau di Yerusalem.

³¹ (9:30)

³² Dikutiko itu si Petrus jo kanti-kantinyo sadang talalok, tapi tibo-tibo inyo tasintak, inyo maliyek Isa Almasih bacahayo, sarato urang nan baduwo tu tagak di dakek Baliau.

³³ Dikutiko urang nan baduwo tu nak ka bajalan maninggakan Baliau, mako mangeceklah si Petrus kabake Isa Almasih, "Angku Guru, sajuak rasonyo pangana kito disiko. Eloklah nak kami tagakkan tigo buwah kemah disiko: ciyek untuak Angku, ciyek untuak Nabi Musa, nan ciyek lai untuak Nabi Elia." (Si Petrus mangecek bakcando itu, tapi inyo indak mangarati apo nan dikatokannyo.)

³⁴ Samantaro si Petrus sadang mangecek, tibolah sagumpa awan, nan marawok-inyo, sainggo inyo mati katakuik-an.

³⁵ Kudian dari dalam awan tu tadanga suwaro nan bakato, "Ikolah Anak-Den, nan Den-piliah. Picayolah kabake sagalo apo nan dikatokan-Nyo!"

³⁶ Sasudah suwaro tu baranti mangecek, mako urang-urang tu hanyo manampak Isa Almasih sajonyo disinan. Pangikuik-pangikuik Baliau marasiyokan sagalo kajadian-kajadian tu, inyo indak bi mancuritokan doh kabake siya-siyanyo, tantang sagalo apo nan lah inyo liyek.

³⁷ Bisuak arinyo Isa Almasih sarato jo katigo urang pangikuik-Nyo turun dari ateh gunuang tu, mako bi tibolah urang nan banyak untuak manamui Baliau.

³⁸ Ado surang laki-laki di antaro urang nan banyak tu, inyo bakato kabake Isa Almasih, jo suwaro nan agak kareh, "Ngku Guru, mintak tolonglah ambo kabake Angku, untuak maliyek anak ambo -- inyo tu anak tungga babeleng di ambo!

³⁹ Jikok roh jahek tibo manggaduah inyo, mako sacaro mandabok inyo mamakiak, sudah tu badannyo tagang-tagang, sampai babuyieh muncuangnyo. Roh jahek tu acok manggaduahnyo, indak namuah kaluwa dari badannyo!

⁴⁰ Lah mintak tolong ambo ka pangikuik-pangikuik Angku untuak ma usie roh jahek tu, tapi indak talok doh di pangikuik Angku tu."

⁴¹ Isa Almasih bakato, "Oih angku-angku urang nan indak ba iman, urang nan sasek! Sampai bara lamo lai Ambo musti ado samo-samo jo angku-angku, sampai pabilo Ambo dapek manahan saba taradok angku-angku? Capeklah, bawoklah anak angkau tu kamari!"

⁴² Samantaro paja tu bajalan manuju ka adok-an Isa Almasih, roh jahek tu ma ampehkannyo ka tanah, sampai tagang-tagang badannyo. Tapi Isa Almasih mamarentahkan roh jahek tu kaluwa, mako cegaklah paja tu. Mako disarahkanlah paja tu baliak kabake urang gaeknyo.

⁴³ Kasadonyo urang bi tacangang maliyek kuwaik kuwaso Allah nan sangaik gadang. Dikutiko urang bi sadang tacangang-cangang, maliyek sagalo apo nan lah dipabuwek dek Isa Almasih, mako Baliau bakato kabake pangikuik-Nyo,

⁴⁴ "Paratikanlah elok-elok, jan sampai lupo jo kato-kato Ambo ko: Anak Manusia ka disarahkan kabake kuwaso manusia."

⁴⁵ Tapi pangikuik-pangikuik Baliau tu indak mangarati jo kato-kato Baliau tu. Parkaro tu dirasiyokan kabake pangikuik-Nyo supayo pangikuik-Nyo jan mangarati. Tapi pangikuik-Nyo takuik mananyokan parkaro tu kabake Isa Almasih.

⁴⁶ Di antaro pangikuik-pangikuik Isa Almasih timbua patangkaran, inyo bi mampatangkakan, tantang siya di antaro inyo tu nan di anggap paliang takamuko.

⁴⁷ Isa Almasih mangatawui apo nan dipikiekan dek pangikuik-Nyo tu, dek karano itu, Baliau ma imbau surang paja ketek, sarato manyuruah paja tu tagak disampiang Baliau.

⁴⁸ Sudah tu Isa Almasih bakato kabake pangikuik-pangikuik-Nyo, "Urang nan lai niyo manarimo paja ketek ko, dek karano di Ambo, mako urang tu ba arati inyo lah manarimo Ambo. Baitu pulo, siya urang nan lai niyo manarimo Ambo, mako inyo tu lah ba arati manarimo Baliau nan ma utuih Ambo. Dek karano, urang nan disangko indak takamuko di antaro angku-angku, sabananyo inyolah urang nan paliang takamuko!"

⁴⁹ Si Yahya bakato kabake Isa Almasih, "Angku, kami ado manampak urang nan ma usie setan ateh namo Angku, kami managah inyo, dek karano inyo tu indak kuleka kito."

⁵⁰ "Jan ditagah pulo inyo lai," kecek Baliau kabake Yahya, sarato jo kabake pangikuik-Nyo nan lain, "dek karano, urang nan indak balawan jo angku-angku, ba arati inyo bapihak kabake angku-angku."

⁵¹ Kutiko lah dakek masonyo Isa Almasih di angkek ka sarugo, mako Baliau ma ambiak kaputusan untuak payi ka Yerusalem.

⁵² Baliau manyuruah urang untuak payi mandawului Baliau. Mako bi payilah urang nan disuruah-Nyo tu, masuak ka sabuwah kampuang di Samaria untuak manyadiyokan sagalo sasuatu untuak Isa Almasih.

⁵³ Tapi urang-urang nan di kampuang tu indak basadiyo untuak manarimo Baliau, dek karano pajalanan Isa Almasih lah jaleh sadang manuju ka Yerusalem.

⁵⁴ Mako dikutiko pangikuik Baliau, si Yakobus jo si Yahya mandanga tantang parkaro itu, mako inyo bi bakato, "Tuhan, apokoh Tuhan lai namuah, jikok kami mamintak api turun dari langik untuak mambinasokan urang-urang ko?"

⁵⁵ Isa Almasih malengah, Baliau bangihi nan baduwo tu.

⁵⁶ Sasudah tu si Yahya jo si Yakobus payi ka kampuang nan lain.

⁵⁷ Samantaro Isa Almasih jo pangikuik-Nyo sadang manaruihkan pajalanan, ado surang urang nan mangecek kabake Baliau, "Ngku, ambo lai namuah manuruikkan Angku kama-kamanyo!"

⁵⁸ Baliau manjawab, "Anjiang utan layi punyo lubang, unggeh layi punyo sarang, tapi Anak Manusia indak ado doh punyo tampaik untuak malalokkan badan-Nyo."

⁵⁹ Sudah tu Isa Almasih mangecek kabake surang urang nan lain, "Kamarilah, turuikkanlah Ambo." Tapi urang tu bakato, "Ngku, ijinkanlah ambo pulang dulu, untuak payi mangubuakan bapak ambo."

⁶⁰ Baliau manjawab, "Padiyakan sajolah urang nan mati surangnyo, payi mangubuakan kantinyo nan mati. Tapi, nan angkau payilah mambaritokan Karajaan Allah di muko bumi ko."

⁶¹ Ado pulo surang urang nan lain mangatokan, "Ngku, ambo iyo nak ka manuruikkan Angku pulo, tapi ijinkanlah ambo pulang dulu untuak mambaritawu kaluarga Ambo."

⁶² Isa Almasih bakato kabake urang tu, "Urang nan lah muloi nak ka mambajak, tapi inyo ma engong juwo ka balakang, urang nan bakcando tu indak tapakai doh untuak Karajaan Allah."

Lukas

Video Lukas 9

Ikuti Kami:

KONTAK | PARTISIPASI | DONASI