Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Isa ngurau rua belas jelma sai nutuk Ia, Ia ngeniko jama tian kuasa untuk nguser ruh jahat rik munyaiko penyakik.

² Kak raduni Ia ngayun tian mik ngunyaiko ulun meruyuh rik nyiarko kabar repa cara Allah merintah sebagai Raja.

³ "Dang ngusung api-api delom lapahmu," ani Isa jama tian. "Dang ngusung tungkok, atau uncang rang sedekah, atau kanikan, atau duit, atau kawai rua biji.

⁴ Di dipa gaoh diterima, tinggal pai keti disan sampai keti ninggalko kota seno.

⁵ Rik di dipa keti mak diterima, waktu keti ninggalko kota seno, kibasko harbuk jak tapak cukutmu, sebagai peringatan jama tian."

⁶ Jelma-jelma sai nutuk Isa berangkat, mik pekon-pekon untuk nyiarko Kabar Betik rik ngunyaiko jelma meruyuh di dipa-dipa.

⁷ Waktu Herodes, sai merintah di Galilea, ngedengi tentang sunyinni kejadian ano, ia bingung. Mani wat sai cawa Yohanes Pembaptis radu hurik luot.

⁸ Wat juga sai cawa bahwa Elia radu muncul luot. Ulun lain cawa muneh bahwa wat sai nabi jak nabi-nabi tumbai, radu hurik luot.

⁹ Herodes cawa, "Nyak radu ngayun jelma mancung uluni Yohanes. Kidang Jelma udi, sapa sebenorni Ia? Lamon sai radu kudengi tentang Ia." Makani Herodes berusaha untuk ngeliak Isa.

¹⁰ Jelma-jelma sai nutuk Isa muloh rik nyeritako jama Isa sunyinni sai radu diguaiko tian. Isa ngurau tian, mik jejama menyendiri di kota Betsaida.

¹¹ Kidang waktu jelma bareh pandai tentang hal seno, tian nutuk Isa. Ia nerima tian, kak raduni cawa jama tian repa cara Allah merintah sebagai Raja. Ia juga ngunyaiko jelma meruyuh jak hantara jelma-jelma seno.

¹² Waktu matarani mulai tebenam, ke rua belas jelma sai nutuk Isa ratong jama Ia rik cawa, "Pak, rang inji tepencil. Lebih baik Bapak ngayun jelma-jelma inji mik, in tian dapok nyepok kanikan rik rang minok di pekon-pekon sai redik dija."

¹³ Isa ngejawab, "Keti gaoh sai ngeni mengan tian." Jelma-jelma sai nutuk Isa cawa, "Sekam angkah wat lima ruti rik rua iwa. Api sebaikni sekam mik ngebeli kanikan untuk sunyinni jelma sinji?"

¹⁴ (Wat kira-kira lima ribu jelma bakas di disan.) Isa cawa jama jelma-jelma sai nutuk Ia, "Kayundo jelma udi mejong bekelompok, kira-kira lima puluh jelma sai kelompok."

¹⁵ Jelma-jelma sai nutuk Isa ngeguaiko api sai dicawako Isa jama tian.

¹⁶ Isa ngakuk lima ruti rik rua iwa udi, raduni nengadah di langit rik ngucapko terima kasih jama Allah. Kak raduni Ia ngebelah-belah ruti rik iwa seno jama culuk-Ni kak raduni ngeniko jama jelma-jelma sai nutuk Ia untuk dibagi-bagiko jama jelma lamon ano.

¹⁷ Sunyinni tian mengan sampai betong. Jelma-jelma sai nutuk Isa ngumpulko kelebihan kanikan seno, rua belas bakul lamonni.

¹⁸ Suatu rani, waktu Isa lagi bedua tenggalan, jelma-jelma sai nutuk Ia ratong jama Ia. Isa betanya jama tian, "Menurut cawani ulun, Nyak ajo sapa?"

¹⁹ Tian ngejawab, "Wat sai cawa Yohanes Pembaptis, wat juga sai cawa Elia, ulun lain cawa salah sai nabi zaman tumbai sai hurik luot."

²⁰ "Kidangni menurut keti tenggalan, Nyak ajo sapa?" tanya Isa. Petrus ngejawab, "Bapak ajo Raja Penyelamat sai dijanjiko Allah."

²¹ Isa cawa jama jelma-jelma sai nutuk Ia, "Dang nihan ngeni pandai hal inji jama sapa pun."

²² Isa cawa juga, "Anak Manusia haga lamon menderita rik ditentang ulih jelma-jelma sai mimpin rik imam-imam kepala, guru-guru agama. Ia haga dibunuh, kidang waktu rani ketelu haga bangkit luot."

²³ Kak raduni Isa cawa jama sunyinni jelma sai way di dudi, "Jelma sai haga nutuk jama Nyak, haga ngelupako kepentinganni tenggalan, mikul salibni unggal rani, rik terus nutuk Nyakku.

²⁴ Mani jelma sai nahanko hurikni, haga mati. Kidang jelma sai ngurbanko hurikni untuk kepentingan-Ku haga diselamatko.

²⁵ Api untungni bagi jelma walaupun seluruh dunia jadi milikni, kidang ia nyadangko hurikni rik mati?

²⁶ Kik ulun meliom ngakui Nyak rik ajaran-ajaran-Ku, Anak Manusia juga meliom ngakui ulun seno waktu Ia ratong kanah jama kuasa-Ni, rik jama kuasa Bapa rik kuasa malaikat-malaikat sai suci.

²⁷ Pandai mak keti: jak hantara keti di dija wat sai mak haga mati semakkung ia ngeliak Allah memerintah."

²⁸ Kira-kira seminggu seraduni Isa ngajarko hal-hal seno, Ia ngusung Petrus, Yohanes, rik Yakobus mik atas gunung untuk bedua.

²⁹ Sewaktu Isa bedua di disan, pudak-Ni berubah rik kawai-Ni jadi handak bekilau-kilauan.

³⁰ Tiba-tiba rua nabi, yakdo Musa rik Elia ratong delom cahaya jak surga. Tian cawa jama Isa tentang kematian-Ni sai mak mesaka lagi haga dirasako-Ni di Yerusalem.

³¹ (9:30)

³² Waktu seno Petrus jama kantik-kantikni pedom, tiba-tiba ia minjak, ia ngeliak Isa becahaya rik jelma rua ano cecok jama Ia.

³³ Waktu tian rua ano haga ninggalko Isa, Petrus cawa jama Isa, "Bapak Guru, bangik becong neram di dija. Betik neram ngeguaiko telu kemah: Sai untuk Bapak, sai untuk Musa, sai lagi untuk Elia." (Petrus cawa injuk reno tanpa ngerti sai dicawakoni.)

³⁴ Sewaktu Petrus masih cawa, ratong awan sai nyalok tian, hingga tian merabai.

³⁵ Jak awan seno kedengian suara cawani, "Injido Anak-Ku sai Kupilih. Dengiko Ia!"

³⁶ Waktu suara ano taru, tian ngeliak Isa tenggalan di disan. Jelma-jelma sai nutuk Isa ngehema gaoh tentang unyinni seno, mak ngeni pandai jama sapa pun api sai radu diliak tian.

³⁷ Jemohni Isa rik telu jelma sai nutuk Ia regah jak gunung, rik lamon jelma ratong jama Isa.

³⁸ Sai jelma bakas jak hantara jelma-jelma lamon udi mekik, "Pak Guru, tulung pai liak anakku -- ia anak hehanaku!

³⁹ Kik ruh jahat ngeganggu ia, ia mekik-mekik rik badanni kejang-kejang sampai bangukni beburoh. Ruh udi nyiksa ia rik ia mak haga luah jak ia.

⁴⁰ Nyak radu ngilu jama jelma-jelma sai nutuk Bapak nguser ruh seno, kidang tian mak dapok."

⁴¹ Isa ngejawab, "Bukan main keti ajo! Keti temon jelma sai radu nyeleweng rik mak percaya! Sampai kapan Nyak haga tinggal jama keti rik haga sabar jama keti? Usung anakmu seno mik dija!"

⁴² Sewaktu sanak seno lapah mik jama Isa, ruh jahat ano ngebantingko sanak seno rik nyani, badanni jadi kejang-kejang. Kidang Isa merintahko ruh jahat udi luah kak raduni sanak seno munyai. Sanak seno diserahko jama bakni.

⁴³ Sunyinni jelma hiran ngeliak kuasa Allah sai hibat ano. Waktu tian masih hiran ngeliak sunyinni sai diguaiko-Ni, Isa cawa jama jelma-jelma sai nutuk Ia,

⁴⁴ "Perhatiko betik-betik rik dang lupa cawa-cawa-Ku inji: Anak Manusia haga diserahko jama kuasa jelma."

⁴⁵ Kidang jelma-jelma sai nutuk Isa mak ngerti cawa-Ni ano. Kejadian seno mak diucakkoni jama tian in tian mak dapok ngerti. Kidang tian rabai nanyako hal seno jama Ia.

⁴⁶ Di hantara jelma-jelma sai nutuk Isa betangkar sapa jak tian ano sai paling langgar kedudukanni.

⁴⁷ Isa pandai pikeran tian, makani Ia ngakuk sai sanak lunik rik nyani sanak udi cecok di geler-Ni.

⁴⁸ Radu Ia cawa jama jelma-jelma sai nutuk Ia, "Jelma sai nerima sanak sinji mani mandang Nyak, retini juga nerima Nyak-Ku. Rik ulun sai nerima Nyak, nerima juga Tuhan sai ngutus Nyak. Mani jelma sai paling lunik jak hantara keti unyinni, iado sai paling langgar kedudukanni!"

⁴⁹ Yohanes cawa, "Tuan, sekam ngeliak jelma nguser sitan atas gelar Tuan, rik sekam ngelarang ia, mani ia lain jelma ram."

⁵⁰ "Dang ngelarang ia," cawa Isa jama Yohanes rik jelma-jelma sai nutuk Ia, "mani jelma sai mak ngelawan keti, retini ia bepihak jama keti."

⁵¹ Waktu radu redik waktuni Isa diiwak mik surga, Ia ngakuk keputusan mik Yerusalem.

⁵² Makani Ia ngayun ulun mik ngehenako Ia. Jelma-jelma sai dikayun-Ni ano mik kuruk mik pekon di Samaria untuk nyiapko sunyin hal untuk Isa.

⁵³ Kidangni jelma-jelma sai di pekon ano mak haga nerima Isa, mani nyata nihan Ia lagi nuju Yerusalem.

⁵⁴ Waktu jelma-jelma sai nutuk Isa, Yakobus rik Yohanes pandai tentang hal seno, tian cawa, "Tuhan, api kedo Tuhan haga, kik sekam ngilu apui jak langit untuk ngebinasako jelma-jelma inji?"

⁵⁵ Isa ngerilong tian, radu Ia ngebutongi tian.

⁵⁶ Radu jak seno tian mik pekon sai bareh.

⁵⁷ Waktu Isa rik jelma-jelma sai nutuk Ia nerusko lapahni, wat jelma sai cawa jama Isa, "Pak, nyak haga nutuk Bapak mik dipa gaoh!"

⁵⁸ Isa ngejawab, "Serigala wat lubangni, burung wat sarangni, kidang Anak Manusia mak ngedok rang untuk pedom."

⁵⁹ Radu Isa cawa jama jelma bareh, "Tutuk Nyak." Kidang jelma seno cawa, "Pak, izinko nyak mulang pai untuk nguborko bakku."

⁶⁰ Isa ngejawab, "Tagando jelma mati sai nguborko jelma mati. Kidang niku, lapah rik siarko kabar bahwa Allah radu mulai memerintah."

⁶¹ Wat juga jelma bareh sai cawa, "Pak, nyak haga nutuk Bapak, kidang izinko pai nyak mulang untuk nangguh."

⁶² Isa cawa jama jelma seno, "Jelma sai radu mulai ngebajak, kidang ngeliak mik kudan, mak layak jadi anggota Allah."

Lukas

Video Lukas 9

Ikuti Kami:

KONTAK | PARTISIPASI | DONASI