Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ikaoni ndra nifahaõ-Nia si felendrua Yesu, Ibe'e khõra wa'abõlõ ba wamofanõ fa'abõlõ zi lõ sõkhi awõ wamadõhõ fõkhõ.
2 Aefa da'õ Ifatenge ira ba wanuriaigõ turia wa no Ibõrõtaigõ wamatõrõ-Nia Lowalangi ba wa'arazo-Nia, awõ ba wamadõhõ fõkhõ.
3 Imane khõra Yesu, "Bõi mi'ohe hadia ia ba wofanõmi, bõi mi'ohe zi'o, ma kandrekandre naha gefe, ba ma õ, ba ma kefe ba ma zui dua gõrõ nukha.
4 Gofu heza latema ami, mi'iagõ ba da'õ irege mirõi mbanua andrõ.
5 Ba heza lõ la tema ami, ba mi'anotogõ gawugawu ba gahemi na mirõi mbanua andrõ, si tobali tandra wamangelama ya'ira."
6 Ba mofanõ ndra nifahaõ Yesu, mõi ira ba mbanua misa ba wanuriaigõ Turia Somuso Dõdõ andrõ awõ ba wamadõhõ niha sofõkhõ gofu heza.
7 Me irongo Herode, samatõrõ ba Galilea, fefu duria andrõ ba tobali abu dõdõnia. Bõrõ me so zanguma'õ, no ifuli auri Yohane Samayagõ Idanõ!
8 So gõi zanguma'õ õsa no ifuli oroma Gelia. Ba so gõi niha bõ'õ zanguma'õ no ifuli auri zamõsa moroi ba gotalua ndra sama'ele'õ luo no.
9 Imane Herode, "No ufa'ew̃a'õ hõgõ Yohane. Ba haniha zindruhunia Niha andre? No oya ngawalõ nirongogu sanandrõsa khõ-Nia." Andrõ omasi sibai Herode i'ila Yesu.
10 Mangawuli ndra nifahaõ Yesu ba latutunõ khõ Yesu fefu zi no lafalua. I'ohe ira Yesu we'amõi ba mbanua sotõi Betisa'ida, ha ya'iya'ira.
11 Ba me la'ila niha sato da'õ, ba la'o'õ Yesu. Itema ira Yesu, fahuhuo Ia khõra sanandrõsa ba mbanua Lowalangi. Ba Ifadõhõ gõi niha sofõkhõ ba gotaluara.
12 Me no arakha bongi, ba mõi khõ Yesu ndra nifahaõ-Nia si felendrua lamane, "He Ama, no arõu naha andre moroi ba mbanua. Abõlõ sõkhi Õfofanõ ndra niha andre, ena'õ tola la'alui gõra awõ nahia wemõrõ ba mbanua ba ma ba halama si fasui ba da'e."
13 Imane khõra Yesu, "Mibe'e manõ gõra." Lamane ira nifahaõ-Nia, "Ha lima ngawua roti ba ha dua rozi gi'a si so khõma. Hadia lõ tola lõ mõi ndra'aga mowõli gõ niha sato andrõ fefu?"
14 (So mato lima ribu ndra matua ba da'õ.) Imane Yesu khõ ndra nifahaõ-Nia, "Miw̃a'õ ba niha sato ena'õ mudadao ba lafa'oli'oli ira, mato lima wulu niha wa'ato zi sangenoli."
15 Ba la'o'õ niw̃a'õ Yesu ira nifahaõ-Nia. La'andrõ dumadao fefu niha sato.
16 Ba Ihalõ zi lima ngawua roti awõ zi dua rozi gi'a andrõ, Ifaõga hõrõ-Nia ba mbanua si yaw̃a ba I'aohasi gõlõ Lowalangi. Iboboto roti awõ gi'a andrõ faoma tanga-Nia ba Ibe'e khõ ndra nifahaõ-Nia ena'õ labagibagi ba niha sato andrõ.
17 Manga ira fefu irege abuso. Ba la'owuloi zi torõi gõ niha sato ira nifahaõ Yesu, ba felendrua daga tõ tosai.
18 Samuza ma'õkhõ, me mangandrõ Yesu ba zi ha Ya'ia, la'ondrasi Ia ira nifahaõ-Nia. Isofu khõra Yesu, "Haniha Ndra'odo andre wanguma'õ niha?"
19 Latema li-Nia, lamane, "So zanguma'õ Yohane Samayagõ Idanõ Ndra'ugõ. So gõi zanguma'õ Elia, ba lamane gõi tanõ bõ'õ õsa samõsa moroi ba gotalua ndra Sama'ele'õ luo no si no ifuli auri."
20 Isofu Yesu, "Ba molo'õ ya'ami, haniha Ndra'odo andre?" Itema li Fetero, imane, "Keriso Ndra'ugõ, Razo Sangorifi nifabu'u Lowalangi."
21 Aefa da'õ Imane Yesu khõ ndra nifahaõ-Nia, "Ma'ifu bõi mi'ombakha'õ da'e gofu ha'õkhõ."
22 Lõ tola lõ'õ oya Itaõgõ wamakao Ono Niha, ba la'uduni Ia ira salaw̃a niha Yehuda, awõ ndra ere sebua, ba sangila amakhoita. Labunu dania Ia, ba na no irugi tõlu ngaluo ba tesusugi mangawuli Ia.
23 Aefa da'õ Imane Yesu ba niha sato, "Dozi niha somasi molo'o Ya'o, ba ya mu'ositengagõ ia; ilu'i rõfania ero ma'õkhõ, ba ya mu'o'õ Ndra'odo.
24 Bõrõ me niha somasi manganau'õ nosonia, da'õ zi taya fa'auri dania. Ba niha sanehegõ fa'aurinia bõrõ Ndra'o, da'õ zanõndra fa'auri dania.
25 Hadia hare ba niha na i'okhõgõ zi sagõrõ ulidanõ andre, na tekiko ia ba taya wa'aurinia samõsa?
26 Na aila niha wamaduhu'õ Ya'o awõ wamahaõ-Gu, ba aila gõi dania Nono wamaduhu'õ niha andrõ na tohare Ia dania si fao lakhõmi-Nia, awõ lakhõmi Nama-Nia, ba lakhõmi mala'ika ni'amoni'õ!
27 Mitõngõni hadia niw̃a'õ-Gu andre: So niha si so ba da'e zi lõ mate fatua lõ ni'ilara wamasindro Lowalangi famatõrõ-Nia andrõ."
28 Mato samigu wa'ara, me no aefa Ifahaõ fefu da'õ Yesu, I'ohe ndra Fetero, Yohane, ba Yakobo yaw̃a ba zuzu hili ba wangandrõ.
29 Me fatua mangandrõ Yesu, ba tobali mbawa-Nia awõ nukhania, tobali afusi no takile.
30 Ba i'anemai'õ tohare darua niha, ya'ia Moze ba Elia si no molakhõmi haga si otarai zorugo. Fahuhuo ira khõ Yesu sanandrõsa ba wa'amate-Nia si lõ ara tõ Itõrõ dania ba Yeruzalema.
31 (9:30)
32 Me inõtõ da'õ ba no alau hõrõ ndra Fetero awõ nawõnia. Ba hiza, me tokea ira, la'ila Yesu solakhõmi, ba darua niha si so ba da'õ awõ-Nia.
33 Ba me larõi Yesu niha si darua andrõ, imane Fetero khõ Yesu, "He Guru, wa'asõkhi nahiada da'e. Da mafazõkhi tõlu nose; sambua khõ-U, sambua khõ Moze, ba sambua khõ Gelia." (Imanõ wehede Fetero me lõ i'ila hadia ia niw̃a'õnia.)
34 Me fahuohuo nasa Yesu, ba tohare lawuo solumõ'õ ya'ira, irege ata'u sibai ira.
35 Aefa da'õ terongo li soroi lawuo wanguma'õ, "Da'e nono-Gu nituyu-Gu. Mifondrondrongo khõ-Nia!"
36 Me no aefa tebato li andrõ, ba la'ila ha tõ Yesu zi so ba da'õ. Ba lõ manõ hedehede ndra nifahaõ Yesu sanandrõsa ba da'õ fefu, ba lõ la'ombakha'õ ba niha gofu ha'õkhõ, hadia ia zi no la'ila andrõ.
37 Mahemolunia mõi mitou moroi ba hili Yesu awõ nifahaõ-Nia si datõlu, ba ato niha sangondrasi Ya'ia.
38 Ba so samõsa ndra matua moroi ba gotalua niha sato andrõ si'ao, wanguma'õ, "He Guru, tolo faigi nonogu andre -- ha sambusambua ia nonogu!
39 No ira'u ia fa'abõlõ zi lõ sõkhi, ba izumaigõ mu'ao ia ba agakandro mbotonia, ba fawukhõ gilo ba mbawania. Lõ mamalõ ifakao ia fa'abõlõ zi lõ sõkhi andrõ ba lõ omasi aheta moroi khõnia!
40 No u'andrõ khõ ndra nifaha'õ-U ba wamofanõ fa'abõlõ zi lõ sõkhi andrõ, ba tebai lafofanõ."
41 Itema li Yesu, "Sindruhundruhu ami andre! Duhuduhu wa niha si no tefuyu tõdõ ami ba si lõ mamati! Ha wa'ara tõ nasa lõ tola lõ so Ndra'o khõmi ba Ubologõ dõdõ-Gu khõmi? Ohe ba da'e nonomõ andrõ!"
42 Fatua mowaõwaõ nono andrõ wangondrasi Yesu, i'olobigõ ia fa'abõlõ zi lõ sõkhi andrõ ba ikakandro'õ mbotonia. Ba Itenaw̃a wa'abõlõ zi lõ sõkhi andrõ Yesu, Ifadõhõ wõkhõ nono andrõ. Awena Ifuli nono andrõ khõ namania.
43 Ba oi ahõlihõli dõdõ niha fefu wamaigi fa'abõlõ Lowalangi fondrege zebua andrõ. Ba wa'ahõlihõli dõdõ nasa so niha sato wamaigi nilau Yesu andrõ fefu me humede Yesu khõ ndra nifahaõ-Nia, Imane,
44 "Mihaogõ wanõngõni ba bõi mi'olifugõ'õ ami wehede-Gu andre: Tebe'e sa dania Nono Niha ba danga niha."
45 Ba lõ aboto ba dõdõ ndra nifahaõ niw̃a'õ Yesu andrõ. Ba Ibini'õ da'õ khõ ndra nifahaõ, ena'õ lõ aboto ba dõdõra. Ba ata'u gõi ira wanofu khõ Yesu.
46 Alua wasosota ba gotalua ndra nifahaõ Yesu sanandrõsa haniha zabõlõ ebua ba gotaluara.
47 I'ila Yesu gera'erara, andrõ Ihalõ ndraono ba Ifezizio ba zinga-Nia.
48 Imane khõra, "Haniha zanema ono andre bõrõ Ndra'o, ba no itema gõi Ndra'o. Ba haniha zanema Ya'o, ba no gõi itema zamatenge Ya'o. Bõrõ me sabõlõ ide'ide ba gotaluami, da'õ zabõlõ ebua!"
49 Imane Yohane, "He Amagu Guru, no ma'ila niha samofanõ fa'abõlõ zi lõ sõkhi ba dõi-Mõ, ba no matenaw̃a ia wamalua da'õ, bõrõ me tenga awõda ia."
50 Imane Yesu khõ Yohane awõ nifahaõ bõ'õ, "Bõi mitenaw̃a niha andrõ, bõrõ me si lõ fa'udu khõmi, ba no awõmi."
51 Me no ahatõ ginõtõ tefazaw̃a Yesu ba zorugo, Ihalõ gangetula we'amõi ba Yeruzalema.
52 Ifowaõwaõ niha fõna-Nia, mõi ba zi sambua mbanua ba Zamaria. Ba da'õ la'asiwai fefu hadia ia khõ Yesu.
53 Ba lõ latema Yesu niha mbanua andrõ, hew̃a'ae numalõ ba Yeruzalema Yesu.
54 Me la'ila ira nifahaõ Yesu da'õ, lamane ira Yakobo ba Yohane khõ Yesu, "He So'aya, hadia omasi Ndra'ugõ na ma'andrõ galitõ moroi ba mbanua wanunu niha andre fefu?"
55 Ifaigi furi Yesu ba mofõnu Ia khõra.
56 Aefa da'õ mõi ira ba mbanua tanõ bõ'õ.
57 Fatua mowaõwaõ Yesu awõ ndra nifahaõ-Nia, so samõsa zanguma'õ khõ Yesu, "He Ama, omasido u'o'õ Ndra'ugõ gofu heza mõi'Õ!"
58 Imane Yesu, "So dõgi narõ hili ba nasu gatua, ba so gazuni ba wofo, ba hiza khõ Nono Niha lõ nahia wemõrõ."
59 Ba Imane ba niha si samõsa tanõ bõ'õ Yesu, "Tabu o'õ Ndra'o." Ba imane niha andrõ, "He Ama, tehe khõgu ua wogo'o amagu."
60 Imane Yesu, "Akha lako'o zi mate khõra si mate. Ba ya'ugõ, ofanõ, turiaigõ duria wa no Ibõrõtaigõ wamatõrõ-Nia Lowalangi."
61 So gõi danõ bõ'õ sanguma'õ, "He Ama, omasido u'o'õ Ndra'ugõ, ba tehegõ ua khõgu wangawuli ba wo'angonaisi soroiyomogu."
62 Imane Yesu ba niha andrõ, "Niha si no mamõrõgõ famaku ba laza, ba na ifaigi furi, ba tenga sinangea tobali ono mbanua Lowalangi da'õ."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA