Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mawu Yesus kimui si sire mapul᷊o dua murit'E, mase nangonggọen kawasa mědeạu manguserẹ̌ rohkẹ̌ dal᷊akị dingangu mapakapian sakị e.

² Bọu e i Sie něndoloh'i sire iapakapian taumata masasakị dingangu apẹ̌lẹ̌habar'u habaru mạanung kereapa Mawu Kasěllahenge mẹ̌parenta makoạ Datu.

³ "Abe pěmpẹ̌bawa manga apa su raral᷊engangu," angkuěng i Yesus si sire. "Abe pěmpẹ̌bawa těking, arau petang sasěmba, arau kaěng, arau roitẹ̌, arau lai manga pakeang tahạ duambaụ.

⁴ Kụ suapạewen i kamene nipakawala němpẹ̌tanạ ute pětanạe sene sarang i kamene maněntangu soa ene.

⁵ Kụ suapạewen i kamene tawe iapakawala, ute su oras'u i kamene maněntangu soa ene ute tontongko awul᷊ẹ̌ bọu laed'i kamene, ipẹ̌sahidi si sire."

⁶ Manga murit'i Yesus nahundal᷊eng mase mạngělikụ kal᷊awọu soa kụ mělẹ̌habar'u Injilẹ̌ e ringangu mạpakapian taumata masasakị su apan tampạ.

⁷ Sarạeng i Herodes mẹ̌pẹ̌parenta su Galilea nakaringihẹ̌ kal᷊awọu hal᷊ẹ̌ mạdiadi e, i sie nẹ̌bimbong. Watụ u piạ u nẹ̌bera u i Yohanes Mananahani e seng nẹ̌biahẹ̌ kapia.

⁸ Piạko l᷊ai sěnggạ nẹ̌bera, u i Elia saụ nětěngkasilo. Sěnggạ l᷊ai nẹ̌bera, u piạ sěngkatau nabi wọu manga nabi kal᷊amonane saụ nẹ̌bangung kapia.

⁹ I Herodes e ute nẹ̌bera, "Iạ seng něndoloh'u taumata nakiwusạ u těmbọ i Yohanes e. Arawe tau ěndaị e, i sai tangu i Sie? Seng lawọ takụ kinaringihẹ̌ mạanun Sie." Kụ i Herodes měngkai mědẹ̌deạ makasilo si Yesus e.

¹⁰ Ene manga rasulẹ̌ e něngkawal᷊ị e, kụ němpẹ̌běke si Yesus kal᷊awọu apang kinoạ i sire. Tangu i Yesus měngkatewe němaringang si sire, mase tamai ringangkewen sire nětěngkaghea sol᷊ong soan Betsaida.

¹¹ Kutẹu sarangke taumata l᷊awọ nakasingkạ u kerene e, i sire němpẹ̌tuhụ si Yesus. I Sie nanarimạ i sire mase nẹ̌bisaran sire mạanung kereapa Mawu Ruata e nẹ̌parenta makoạ Datu. Kụ i Sie lai napakaul᷊en masasakị e sutal᷊oaran sire.

¹² Sarạeng matangěllo nanětạe napihe, i sire mapul᷊o dua murit'i Yesus němpẹ̌haungke si Sie kụ němpẹ̌bera, "Tuang, tampạ ini kai naghea. Mapiawe i Tuang něndoloh'u taumata l᷊awọ iapẹ̌kaesẹ̌ mẹ̌deạu i sire nakapẹ̌deạ kaěng dingangu kawawunakeng su manga weọ e ringangu su manga kamponge tamai sini mạngělikụe."

¹³ Kutẹu i Yesus simimbang, "I kamene e apakaěng i sire e." Manga murit'i Yesus němpẹ̌bera, "Si kami ěndaung sěngapạen kate borotẹ̌ limambaụ dingangu kinạ duambua. Kụ apa i kami měnsang harusẹ̌ tamai mamělli kaěng baug'u taumata ini kěbị?"

¹⁴ (Kai nạung mangawe lima hiwu su kataune esẹ sene.) Mawu Yesus něhengetang su manga murit'E, "Apakaiangko i sire ěndaị e apẹ̌kamonaěng pẹ̌tahạ limang pul᷊o su kataune sěngkamonaěng."

¹⁵ Manga murit'i Yesus e němpẹ̌koạ ewe apan nipěhengetang i Yesus si sire.

¹⁶ Ene i Yesus nangal᷊ạe borotẹ̌ limambaụ dingangu kinạ duambua e mase rụdal᷊ingarạ e sol᷊ong l᷊angị e kụ nakitarimakasẹ su Mawu Ruata e. Bọu e i Sie někakakempangke borotẹ̌ dingangu kinạ e ringangkewen l᷊iman'E mase tinẹ̌gone su manga murit'E tadeạu ipẹ̌papahiạ su taumata l᷊awọ e.

¹⁷ Tangu i sire nahungkaěngke kěbị sarang něngkal᷊aedẹ̌. Kụ manga murit'i Yesus němpangomol᷊eng lěmbem bọu nikaěng i sire kakěpal᷊e mapul᷊o dua su luwene.

¹⁸ Su ěllo sěmbaụ e, piạ i Yesus měkẹ̌kal᷊iomaneng sẹ̌sane, kụ manga murit'E riměnta su anun'E. I Yesus kai nakiwal᷊o si sire, "Angkuěngkewen taumata, kai i sai Iạ e tangu?"

¹⁹ I sire simimbang, "Piạ u mẹ̌bẹ̌bera u kai i Yohanes Mananahani. Piạko l᷊ai mẹ̌bẹ̌berau kai i Elia, sěnggạete wue ute mẹ̌bẹ̌berau kai sěngkatau wọu tal᷊oaran manga nabing kal᷊imonane kụ saụ nẹ̌bangung kapia."

²⁰ "Kutẹu angkuěngbeng kamene ute i sai wue tangu Iạ ini?" angkuěng i Yesus. I Petrus simimbang, "I Tuang kai Ratu Mananal᷊amatẹ̌ seng nirianding Mawu Kasěllahenge."

²¹ Kutẹu i Yesus něhengetang su manga murit'E, "Měngkatewe kumbahang měhabarẹ̌ hal᷊ẹ̌ ene su sarang sěngkatau."

²² I Yesus něhengetang l᷊ai, "Ahus'u Taumata e mal᷊aing hinong makẹ̌dang mẹ̌tatahang u sunsara ikạdirin manga matatebone ringangu manga imang těmbonange ringangkewelain manga mananěntirong agama. I Sie sarung pateěng, arawe su katěllu ěllone sarung iapẹ̌bangung kapia."

²³ Bọu e i Yesus něhengetang su kěbị taumata apang ene sene, "I sai mapulu tumol᷊e Siạ ute harusẹ̌ mẹ̌timbul᷊eng kapulum batangenge manapuạ kuruise apang kal᷊aěllo kụ měngkatewe tol᷊e Siạ.

²⁴ U i sai mapulu mẹ̌tatahangu pẹ̌bawiahe ute sarung kailangeng u pẹ̌bawiahe. Arawe i sai manarakang u pẹ̌bawiahe waug'u Iạ e, ute sarung ipakasal᷊amatẹ̌.

²⁵ Apa wue gunane su sěngkatau managhuang kạguwạu dunia ini, kutẹu i sie makagholang dingangu kailangengu pẹ̌bawiahe?

²⁶ Kereu i sai mạmea mangakung Iạ dingangu těntiro-Ku ute Ahus'u Taumata sarung lai mamea mangakun sie su tempong i Sie sarung duměnta ringangu kawasan'E, kụ dingangu kawasang i Amang dingangkewelain kawasan manga malạekatẹ̌ masusi e!

²⁷ Kěngkasingkạko: u wọu tal᷊oarang kamene tamai ini e piạ u tawe makatemang papate e těntal᷊ang i sie reng tawe nakạsilo Mawu Ruata nẹ̌parenta."

²⁸ Mangawe sěngkamisa, Yesus naněntiron manga hal᷊ẹ̌ e, i Sie namaringang i Petrus, i Yohanes dingangi Yakobus simaka wul᷊ude, kụ nẹ̌kal᷊iomaneng.

²⁹ Kutẹu piạ e i Yesus mẹ̌kẹ̌kal᷊iomaneng sene, ghatin'E nẹ̌bal᷊ui ringangu pakeang'E kụkerong nẹ̌těngkawira.

³⁰ Ene sěngkal᷊ěndị e piạ taumata ruang katau i Musa rẹ̌duan Elia nẹ̌těngkasilo su ral᷊ungu tualagẹ̌ bọu sorga. I sire mạhumbisaran Yesus mạanung kapapohong'E seng tawẹ karěngụe lai sarung dal᷊engang'E su Yerusalem.

³¹ (9:30)

³² Su tempo ene i Petrus dingangu manga hapị e mẹ̌tẹ̌tikị, sěngkianu něngkapuko ringangu nakasilo si Yesus siměnnang dingangu ruang katau mạhundarisi dingang i Sie.

³³ Ene piạ e i rẹ̌dua e mẹ̌tẹ̌tal᷊eịen Yesus tangu i Petrus e kai nẹ̌bera si Yesus, "Tuang Guru, napiang koạ e i kitẹ sini. Mapiangbe i kami měndarisị sello tatěllu: sěmbaụ si Tuang, sěmbaụ si Musa ringangu sěmbaụ l᷊ai si Elia." (I Petrus nẹ̌bera kerene wěga wue kai apa iwẹ̌berane.)

³⁴ Kutẹu i Petrus kạpẹ̌berane, piạ e winawa kụ nangěllung si sire, hakịu i sire něngkatakụ.

³⁵ Kutẹu wọu winawa ene kinaringihẹ̌ tingihẹ̌ mẹ̌bẹ̌bera, "Ini e Ahusẹ̌-Ku pinile-Ku. Pẹ̌daringihẹ̌ si Sie!"

³⁶ Sarạeng tingihẹ̌ ene nangẹ̌dung, i sire nakasilọe si Yesus sẹ̌sane sene. Manga murit'i Yesus měngkatewe něnděmmasu kěbị ene, dingangu tawe němpẹ̌běke si sai-sai apang kụ seng kinasilon sire.

³⁷ Sěngkariọěllone i Yesus dingang i sire těllu murit'E kạpahunděsunge wọu wul᷊ude ene, kụ gapaěng u taumata l᷊awo mạněnsomahẹ̌ si Yesus.

³⁸ Sěngkatau esẹ bọu tal᷊oaran taumata l᷊awọ e nẹ̌pal᷊ehe, "Tuang Guru, tul᷊ungko kakěllai anạku -- kai mang sěmbaụ ene anạku e!

³⁹ Kamageng rohkẹ̌ dal᷊akị sumake si sie, i sie měngkatewe pẹ̌sěngkianu mẹ̌pẹ̌pal᷊ehe ringangu wadang e iapẹ̌kẹ̌kahimbẹ̌sọ e hakịu mẹ̌nẹ̌něbu mohonge. Rohkẹ̌ ene měngkatewe mạpakạbaụ i sie ringangu tawe sumẹ̌bang bọu anune!

⁴⁰ Iạ seng bọu nẹ̌dorong su manga murit'i Tuang, apạnokol᷊'u rohkẹ̌ ene, kaiso i sire mang ta makakoạ."

⁴¹ I Yesus simimbang, "Bal᷊inewe mal᷊ongkọ i kamene ini! I kamene mang těngadẹ̌ taumata makakal᷊ubengkọ dingangu tawe mangimang! Delaing kạděngụe Iạ harusẹ̌ mẹ̌tanạ dingangi kamene ringangu mẹ̌tingkědang i kamene? Ramahịe wawa anạu ene!"

⁴² Kutẹu rariọ buhụe lụhaung si Yesus, rohkẹ̌ dal᷊akị e mapẹ̌dẹ̌dal᷊ahintụ i sie hakịu wadange mapẹ̌kakahimbẹ̌sọe. Kụ i Yesus nangoro rohkẹ̌ dal᷊akị ene pasẹ̌bang kụ dariọ e napiạe. Mase rariọ ene nịsasul᷊e si amange.

⁴³ Kěbị taumata e mangkewen němpẹ̌dal᷊inaụ nakasilo kawasan Duata e kawe kereng kawantuge. Su tempong i sire měngkatewe wẹ̌dang měngkạherangu nakasilo apang kěbị kẹ̌koateng'E, ute i Yesus něhengetang su manga murit'E,

⁴⁴ "Pẹ̌kakěllako pakapia-pia kụ ariẹbe kiwul᷊ei manga hengetang-Ku ini: Ahus'u Taumata e sarung isarakang su kawasan taumata e."

⁴⁵ Arawe manga murit'i Yesus e tawe nakaěnna waweran'E e. Kụ hal᷊ẹ̌ ene měngkai mạdal᷊irung si sire, madiringu i sire makaěnna. Kutẹu i sire ghụgoẹ̌ makiwal᷊ong hal᷊ẹ̌ ene si Sie.

⁴⁶ Su tal᷊oaran manga murit'i Yesus měmpẹ̌dẹ̌darendeh'u mạanung měnsang i saị e wọi sire kạguwakenge.

⁴⁷ I Yesus masingkạu tiněnnan sire, hakịu ene i Sie nangal᷊ạ sěngkatau rariọ kạdodọ kụ niapararisịe su rẹ̌duh'E.

⁴⁸ Mase i Sie něhengetang su manga murit'E, "I sai manarimạ u rariọ ini ual᷊ing u Iạ e mangal᷊ene ute měnarimạ u Iạ. Kụ i sai měnarimạ u Iạ e, ute měnarimạ i Sie kụ něndoloh'u Iạ e. Batụu i saing kakạdọdokang e su tal᷊oarang kamene e, i sie kai kạguwakenge!"

⁴⁹ I Yohanes nẹ̌berau, "Tuang, i kami nakasilo piạ tau mạnokol᷊u setang su ral᷊ungu arengi Tuang, kụ i kami nẹ̌sěding i sie, watụ u i sie wal᷊inewe wọ'i kitẹ."

⁵⁰ "Abe pẹ̌sẹ̌ding i sie," angkuěng i Yesus si Yohanes dingangu manga murit'i Yesus wal᷊ine, "u i sai tawe rumokạ si kamene, ute su sěmbẹ̌kang kamene."

⁵¹ Ene sarạeng maraning tempone i Yesus mahengkẹ sol᷊ong sorga, i Sie namutusẹ̌ tadeạu makoạ sol᷊ong Yerusalem.

⁵² Tangu i Sie rimolohen tau niapangal᷊imona si Sie. I sire apan nirolohẹ̌ ene nahundal᷊engke, mase nahunsuẹ̌ e su kampong sěmbaụ su Samaria mědeạu měndiahing kěbị ene si Yesus.

⁵³ Kaiso i sire su kampong ene tawe manarimạ i Yesus, batụu mamben mal᷊ahẹ-lahẹ u i Sie kawe kạdal᷊enge sol᷊ong Yerusalem.

⁵⁴ Tangu, su tempong manga murit'i Yesus kụ i Yakobus dẹ̌duan Yohanes nasingkạeng hal᷊ẹ̌ ene, i sire němpẹ̌berạ e, "Mawu, kawe Mawu mapulu, i kami mẹ̌gahagho tadeạu piạ putung ěnaẹ katěntung bọu l᷊angị kụ panutung si sire ini e?"

⁵⁵ I Yesus nẹ̌biling, mase namal᷊ěndihẹ̌ si rẹ̌dua e.

⁵⁶ Bọu e i sire něngkakoạ e sol᷊ong kampong bal᷊ine.

⁵⁷ Kutẹu i Yesus dingangu manga murit'E kạpahundal᷊enge, piạ tau nẹ̌bera si Yesus, "Tuang, iạ mapulu tumol᷊e si Tuang suapạewen dal᷊engangu e!"

⁵⁸ I Yesus simimbang, "Dal᷊ugẹ̌ e piạ liange ringangu manụ u kinoaěng e piạ pangangěllungange, arawe Ahus'u Taumata ute tawẹ u pangirul᷊umang u těmbọ e."

⁵⁹ Mase i Yesus něhengetang su sěngkatau wal᷊ine, "Tol᷊ẹ e si Siạ." Arawe tau e nẹ̌bera, "Tuang balako iạ mapul᷊ẹ kal᷊imona mělẹ̌bing i amangku e."

⁶⁰ Yesus simimbang, "Balạe taumata nate e apělẹ̌bing u taumatane nate sẹ̌sane. Arawe i kau, rakọ e kụ pangekeng habar'u Mawu Ruata seng nanětạ e nẹ̌parenta."

⁶¹ Piạ l᷊ai sěngkatau wal᷊ine nẹ̌bera, "Tuang, iạ mapulu tumol᷊e si Tuang, kụ balako iạ mapul᷊ẹ kal᷊imona mědeạu mẹ̌katạ."

⁶² Yesus něhengetang su tau ene, "Kụ seng nanětạ němungkalang ěntana e, mase mẹ̌bihu sol᷊ong l᷊ikude, ute tawe hinone makoạ komol᷊angu umat'u Mawu Ruata."

Lukas

Video Lukas 9

Ikuti Kami:

KONTAK | PARTISIPASI | DONASI