Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai ipatumpu ma na sapuluh dua ai; ibere ma bani sidea gogoh ampa kuasa mangimbang sagala setan-setan ampa pamalum naborit.
2 Isuruh ma sidea mamaritahon Harajaon ni Naibata ampa pajorgitkon halak.
3 Nini ma hubani sidea, “Ulang ma boan hanima atap aha pe hu pardalanan, barang tungkot, barang ranjut, barang ruti, barang duit, barang dua baju pe.
4 Anggo masuk hanima bani sada rumah, ijai ma hanima tondok, lanjar hunjai ma hanima misir use.
5 Anggo adong na so manjalo hanima, pirpirhon hanima ma orbuk na longkot bani naheinima sanggah na laho hanima hun huta ai bahen hasaksian dompak sidea.”
6 Jadi laho ma sidea, idalani sidea ma huta-huta ai, laho mangambilankon Ambilan Na Madear, ampa pamalumkon atap ija-ija pe.
7 Raja Herodes pe, ibogei do haganup na masa ai, gabe mabiar ma ia, halani adong deba halak na mangkatahon, na dob ipapuho do si Johannes humbani na matei;
8 na deba nari mangkatahon na dob roh do si Elias, anjaha na legan use, paboa na dob mulak manggoluh do sada halak humbani nabi na basaia.
9 Tapi ihatahon si Herodes ma, “Anggo si Johannes domma hutampul uluni, tapi ise do on, na hubogei on baritani?” Anjaha ipangindo uhurni do sihol idahonni Ia.
10 Dob mulak apostel ai ibaritahon sidea ma hubani Jesus haganup na binahen ni sidea ai, gabe iarahkon ma sidea surut bani sada huta na margoran Betsaida.
11 Dob ibotoh na mabuei ai pasal ai, irikkon sidea ma Ia; ijalo Jesus ma sidea, ibaritahon ma bani sidea pasal Harajaon ni Naibata, anjaha ipamalum ma sagala na porlu sipamalumon.
12 Marayak bod ari, roh ma na sapuluh dua ai mangkatahon hu Bani, “Pamisir Ham ma na mabuei in, ase laho sidea hu huta-huta ampa hu parjuma-juma na inggot in, mangindahi tondokan ampa sipanganon, ai halimisan do iananta on.”
13 Tapi nini ma hubani sidea, “Bere hanima ma sidea mangan!” Jadi nini sidea ma, “Seng dong banta lobih humbani lima ruti ampa dua dengke, anggo seng laho hanami mamboli sipanganon bani halak na mabuei on ganup.”
14 Ai adong do ijai hira-hira lima ribu halak dalahi. Anjaha nini ma hubani susian-Ni ai, “Hatahon hanima ma sidea hundul mar sasatumpuan, lima puluh satumpuan.”
15 Ibahen sidea ma sonai, ipahumpul ma sidea haganup.
16 Jadi ibuat Jesus ma ruti na lima ai ampa dengke na dua ai, anjaha dob mangkawah Ia dompak datas anjaha ihatahon tarima kasih, ipartopik ma ai, anjaha iberei ma bani susian-Ni, ase sidea mambagihon bani na mabuei ai.
17 Mangan ma sidea anjaha bosur bei do haganup; ipatumpu do teba-teba na lobih ai, gok sapuluh dua bantei.
18 Bani na sahali, sanggah martonggo Ia sahalaksi, rapkonsi do susian ai. Jadi isungkun ma sidea, “Ise do Ahu, nini halak simbuei?”
19 Jadi nini sidea ma mambalosi, “Si Johannes Pandidi do,” na legan mangkatahon “si Elias,” anjaha na legan use, “Sada humbani nabi na basaia, na dob mulak manggoluh.”
20 Tapi nini ma hubani sidea, “Ia hanima, ise do Ahu nini hanima?” Jadi nini si Petrus ma mambalosi, “Kristus ni Naibata do Ham!”
21 Jadi pangkei ma sidea ipalumba, ase ulang ipatugah-tugah ai age bani ise.
22 Lanjar ihatahon ma, “Ia Anak ni Jolma in maningon buei do sitaronon-Ni, ambukkonon ni pangintuai-pangintuai, sintua ni malim ampa sibotoh surat do Ia, dob ai bunuhonni, anjaha mulak manggoluh do bani ari patoluhon.”
23 Tapi nini ma hubani sidea haganup, “Barang ise na sihol mangirikkon Ahu, iparnalang ma dirini, iporsan ma silangni ari-ari laho mangihutkon Ahu.
24 Ai magouan hosah do na sihol paluahkon hosahni, tapi na magouan hosah halani Ahu, ai do na pagoluhkonsi.
25 Ai aha ma gunani bani jolma, age ganup dunia on dapotsi, anggo magou anjaha hona uhum ia marhitei ai?
26 Ai barang ise na maila halani Ahu ampa halani hatang-Kin, pailaon ni Anak ni Jolma in do ia sanggah na roh Ia ibagas hasangapon-Ni ampa hasangapon ni Bapa in rap pakon malekat na susi in.
27 Tapi tongon do na Huhatahon on bannima, adong do deba na jongjong on ijon, na so mangahap hamatean ope, anggo lape ididah roh Harajaon ni Naibata.”
28 Hira-hira ualuh ari, dob salpu parsahapan ai, iarahkon Jesus ma si Petrus, si Johannes ampa si Jakobus tangkog hu sada dolog, laho martonggo.
29 Jadi, sanggah na martonggo ai Ia, mubah ma rupa ni bohi-Ni, anjaha pakeian-Ni pe lopak ma marlinang-linang.
30 Anjaha tonggor ma, adong do dua halak marsahap-sahap pakon-Si, ai ma si Musa ampa si Elias,
31 na marhasangapon idahon, anjaha isahapkon sidea do pasal ujung ni langkah-Ni, sidobkonon-Ni i Jerusalem.
32 Tarpodom do anggo si Petrus ampa hasomanni na dua ai. Tapi dob puho sidea, ididah sidea ma Jesus ibagas hasangapon-Ni ampa sidua halak, na jongjong i lambung-Ni ai.
33 Anjaha sanggah na sihol laho ai sidea humbani Jesus, nini si Petrus ma hu Bani, “Guru, dearni in ijon hita! Ipauli hanami ma tolu sopou-sopou, sada Bamu, sada bani si Musa anjaha sada bani si Elias.” Seng ibotoh, aha na hinatahonni ai.
34 Mangkatahon ai ope ia, roh ma sada hombun manlinggomi sidea, gabe mabiar ma sidea, sanggah na masuk sidea hubagas hombun ai.
35 Jadi roh ma sada sora humbani hombun ai, na mangkatahon, “On do Anak-Ku, na Hupilih in, tangihon nasiam ma Ia!”
36 Dob salpu marhata sora ai, sasada Jesus mando jumpah sidea ijai. Sip do sidea, seng ipatugah sidea na nididah ni sidea ai atap hubani ise pe bani panorang ai.
37 Patarni ai, sanggah tuad sidea hun dolog ai, roh ma buei halak manjumpahkon-Si.
38 Jadi tonggor ma, adong ma sada dalahi humbani na mabuei ai mandilohon, “Guru, sombahku Bamu, marpanatap ma Ham bani anakkon, sasadasi do anakku.
39 Tonggor Ham ma, anggo irotol setan ai ia, sompong ma ia mandoruh; isontap-sontap do ia ronsi na marguboh pamanganni; igosa-gosa do ia, anjaha mahol do ia surut hun bani.
40 Domma huelek-elek namin susianmu on, ase iusir namin setan ai, tapi seng mangasup sidea.”
41 Jadi nini Jesus ma mambalosi, “Bangsa na so porsaya anjaha kahou! Sadiha dokah nari Ahu rap pakon hanima, anjaha paanju-anjuon-Ku hanima? Boan ham ma anakmu in hujon!”
42 Sanggah na roh ai ia, idorab setan ai ma ia anjaha ipugulhon. Tapi isorgang Jesus ma setan na jahat ai anjaha ipamalum ma dakdanak ai; iondoskon ma ia bani bapani.
43 Haganup do longang pasal kuasa ni Naibata na banggal ai. Sanggah na longang ai haganup halani pambahenan-Ni ai, nini ma hubani susian-Ni ai,
44 “Tangihon hanima ma hatang-Kon, ondosonkon ma Anak ni Jolma in hu tangan ni halak.”
45 Tapi seng iarusi sidea hata ai, ponop do ai humbani sidea; anjaha mabiar do sidea manungkun-Si pasal hata ai.
46 Jadi tubuh ma pingkiran i tongah-tongah ni sidea pasal ise do sidea sibanggalan.
47 Tapi ibotoh Jesus do pingkiran ni sidea ai, gabe ialop ma sada dakdanak, ipajongjog ma ai i lambung-Ni,
48 anjaha ihatahon ma bani sidea, “Na manjalo dakdanak on ibagas goran-Ku, Ahu do na jinaloni ijai, anjaha na manjalo Ahu, na marsuruh Ahu do jinaloni ai. Ai barang ise sietekan i tongah-tongahnima, ia do sibanggalan.”
49 Tapi nini si Johannes ma mambalosi, “Guru, ididah hanami do sada halak mangusir setan marhitei goran-Mu, gabe ipandang hanami ma ia, halani seng siirikkon Ham ia songon hanami.”
50 Tapi nini Jesus ma hu bani, “Ulang pandang hanima ia, ai ise na so mangimbang hanima, hasomannima do.”
51 Jadi dob lambin dohor ari parbangkit-Ni, idompakkon ma bohi-Ni mardalan hu Jerusalem.
52 Isuruh ma suruhan parlobei-Ni. Jadi laho ma sidea, imasuki sidea ma sada huta ni halak Samaria, laho patorsa parbornginan Bani.
53 Tapi seng ra sidea manjalo-Si, halani na laho hu Jerusalem ai Ia.
54 Mangidah ai susian-Ni, si Jakobus ampa si Johannes, ihatahon sidea ma, “Tuhan, dear do uhur-Mu ihatahon hanami turun apuy hun datas, mamboiskon sidea?”
55 Tapi marhusor ma Ia, anjaha ihata ma sidea, nini ma, “Lang ibotoh hanima, atap tonduy aha do na bannima?”
56 Jadi hu huta na legan ma sidea laho.
57 Sanggah mardalani sidea, nini sada halak ma hu Bani, “Sai irikononku do Ham, barang huja pe Ham laho!”
58 Tapi nini Jesus ma hu bani, “Na marliang do sorigala, anjaha na marasar do manuk-manuk na i awang-awang, tapi anggo Anak ni Jolma in, hatibalan ni ulu-Ni pe seng dong.”
59 Bani na legan ihatahon, “Irikkon ma Ahu!” Tapi nini ma, “Lopas Ham lobei ahu, laho mananom bapa!”
60 Tapi nini hu bani, “Paturut ma na matei mananom na mateini, tapi anggo ho, laho ma mamaritahon Harajaon ni Naibata.”
61 Sada halak na legan use mangkatahon, “Huirikkon pe Ham Tuhan, tapi lopas Ham lobei ahu martading hata hubani sinrumahku.”
62 Tapi nini Jesus ma hu bani, “Na manjamah tinggala anjaha na mangkawah dompak pudi, seng talup masuk ai bani Harajaon ni Naibata.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA