Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali tempo etu boros kojo tau kangguyu-ngguyu mangampago i Yesu. Tau etu bara sawei nsowu kaborosinya see naka sira masilombu witinya. Wali tempo etu i Yesu mampogomboka ruyu anaguruNya, Ia manganto’o, “Pakatao kojo naka ne’e komi mangalulu lengko nto Yahudi to aliran Parisi, apa sira tau to ojo gombonya semo to manoto. Wali lengko nsira etu maya raporapaka ewa ragi apa kanjo’u njo’u kaboroboros tau to mangalulu. Wali pakatao kojo naka ne’e komi seja mangalulu.
2 Apa nempo gombo nsira manoto, pei kamonsonya raya nsira maja’a. Raya nsira etu taa nansani nsa’e ri tempo si’i. Pei samparia to taa ransani ri tempo si’i, samparia etu darapaponsanika. Pasi samparia to taa rakita ri tempo si’i, to etu darapapokitaka.
3 Wali apa saba darata temponya samparia darapaponsanika, jagai kojo gombo ngkomi see ojo anu to monso to rato’o. Apa samparia to rato’o ri tempo tare tau to yusa mangandonge, anu to etu danadonge ntau boros. Pasi anu to rapojawaka resi yunu nja’u raya nsongi to raba’a wombonya, anu to etu darapakarebaka seja resi tau boros, raporapaka ewa tau to kaboo yako ndate wumbu banua.
4 “Wali yunu-yunungKu, Aku manganto’oka komi, monso pu’u, ane tau, ia nakurang mangampopate yau koro ngkomi, pei roo see tamo re’e bara kesaa to ia maya mangika damampakaja’aka yau komi. Wali ne’e meka resi tau.
5 Pei Aku mampatiendoka yami komi i sema to masipato komi mampalaika pasi manga’angga. Etu semo i Pue Allah. Apa Ia nakurang mangampopate yau koro ntau, roo see Ia re’e kuasa damamponasoka yau tau etu lo’u apu naraka. Wali Aku manganto’oka komi masipato komi mampalaika Ia saba manga’angga kuasaNya etu, pei ne’e mampokeka tau.
6 “Pei pamporayang i mPue Allah bae kojo. Pobuuka ruyu tonsi dena. Tonsi etu lima mba’a olinya dua ngkomba doi to kodi kojo. Pei nempo taa bae batuanginya tonsi etu, tare pasi samba’a to nakalingan yau i mPue Allah.
7 Wali gete, taa manto’o komi! I Pue Allah mamporayang kojo komi, see naka sakowa toko mbayua ndate wo’o ngkomi, Ia mangansani kaborosinya. Wali ne’e meka mampobuuka bara kesaa to damawali resi komi ri lino si’i, apa komi semo to bae-bae batuanginya resi i Pue Allah sakowa dena to boros kojo, wali Ia damangararamaka katuwu ngkomi.
8 Wali Aku manganto’oka komi, i sema-sema tau to mampongakung ri tango ntau boros, manganto’o, ‘Aku mangalulu i Kerisitu,’ tau etu Aku, Wiyaa nto Lino, daKupongakung seja ri tango mpomakau i mPue Allah ndate saruga manganto’o, ‘Tau etu monso pu’u mangalulu Aku.’
9 Pei i sema-sema tau to mamposapuka Aku ri tango ntau boros, manganto’o, ‘Aku taa mangalulu i Kerisitu,’ ane ewa see Aku damamposapuka seja tau etu ri tango mpomakau i mPue Allah ndate saruga, pei manganto’o, ‘Tau etu taa kojo mangalulu Aku.’ Ewa wetu to Aku damanganto’oka pomakau etu.
10 Pasi Aku manganto’oka seja komi i sema tau to magombo mangewa Aku, Wiyaa nto Lino, tau etu tiroo maya ralapas dosanya etu. Pei tau to manto’o maja’a i Nosa Mapasing, tau etu taa daralapas dosanya etu.
11 “Pei ane komi to mangalulu Aku, komi danasawang i Nosa Mapasing. Ri tempo to darata tau damangansoko komi pei mangkeni komi darabotus nja’u banua to napampotunde nto Yahudi, bara ri tango ngkepala-kepala bara ri tango mpomarenta apa saba komi mangalulu Aku. Pei tempo etu ne’e moru-moru raya ngkomi mampobuuka yami bara gombo kesaa to danusonoka ngkomi pasi ewa wimba danuika ngkomi manganto’o gombo etu.
12 Apa tempo komi damampogomboka tau to re’e kuasanya etu, tempo etu semo panewa i Nosa Mapasing damampaponsanika komi gombo to darato’o.”
13 Wali yako etu re’e samba’a tau ri oyo ntau boros to manganto’oka i Yesu, “Pa’a Guru, tukakangku bo’onya mangantilaka aku panta to yako ri pa’a mami. Wali to’oka ia tilaka aku!”
14 Wali i Yesu manganto’oka ia, “Gete, korom. Tare tau to room mangokotaka Aku damawali ketua ada ngkomi santukaka.”
15 Roo see, Ia manganto’oka wo’u tau boros, “Pakatao kojo naka ne’e komi mawali bamporomung. Apa nempo bae kasugi ntau ri lino, si’a kasugi etu to mangawaika ia katuwunya.”
16 Panewa i Yesu manganto’oka sira rapa, Ia manganto’o, “Re’e samba’a tau sugi to nawunya mawali kojo kalingaa.
17 Wali ia mampobuuka, ‘Wimba dakuika, apa tamo soa konda dakupamposaka wua ngkalingaangku si’i’.
18 “Panewa ia mampobuuka, ‘Ewa si’i dakuika. Aku damangabungkas yau samparia kondangku panewa aku damangawangu konda to bae wo’u see soa tampa dakupamposaka wua ngkalingaa pasi ngaya-ngaya.
19 Panewa roo see aku maya manganto’oka korongku, “Bae dalengku! Tamo re’e kesaa to dakupo’ipu nempo malagi nto’u. Wali aku damamposau-sau ruyu, pei damangkoni-ngkoni pei manginunginu, mampakasanang rayangku.”’ Ewa wetu pampobuuka ntau sugi etu.
20 “Pei i Pue Allah manganto’oka ia, ‘Korom tau bea apa nene si’i semo korom dapura nosamu. Wali gete! Kasugi to nuporomung ngkorom etu tamore batuanginya resi korom. Tau to yusa semo to damangantima!’”
21 Wali ojo karoonya i Yesu manganto’o rapa etu, Ia manganto’oka wo’u tau boros, “Wali samparia tau to ojo mamporomungika koronya kasugi ri lino si’i, pei to taa manga’angga anu to bae batuanginya resi i Pue Allah, tau etu sewaju ewa tau sugi to Kuporapaka etu.”
22 Wali ojo karoonya i Yesu mampogomboka tau boros etu, Ia manganto’oka wo’u anaguruNya, “Wali si’a kasugi ngkomi ri lino si’i to bae batuanginya resi i Pue Allah. See naka Aku manganto’oka komi ne’e mampomoruka doi to danupake ngkomi damangarata anu to danupake. Ne’e mampobuu-buuka, ‘Bara yako imbare darapangarata pangkoningku?’ Pasi ne’e seja mampomoruka koro ngkomi, mampobuuka, ‘Bara yako imbare darapangarata pakengku?’
23 Wali ne’e mampomoruka anu etu apa katuwu semo to bae-bae batuanginya pei pangkoni, pasi koro semo to baebae batuanginya pei pake. Wali i Pue Allah semo to mangawaika komi katuwumu pasi koromu, wali taa manto’o Ia damangawaika seja komi pangkoni pasi pake.
24 Pobuuka katuwu ntonsi papaa. Sira tare mamuya bara mamota. Pasi sira tare konda to darapamposaka pangkoni. Pei i Pue Allah semo to mampotungku sira. Wali taa manto’o komi pei taa danawaika i mPue Allah pangkoni apa komi semo to bae-bae batuanginya pei tonsi!
25 Wali tare batuanginya komi moru-moru rayamu. Apa kamoru ndaya taa kojo maya mangansawang komi see datidugang wo’u katuwu ngkomi nempo ojo samba’a jam kasaenya.
26 Wali ane kamoru ndaya ngkomi taa damangadugang katuwu ngkomi nempo ojo samba’a jam, tare batuanginya komi mampomoruka palaong to yusa.
27 “Pasi pobuuka seja katuwu ngkaya to magaya sesenya, apa kaya etu taa mapalaong see mangarata sesenya etu. Pei Aku manganto’oka komi sakowa bue ngkita, i Makole Salomo to meyawa kojo tempo owi, ia taa seja re’e pakenya to gaya-gaya pei sese ngkaya etu.
28 Wali kaya etu taa bae kojo batuanginya apa nempo tuwu seo si’i, nile tamo re’e apa roomo rawetas yau pei ratunju yau. Pei nempo taa bae batuanginya, kaya etu tiroo nawaika i mPue Allah sesenya to raporapaka ewa pakenya. Wali ane kaya to taa bae batuanginya etu pei nawaika i mPue Allah pakenya, taa manto’o komi. Gete komi kodi kojo pangayamu apa komi taa mansarumaka i Pue Allah damangawaika komi anu to danupake!
29 Wali ne’e moru-moru sampe manganto’o, ‘Bara kesaa to dakukoni?’ pasi ‘Bara kesaa to dakuinu?’ Ne’e bata-bata rayamu mampobuuka i Pue Allah bara taa damangararamaka katuwu ngkomi.
30 Apa etu semo to napobuuka ntau to taa mangansani i Pue Allah. Wali ne’e manganto’o ewa wetu. Apa Pa’a ngkomi to ndate saruga, Ia mangansani komi parluu samparia anu to etu.
31 Wali ne’e anu ri lino si’i to mawali bae kojo batuanginya resi komi. Pei to masipato mawali bae kojo batuanginya resi komi, etu semo mangabiaka i Pue Allah mawali Makole ngkomi. Apa ane ewa wetu nuika ngkomi, komi darawaika seja samparia anu to parluu ngkomi etu.
32 “Wali komi to anagurungKu to taa boros, ne’e meka, apa masanang kojo Pa’amu mangika see komi mawali tau to Ia Makolenya.
33 Wali pobalu ngaya-ngaya ngkomi pei waika doinya resi tau to masiasi. Panewa poromung kasugi to ndate saruga, apa kasugi to etu maya raporapaka ewa dompet to taa dapura yau bananginya. Pasi ndate ria tare to palima to masua damangoko yau kasugimu pasi taa seja re’e ane to mampakaja’aka yau kasugi etu.
34 Wali ika palaong to bae batuanginya see re’e kasugi ngkomi ndate saruga. Apa imbare kasugimu, etu semo to napobuu-buuka ngkomi.”
35 Wali yako etu i Yesu manganto’o wo’u, to’oNya, “Pakaroso raya mangampeas temponya Aku dama’i muni. Ika ewa naika nto papolaong to manaa mangampeas kama’i muni ntau puenya yako nja’u roa mpaporongo. To papolaong etu roomo mamposunsuka pake nsira damapalaong, pasi roomo mangantuni pansonanya see tempo tau puenya ma’i muni pei sira mangandonge ia ratamo ri tango mbombo pei mampokio sira, sira nakurang mansaka mangalokaka ia ba’a mbombo etu.
36 (12:35)
37 Wali masanang to papolaong etu ane tau pue nsira mangarata sira manaa mangampeas ia nempo ntongo wuri bara mosueo karatanya. Aku manganto’oka komi, ane ewa see lengko nsira, tau puenya damangawali yau pake to si ia panewa damanganto’oka to papolaonginya etu, ‘Patunda, aku semo damampokoni komi.’
38 (12:37)
39 Pasi pobuuka seja rapa si’i mangkonong to palima. Ane tau pue banua mangansani yami bara jam sawei danakama’i nto palima ri raya mburi, ia taa dayore pasi ia taa damangabiaka to palima etu mampakaja’aka yau banuanya see damasua damangoko yau ngayangayanya.
40 Wali ewa see seja komi jagai kojo ne’e lenga mangampeas kama’ingKu see sigena komi ane Aku rata. Apa ri tempo to komi taa mampobuuka bara dama’i Aku, Wiyaa nto Lino, tempo etu semo Aku dama’i.”
41 Wali ojo karoonya i Yesu manganto’o rapa etu, i Petrus manganto’oka Ia, “Pue, bara i sema kamonsonya to papolaong to matao to nuporapaka ngKomi etu, bara kami bara samparia tau?”
42 Wali i Pue mangansono, Ia manganto’o, “To papolaong to matao etu, etu semo tau to ewa si’i lengkonya. Rapanya to papolaong to masipato rasarumaka pasi to pande, ane tau pue banua dayau njo’u longko, to papolaong to etu semo to nasarumakaka ntau puenya damampasilonga to papolaong to yusa. Wali to papolaong to rasarumaka etu ia semo to mangawaika yununya pangkoninya samba’a pei samba’a ane ratamo tempo mangkoni.
43 Wali masanang kojo to papolaong to etu tempo karata muni ntau puenya ane tau puenya etu mangarata ia madota mangangika palaong to rasarumakaka resi ia etu.
44 Wali Aku manganto’oka komi, monso pu’u to papolaong to masipato rasarumaka etu ia danato’oka ntau puenya, ‘Yako tempo si’i korom semo to mampasilonga samparia to aku puenya.’
45 Pei rapanya to papolaong etu mampobuuka, ‘Masaewa panewa rata muni tau puengku.’ See naka ia mula mangantidas yununya to papolaong seja, to we’a pasi to langkai. Pasi ia ojo mangkoni-ngkoni pasi manginu-nginu see naka kayangu.
46 Wali ane ewa see kesaa to damawali resi ia? Ewa si’i damawali. Ane ratamo eo pasi jam to taa napondayaka nto papolaong etu puenya bara darata muni, tempo etu semo tau puenya darata muni. Panewa puenya mapari kojo danaika mangahuku ia panewa damamposaka yau ia nja’u tampa to masipato darapamposaka tau to taa mangaya i Pue Allah.
47 “Wali to papolaong to manasanya pamporani ntau puenya pei ia taa mampakaroso damangika anu to naporani ntau puenya etu, tau etu daratidas mapari kojo.
48 Pei to papolaong to taa manasanya pamporani ntau puenya see naka ia mangika palaong to masipato rahuku, tau etu daratidas seja pei taa mapari kojo. “Wali ane boros to rawaika resi tau, ane ewa see boros seja to naporani i mPue Allah tau etu damangawai. Pasi ane boros to rasarumakaka resi tau, ane ewa see i Pue Allah mamporani tau etu damadota kojo mangampake anu to rasarumakaka resi ia etu.”
49 Wali roo see i Yesu manganto’o rapa, Ia manganto’o, “Palaong to daKuika ri lino si’i maya raporapaka ewa apu to mangkoni yau samparia anu to maja’a. Apa yako palaongingKu etu see naka nangi anu to maja’a. Wali ane ewa pamporaningKu, matao ane apu etu roomo rapotuwu.
50 Pei ri katawanya palaong etu mawali, Aku tiroowa damangarata kasesa to mapari kojo. Kasesa etu dakono juku ri korongKu, see naka maya raporapaka ewa ue to rapangayo’o tau tempo rabaptis. Wali Aku taware kasanang ndayangKu ane tawa roo kasesa etu.
51 Wali komi bara mampobuuka apa saba Aku ma’i rapoanaka ri lino si’i see naka tau ri lino si’i damawali masingkatao samba’a pei samba’a. Pei si’a ewa see. Kasimbalinya yako etu, apa saba Aku ma’i see naka tau damawali masimpayu raya nsira samba’a pei samba’a apa re’e to mangaya Aku pasi re’e seja to taa mangaya.
52 Wali yako ri tempo si’i tau tamo damasingkatao. Rapanya lima mba’a tau to samba’a banua. Tau etu daraga’a see togo sira damangewa tau dua. Pasi tau dua etu damangewa sira togo.
53 Wali pa’a damangewa ananya to langkai, pasi ana langkai damangewa pa’anya. Pasi indo damangewa ananya to we’a pasi ana to we’a damangewa indonya. Pasi ewa see seja temanua to we’a damangewa manianya to we’a, pasi mania to we’a damangewa temanuanya to we’a. Wali etu semo palaong to damawali apa saba Aku ma’i ri lino si’i.”
54 Wali yako etu i Yesu manganto’oka tau boros, Ia manganto’o, “Ane ri tana ngkita si’i, ane komi mangkita limu to ma’i yako ri tondo kasoyo nu eo, komi manganto’o, ‘Kita damangarata uja upu sire.’ Panewa rata kojo uja etu.
55 Pasi ane ma’i ngoyu yako ri tondo selatan, komi manganto’o, ‘Darata temponya eo mapoi.’ Panewa rata kojo eo mapoi etu.
56 Gete komi to ojo gombomu manoto! Ojo anu to taa bae kojo batuanginya ewa rao, ojo to etu to mawali bae batuanginya resi komi. Wali ane komi mangansani mampasisala tondong to mawali ri yangi pasi ri lino ane mangkonong rao, maka pei komi taa mangansani batuanginya tondong to napapokitaka i mPue Allah komi mangkonong Aku? Tondong to etu to bae-bae batuanginya pei rao.
57 “Pasi maka pei komi taa mangabotus palaong to imba to masipato raika? Etu semo pojea see maya masingkatao yami pei i Pue Allah ri katawanya rapangabotus to lino.
58 Palaong to etu maya raporapaka ewa si’i. Rapanya re’e tau to masusa rayanya apa saba palaong to nuika ngkomi resi ia, pasi tau etu rani mangkeni palaong etu resi to pobotus. Ane ewa see, to tao-tao komi mampeyaa kojo masingkatao muni resi ia tempo tiroowa ri raya mpalinja ngkomi yau mampago to pobotus naka ne’e ia damangkeni komi ri tango nto pobotus etu. Apa ane mampotango to pobotus, to pobotus etu bara damangawaika komi resi tau damangantarungku.
59 Pasi ane ewa see, Aku manganto’oka komi monso pu’u komi taa damasuwu muni yako ri tarungku etu ane tawa mampakalino kojo denda to nato’o nsira. Wali sira taa damampakakodi denda etu nempo sangkodija to tawa rabayar.” Wali ewa wetu nato’o i Yesu mamporapaka resi sira mangkonong kasingkatao nsira resi i Pue Allah, apa etu semo to bae kojo batuanginya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA