Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq waktu beiyu-iyu dengan sampun bekeriwung dait bedesek-desekan, Deside Isa bemanik lẽq pengiring-pengiring-Ne, "Onyaq-onyaq lẽq ragi ruti dengan Parisi, maksut Tiang kemunapikan ie pade.

² Ndẽq araq saq teseboq saq ndẽq gen penggitan, dait ndẽq araq saq terahasieang saq ndẽq gen tebungkar.

³ Saq side pade ucapang lẽq taoq saq peteng, gen kedengahan lẽq taoq saq menah; dait saq side pade pẽsẽq lẽq kentok dengan lẽq dalem kamar saq teimpet, gen teumumang belẽq-belẽq."

⁴ "Tiang badaq side, batur-batur Tiang! Ndaq takut lẽq ie pade saq bau nyematẽq awak laguq sesampun nike ndẽqne bau piaq napi-napi malik.

⁵ Mangkin araqan Tiang badaq side lẽq sai side pade harus takut. Pade takut tipaq Allah! Sẽngaq sesampun nyematẽq, Ie ẽndah bedowe kuase netẽh ojok dalem api nerake! Tiang badaq side pacu-pacu, tipaq Allah doang side pade harus takut.

⁶ Lime kedit perit tejual ajine due kẽpẽng saq paling kodẽq. Timaq maraq nike ndẽq araq sopoq juaq saq telupaqang siq Allah.

⁷ Bulu lẽq ulunde ẽndah sampun terẽkẽng selapuqne, keranaq nike ndaq takut; side pade jaoq belẽqan ajine tebanding kedit-kedit perit nike."

⁸ "Tiang badaq side: Dengan saq ngakuq lẽq julun dengan luwẽq bahwe ie pengiring Tiang, ie gen teakuq ẽndah siq Bije Manusie lẽq arepan malaẽkat-malaẽkat Allah.

⁹ Laguq dengan saq nilas lẽq julun dengan luwẽq bahwe ie pengiring Tiang, ie gen tetilas ẽndah siq Bije Manusie lẽq arepan malaẽkat-malaẽkat Allah.

¹⁰ Lamun dengan ngucapang sopoq hal saq nentang Bije Manusie, ie bau teampunin; laguq lamun ie menghine Roh Suci, ie ndẽq gen teampunin.

¹¹ Lamun side pade tejauq ojok balẽ-balẽ ibadah jari teadilin lẽq arepan pemrẽntah atao penguase, ndaq kuatir mengenai berembẽ side pade harus bẽle diriq atao mengenai napi saq harus side pade sampẽang.

¹² Sẽngaq lẽq waktu nike ẽndah Roh Suci gen badaq side pade napi saq harus side pade sampẽang."

¹³ Sopoq dengan lẽman tengaq-tengaq dengan luwẽq nike matur lẽq Deside Isa, "Bapaq Guru, silaq Pelungguh manikang semeton tiang adẽqne bẽng tiang separo harte warisan amaq tiang."

¹⁴ Jawab Deside Isa, "Semeton, sai saq ngangkat Tiang jari hakim atao tukang bagi warisan antare deduaq side pade?"

¹⁵ Beterus lẽq selapuq dengan saq araq lẽq derike Deside Isa bemanik, "Onyaq-onyaq dait waspade, ndaq jangke side pade serakah. Sẽngaq idup manusie ndẽq beharep lẽman kesugihanne, timaq dowẽne belimpah-limpah."

¹⁶ Beterus Deside Isa nyeriteang perumpamean niki, "Araq sopoq dengan sugih. Ie bedowẽ tanaq saq belimpah-limpah hasilne.

¹⁷ Dengan sugih nike mulai mikir dalem atẽne, 'Sampun ndẽq araq malik taoq tiang jari nyimpen hasil tanaq tiang. Napi akal tiang mangkin?'

¹⁸ Beterus ie mikir malik, dait ie ngeraos mẽsaq, 'Nah, tiang araq akal; gen tiang bungkar gudang-gudang tiang terus tiang penganjeng saq belẽqan. Lẽq derike taoq tiang toloq selapuq gandum tiang dait barang-barang tiang saq lain.

¹⁹ Beterus tiang gen muni lẽq diriq tiang mẽsaq: Side aget! Side sampun bedowẽ selapuq saq solah, dait ndẽq gen bis jangke betaun-taun. Mangkin mentelah! Ngelor dait nginem, dait puasang idupde!'

²⁰ Laguq Allah bemanik lẽq ie, 'Hai dengan bodo! Kelem niki ẽndah side gen matẽ, terus sai saq gen mauq selapuq kesugihan saq sampun side kumpulang umaq diriqde nike?'

²¹ Maraq nike kejarianne sebilang dengan saq berusahe pesugih diriqne mẽsaq, laguq ndẽq berusahe jari sugih menurut pekayunan Allah."

²² Beterus Deside Isa bemanik lẽq pengiring-pengiring-Ne, "Keranaq nike Tiang badaq side pade, 'Ndaq side pade kuatir mengenai idupde, napi saq gen side pade kelor, atao napi saq gen side pade kadu.'

²³ Sẽngaq idup nike pentingan lẽman keloran dait awak pentingan lẽman kelambi.

²⁴ Perhatiang kedit-kedit gagak! Ie pade ndẽq uwah sawur binẽq, ndẽq ẽndah bedowẽ gudang atao lumbung. Laguq Allah peliharaq ie pade! Side pade jaoq belẽqan ajine ketimbang kedit-kedit!

²⁵ Sai lẽq antare side pade siq kuatirne bau ngeromboq umurne timaqne sekediq?

²⁶ Jari, lamun side pade ndẽq sanggup miaq sopoq hal timaq saq paling kodẽq, kembẽq side pade harus kuatir mengenai hal-hal lain?

²⁷ Perhatiang berembẽ kembang-kembang bakung tiwoq; kembang-kembang nike ndẽq begawẽan, ndẽq ẽndah nyẽsẽk, laguq Tiang badaq side: Nabi Sulaiman timaq ie sugih gati, ndẽq ngengadu kelambi saq solahne maraq kembang-kembang nike!

²⁸ Pupaq lẽq lendang tiwoq jelo niki dait lẽmaq bis tesedut. Laguq Allah payas pupaq nike solah gati. Lebih-lebih side pade, dengan-dengan saq kurang percaye!

²⁹ Jari, ndaq kuatir dait bingung mengenai napi saq side pade kelor dait inem.

³⁰ Selapuq nike teboyaq siq bangse-bangse lẽq dunie saq ndẽq kenal kance Allah. Padahal napi saq side pade perluang lẽq dalem idupde, selapuqne nike sampun tewikanang siq Bapa side pade.

³¹ Laguq boyaq Kerajaan Allah, make selapuq saq lain ẽndah gen teromboqang tipaq side pade siq Allah."

³² "Ndaq takut, side saq cume sekediq jumlahne! Sẽngaq Bapa side seneng ngicanin side Kerajaan-Ne nike.

³³ Jual dowẽnde dait sedekahang kẽpẽngne tipaq dengan miskin. Piaqang diriqde dompẽt saq ndẽq iniq sẽde, nike harte saq tesimpen lẽq sorge. Harte nike ndẽq iniq telang sẽngaq maling ndẽq bau bait dait tembrẽnẽ ndẽq bau nyenyẽdaq.

³⁴ Sẽngaq lẽq mbẽ hartende araq, lẽq derike ẽndah angende!"

³⁵ "Bejage-jage lẽq selapuq hal. Side harus tetep siep kadu kelambi dait dilahde tetep tenyalaqang,

³⁶ pade maraq pelayan-pelayan saq kenyeke ngantih majikanne tulak lẽman gawẽ ngawinang. Lamun majikan nike tulak, dait ketok lawang, ie pade nyerepek bukaq lawang.

³⁷ Bahagie gati pelayan-pelayan saq tedait kenyeke ngantih lẽq waktu majikanne dateng. Tiang badaq side: Setetune majikan nike gen besiep-siep dait suruq pelayan-pelayan nike tokol, terus ie ngelayanin ie pade.

³⁸ Bahagie gati pelayan-pelayan nike lamun majikan nike ndait ie pade kenyeke siep ngantih, timaq ie dateng tengaq kelem atao subuh!

³⁹ Pade inget! Seandẽne ẽpẽn balẽ sampun nenaoq jam pire maling gen dateng, ie gen bejage adẽq maling ndẽq tame ojok dalem balẽne.

⁴⁰ Keranaq nike, side pade ẽndah harus besiep-siep, sẽngaq Bije Manusie gen rauh lẽq waktu saq ndẽq side pade badẽq."

⁴¹ Petrus metakẽn, "Junjungan Saq Mulie, napi perumpamean nike Pelungguh tujuang tipaq tiang pade atao tipaq selapuq dengan?"

⁴² Jawab Junjungan Saq Mulie, "Sai pelayan saq setie dait bijaksane sehingge teangkat siq majikanne jari kepale tipaq pelayan-pelayan lain, adẽq ie bẽng ie pade bekelor lamun sampun wayene?

⁴³ Bahagie gati pelayan saq tedait kenyeke ngelaksaneang tugasne waktu majikanne tulak!

⁴⁴ Tiang badaq side: Setetune pelayan nike gen tesaduq siq majikanne jari jagaq selapuq dowẽne.

⁴⁵ Laguq lamun pelayan nike jahat, ie gen bebase lẽq dalem angenne, 'Majikan tiang masih ngonẽq tulak,' terus ie ngempuk selapuq pelayan dait bekelor dait nginem jangke bowos,

⁴⁶ beterus majikanne gen tulak lẽq jelo dait jam saq ndẽq ie badẽq. Make pelayan nike gen tesiksaq siq majikanne, dait tejariang senasip kance dengan-dengan saq ndẽq setie.

⁴⁷ Pelayan saq nenaoq pekayunan majikanne, laguq ndẽq besiep-siep dait ndẽq ngelaksaneang pekayunan majikanne nike, gen tepecut keras-keras.

⁴⁸ Laguq pelayan saq ndẽq nenaoq pekayunan majikanne, beterus ngelaksaneang hal saq salaq, sehingge harus tepecut sekediq doang. Sẽngaq dengan saq sampun teicanin luwẽq, lẽman ie gen tetuntut luwẽq ẽndah. Dait dengan saq sampun tepercayeang luwẽq, lẽman ie gen tetuntut luwẽq ẽndah."

⁴⁹ "Tiang dateng jari nimbulang julat lẽq gumi niki. Solahan malik lamun apine sampun nyale!

⁵⁰ Tiang harus ngalamin sopoq baptisan, dait angen Tiang osah gati sendẽqman hal nike telaksane.

⁵¹ Napi side pade paran Tiang dateng jari jauq perdamẽan ojok dunie? Ndẽq, ndẽqne perdamẽan, laguq perlawanan.

⁵² Mulai lẽman mangkin, keluarge saq luwẽqne lime dengan gen bemusuhan, telu lawan due atao due lawan telu.

⁵³ Amaq gen ngelawan anakne saq mame, dait kanak mame gen ngelawan amaqne. Inaq gen ngelawan anakne saq nine, dait kanak nine gen ngelawan inaqne. Mentoaq nine gen ngelawan menantune saq nine dait menantu nine gen ngelawan mentoaqne saq nine."

⁵⁴ Deside Isa bemanik ẽndah lẽq dengan luwẽq, "Lamun side pade serioq awan taẽk lẽq bagian bat, langsung side pade bebase, 'Gen ujan.' Dait tetu-tetu ujan.

⁵⁵ Lamun side pade beridap angin dateng lẽman lauq, side pade bebase, 'Gen panas.' Dait tetu-tetu panas.

⁵⁶ Side pade dengan-dengan munapik! Side pade tao badẽq cuace lẽman serioq keadaan langit dait gumi. Kembẽq tande-tande jaman niki ndẽq tao side pade tapsir?"

⁵⁷ "Kembẽq side pade ndẽq mutusang mẽsaq napi saq kenaq?

⁵⁸ Lamun araq dengan ngelaporang side pade ojok pengadilan, berusahe semampu side jari nyelesẽang pelekare nike kance ie sewaktu side pade masih lẽq tengaq langan. Lamun ndẽq, laun ie jauq side pade ojok hakim dait hakim nike gen nyerahang side pade ojok petugasne, dait dengan nike gen tamaqang side pade ojok dalem bui.

⁵⁹ Tiang badaq side: Side pade ndẽq gen sugul lẽman bui sendẽqman side bayah utangde jangke lunas!"

Lukas

Video Lukas 12

Ikuti Kami:

KONTAK | PARTISIPASI | DONASI