Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bariburibu niha sato sowulo fadegedege, oi lahundrahundra gahe nawõra. Me owulo niha sato andrõ, Imane Yesu khõ ndra solo'õ Ya'ia, "Mi'angelama ba laru ndra Farizai'o andrõ, ya'ia waminisa tõdõ andrõ khõra.
2 Lõ hadõi nibalugõ si lõ oroma dania, ba lõ hadõi nibini'õ si lõ teboka dania.
3 Niw̃a'õmi ba zi bongi, ba terongo dania ba zi ma'õkhõ; ningõngõgõmi ba dalinga niha ba mbate'e si no mukusi, ba lafarongogõ dania irege teboloso."
4 "Mitõngõni, ya'ami ira si fahuwu khõ-Gu! Bõi mi'ata'ufi zamunu boto, me tebai lalau hadia ia zi tõra moroi ba da'õ.
5 Ba da Uforoma'õ khõmi haniha zi lõ tola lõ mi'ata'ufi. Mi'ata'ufi Lowalangi! Bõrõ na no aefa Ibunu, ba so wa'abõlõ khõ-Nia wanibo'õ niha ba narako! Sindruhu niw̃a'õ-Gu khõmi, Ya'ia zi lõ tola lõ mi'ata'ufi.
6 La'amawa lima ngawua ziliw̃i mobõli dua se. Hew̃a'ae si manõ sambua lõ solifu Lowalangi.
7 Ba no mu'erai fefu rozi mbu ba hõgõmi, bõrõ da'õ bõi mi'ata'ufi; no abõlõ ebua mbõlimi moroi ba ziliw̃i andrõ!"
8 "Mihaogõ wanõngõni: Niha samaduhu'õ fõna zato wa nifahaõ-Gu ia, Ifaduhu'õ gõi dania ia Ono Niha andrõ fõna ndra mala'ika Lowalangi.
9 Niha sangosilõ'õgõ wa nifahaõ-Gu ia fõna zato ba lõ Ifaduhu'õ dania niha andrõ Ono Niha fõna ndra mala'ika Lowalangi.
10 Na so niha sanguma'õ hadia ia ba wolaw̃a Ono Niha, tola mu'efa'õ ia; ba niha sango'aya Eheha Lowalangi, tebai te'efa'õ niha andrõ.
11 Na la'ohe ami ba nomo wangandrõ wangetu'õ hukumi fõna zamatõrõ awõ zi so kuaso, bõi abu dõdõmi hewisa ami wobelegõ ya'ami ma zui hadia zinangea miw̃a'õ.
12 Ifahaõ dania ami Eheha Lowalangi hadia zinangea miw̃a'õ ba ginõtõnia."
13 Samõsa ba gotalua zato sanguma'õ khõ Yesu, "He Samahaõ, tandraigõ w̃a'õ khõ dalifusõgu ena'õ ibe'e khõgu õsa harato nirõi zatuama khõma."
14 Itema linia Yesu, "He talifusõ, haniha zombali'õ Ya'o sanguhuku ba wombagi harato khõmi ya'ami si darua?"
15 Aefa da'õ Imane Yesu ba niha sato si so ba da'õ, "Mi'angenanõi ba mi'angelamaisi wa'omasi gana'a andrõ. Bõrõ me fa'auri niha tenga moroi ba haratonia, hew̃a'ae no fahõna khõnia."
16 Itutunõ khõra Yesu gamaedola andre, "So samõsa niha si kayo sokhõ tanõ si sõkhi, si tola mame'e bua soya sibai.
17 Mangerangera niha si kayo andrõ imane tõdõnia, 'Hadia nasa nilaugu iada'e? Lõ hadõi khõgu nahia sa'ae wangirõ'õ bua nowigu?'
18 Ba mangerangera ia zui imane bakha ba dõdõnia samõsa, 'Aha, so akagu! Ufadudugõ'õ halasagu andrõ, ba sebua moroi ba da'õ ufazõkhi. Ba da'õ u'irõ'õ dania mbua nowigu ba fefu haratogu tanõ bõ'õ.
19 Aefa da'õ ba uw̃a'õ khõgu samõsa: Ha wa'amoharazaki ndra'ugõ! Fefu zi sõkhi ba no oi õ'okhõgõ, ba lõ ahori barõ zi ha'uga fakhe. Honogõ'õ iada'e! Lau mangamanga ba mamadumadu hadia ia ba omusoi'õ dõdõu!'
20 Ba hiza, Imane khõnia Lowalangi, 'He niha sambõ era'era! Bongi andre mate ndra'ugõ! Ba ha'õkhõ mõi fefu wa'akayo si no õ'owuloi andrõ?'
21 Si manõ lala niha sangowuloi khõnia harato gulidanõ, ba si lõ mangowuloi khõnia harato ba khõ Lowalangi."
22 Ba Imane Yesu khõ ndra solo'õ Ya'ia, "Da'õ wa'uw̃a'õ khõmi, 'Bõi mibusi tõdõ hadia ia ba wa'aurimi, hadia ni'ami, ba ma hadia ni'onukhami.'
23 Abõlõ ebua wa'auri moroi ba gõ, ba abõlõ ebua mboto moroi ba nukha.
24 Mifaigi atõ gaga andrõ! Lõ mananõ, lõ mamasi, ba lõ'õ gõi khõra halasa ba ma nahia wangirõ'õ. Ba Irorogõ ira Lowalangi! Ba no abõlõ ebua mbõlimi moroi ba wofo andrõ!
25 Haniha ba gotaluami zi tola manganau'õ dõfinia he ha ma'ifu, bõrõ me i'abusi tõdõ?
26 Na ba wondrege zide'ide andrõ tebai milau hadia ia, ba hana wa mi'abusi tõdõ nasa danõ bõ'õ?
27 Mifaigi mbunga ladari mbõhõ ba mbenua; lõ mohalõw̃õ ira, ba lõ'õ gõi managu. Ba mifaigi: Hew̃a'ae fondrege zi kayo Razo Salomo, ba tenga si mane fa'asõkhi mbunga andrõ nukhania!
28 Tumbu ndru'u andrõ ba mbenua, ba mahemolu ba ahori latunu. Ba wa'asõkhi wamogamagama Lowalangi du'u andrõ. Mendrua manõ ami! Ba hiza, lõ mamati ami!
29 Bõrõ da'õ, bõi mi'abusi tõdõ ba bõi fawuka gera'erami ba zanandrõsa ba ni'a ba ba nibadumi.
30 Niha si lõ mangila Lowalangi zolohilohi si manõ. I'ila Amami wa moguna khõmi da'õ.
31 Si lõ tola lõ mi'alui, ya'ia ena'õ Lowalangi zamatõrõ fa'aurimi, ba fefu danõ bõ'õ andrõ Ibe'e gõi khõmi."
32 "Bõi mi'ata'ufi, ya'ami rorogõfõ si lõ atoto! No fa'omasi Nama zame'e khõmi howuhowu moroi ba gamatõrõw̃a-Nia andrõ.
33 Mifamawa fefu zi so khõmi ba mibe'e mbõlinia ba niha si numana. Mifazõkhi khõmi kofekofe si tebai obou, ya'ia harato ni'irõ'õ ba zorugo si tebai ihalõ sanagõ ba si tebai i'a hama.
34 Bõrõ me gofu heza so haratomi, ba da'õ gõi so dõdõmi!"
35 "Mi'angenanõi ba ngawalõ hadia ia. Ena'õ si lõ mo'aetufa mama'anõ ami wonukha ba fandrumi lõ mamalõ muhola,
36 hulõ genoni sombalombaloi sokhõ ya'ia, sangawuli moroi ba walõw̃a. Na mangawuli zokhõ ya'ira andrõ ba itoko mbawa ndruhõ, ba i'anema'õ ibokai.
37 Ha wa'amoharazaki genoni nisõndra zokhõ ya'ira si no mama'anõ wombaloi ya'ia. Ya faduhu dõdõmi: Mama'anõ gõi zokhõ ya'ira andrõ, ba ifedadao ndra sohalõw̃õ khõnia andre, ba mõi ia enonira.
38 Ha wa'amoharazaki ndra enoni na i'ila ira sokhõ ya'ira labaloi wa'atoharenia, hew̃a'ae talu mbongi ma zui tõra moroi ba da'õ so ia!
39 Mitõngõni da'e! Na i'ila sokhõ omo we'aso zanagõ, ba izago nomonia ena'õ lõ mõi zanagõ andrõ.
40 Ya si lõ mo'aetufa mama'anõ gõi ami, me tohare dania Nono Niha andrõ ba ginõtõ si lõ midõnadõna."
41 Isofu Fetero, "He So'aya, hadia khõma Õtandrõsaigõ wamahaõ andrõ ma ba niha fefu?"
42 Itema linia, Yesu, "Haniha genoni si lõ farõi ba satuatua, da'õ genoni nibali'õ zokhõ ya'ira hõgõ ba genoni bõ'õ fefu same'e gõra ba ginõtõ si no muhonogõi?
43 Ha wa'amoharazaki genoni andrõ, na mangawuli zokhõ ya'ia ba i'ila ia ibayabaya halõw̃õnia!
44 Ya faduhu dõdõmi: ibe'e rorogõfõnia fefu haratonia sokhõ ya'ia khõ genoni si manõ.
45 Ba na imane tõdõnia enoni andrõ: 'Ara nasa mangawuli zokhõ ya'o,' ba ibõrõtaigõ ibõbõzi genoni bõ'õ fefu, ba ilau mangamanga ba mamadumadu irege mabu,
46 ba samuza ma'õkhõ, ba zi lõ idõnadõna, mangawuli zokhõ ya'ia. Ibõbõzi genoni andrõ sokhõ ya'ia, ibali'õ si mane niha si lõ mamati khõ Lowalangi.
47 Nibõbõzi sabõlõbõlõ genoni sangila somasi zokhõ ya'ia ba lõ'õ sa ifa'anõ ia awõ wa lõ gõi ilau zomasi zokhõ ya'ia andrõ.
48 Ba enoni si lõ mangila somasi zokhõ ya'ia, ba bõrõ da'õ ifalua zi lõ faudu irege labõzi ia, ba nikaohasi wamõbõzi ya'ia. Bõrõ me nibe'e soya, oya gõi te'andrõ moroi khõnia. Ba si no mufaduhusi tõdõ soya ngawalõ, ba oya gõi te'andrõ moroi khõnia."
49 "So Ndra'o ena'õ so wa'akhozi ba gulidanõ andre. Ha wa'asõkhi na no humola galitõ!
50 So nasa wamakao sabõlõbõlõ si lõ tola lõ Utõrõ. Ba lõ ahono dõdõ-Gu fatua lõ salua da'õ.
51 Miwalinga solohe fa'atulõ mõi Ndra'o ba gulidanõ andre? Uw̃a'õ khõmi, lõ'õ, tenga fa'atulõ, no fa'udusa.
52 I'otarai iada'e, fa'udu zi dalima si sambua omo: datõlu lalaw̃a zi darua, ma zui darua lalaw̃a zi datõlu.
53 Ilaw̃a nononia matua ama ba ilaw̃a namania ono matua. Ilaw̃a nononia alawe ina ba ilaw̃a ninania ono alawe. Ilaw̃a nina matuania umõnõ alawe ba ilaw̃a numõnõnia inania matuania."
54 Imane Yesu ba niha sato, "Na mi'ila manõi lawuo ba gaekhula ba i'anema'õ mimane, 'Moteu dania.' Ba sindruhundruhu moteu.
55 Ba na so nangi moroi raya, mimane, 'Molõkhõ dania.' Ba sindruhu molõkhõ.
56 Niha samini tõdõ ami! Mi'ila sa mifaigi dandratandra ba mbanua awõ dandratandra ba gulidanõ. Ba hana wa tebai mi'ila dandratandra ginõtõ andre?"
57 "Hana wa tebai mi'etu'õ samõsa hadia ia zindruhu?
58 Na so zangadugõ ya'ami ba la'ohe ami ba zanguhuku, abõlõ sõkhi na mi'alui si'ai lala wangatulõ ba gotaluami fatua ba dalu lala na so ami. Na tenga si manõ, i'ohe ami dania fõna zanguhuku ba ibe'e ba danga folisi ami sanguhuku andrõ, ba ibe'e ami ba gurunga folisi.
59 Ya faduhu dõdõmi! Lõ tola aheta ami moroi ba gurunga andrõ fatua lõ mibu'a fefu hadia ia."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA