Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Měngkatewe ringangu hiwune kal᷊awọu taumata měmpẹ̌sẹ̌sasěngkilẹ̌ hakịu seng piạ u kẹ̌katahidaěng laede. Těntal᷊ang manga taumata reng měmpẹ̌dẹ̌dahěmung, i Yesus něhengetang su manga murit'E, "Pěmpẹ̌teghang bue su l᷊ahaes'u tau Farisi, mangal᷊ene i sire kai měmpạmělle.

² Tawẹ apa mạl᷊ahěmbung kụ tawe lekesang dingangu tawẹ apa mạdal᷊irung kụ tawe kasingkateng.

³ Apan niwerang kamene su tempong hěbi sarung karingihẹ̌ su tempong ěllo; kụ apạewen nisiang i kamene su ral᷊ungu kamarẹ̌ makakunsị sarung iwohang pakapěpidẹ̌."

⁴ "Manga hapị pěmpẹ̌tahěndung bue! Abe katakụ si sire apan měmpạmate wadange, kaiso kawe tawe makapẹ̌kapura mapal᷊iung ene.

⁵ Mapiangbe Iạ maněntiro si kamene i sai hinong ikẹ̌katakụ i kamene. Kěngkatakụ su Mawu Ruata! Watụ u wọuten namate, i Sie kawasa lai měhipe su ral᷊ungu naraka! Pěmpangimangke u kai i Sie hinong ikatakụ i kamene.

⁶ Hěnggeng limambaụ iwẹ̌bal᷊ụ su roitẹ̌ kararodokange ruang kal᷊ěpa. Maningbe kerene tawẹu sarang sěmbaụ kawul᷊eěngu Mawu Ruata.

⁷ Saral᷊aing utạ su těmbọ mang kạdarekeng kěbị, ual᷊ingu ene abe katakụ; i kamene limembowen maarẹ̌ga wọu manga hěnggeng!"

⁸ "Pěmpẹ̌tahěndungko pakapia-pia: I sai mangakum batangenge su těngong l᷊awọ u i sie kai muritẹ̌-Ku ute, i sie sarul᷊aing iakung Ahus'u Taumata e su těngon manga malạekat'u Mawu Ruata e.

⁹ Arawe i sai mẹ̌sunial᷊'u Iạ e su těngon taumata e u i sie kai muritẹ̌-Ku e tangu i sie sarul᷊aing ipẹ̌sunial᷊ẹ̌ su těngon manga malạekat'u Mawu Ruata e.

¹⁰ Kamageng i sai mẹ̌berang sěngkamohong ipěndokạ Ahus'u Taumata e, i sie rembeng ampungang; arawe kereu i sie kai měhinakang Rohkẹ̌ u Ruata e, i sie tawe kaampungang.

¹¹ Kereu i kamene iěntudẹ̌ sarang manga wal᷊eng pẹ̌kakal᷊iomanengang kụ ipakihukung su těngon těmbonangu kawanua arau měngangawasa ute, abe ghěnggang u měnsang kereapa wue i kamene mẹ̌tahutěndạu watangeng arau kai hinong sumimbang kereapa.

¹² U wawera hinong ipẹ̌berang kamene e sarungbe těntiroěngu Rohkẹ̌ u Ruata si kamene su tempone."

¹³ Sěngkatau wọu tal᷊oaran taumata l᷊awọ e nẹ̌bera si Yesus, "Tuang Guru, kěnnangko i Tuang pẹ̌bera su tuhangku, iạ gěllirengkon sěmbạgeang bọu arětạ tatěntang i amang i kami."

¹⁴ Mawu Yesus simimbang, "I sai wue něnduị Siạ makoạ mělahukung arau měmamahiạ pusakạ sutal᷊oaran dua?"

¹⁵ Mase su kěbị taumata apan ene sene i Yesus něhengetang, "Pěmpẹ̌teghang dingangu pakarariagạ bue, i kamene kumbahangbe maanggang. U pẹ̌bawiah'u taumata e wal᷊inewe kahiang kakakalạ e, maningbe lai rarotonge mạhěmpal᷊iu."

¹⁶ Mase i Yesus nẹ̌běkem papinintu ini, "Piạ e sěngkatau kalạ. I sie piạ ěntanane kụ mẹ̌gẹ̌gěsi mal᷊awọ.

¹⁷ Tau kalạ ene mẹ̌sěsipirẹ̌ su ral᷊ungu naunge, 'Seng tawẹ apa tampạ l᷊ai pěngomol᷊angu ghẹ̌sing ěntanaku. Kụ kai mẹ̌kapurạe iạ e?'

¹⁸ Bọu e i sie měngkate saụ mạngěnna kụ nẹ̌bera e su ral᷊ungu naunge, 'Ah! Iạ piạbe akal᷊ẹ̌ku; manga gudangku e sarung takụ golangeng mase takụ koateng limembong kaguwạe. Su tampạ ene takụ pěngomol᷊ang kal᷊awọu gandung dingangu patikụ darotongku wal᷊ine.

¹⁹ Tangu iạ sarung mẹ̌bera su watangengku: I kau nakauntung! Kal᷊awọu apang mapia seng tẹ̌taghuanengu ringangu tawe sarung kasueěnge karěngụewen taung mědẹ̌dal᷊iun taung. Pangirol᷊oko! Kaěngko ringangu panginungko kụ temangeko wiahu!'

²⁰ Arawe Mawu Ruata e něhengetang si sie, 'Ei tungkọ! Sěhěbi ini e lai i kau sarung mate, mase i sai wue sarung makaěbạ kěbị kakakalạ u seng niriahinu e?'

²¹ Kerene kakakoạ u apan taumata mědẹ̌deạu makalạ baụgu watangenge hala, kaiso tawe mẹ̌těngkakalạ su matan Duata."

²² Mase i Yesus něhengetang su manga murit'E, "Ual᷊ingu ene hakịu Iạ e něhengetang, 'Abe ghěnggangu pẹ̌bawiahu, měnsang i kamene kai kumaěng a ringangu mẹ̌pakeangu a.'

²³ Pẹ̌bawiahẹ̌ e limembowen bọu laidopẹ̌ dingangu wadange limembowen bọu pakeang.

²⁴ Tatingangko manga manụ gaga! I sire tawe mangangasị, dingangu tawe mananipo, tawẹ lai manga gudange arau pěndaresokangu ěmme. Arawe Mawu Ruata mang mělẹ̌hiking si sire! I kamene limembong maarẹ̌ga wọu manga manụ u kinoaěng.

²⁵ I sai wue wọu tal᷊oarang kamene kahiang ghěnggange makạkasěmpụ umurẹ̌ maning kětạeng kadodọ?

²⁶ Kereu hal᷊ẹ̌ kakạdodokange mang tawe ikakoạ i kamene, unụe ghuměnggangu manga hal᷊ẹ̌ bal᷊ine?

²⁷ Tatingangko! Kereapa manga ghal᷊oghonge timuwo nẹ̌bungang, kutẹu manga bungang ene e tawe mělahal᷊ẹ̌, dingangu tawe mẹ̌kakahiwuang. Arawe lai Ratu i Salomo e kerẹeng kakalạ e tawe mẹ̌papakeang kere manga bungang ene kaholẹ e.

²⁸ Děmpugẹ̌ sural᷊one timuwo su sahěllo ini e kụ sěngkariọěllone nịtatutung. Arawe Mawu Ruata e mělẹ̌lěnggihẹ̌ děmpugẹ̌ ene kereng kaholẹ e. Dumakelengbe i kamene! Kutẹu i kamene kai lome pangangimange!

²⁹ Kụ abe ghěnggang dingangu mẹ̌bingo měnsang i kamene kumaěng a ringangu manginung a!

³⁰ Manga hal᷊ẹ̌ tamai ene rẹ̌dareakengu apan taumata wẹ̌gam Mawu Ruata. Sumbal᷊iau i Amangu e masingkạ u i kamene mambeng mẹ̌sẹ̌sal᷊imaẹ patikụ ene.

³¹ Kaiso i kamene hinong mẹ̌sẹ̌sěmpị tadeạu Mawu Ruata mẹ̌kawasa su pẹ̌bawiahu, kụ apạewen bal᷊ine ute, mal᷊aing ionggọ u Mawu Ruata si kamene."

³² "I kamene maningbe rekenange mahal᷊i, kai abe katakụ! U i Amang i kamene e mal᷊uasẹ̌ mangonggọu al᷊amat'E wọu Kararatuang'E.

³³ Bal᷊ụ e rarotong i kamene kụ onggọko manga roite su tau kasiang. Pẹ̌koạko kawihẹ̌ ta mal᷊ahenẹ baugu watangengu e, mangal᷊ene arětạ maresọ su sorga. Arětạ ene tawe mailang ual᷊ingu tahatako e tawe makapěngal᷊ạ dingangu uane tawe makapěnggolọ.

³⁴ U suapan piạ arětạ u e, naungu e mal᷊aing sene!"

³⁵ "Pakarariahi wue tumatěngo patikụ sạbarang. I kamene měngkai hinong měmpẹ̌pakeang dingangu sol᷊onu hanesẹ̌ dụděllị,

³⁶ mẹ̌sul᷊ungu manga ěllang kụ měmpạngampal᷊ẹ̌ mawune mẹ̌bal᷊ị bọu sal᷊iwangu pẹ̌kakawing. Kereu mawune mẹ̌bal᷊ị kụ manengkelẹ̌ tukadẹ̌ e, tangu i sire sarung manope tukadẹ̌.

³⁷ Apạe mauntu manga ěllang kụ kẹ̌kaěbakeng měmpẹ̌lẹ̌lukadẹ̌ su tempon mawune sumongo. Pěmpangimangko: Mawu ene sarung mẹ̌dariahi kụ měngorọ e manga ěllange apạkaiang, kụ bọu ene i sie mẹ̌siliwirẹ̌.

³⁸ Apạ e mauntu manga ěllang ene kereu mawun sire ene kụ nakaěbạ si sire kạpẹ̌ngampal᷊e maningbe lai i sie simongo kẹ̌kal᷊oarane, arau maraning kalonge!

³⁹ Pẹ̌tahěndungko ini! Kereu manga taghuangu wal᷊e masingkạ u orasẹ̌ děntaěngu tahatako e, i sie sarung měndiagạ takadeạu tahatako e tawe makasuẹ̌ su ral᷊ungu wal᷊ene.

⁴⁰ Hakịu ene i kamene mal᷊aing pakarariahi, u Ahus'u Taumata e sarung duměnta su tempo ta laantiwang i kamene."

⁴¹ "Mawu, apa wue těntiro ene timonane si kami arau su kěbị taumata?" angkuěng i Petrus.

⁴² Mawu simimbang, "I sai ěllang masatia ringangu matahuěnna hakịu niruị u mawune iapạněmbonang manga ěllange wal᷊ine iapạngonggọ u kaěng si sire su tempone?

⁴³ Kariangkamang ěllang ene kereu mawune mẹ̌sul᷊e kụ kẹ̌kaẹ̌bakeng i sie kạpẹ̌koạe munarane!

⁴⁴ Pěmpangimangko: Mawu ene sarung měnduị i sie manahimata patikụ darotonge.

⁴⁵ Kaiso kereu ěllang ene kụ kai mẹ̌bera su ral᷊ungu naunge, 'Mawuku e wẹ̌dang diọ mararěnna ruměnta,' mase i sie měngkate mẹ̌mẹ̌mahang kal᷊awọu manga ěllange kụ kumaěng dingangu měnginung sarang miwukang,

⁴⁶ tangu mawune sarung duměnta su ěllo ringangu orasẹ̌ ta kinahěnganeng. Kụ ěllang ene sarung těntiroěngu papahang bọu mawune, ringangu koateng kere nẹ̌koạ taumata tawẹ satiane su Ruata.

⁴⁷ Ěllang kụ masingkạ u kapulun mawune kaiso tawe nẹ̌dariahi ringangu tawe lai nẹ̌koạ timuhụewe kapulun mawune, sarung pahangengu ral᷊iwara maněnggạ.

⁴⁸ Arawe ěllang nạung bẹ̌gang kapulung mawune, bọu ene měkẹ̌koạ hal᷊ẹ̌ tawe mělahino hakịu hinong liwarangu ral᷊iwara riọ mahaěng. U i sain seng nionggol᷊ang l᷊awọ sarul᷊aing paghěleěng l᷊awọ. Kụ i sain piněnarakanengu l᷊awọ saunengke wue panẹ̌tul᷊ang limembong kakěpal᷊e."

⁴⁹ "Iạ duměnta mapakahěngisu dunia ini. Apa kapia kereu putunge seng dụděllị!

⁵⁰ Bẹ̌dang piạ kasasusa masaria hinon Takụ dal᷊engang. Ene naung-Ku e měngkate apa maghěnggang těntal᷊ang ene wẹ̌dang ta nakoạ.

⁵¹ Su naung i kamene Iạ duměnta e kai mẹ̌bawa pẹ̌darame su dunia e? Tala, bal᷊inewe pẹ̌darame kaiso kawe pẹ̌daral᷊aị.

⁵² Manětạ bọu ini e, dal᷊ohom bal᷊e limangkatau e sarung mẹ̌darokạ, těllungkatau sarung dumokạ duang katau arau ruang katau rumokạ těllungkatau.

⁵³ I amang sarung dumokạ anạe esẹ dingangu anạ e esẹ dumokạ si amange. I ninange sarung dumokạ anạ e wawine kụ anạe wawine rumokạ si ninange. I ninange kinaratingang sarung dumokạ anạ e mirarating, kụ anạ e mirarating dumokạ si ninange kinaratingang."

⁵⁴ Mawu Yesus něhengetang l᷊ai su taumata l᷊awọ, "Kereu i kamene makạsilo winawa masapuạ su puěngu wahẹ ute, i kamene apid'u měmpẹ̌bera u, 'Sarung dumasehẹ̌.' Kụ mang kahěngang-hěngang mẹ̌tahiti.

⁵⁵ Kereu i kamene makapěndang u anging tumiụ bọu timuhẹ̌ ute, i kamene měmpẹ̌berau, 'Sarung měpẹ̌disẹ̌.' Kụ mang makoạ kerene.

⁵⁶ I kamene kai puluang měmělle! I kamene makakatikạ bue kakakoạ u wanua mạeng měmpẹ̌patehẹ̌ kakakoạ u l᷊angị dingangu dunia. Kawe unụe manga tatialan tempo ini tawe ikatikạ i kamene?"

⁵⁷ "Kawe unụe tawe ikaputusi kamene hala e hal᷊ẹ̌ u katul᷊idẹ̌ e?

⁵⁸ Kereu piạ taumata mangaduhang i kamene su mělahukung, ute pẹ̌kakereapa wue sěngapang botonge pěngěnsue patikụ hal᷊ẹ̌ ene těntal᷊ang i kamene deng bědang su tal᷊oaran dal᷊enge. Kamageng tala ute, kiwuạu i sie kai mamol᷊eng i kamene sol᷊ong těngon mělahukung kụ sarung měnarakang i kamene su polisi, kụ měnowang kamene su ral᷊ungu tahungkụ.

⁵⁹ Pěmpangimangko! I kamene tawe makasẹ̌bang bọu tahungkụ těntal᷊ang une su ral᷊ungu naung bědang ta nasue."

Lukas

Video Lukas 12

Ikuti Kami:

KONTAK | PARTISIPASI | DONASI