Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ia joo wattu sirempunmi massa'bu-sa'bu to tau madoang ngkita Puang Isa. Nasisi'pin-si'pin ntalimbungngi to Puang Isa anna den to disilesei ajena. Napamulami Puang Isa nnajahhi anak gurun-Na nakua, "Majaga kamu' jio mai raginna to-Farisi. Ia to kusanga iamo to kamajekkonganna.

² Te'da to membuninna tangladipangpekitan, na te'da to dibunianan tangladipangpeissenan undinna.

³ Jaji, apa to mipau ke bongi, la nasa'ding tau ke allomi. Na apa to mipangbisikan lako solami lan kamara' dilacak, la dipetamban jio pangbudan tau."

⁴ Mpatarruhpa kadan-Na Puang Isa nakua, "Ee kamu', to kusanga soba'-Ku'. Ingaranni! Danggi' mimalaja' lako tolino to batang kale manda nakulle nabuno, apa te'da nakullei mbuno penawammi.

⁵ La kupauan kamu' to sipato' la mikalaja': Malaja' kamu' lako Puang Allataala! Nasaba' ianna mangka mbuno kamu', makuasapa Ia mpatama kamu' naraka. Ingaranni, Ia mandara to parallu mikalaja'.

⁶ Duara de'pen allinna ke lima denah, apa moi mesa' te'da tangnaingaran Puang Allataala.

⁷ Moi beluak jao ulummi mangkamo dibilang ngasan. Iamo joo danggi' mimalaja', nasaba' la'bi keangga' kamu' na ia to denah."

⁸ Mangkada unapa Puang Isa nakua, "La miingaran kumua, ia to tonnakuina' jio olona tobuda kumua tomenturu'i lako kale-Ku', la kuakui todai to Aku', Anak Mentolino, jio olona malaeka'-Na Puang Allataala.

⁹ Apa ia to tompessakkannina' jio olona tobuda, kumua te'da namenturu' lako kale-Ku', la kupessakkanni todai jio olona malaeka'-Na Puang Allataala.

¹⁰ Ia to tonnewa kadana' tee Aku', Anak Mentolino, wa'dingpa didampangan, apa ia to toncapa' Roh Allataala, te'damo nawa'ding didampangan.

¹¹ Ia ammidikara-kara lan bola passambajangan iarika jio olona tomangparenta ba'tu tomangra'tah kara-kara, danggi' miselang kumua apara la mipau, ba'tu umbo la mikua mpangngewai kalemi.

¹² Nasaba' apa to mipebalian la napatuju kamu' Roh Allataala ke wattunnamo kamu' la mebali."

¹³ Den tau mangkada jio mai tangnga-tangngana tobuda lako Puang Isa nakua, "Oo Guru, ia ke wa'dingngi, takuanpi to sile'toku' nabenna' to tawaku' jio mai manahna tomatuangki'."

¹⁴ Mebalimi Puang Isa nakua, "Oo mane, indara to nnangka'na' menjaji pangbicara ba'tu tomantawa ewananmi sola dua?"

¹⁵ Mpatarruhhi kadan-Na Puang Isa lako tobuda ntuu jio nakua, "Majaga kamu', miingaran meloi, danggi' mimadoang nnassang sininna apa lan tee lino. Nasaba' ia to katuoanna tau te'da napole jio mai kasugiran, moi nasugih lallang."

¹⁶ Mangcuritami Puang Isa mpake pangpasusian nakua, "Den tosugih nnampui bara'bah gaja loang, nabuda assele'na.

¹⁷ Mangpikkiri'mi joo tau nakua, 'Te'damo naganna' to ngenan kunii nnanna assele' bara'bahku'. La kuapamira?'

¹⁸ Mangpikkiri' omi namangkada lan penawanna nakua, 'Denmi pale' akkalanku', la kupematonggoi to ngenan assele' bara'bahku', na ia kunii nnannai to assele' bara'bahku' sola ewanan laenku'.

¹⁹ Angkumangkada lako kaleku' kumua: Masannangmoko! Tanglapura to sininna ewanan muampui, moi mangpulo-pulo taunna. Mpessaumoko bo'jo'mu! La mupemasannangngimi to katuoanmu, kumande mandamoko sola mangngiso'.'

²⁰ Apa nakua Puang Allataala mangkada lako joo tosugih, 'Ee, tobango'! Ia bang unamo tee bongi naladika'tu to sunga'mu. Na indamora la mpuapai to ewanan murempun?'

²¹ Susimi joo katuoanna to tau nnangaran kasugiran kalena lan lino, apa situru' Puang Allataala tangngia kasugiran tongan joo."

²² Nakuamo Puang Isa lako anak gurun-Na, "Iamo joo, la miingaran! 'Danggi' mipuselangngi to katuoanmi, to kumua apara to la mikande, ba'tu apara to la miputamangkale.'

²³ Nasaba' la'bi parallu ia to katuoan na ia to kande, na ia to batang kale la'bi parallu na ia to pakean!

²⁴ Kitari to kaok! Te'da namantanan, te'da namepare, te'da naampui pa'pak, apa napatuo unai Puang Allataala! Na la'bi keangga' kamu' na ia to manuk-manuk!

²⁵ Moi mipuselangngi to katuoanmi, te'da mikullei mpamalambeh sunga'mi moi sangmanne'!

²⁶ Na ia joo apa biccukra na tangmikullemo mpugaukki, matumbai milampuselang ori to laenna?

²⁷ Kitari to bunga bakung umbo nakua tuona jio padang. Te'da namangngunu, te'da too natumannun. Apa la miingaran, moi Raja Sulaiman to gaja sugih, te'da nampake pakean susi ballona joo bunga!

²⁸ Ee, totangmatappa'! Ia ke naballoii Puang Allataala to reu jio padang susi joo, to tuo tee allo na masawa disumpun, apa pole'raka to kamu' sola ngasan!

²⁹ Iamo joo danggi' mipuselangngi to kumua apara to la mikande ba'tu apara to la miiso'. Danggi' mika'tu rannu.

³⁰ Ia ngasan to susi joo naangah bang tolino to tangnturu' Puang Allataala. Apa naissen ia Ambe'mi Puang Allataala kumua miparallui ngasan joo.

³¹ La mipengkulle-kullei mpugaukki to pakkaeloran-Na Puang Allataala, na ia to laenna miparallui la naben too kamu'."

³² Naajahhimi Puang Isa to anak gurun-Na nakua, "Danggi' mimalaja' moi mitangpira! Nasaba' napumasannang Ambe'mi Puang Allataala jao suruga mpupenjaji kamu' taun-Na lan kaparentan-Na.

³³ Balukki to ewananmi mibenni tokaasi-asi. La nnangah kamu' doi' to te'da namemmatua, iamo to kasugiran dianna jao suruga. Ia joo kasugiran te'da nata'de, nasaba' te'da nakullei la naboko tau, na te'da nakullei nakande ane.

³⁴ Nasaba' umbo-umbo nanii to ewananmi, la minawa-nawa tarruh bangngi."

³⁵ Mangngajahhimi Puang Isa nakua, "Majaga kamu' ammituli ntajanni to karatuan-Ku'. Massa'wak rampa' kamu', mipadukku bangngi to palitammi.

³⁶ La sadia kamu' mangjama susi mesa' kaunan ntajan puangna pole jio mai tobotting. Sadia bang ntimbakanni ba'ba ke mangdedekki.

³⁷ Liwa' masannangna tuu lako kaunan ke naampa'i puangna ntajanni. La mikatappa'i kumua, ia to puangna la massa'wak rampa' todai nasuai joo kaunanna cumadokko naparakaii.

³⁸ Masannang tuu lako kaunan ke diampa'i sadia bang, moi tangnga bongi iarika dannarimo naratu to puangna.

³⁹ Ingaranni! Ia kenna issenni ampu bola wattunna joo nanii ratu to taboko ke bongii, la te'da namamma' nnampai bolana, danggi' namentama joo taboko.

⁴⁰ Susi toomo kamu', la da'tan bang kamu' majaga, nasaba' ia to karatuan-Ku' tee Aku', Anak Mentolino, te'da mikalannaii."

⁴¹ Mekutanai Petrus nakua, "Oo Puang, kami'raka tapapatui tuu pangpasusian, iarika sininnaraka tau?"

⁴² Mebalimi Puang Isa nakua, "Iamo kupapatui to kaunan melo to wa'ding dikatappa'i. Iamo la naben kuasa puangna ngkapalai kaunan laenna, napakandei ke wattunnami kakumandean.

⁴³ Liwa' ia masannangna joo kaunan ke polemi to puangna, naampa'i puangna mpugaukki to jamanna.

⁴⁴ Katappa'i kumua, ia joo kaunan la naben kuasa puangna mparakai to sininna ewananna!

⁴⁵ Apa macilakai joo kaunan ke mangkadai lan penawanna kumua, 'Masaipa namane' pole to puangku'', nabunomi to padanna kaunan, la muane la baine, namangmaroah-roah, sanggenna malango.

⁴⁶ Apa te'da nakalannaii nata'pa ratu to puangna. Napemoncongngimi puangna, napasusii parri'na to totangnturu' Puang Allataala.

⁴⁷ Ia to kaunan naissen apa to nakabudai puangna, apa te'da namajaga sola te'da napugaukki, iamo na la dipemoncongngi.

⁴⁸ Apa ia to kaunan te'da naissenni apa to nakabudai puangna, napugauk kasalan to la dinii rrambii, te'da nadipemosoi dirambi. Nasaba' ia to todiben buda, la dipeta'dai too buda. Na ia to todipabarakkanni buda, la'bi buda pole' opa dipeta'da jio mai kalena."

⁴⁹ Mangngajahhimi Puang Isa nakua, "Iamo kuratu tama lino sanga ratuna' mbawa api, na kurannuan namanglulu-lulu to dukkunna!

⁵⁰ Denpa kamaparrisan tonggo la kuperasai. Na te'da narapa' to penawang-Ku', ke te'dapi najaji.

⁵¹ Misangaraka kumua ratuna' mbawa kasikalinoan tama lino? Te'da! Tangngia kasikalinoan to kubawa, apa kasiewalianra.

⁵² Mammula tee too, ia ke denni lima tau lan bola, ia to tallu nnewai to duanna, ba'tu dua nnewai to tallu.

⁵³ Ambe' la nnewa anakkana muane, na anak muane la nnewa ambe'na. Indo la nnewa anakkana baine, na anak baine la nnewa indona. Indo matuanna la nnewa anak mamintunna baine, na anak mamintunna baine la nnewa indo matuanna."

⁵⁴ Nakuapa Puang Isa lako tobuda, "Ia ke ngkita kamu' saleu' endek jio kalambunan, ta'pa mikua, 'La uran'. Na uran tongan.

⁵⁵ Ia ke mangngiri' lo'i mai to angin, mikua, 'La pebarrangan omo'. Na jaji tongan susi joo.

⁵⁶ Ee, kamu' tomajekkong! Macca kamu' mbattuanannii to tanda mikita jao langi' sola lan lino. Apa te'da miissenni mbattuananni to apa kupugauk, tanda karatuan-Na Puang Allataala mangparenta susi Raja."

⁵⁷ Mangngajahhimi Puang Isa nakua, "Ciapari na te'da kamu' mipikkiri'i to melona la mipugauk?

⁵⁸ Ia ke denni ewalimmi male mparapa' kamu' lako tomangra'tah kara-kara, ammijio unapa tangnga lalan, la'bi melo ke sikalino bangmo kamu' jolo'. Nasaba' ianna te'da misikalino, la nabawa kamu' lako olona tomangra'tah kara-kara, namane' tomangra'tah kara-kara mpangngolo kamu' lako pulisi ammidipatama pangtarungkuan.

⁵⁹ La miingaran! Ia ke te'dapi mibajahhi angge macerona to indanmi, te'da mikullei messun lan mai pangtarungkuan."

Lukas

Video Lukas 12

Ikuti Kami:

KONTAK | PARTISIPASI | DONASI