Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O Yesus gee 'o Ngomasa 'Itebi-tebini wiparetano wamada 'o Yordan ma 'akere, de 'o Ngomasa 'Itebi-tebini wi'asa 'o tonaka 'ika-kakasaka.

² Ge'enaka dau 'una 'o Tokata ma Koana witaili, ma do'ingo 'o wange nagi soata de 'o obiri nagi soatino. Ge'ena ma do'ingono ka ma eta ma kowo'odomuwa so wamao wisawinukou.

³ 'O Tokata ma Koana kaingosekau 'unaka, "Ngona ne'ena ma Jo'oungu ma Dutu wi Ngowaka. So bika nasuloko 'o teto-teto ne'ena 'imadadi 'o 'inomo."

⁴ 'O Yesus wosango, "'O Buku 'Itebi-tebinoka 'isilefoku, ''O nyawa yo'ahu duga ka de 'o 'inomuwa.'"

⁵ Ge'enaka de 'o Tokata ma Koana 'o Yesus wi 'asali 'o ngii 'ikuru-kurutieka, de kaisijaino wisidumutu 'o duniaka ma koa-koana de ma harataa.

⁶ De ma Tokata ma Koana kaingosekau 'o Yesusika, "'O duniaka ma kuasa de ma harataa 'iodumu ne'ena 'asa tonisidukula. Sababu 'iodumu ne'ena ma Jo'oungu ma Dutu wosarakaniokau ngoino, de ngoi 'idadi takikula nago'onaka naga bato gee ngoi tomau takikula.

⁷ 'Iodumu ge'ena dua to ngonau nako noisuba."

⁸ 'O Yesus wosango, "Naga 'o Buku 'Itebi-tebinoka 'isilefoku, ''O nyawa 'iodumu salingou yosuba duga ka ma Jouka ge'ena la ma Jo'oungu ma Dutu gee womatengo-tengoka, de ka 'unaka duga wileleani.'"

⁹ Ge'enaka de 'o Tokata ma Koana wi'asa 'o Yesus 'o Yerusalemuka, de wisuloko wodoade daku ma Jo'oungu ma Dutu 'awi Woa ma deku 'idaduieka de kaingosekau 'unaka, "Ngona ma Jo'oungu ma Dutu wi Ngowaka. So bika ne'enaka de nomaotaka.

¹⁰ Sababu naga 'o Buku 'Itebi-tebinoka 'isilefoku, 'Ma Jo'oungu ma Dutu 'asa wakokisuloko wi mala'ekati nijaga 'isidi-diai.'

¹¹ De mita, 'Ma mala'ekati ge'ena 'asa nirilegono la ka 'ani dou ma 'uwa 'itigi 'o tetoku!'"

¹² 'O Yesus wosango, "Naga 'o Buku 'Itebi-tebinoka 'isilefoku, 'Ka moi ma 'uwa witaili ma Jou, nanga Jo'oungu ma Dutu.'"

¹³ 'O Tokata ma Koana 'iduanginou 'o Yesusika witaili ma ngekomo 'irupa-rupaka, ge'enaka de kawimada 'o Yesus de 'idamaali 'o 'orasi yaowa-owa.

¹⁴ Ge'enaka de 'o Yesus 'o Ngomasa 'Itebi-tebini 'awi singina yaparetano wolioli 'o Galilea ma daeraaka. De ma habari ma ngale 'una ge'ena 'o Galilea ma daeraaka yakilolituku.

¹⁵ 'Una wodotoko 'o lo-lomu ma woa-woaka ge'ena 'o Galileaka, de 'o nyawa 'iodumu wisiarene.

¹⁶ 'O Yesus waikali 'o Nazaretika gee 'una wodaamoko ge'enaka. Pomaoma-omasa ma Wangeka 'una wotagi 'o lo-lomu ma woaka moteke biasau 'una koge'ena. Ge'enaka waika de woma'oko ma ngale wobaca 'o Buku 'Itebi-tebini,

¹⁷ de wikula ma Nabii Yesaya 'awi buku. Wasose ma buku 'ipe-peleleno ge'ena de wamake ma bo-bula gee 'ingose konee,

¹⁸ "Ma Jou wi Ngomasa naga ngoioka ma ngale 'ikula 'o kuasa, sababu 'una woigorakokau ma ngale tositotara 'o Habari ma Owa 'o nyawa yosusa-susaka. 'Una woisuloko tosikawasa 'o nyawa gee yakitago-tagokinoka 'ato 'ona 'asa yakisipidili, gee yorau-rau 'asa yomasimakeli, de kiaka naga gee yaki'asa 'ito-torou 'asa yakisilaha,

¹⁹ de tosihabari 'ato ma Jou 'awi kawasa wosilaha ma 'orasi ya'adonokau."

²⁰ 'O Yesus wapeleleli ma buku ge'ena, de wosigilio yole-leleanika, 'asa deika wogogere. 'O nyawa 'iodumu ma woa ma dodaka ge'ena wiriungini.

²¹ De 'o Yesus wakidotoko 'onaka, wongose 'ato, "Ne'ena ma wange 'o Buku 'Itebi-tebini ma bo-bulaka gee tabacakau kangano ge'ena 'idadiokau ma 'orasi ngini nio'isene."

²² 'O nyawa ge'enaka gee yoodumu yongose 'ato 'awi demo-demo ge'ena 'iodumu 'itiai. De yoherangi 'okia naga gee wosidemo-demokau 'ena ma sureka. So 'ona kayongosekau, "'Una ge'ena ka 'o Yusuf wi ngowaka!"

²³ So 'o Yesus wongose 'onaka, "Ma raiokau ngini dua nisicagulu naneda ngoino, 'Ee Dotere, bika ngona ma sirete nomasilaha. 'O no-nako 'ihera-herangi gee mio'isene 'o Kapernaumoka nodi-diai, bika nodiaioli to ngona ma sirete 'ani soanoka.'"

²⁴ 'O Yesus wongoseli, "Ngoi tinidongose, ma gou-goungu koi'iwa 'o nabii moi yakihoromati to 'ona ma sirete manga soanoka.

²⁵ Ma bika niosigisene! Ma 'orasi ma nabii Elia wo'ahu, 'o Israel ma tonaoka 'o baulaco ma kiamati yakidaene 'o soana 'isinoimika sababu koibesakuwa 'o taunu sa'ange de ma songonano. Ma 'orasi ge'ena 'o bao-bao yosusa-susa manga gudai 'o Israeloka.

²⁶ Ngaro koge'ena ma, ma Jo'oungu ma Dutu kowosulokuwa 'o Elia wotagi wakiriwo 'o bao-baoka go'ona ka moika ma, so duga ka gee 'o bao-baoka mimoi 'o Sarfat ma kotaka 'o Sidon ma daeraaka.

²⁷ Koge'enali mita ma 'o 'orasi ma Nabii Elisa, 'o Israeloka manga gudai yakipado-pado, de komoiwa wakisi'aiki, duga ka 'o Naaman 'o Siria ma nyawa gu'una."

²⁸ 'O nyawa 'iodumu ma lo-lomu ma woa ma dodaka go'ona yakito'otasa ma sala gee yo'isene ma hali ge'ena.

²⁹ 'Ona yomakokitebulu de witagoko 'o Yesus wisisupu 'o kota ma dudunika 'o babawata ma 'uruka, gee kiaka naga manga kota yodi-diaioka. 'Ona manga singina 'itorou 'unaka so yomau wisiitomou 'o ba-bawatuku.

³⁰ Ma 'o Yesus womasisisu 'o nyawa ma gu-gudaika de wotagiokau.

³¹ Ge'enaka de 'o Yesus wotagi daukuku 'o Kapernaum ma kotaku 'o Galileaka. Ge'enaka dau 'o nyawa wakidotoko Pomaoma-omasa ma Wangeka 'isinoi-noimi 'o lo-lomu ma woa-woaka.

³² 'Ona yoherangi 'awi do-dotoko, sababu 'una wobi-bicara de ma ku-kumatioka.

³³ Ge'ena ma lo-lomu ma woaka wimoi 'o tokata widongosamuku. 'Una woma'orese kawongosekau 'o Yesusika,

³⁴ "Ee, Yesus 'o Nazaret ma nyawa, 'uwa nomadatawongo to ngomi mia hali. Ngona naino ne'enano nomau minibinasau? Ngoi toninako ngona ge'ena ma kia. Ngona ge'ena ma Jo'oungu ma Dutu wi Su-suloko 'Itebi-tebini!"

³⁵ De 'o Yesus wodubera ma tokatika ge'ena wongose 'ato, "Nomariidi, nosupuoka 'o nyawaka nu'una!" Ge'enaka de ma tokata ge'ena wisi'umo 'o nyawa gu'una ge'ena yoku-kudai manga bionuku, de 'isupuokau 'o nyawaka gu'una ka ma eta ma kowikasiriwa.

³⁶ 'O nyawa yoodumu yokokiherangi de kayomakadongosekau, "Tei posironga wosigou-gounguku 'awi demo-demo ge'ena. Sababu de 'awi kumati de wi kuasa 'una wosuloko 'o tokata 'ikokisupu de 'ena mita 'ikokisupu!"

³⁷ So 'o Yesus wi habari 'itagi ma daeraaka ge'ena yakilolituku.

³⁸ Ge'enaka de 'o Yesus womagoraka 'o lo-lomu ma woaka ge'ena, de wotagi 'o Simon wi woaka. 'O Simon ma toroa migogamuku mosauku ma upasa misirama, so 'o nyawa-nyawa ge'enaka gee yoga'asoko 'o Yesusika yongose 'ato, "Tanu moniriwo monisi'aikokasi!"

³⁹ 'O Yesus waika woma'okode 'ami dangiri ma dateoka de wosuloko 'ami panyake ge'ena 'i'aiki. De 'ami panyake ge'ena ma 'i'aioka, de momomikokau so makileleani.

⁴⁰ 'Iobirou de 'o nyawa gee manga riaka dodoto yosa-sangisara manga panyake 'i'ini-'inioka yoodumu yaki'asa 'o Yesusika. 'O Yesus 'awi giama wakidatamiku moi-moi yoodumu go'ona, de wakisilaha.

⁴¹ 'O tokata mita 'ikokisupu 'o nyawa manga gudaioka yakido-dongosamuku, de 'ima'ore-'orese, "Ngona ge'ena ma Jo'oungu ma Dutu 'awi Ngowaka!" Ma 'o Yesus wodorofu de kowosidabiwa 'ena 'ibicara, sababu 'ena yanako 'una ge'ena ma Koana Wosilaha-laha.

⁴² Ma bibinie yaika 'iwange de 'o Yesus woma'aiki ma kotaka ge'ena de wotagi 'o ngii moika gee 'irii-riidika. 'O nyawa-nyawa wirinonu so gee wimakeno de yoga'asoko la 'uwa wakimada.

⁴³ Ma 'o Yesus kawongosekau, "'O Habari ma Owa ma ngale kokia ma Jo'oungu ma Dutu wopareta ma ngale wokoana salingou tositotara 'o kota 'iregu-reguka mita, sababu ma ngale ge'enau ma Jo'oungu ma Dutu woisuloko 'o duniano."

⁴⁴ Ge'enau so 'o Yesus wobobita 'o lo-lomu ma woa-woaka 'iso de 'o Yudeau ma daeraaka.

Lukas

Video Lukas 04

Ikuti Kami:

KONTAK | PARTISIPASI | DONASI