Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Eheha Lowalangi zi so khõ Yesu me Irõi Nungo Nidanõ Yoridano. I'ohe Ia Eheha andrõ numalõ ba danõ si mate.
2 Ba da'õ itandraigõ Ia Afõkha õfa wulu wongi wa'ara. Ba zi sandrohu inõtõ andrõ lõ manga Ia. Irege ba gafuriata taraso khõ-Nia wa'olofo.
3 Imane khõ-Nia Afõkha, "Na ono Lowalangi Ndra'ugõ, w̃a'õ ba gara andre ena'õ tobali roti."
4 Itema li Yesu, "No musura ba Mbuku Ni'amoni'õ, 'Lõ auri niha ha ba gõnia manõ.'"
5 Aefa da'õ i'ohe Yesu ba nahia salaw̃a Afõkha, ba zi ha mamõ'i hõrõ wa'ara iforoma'õ Afõkha khõ Yesu fefu gamatõrõw̃a ba gulidanõ.
6 Imane Afõkha khõ Yesu, "Fefu wa'abõlõ awõ wa'akayo andre ube'e khõ-U dania, bõrõ me no mube'e khõgu da'õ fefu, andrõ wa tola ube'e ba niha somasi ndra'o.
7 Khõ-U dania fefu da'õ, na Õtuhi danõ wangalulu khõgu."
8 Imane Yesu, "No musura ba Mbuku Ni'amoni'õ, 'Ha khõ Zo'aya Lowalangiu mangalulu ndra'ugõ, ba ha Ya'ia õfasumange!'"
9 Aefa da'õ i'ohe Yesu Afõkha ba Yeruzalema ba ifa'aso Ia yaw̃a ba mbumbu Nomo Zo'aya. Imane afõkha khõ Yesu, "Na ono Lowalangi Ndra'ugõ, ba fazaumba'õ moroi ba da'e.
10 Bõrõ me no musura ba Mbuku Ni'amoni'õ, 'Ifatenge dania mala'ika-Nia Lowalangi, ba lahaogõ wanaro Ya'ugõ.'
11 Ba latema'õ, 'Ndra'ugõ dania mala'ika faoma tangara, ena'õ lõ manendre gahe-U ba gara!'"
12 Itema linia Yesu, "No musura ba Mbuku Ni'amoni'õ, 'Bõi tandraigõ, Zo'aya, Lowalangiu.'"
13 Ba me no awai ifalala Afõkha wanandraigõ Yesu, maoso Gafõkha irõi Yesu, ba ibaloi ginõtõ si sõkhi.
14 Aefa da'õ mangawuli ba Galilea Yesu. Eheha Lowalangi zamatõrõ Ya'ia, irege tehõngõ duria-Nia ba zi sagõrõ tanõ andrõ.
15 Mamahaõ Ia ba nomo wangandrõ, ba oi dozi niha lasuno Ia.
16 Me no aefa da'õ mõi Yesu ba Nazareta, ba mbanua te'ebua'õ Ia mbõrõta. Me luo Sabato, si mane si to'õlõ, mõi Ia ba gosali. Musindro Ia ba wombaso Buku Ni'amoni'õ,
17 labe'e khõ-Nia mbuku Yesaya sama'ele'õ. Ibokai buku si no mufagaõlõ andrõ, ba Isõndra ayati andre,
18 "So khõ-Gu geheha Lowalangi, bõrõ me no Ibayoini Ndra'o, ba wanuriaigõ Turia Somuso Dõdõ soroi Lowalangi ba niha si numana. Ifatenge Ndra'o ba wangombakha fangefa'õ ba niha nikuru ba fangila niha ba niha sagau'a;
19 ba famolala tõdõ ba niha nifakao, ba wanuriaigõ inõtõ si sõkhi khõ Zo'aya ba wangorifi banua-Nia."
20 Ifuli Ifagaõlõ zura andrõ Yesu, ba Ifangawuli ba zohalõw̃õ, ba aefa da'õ Ilau dumadao. Fefu niha si so ba gosali oi lafaigi Ia.
21 Imane khõra Yesu, "Ma'õkhõ andre, me mirongo nõsi Mbuku Ni'amoni'õ andre, fefu nisura andrõ ba no alua."
22 Ba oi adõni ba ahõlihõli dõdõra khõ Yesu, bõrõ me wa'asõkhi fefu niw̃a'õ-Nia. Ba lamane, "Hadia tenga ono Yosefo Ia andre?"
23 Imane khõra Yesu, "Tatu miw̃a'õ khõ-Gu gamaedola andre, 'He doto, fadõhõ ua Ndra'ugõ. Hadia nilau-Mõ ba Gafana'uma, ba lau gõi ba da'e ba mbanua-U samõsa.'"
24 Inõnõ wanguma'õ Yesu, "Ya faduhu dõdõmi, lõ hadõi sama'ele'õ nifosumange ba mbanuania samõsa.
25 Ba mifondrondrongo: Me inõtõ Gelia, me lõ teu tõlu fakhe amatonga wa'ara, alua lofo sabõlõbõlõ ba danõ. Ba ginõtõ da'õ ato sibai lakha mbanua ba niha Gizera'eli.
26 Hew̃a'ae si manõ, lõ Ifatenge Gelia ba lakha mbanua sato andrõ Lowalangi. Ifatenge Gelia ha khõ lakha mbanua ba Zarafa ba danõ Zidona.
27 Si manõ gõi me inõtõ Gelisa sama'ele'õ, ato niha sofõkhõ bou auri sata'u ita ba niha Gizera'eli, ba samõsa lõ ba gotaluara nifadõhõ, baero Na'ema banua Ziria andrõ."
28 Ba mofõnu sibai niha fefu si so ba gosali me Imanõ wehede Yesu.
29 Muzizio ira ba lafofanõ Yesu baero mbanua. La'ohe Ia ba ngõfi hili, heza lataru'õ mbanuara. Omasi ira latuli'õ Ia ba mbaho.
30 Ba hiza, Itõrõ manõ gotalua niha sato andrõ Yesu, mofanõ Ia.
31 Aefa da'õ numalõ Yesu ba mbanua Gafana'uma ba Galilea. Ba da'õ Ifahaõ niha me luo Sabato.
32 Ba oi ahõlihõli dõdõ niha me mamahaõ Yesu, bõrõ me mofa'abõlõ wahuhuosa-Nia.
33 Ba gosali andrõ so niha nira'u wa'abõlõ zi lõ sõkhi si ra'iõ. Mu'ira'ira niha andrõ,
34 "He Yesu, banua Nazareta, hadia nilau-Mõ khõma? Hadia mõi'Õ ba wamakiko ya'aga? U'ila haniha Ndra'ugõ: Tengetenge Ni'amoni'õ Ndra'ugõ soroi Lowalangi!"
35 Ihangõi wa'abõlõ zi lõ sõkhi andrõ Yesu. Imane Yesu, "Honogõ'õ! Ofanõ moroi ba niha andre!" Maoso wa'abõlõ zi lõ sõkhi si ra'iõ andrõ i'olobigõ niha andrõ fõnara fefu, aefa da'õ iheta ia moroi ba niha andrõ lõ ifakao.
36 Ahõlihõli dõdõ niha sato. Faoma lamane khõ nawõra, "Tenga mai wa'abõlõ wehede-Nia. Si fao lakhõmi ba fa'abõlõ, Ifofanõ wa'abõlõ zi lõ sõkhi, ba mofanõ!"
37 Ba tehõngõ duria Yesu ba zi sagõrõ tanõ andrõ.
38 Irõi gosali Yesu, numalõ Ia ba nomo Zimoni. Mofõkhõ fogikhi nina matua Zimoni, ba la'ombakha'õ da'õ khõ Yesu.
39 Mõi Yesu ba naha wemõrõ ndra alawe andrõ, ba Ifofanõ wogikhi andrõ. Dõhõ wogikhi andrõ ba i'anema'õ maoso nina matua Wetero mõi ngoningonira.
40 Me aekhu luo, la'ohe khõ Yesu fefu niha sofõkhõ, awõ ngawalõ wõkhõ. Ba Idozigõ Itufa ira Yesu tanga-Nia ba wamadõhõ ya'ira.
41 Aheta wa'abõlõ zi lõ sõkhi andrõ si fao fe'ao'ao, lamane, "Ono Lowalangi Ndra'ugõ!" Ba Ihangõi ira Yesu, me lõ Itehe muhedehede ira, bõrõ me la'ila wa Ya'ia Razo Sangorifi.
42 Me ibõrõgõ tumbu luo, Irõi mbanua andrõ Yesu numalõ ba nahia si lõ nihaniha. Ibõrõtaigõ la'alui Ia niha. Ba me lasõndra Ia, lataha Ia ena'õ bõi Irõi ira.
43 Ba Imane khõra Yesu, "Lõ tola lõ'õ Uturiaigõ Duria Somuso Dõdõ andrõ ba mbanua bõ'õ sanandrõsa khõ Lowalangi ba famatõrõ-Nia, da'õ mbõrõ wa Ifatenge Ndra'o Lowalangi ba gulidanõ."
44 Bõrõ da'õ mangombakha Yesu ba nomo'omo wangandrõ ba zi sagõrõ tanõ Yudea.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA