Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Naonda nobatun makow kon tubig in Ongkag Yordan ki Yesus, Sia kinawasa in Roho i Allah bo dinia minayak im padang gurun.
2 Kon tua Sia sinoba in Ibilis opat nopuḷuh nosinggai ing ko'onggotea. Opat nopuḷuh nosinggai tua Sia diaí nokaan kon onu bo onu daí pangabisannya, ginogoy in Sia.
3 Bo namangoi in Ibilis noguman ko'i Yesus, "Aka Ikow bo totu-totu'u ki Adií i Allah, yo pogumanaikah im batu mita tanion simbaí mobalií roti."
4 Ta'e ki Yesus notubag, "Kom Buk Mosuci oyuíon pinais nana'a, 'Intau de'emanbií tongaí mobiag in roti.'"
5 Bo Ibilis nodia ko'i Yesus minayak in tampat inta moḷantud bo sinunduínya ko'i Yesus im bayongan karaja'an in dunia
6 poḷat noguman nana'a, "Komintan kakuasa'an bo kakaya'an tana'a daitonku ogoi ko'i-Nimu, sin tana'a komintan aim bidon inogoi ko'inakoí daí na'a komintan im mota'aukubií ogo-ogoi makow ko'i inekabií inta ko'ibogku pobogoian.
7 Daí aka Ikow bo mo'ibog mosumbah ko'inakoí yo daitonkubií ogoi ko'i-Nimu intua komintan."
8 Ta'e ki Yesus notubag, "Aindon pinais kom Buk Mosuci, 'Sumbah ing ki Tuhan, ki Allahmu, sin tongaíbií Sia im mota'au duduianmu.'"
9 Daí Ibilis nodia ko'i Yesus minayak im binubungan Baḷoi Tuhan kon Yerusalem bo noguman ko'i-Nia, "Aka Ikow ki Adií i Allah yo ḷandukkah monag nongkon na'a.
10 Sing kom Buk Mosuci aim pinais nana'a, 'Ki Allah mopotabaí im malaekat-Nya mita moḷukad ko'i-Nimu kopiraan totok.
11 Natua doman, singkaponbií monia in Ikow daí diaíbií mo'idatong kom batu in si'oḷ-Mu.'"
12 Ki Yesus notubag, "Aim pinais domandon kom Buk Mosuci in nana'a, 'Dona'ai ikow mosoba ko'i Tuhan, ki Allahmu.'"
13 Naonda Ibilis nopaḷut nosoba ko'i Yesus, sinaḷaíannyadon ing ki Yesus bo mogoḷat ko wakutu inta mopia angoian bui.
14 Onda intua ki Yesus minayakdon bui ing Galilea, bo Sia umuran kom bonu ing kawasa in Roho i Allah. Habar soaáḷ ki Yesus no'isiardon kom bayongan lipuí tatua.
15 Kon tua, Sia minaya-mayak makow kom baḷoi pososambayangan bo nopoyaput in Habar Mopia bo umuran dayowon im bayongan intau in Sia.
16 Ki Yesus minayak doman in Nazaret, tobatuí lipuí inta kino'itoian-Nya. Kon singgai in Sabat, podudui ing kabiasa'an-Nya, Sia minayak im baḷoi pososambayangan. Sia sinimindog bo nobaca kom Buk Mosuci.
17 Sia inogoian im buk i Nabi Yesaya. Binukaí-Nya in litodan buk tatua bo kinobukaían-Nya in ayat inta noguman nana'a:
18 "Roho i Tuhan oyuíon ko'i-Nakoí, sin Aku'oi in aim pinilií-Nya mopoyaput in Habar Mopia kon intau mita bogaí. Sia nopotabaí ko'i-Nakoí mopota'au ing kabebasan kon intau mita kom bonu im ponjara bo mongundam kom mata in intau mita bilog; bo mopobebas in intau mita inta sinokodorot
19 bo mopota'au doman ing koaíngoian i Tuhan moposaḷamat in umat-Nya."
20 Nopaḷut makow binaca-Nya intua, ilitod-Nya bui im buk tatua bo pinobui-Nya kon intau inta mogogaid kom baḷoi pososambayangan tatua, bodongka ilimituí. Komintan intau inta kom bonu im Baḷoi Pososambayangan tatua inimindoi ko'i-Nia.
21 Bo nomangkoidon ing ki Yesus nosingog nana'a, ko'i monia, "Onu im pinais kon ayat tana'a singgai domandon na'a inintompodan ko wakutu im mo'ikow nokodongog.
22 Onu inta poguman-Nya, komintan mokosanang kong gina monia, sahingga kino'ibog monia in Sia bo umuran monia indongogan im poguman-Nya. Bayongan intau kon tua komintan nolibo-liboían, "Degaí Siabií na'a inta ki adií i Yusup?"
23 Daí ki Yesus noguman nana'a, "Tantuí nana'abií in singogon monimu ko'i-Nakoí, 'Hoi mongongundam, undamaidon in awak-Mu tontanií. Bo aidai domandon kon na'a, kon lipuí-Mu tontanií onu inta ain dinongog nami inaidan-Mu kong Kapernaum!'"
24 Ki Yesus noguman doman, "Poguman-Kudon ko'i monimu, diaíbií in nabi hormaton kon lipuí-Nya tontanií.
25 Ta'e indongogai in singog-Ku na'a: Kon sempo i Nabi Elia, wakutu ing kinodaitan ka'anon sin toḷudon notaong kapin in diaí nonguya-nguyan. Wakutu intua noaíntoí in dongkadon boba-bobay kon Israel.
26 Tongaí umpakah natua yo ki Elia in diaíbií pinotabaí i Allah minayak kon tobatuí boba-bobay kon Israel, ta'e pinotabaí-Nyabií in sia minayak kon tobatuí boba-bobay kon Sarpat kom butaí in Sidon.
27 Natua doman ing kon sempo i Nabi Elisa, tungkuḷ intua nobayong intau Israel im pinanyaki kusta, ta'e diaíbií tobatuímai ing kon sigad monia tua in inundaman, kolikudbií ing ki Naaman intau in Siria tua."
28 Nokodongogmai kon tua, nodait sinumoruí in intau mita inta kom bonu im Baḷoi Pososambayangan tatua.
29 Mosia sinimindog bo noguntun ko'i Yesus pinoḷuai kong kotaí tatua, bo dinia monia in Sia kom bingkií in irang kon tudu im buḷud tatua sin roncana'an monia tuḷudon kon irang tatua in Sia.
30 Ta'e minayak in Sia bo ginimilo-gilot makow kon intau mobayong daí diaí no'ulií monia bo minayakdon in Sia.
31 Onda intua ki Yesus minayak ing Kapernaum, tobatuí kotaí kong Galilea. Kon tua Sia nopoyaput doman in Habar Mopia kon singgai in Sabat.
32 Pototunduí-Nya mokosanang totok kong gina monia, sim mokobangkaḷ totok onu in singogon-Nya.
33 Kom baḷoi pososambayangan tatua oyuíon doman in tobatuí intau inta kinotoḷangan in dimukud mora'at. Intau tatua nomaḷuí,
34 "Hoi Yesus intau in Nazaret, onuon-Mu ing kami? Degaí mamangoi Ikow momutuí ko'inami? Kinota'auankubií in Ikow: Ikow in totabaí inta Mosuci nongkon i Allah!"
35 Ta'e ginuakkan i Yesus in dimukud mora'at tatua, "Kibio-bioímai bo luaidon ikow kon intau tanion!" Daí dimukud mora'at tatua nogumpang kon intau tatua kon tayowonmai monia komintan, onda intua sia iḷumuaidon pia-pia nongkon intau tatua.
36 Komintan intau nongoherang bo nosingog, "Diaíbií tongaí ibo-ibog in singog-Nya mita. Mokobangkaḷ totok im pososingog-Nya bo takin kawasa in Sia nokipoḷuai in dimukud mita mora'at tatua, bo ḷumuai doman im mosia!"
37 Daí habar soaáḷ ki Yesus no'ibaya-bayakdon makow kom bayongan lipuí kon tua.
38 Onda intua ki Yesus nonaḷaímai kom baḷoi pososambayangan tatua bo minayak kom baḷoi i Simon. Kon tua ki guyaí i Simon notakit pinonikan im patuí bo irimintonow, daí pinoguman monia ko'i Yesus in soaáḷ tatua.
39 Daí minayak dinimiug kon tosiugan i guyaí i Simon tatua ing ki Yesus bo ininggama'an-Nya im patuí tatua. Kon dodaipa doman tatua bo nopia ing ki guyaí i Simon daí nobangondon in sia bo nobantung ko'i monia.
40 Naonda in tongkanaí tumoyopdon mata in singgai, komintan intau nodia mangoi ko'i utat mita monia inta notakit noyagi-yagimai sin angoion poki'undam ko'i Yesus. Bo nodait iyapu i Yesus im mosia daí nongopia in takit mita monia tua.
41 Dimukudpa mita mora'at in iḷumuai nongkon moaíntoí intau, sindaḷan kumarak bo moguman, "Ikow nion ki Adií i Allah!" Ta'e totok in sinoruían i Yesus im mosia bo diaí inogoi mosingog sing kota'auandon monia kon Sia tua in Raja Mopoposaḷamat.
42 Naonda im modiugdon mobayag, ki Yesus nonaḷaímai kong kotaí tatua bo minayak in tobatuí tampat inta mo'ingongow totok. Ta'e mulai bo sinayak monia in Sia, bo naonda in noyodungkuḷ monia, inampagan monia in Sia kom baí diaípa monaḷaímai ko'i monia kon tua.
43 Ta'e ki Yesus noguman nana'a, "Habar Mopia kon naíonda ing ki Allah momarentah mustibií bayaían-Ku doman poyaput kong kotaí mita ibanea, sin tuabií im mangale pinopotabaían i Allah ko'i-Nakoí mamangoi in dunia na'a."
44 Manangka intua ki Yesus minaya-mayak makow im bayongan Baḷoi Pososambayangan kom butaí in Yudea bo nopoyaput in Habar Mopia tatua.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA