Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mawu Yesus napenẹ u Rohkẹ̌ u Ruata e su tempong i Sie naněntangu sal᷊ụ u Yordan e. Rohkẹ̌ u Ruata e nangahạ si Sie sol᷊ong banua l᷊inggi.
2 Sene i Sie nisal᷊ukateng u setang ěpạ u pul᷊o su ěllone karěngụe. Karěngụewen ěllo ene, i Sie tawe kimaěng manga apa-apa kụ pěngěnsueěnge i Sie nakapěndang nahutung.
3 Setang nẹ̌berạe si Sie, "I Kau Ahusẹ̌ben Duata arauěng? Ute pěngoroko watu ěndaị apakakoạ borotẹ̌."
4 Tangu Mawu Yesus simimbang, "Su ral᷊ungu Winohẹ Susi kạbawohẹ, 'Taumata e tawe makapẹ̌biahẹ̌ sěmatang bọu borotẹ̌.'"
5 Mase setange něngahạe si Yesus sol᷊ong sěmpalang marangẹ, kụ su ral᷊ungu sěngkakondạ tangu setange nanodẹen patikụ kararatuangu dunia ini e si Sie.
6 "Patikụ kawasa ringangu kakakalạ ěndaị e sarung takụ onggotang si Kau e," angkuěngu setang si Yesus e, "ual᷊ingu patikụ ene seng nighěllị si siạ, ute walạewe iạ mapulu měnsang takụ ionggọ si sai-sai.
7 Tangu patikụ ene sarung makoạ bạgeang'U, kereu i Kau mẹ̌suba su těngoku."
8 I Yesus simimbang, "Su ral᷊ungu Winohẹ Susi e mạbawohẹ, 'Pẹ̌subạe su Mawu Kasěllahenge kụ pẹ̌tahamawụ e si Sie sẹ̌sane.'"
9 Mase setange nangahạewen Yesus sol᷊ong Yerusalem kụ naměllọ i Sie su wowong atụ u Wal᷊em Mawu e, kụ nẹ̌berạe si Sie, "I Kau Ahusẹ̌ben Mawu Ruata arau ěng? Ute tumpạ e wọu ini.
10 Batụu su ral᷊ungu Winohẹ Susi e mạbawohẹ, 'Mawu Ruata e sarung mẹ̌parenta manga malạekatẹ̌ ipěnanudẹ̌ pakapia-pia si Kau.'
11 Kutẹu lai, 'Manga malạekatẹ̌ sarung měmpanal᷊endeng si Kau ringangu l᷊imang sire, tadeạu l᷊aed'U e lai tawe matangga su watu.'"
12 I Yesus simimbang, "Su ral᷊ungu Winohẹ Susi mạbawohẹ, 'Kumbahang manal᷊ukạ Mawu Kasěllahenge Ruatanu.'"
13 Tangu sarạeng setange nangědọe nanal᷊ukạ si Yesus dingangu haghin sasal᷊ukạ, tangu i sie namehọe wọu anun Yesus kụ něngampal᷊ẹ̌ tempone mapia.
14 Bọu e i Yesus nẹ̌sul᷊ẹ e sol᷊ong Galilea; kụ i Sie nilohoěngken Rohkẹ̌ u Ruata e. Kụ telengu mạanun Sie měngkatewe nasěsahẹ̌ su patikụ banua ene.
15 I Sie mạněntiro su manga wal᷊em pẹ̌kakal᷊iomanengang ringangu kěbị taumata mẹ̌dẹ̌dalo si Sie.
16 Ene i Yesus natamai lai sol᷊ong Nazaret tampạe nạung kinasariaěnge. Su ěllon Sabatẹ̌ e tuhụewe tundune i Sie simuẹ̌ su wal᷊em pẹ̌kakal᷊iomanengang. I Sie nẹ̌buạ dimarisị mẹ̌basa Winohẹ Susi e,
17 kụ nighěllikangkem bukẹ̌ u Nabi Yesaya. I Sie namingkahẹ̌ bukẹ̌ ene, mase nakahombang ayetẹ̌ ini,
18 "Rohkẹ̌ u Mawu ene si Siạ, batụu i Sie seng nělanisẹ̌ si Siạ tadeạu ipẹ̌lẹ̌habar'u habarẹ̌ makạdal᷊uasẹ̌ e su makakasiang. I Sie rimoloh'u Iạ mědeạu pěmẹ̌mohangu karal᷊ěsọ u mạtatahungkụ dingangu kawawekesu matan tau wuta; iapělẹ̌liu tau tẹ̌tumbiagheng
19 ringangu iapělẹ̌habar'u oras'u rarěntang Mawu e, makasal᷊amatẹ̌ umat'E pinilene."
20 Mase i Yesus wọeten něndul᷊ung bukẹ̌ ene kapia kụ naněgong ene su mělahal᷊ẹ̌, bọu ene i Sie kimaiang. Matang kal᷊awọu taumata su ral᷊ungu wal᷊em pẹ̌kakal᷊iomanengang e měngkatewe matatandạ si Sie.
21 Tangu i Yesus nanětạe něhengetang si sire kere ini, "Manga ayet'u Winohẹ Susi su sahěllo ini e pinakasěhụ su oras'u i kamene nakaringihẹ̌."
22 Manga wawera niweran'E měngkatewe maral᷊ěnggihẹ̌, hakịu i sire němpẹ̌dal᷊inaụ dingangu mạbohang si Sie. I sire němpẹ̌bera, "Kai wal᷊inewe anạ i Yusup i Sie Ho?"
23 Tangu i Yesus něhengetang si sire, "Ěndịu i kamene mang mẹ̌pakẹu sasailing bawera ini e si Siạ, 'Dokterẹ̌ pangundangko watangengue. Apan nakal᷊aherang kinaringih'i kami e nikoạ u su Kapernaum, koạko l᷊ai su soan gaghurangu e.'"
24 I Yesus saụewe něnamba, "Pẹ̌tahěndungke, tawe apa nabi kụ lẹ̌adateng su soane sẹ̌sane.
25 Ual᷊ingu ene daringihẹ̌ko: su tempong Elia, piạ e arẹ̌gan těllu taung ěnnungu wul᷊ang karěngụe tawe rimasehẹ̌, hakịu piạ e karal᷊unusẹ̌ masaria su kạguwạu wanua. Su tempo ene lawọ manga wawine wal᷊u su Israel.
26 Maning seng kerene, Mawu Ruata e tawe něndoloh'i Elia tamai sol᷊ong sěngkatau wọu manga wal᷊u e, kaiso kětạewen sol᷊ong anun sěngkatau wawine wal᷊u su Sarfat su wanuang Sidon.
27 Kerene lai su tempon Nabi Elisa mal᷊awọ taumata su Israel piạ sakịe kusta makatatakụ, kaiso tawẹu sarang sěngkatau l᷊ai wo'i sire nipakaul᷊e, tumbạewen i Naaman tau Siria e."
28 Kěbị taumata su wal᷊em pẹ̌kakal᷊iomanengang e měngkatewe nisawelangu pẹ̌du sarạeng nakaringihẹ̌ tamai ene.
29 Kụ i sire měngkatewe němpẹ̌bua mase nanokol᷊'i Yesus nipasẹ̌bang bọu soa, ringangu niwawan sire sarang lengehu wul᷊ude, pinẹ̌koateng soan sire. I sire mẹ̌nẹ̌naung u měnuhud'i Sie su těnggilihange.
30 Arawe i Yesus dimal᷊eng bọu tal᷊oaran taumata l᷊awọ e apidu natamai.
31 Bọu e i Yesus tamai sol᷊ong soan Kapernaum su Galilea. Su tampạ ene i Sie mạněntiro taumata l᷊awọ su ěllon Sabatẹ̌ e.
32 Kụ i sire mangkewen měmpẹ̌dal᷊inaụ nakasilo kakakoạ'E maněntiro, u i Sie mẹ̌bẹ̌bera ringangu kawasa.
33 Ene su wal᷊em pẹ̌kakal᷊iomanengang piạ e sěngkatau nisakeěngu rohkẹ̌ dal᷊akị. Tau ene měngkatewe namansagẹ̌ maihạ-ihạ,
34 "Ei Yesus, tau Nazaret, i Kau mapulu mẹ̌koạ apa si kami? I Kau riměnta maminasa si kami e? Iạ masingkạ i sai Kau! I Kau kai rarolohangu Ruata!"
35 "Pakarěmmasẹ̌ko!" Pal᷊ěndih'i Yesus su rohkẹ̌ dal᷊akị e. "Pěmpẹ̌sẹ̌bangke wọu tau ěndaị e!" Mase rohkẹ̌ dal᷊akị e wọuten napakawẹ̌bahu tau e su těngon sire kẹ̌bị, bọu e simẹ̌bang wọu tau ene, kụ tawe kạdiongeng nakapẹ̌kapura si sie.
36 Kěbị taumata naral᷊ingu kụ němpẹ̌bera sěngkatau su wal᷊ine, "Bal᷊inewe mal᷊ongkọ manga waweran'E. Piạ pěhěngking'E ringangu kawasan'E, i Sie nẹ̌parenta manga rohkẹ̌ daral᷊aị pasẹ̌bang, kụ i sire nahunsěbangke wue!"
37 Kutẹu telengu mạanun Yesus měngkatewe nẹ̌sasěsahẹ̌ su apam beọ u wanua nal᷊ikụ.
38 I Yesus simẹ̌bang bọu wal᷊em pẹ̌kakal᷊iomanengang e, mase rimangeng su wal᷊eng Simon. Kutẹu i empong Simon bawine e kai lụl᷊ěhabẹ̌, kụ i sire nakitul᷊ungke si Yesus e.
39 Tangu i Yesus himaung su ral᷊okangu tau wawine ene, kụ napakailangu lěhabẹ̌ ene. Kụ lěhabẹ̌ e naintal᷊ẹ̌ dingangu i empong Simon bawine e měngkatewe nẹ̌bangung dingangu nẹ̌tangkiang si sire.
40 Ene sarạeng matangěllo simědạ e ute kěbị taumata němpangěntudẹ̌ sol᷊ong anung Yesus apạewen anạ u sěngkataun sire balạewe měnsang sakị apa. I Yesus e něnělid'u l᷊iman'E su pẹ̌sěngkatau kụ napakapian sire.
41 Manga rohkẹ̌ daral᷊aị e mal᷊aing nahunsẹ̌bang bọu taumata l᷊awọ e, apidu kạpẹ̌mansage maihạ, "I Kau Ahus'u Ruata e!" Kutẹu i Yesus kai němal᷊ěndihẹ̌ si sire kụ tawe napakawalan sire niapẹ̌bera, watụ u i sire kawe masingkạ u i Sie kai Ratu Mananal᷊amatẹ̌.
42 Sarạeng matangěllo e nanětạe siměnnang i Yesus naněntangu soa ene mase nakoạ sol᷊ong tampạ tạ taune. Kutẹu taumata l᷊awọ e nanětạ e mědẹ̌deạ si Sie kụ piạ e i sire nakaěbạ si Sie, i sire měngkai mạmaedẹ̌ si Sie u abe apẹ̌něntang i sire.
43 Kaiso i Yesus něhengetang, "Injilẹ̌ mạanun kereapa Mawu Ruata e mẹ̌parenta ute hinon Takụ habareng lai su manga soa wal᷊ine batụu kai ene Mawu Kasěllahenge rimoloh'u Iạ sol᷊ong dunia e."
44 Ual᷊ingu ene Mawu Yesus měngkawe měnẹ̌nasẹ̌ su manga kanisa su patikụ soan Yudea e.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA