Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Gok Tonduy Na Pansing mulak ma Jesus hun Bah Jordan. Ibobai Tonduy ai ma Ia hu halimisan,
2 anjaha ilajou sibolis ma Ia ompat puluh ari dokahni. Seng dong mangan atap aha pe Ia bani panorang ai, jadi dob salpu ai, malohei ma iahap.
3 Jadi nini sibolis ai ma hu Bani, “Anggo tongon do Ham Anak ni Naibata, hatahon Ham ma batu on gabe ruti!”
4 Tapi ibalosi Jesus ma ia, “Tarsurat do seng pitah ruti tumang hagoluhan ni jolma.”
5 Dob ai ibobai ma Ia bani ianan na gijang, anjaha ibagas na sangkidop mata ipatuduhkon ma Bani sagala harajaon na i dunia on.
6 Lanjar ihatahon sibolis ai ma hu Bani, “Bamu pe hubere ganup kuasa on ampa hasangaponni ai, ai domma bangku iondoskon ai, anjaha hubere do ai hubani halak harosuh ni uhurhu.
7 Anggo ra Ham marsombah bangku, Bamu ma haganupan in.”
8 Jadi nini Jesus ma mambalosisi, “Tarsurat do, ʻTuhan Naibatamu do sisombahonmu, anjaha Sahalaksi do hansa sibalosanmu!ʼ”
9 Dob ai ibobai ma Ia hu Jerusalem, ipajongjong ma Ia bani anjung-anjung ni rumah panumbahan ai, anjaha nini ma hu Bani, “Anggo Anak ni Naibata do Ham, lumpatkon Ham ma hunjon hu toruh.
10 Ai tarsurat do, ʻHatahonon-Ni do malekat-Ni halani Ho, ase ijagai Ho,
11 anjaha tatang-tatangon ni sidea ma Ho, ase ulang tarantuk nahei-Mu bani batu!” ʼ
12 Tapi nini Jesus ma mambalosisi, “Ihatahon do homa, ʻSeng bulih lajouonmu Tuhan Naibatamu!ʼ”
13 Jadi, dob salpu idalankon sibolis ganup parlajouan ai, itadingkon ma Ia, paima jumpah panorangni use.
14 Jadi mulak ma Jesus hu Galilea ibagas hagogohon ni Tonduy ai, anjaha sar ma barita-Ni bani ganup nagori ai inggot.
15 Mangajari do Ia bani parguruan ni sidea, anjaha haganup do mamuji-Si.
16 Jadi roh ma Ia hu Nasaret, huta hagodangan-Ni ai; mangihutkon hasomalan-Ni, masuk ma Ia hu parguruan ai sanggah ari Sabat, anjaha jongjong ma Ia laho mambasa.
17 Jadi ibere ma hu Bani buku ni Nabi Jesayas; iungkab ma ai, gabe jumpah-Si ma na tarsurat sonon,
18 “Tonduy ni Tuhan in do sogop hu Bangku, ai iminaki do Ahu, laho mangambilankon Ambilan Na Madear bani halak na masombuh. Isuruh do Ahu laho patugahkon haluahon bani na tartutup ampa mambahen marpangidah use na mapitung, laho paluahkon halak na niodoh-odoh,
19 ampa patugahkon tahun paridop ni uhuran ni Tuhan in.”
20 Dob ai igulung ma buku ai, ipaulak ma ai bani siparugas, lanjar hundul. Jadi nono ma hu Bani ganup mata ni halak na i parguruan ai.
21 Jadi ihatahon ma hubani sidea, “Sadari on ma jumpah na tarsurat in, na binogei nasiam in.”
22 Haganup do sidea marhatongonkon, anjaha longang bei do sidea manangar hata na mantin, na luar humbani pamangan-Ni ai, gabe nini sidea ma, “Ai lang anak ni si Josep do Ia?”
23 Jadi nini ma hubani sidea, “Hatahonon nasiam do namin Bangku hata ni limbaga on, ʻAle doktor, pamalum dirimu! Sagala na binogeinami pasal na binahen-Mu i Kapernaum, lanjar ai ma bahen ijon, i huta hagodangan-Mu on!ʼ”
24 Tapi nini ma, “Sintong do na Huhatahon on bani nasiam, seng adong nabi na marsangap i nagorini sandiri.
25 Ibagas hasintongan Huhatahon ma bani nasiam, buei do namin naboru na mabalu i tanoh Israel bani panorang ni si Elias, sanggah na tartutup langit ai tolu tahun onom bulan, sanggah na masa lohei maningting i tanoh on,
26 tapi seng isuruh si Elias atap hubani ise sidea, tapi hu Sarpat do, na i nagori Sidon, hubani sada naboru na mabalu.
27 Anjaha buei do na gadamon i Israel bani panorang ni Nabi Elisa, tapi seng dong humbani sidea na gabe malum, pitah si Naeman halak Siria ai do.”
28 Jadi marah tumang ma haganup na i parguruan ai, dob ibogei sidea ai,
29 gabe jongjong ma sidea, iusir sidea ma Ia hu darat ni huta ai, das hu salansah ni dolog, hajongjongan ni huta ni sidea ai, laho manggulangkon-Si hu toruh.
30 Tapi laho ma Ia, montas hun tongah-tongah ni sidea.
31 Jadi tuad ma Ia hu Kapernaum, ai ma sada huta i Galilea, anjaha iajari ma sidea sanggah ari Sabat.
32 Jadi longang ma sidea pasal pangajarion-Ni ai, ai marhidorat do hata-Ni ai.
33 Anjaha adong do i parguruan ai sada halak partonduy setan na mabutak. Gogoh-gogoh do ia mardilo-dilo,
34 “Ham Jesus na hun Nasaret! Ai roh do Ham sihol mangagou hanami? Hubotoh do atap ise Ham, ai ma Na Pansing ni Naibata!”
35 Tapi isorgang Jesus ma ia, nini ma, “Sip anjaha luar ma hun bani!” Jadi isampakkon setan ai ma ia hu tongah-tongah, anjaha luar ma ia hun bani, tapi seng mahua ia ibahen.
36 Jadi longang ma uhur ni sidea ganupan, anjaha nini sidea ma samah sidea, “Hata na sonaha do on? Ipaksa do tonduy na mabutak marhitei kuasa ampa gogoh, gabe mandarat do.”
37 Jadi sar ma barita-Ni ai bani ganup ianan, bani nagori na inggot hujai.
38 Laho ma Jesus hun parguruan ai, anjaha masuk ma Ia hu rumah ni si Simon. Ia anturang ni si Simon, parah do panei-paneini, gabe itarsingatkon sidea ma pasalsi hu Bani.
39 Jadi roh ma Ia jongjong hu lambungni, anjaha mangonai hata ma Ia bani panei-panei ai, gabe laho ma panei-panei ai hun bani. Mintor jongjong ma ia, marugas bani sidea.
40 Dob sundut mata ni ari, ipamboan halak ma hu Bani na boritan ni bei, na marbagei-bagei niarouni. Itampeihon ma tangan-Ni bani ganup sidea, laho pamalum sidea.
41 Kaluar do setan-setan humbani buei halak, lanjar mardilo-dilo, “Anak ni Naibata do Ham!” Tapi isorgangi do sidea, anjaha lang ilopas sidea marsahap, halani ibotoh sidea, Ia do Kristus ai.
42 Tapi dob siang ari, laho ma Ia hu darat bani ianan na lungun. Ipindahi halak na mabuei ai do Ia, anjaha dob jumpah sidea, sihol do jolomon ni sidea Ia, ase ulang laho Ia humbani sidea.
43 Tapi Nini ma hubani sidea, “Maningon ambilankonon-Ku do homa Ambilan Na Madear pasal Harajaon ni Naibata age bani huta na legan ai, ai halani ai do ase isuruh Ahu.”
44 Jadi laho ma Ia marambilan bani sagala parguruan ni halak Jahudi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA