Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali i Yesu bae karoso ndaya to nawaika i Nosa Mapasing Ia tempo Ia mawolili muni yako nja’u koro Yordan. Wali Ia nasale i Nosa Mapasing nto’u pada bone.
2 Wali opo mpuyu mbengi kasaenya Ia ndate pada bone etu pasi tempo etu Ia nagoda i ngKepala nto pantipu. Ri rayanya opo mpuyu mbengi etu Ia tare mangkoni bara kesaanya, wali see naka Ia moro kojo kompoNya.
3 Wali i Kepala nto pantipu manganto’oka Ia, “Ane monso pu’u Komi Ana i mPue Allah, to’oka watu si’i, ‘Powali yau roti.’”
4 Pei i Yesu mangansono, Ia manganto’o, “Aku taa damangika ewa wetu apa re’e to ratulis ri raya ntuntu i mPue Allah to manganto’o, ‘Naka pei to lino re’e katuwunya si’a ojo saba mangkoni pangkoni. To bae wo’u batuanginya tau nempo mawali moro komponya pei ia tiroo mampolaika kasamparianya gombo i mPue Allah.’ Etu semo to re’e ratulis ri raya ntuntu i mPue Allah.”
5 Wali yako etu i Kepala nto pantipu mangkeni i Yesu nto’u rapa ntongku to malangan. Ojo karata nsira ndate ria, ri rayanya sampida mata ia mangansuduka i Yesu samparia lipu ntau to nakuasang makole.
6 Ia manganto’oka i Yesu, “Samparia lipu to meyawa pasi to bae batuanginya to nukita ngKomi etu aku damangawaika Komi damangkuasang. Apa samparia etu roomo rawaika resi aku, wali i sema to aku rani mangawaika, aku maya mangawaika.
7 Wali aku damangawaika kojo resi Komi ane Komi damampue mampakabae aku.”
8 Pei i Yesu manganto’oka ia, “Gete, bo’ongKu! Apa re’e porenta to ratulis ri raya ntuntu i mPue Allah to manganto’o, ‘Ne’e mampue mampakabae anu to yusa wo’u kasimbalinya yako i Pue apa Ia semo Allah ngkomi. Pasi tare yusa to danupalaika kasimbalinya yako Ia.’ Ewa wetu ratulis ri raya ntuntu i mPue Allah.”
9 Wali yako etu i Kepala nto pantipu mangkeni wo’u i Yesu ndeku Yerusalam. Rata nda’a ria, ia mangkeni i Yesu ndate wumbu to malangan kojo ri banua i mPue Allah panewa manganto’oka Ia makore ndate ria. Ia manganto’oka i Yesu, “Ane monso pu’u Komi Ana i mPue Allah, patimbesi lo’u aranya,
10 apa re’e ratulis ri raya ntuntu i mPue Allah, to’onya, ‘I Pue Allah manganto’oka pomakauNya damampalaes Komi see Komi taa damangarata salaka.
11 Wali pale nsira damangokotaka Komi naka ne’e pasiwa witiMu dakono ri watu.’
12 Pei i Yesu mangansono wo’u gombo i ngKepala nto pantipu etu, Ia manganto’o, “Bo’ongKu matimbesi, apa re’e seja ratulis ri raya ntuntu i mPue Allah, to’onya, ‘Ne’e mangansoba kuasa i mPue Allahmu.’ Ewa wetu ratulis ri raya ntuntu i mPue Allah.”
13 Wali ojo karoonya i Kepala nto pantipu mampeyaa sawei ngaya panggoda, ia mampiyaika i Yesu damangampeas tempo to yusa.
14 Wali yako etu i Yesu mawolili muni njo’u propinsi Galilea. Tempo Ia mawolili etu, re’e kuasa i Nosa Mapasing resi Ia. Pasi kareba mangkonong palaong to inikaNya natikareba-rebamo juku ri lipu ntau nja’u ria.
15 Ia mampotunde nja’u banua-banua to napampotunde nto Yahudi, pasi samparia tau mangabarong Ia.
16 Wali yako etu i Yesu yau njo’u kota Nasaret, kota to karooNya tempo Ia dakodiwa sampe rata temponya Ia baemo. Wali rata nja’u ria, ojo karatanya Eo Rapandoo, Ia yau ri banua to napampotunde nto Yahudi ewa to biasa inikaNya. Rata nja’u ria Ia masua ri raya banua etu panewa yako etu Ia makore damangabasa tuntu i mPue Allah.
17 Wali re’e tau to mangawaika Ia buku rayuyu to nja’u ratulis gombo i Yesaya, to pantuntu tuntu i mPue Allah tempo owi. Wali i Yesu mangaloka buku rayuyu etu panewa Ia mangarata ayat to Ia rani mangabasa, ayat etu manganto’o,
18 “Nosa i mPue re’e resi Aku, apa Ia roomo mangampilis Aku damampakarebaka kareba matao resi tau to masiasi. Pasi Ia nampokau Aku damampaponsanika resi tau to nata’amaka nsa’e sira daralapa muni. Pasi Ia nampokau Aku damampaponsanika resi tau to buta sira damangkita muni rao. Pasi Ia nampokau Aku damangansawang tau to rapakasusa,
19 pasi damampakarebaka resi to lino, manganto’o, ‘Ratamo temponya i Pue Allah damamponsanika komi kanotoNya.’” Etu semo gombo i Yesaya to nabasa i Yesu.
20 Wali ojo karoonya i Yesu mangabasa gombo etu, Ia mangayuyu muni buku rayuyu pei mangawaika muni resi tau to mampasilonga buku etu. Roo see Ia matunda damampotundeka tau boros. Wali samparia tau to nja’u raya banua etu paka mangalo’aka resi i Yesu.
21 Wali Ia manganto’oka sira, “Tuntu i mPue Allah to owo roo nudonge ngkomi tibanangimo seo si’i ri tempo komi mangandonge etu.”
22 Wali samparia tau to nja’u ria paka mangabarong i Yesu, pasi sira ipu rayanya mangandonge gomboNya to magaya kojo etu. Pei sira taa mangaya Ia to pantuntu tuntu i mPue Allah, sira mampobuuka Ia ojo tau biasa semo. See naka sira manganto’o samba’a pei samba’a, to’onya, “Gete, tau si’i ojo Ana i Yusup!”
23 Wali i Yesu manganto’oka wo’u sira, Ia manganto’o, “Aku kunsani komi rani mampatiendoka Aku mangkonong ligi to manganto’o, ‘Dokter, pakulir koromu ngkalio!’ Apa ane ri ligi etu Aku raporapaka ewa dokter pasi komi raporapaka ewa koro nu dokter etu apa komi yunungKu to samba’a lipu. Wali sewaju ewa manganto’oka Aku, ‘Ikaka seja kami to yunuMu palaong to taa rapobiasa to nuika ngKomi resi tau Kapernaum seore.’”
24 Yako etu i Yesu manganto’o wo’u, “Aku manganto’oka komi monso pu’u tare to pantuntu tuntu i mPue Allah to na’angga ntau ane nja’u lipu to si iaja.
25 Pasi monso seja sarita si’i: Ane tempo i Elia tempo owi, tempo etu togo nto’u pei ono mbuya kasaenya taa kojo re’e uja pasi juku ri tana Israel mawali oro to mapari kojo. Wali tempo etu malagi kojo tau balu ri tana Israel si’i.
26 Pei i Elia taa napokau i mPue Allah damangansawang tau balu to Israel etu apa sira taa mangaya i Elia monso pu’u to pantuntu tuntu i mPue Allah. Kasimbalinya yako etu, ia rapokau damangansawang samba’a tau balu to si’a to Yahudi to maroo ri kota Sarpat nja’u tana Sidon.
27 Pasi tempo i Elisa, to pantuntu tuntu i mPue Allah tempo owi seja, tempo etu malagi kojo tau ri tana Israel to masaki malobo. Pei si’a tau etu to rapakatao muni apa sira taa seja mangaya i Elisa ia to pantuntu tuntu i mPue Allah. Wali ojo i Naaman to Siria to rapakatao muni yako ri panyaki to etu.” Ewa wetu nato’o i Yesu mampakanasaka sira ane to Yahudi taa mangaya Ia, Ia dayau wo’u resi tau to yusa.
28 Wali ojo pangandonge ntau to ri raya banua to napampotunde nto Yahudi gombo i Yesu etu, sira samparia paka maja’a kojo rayanya.
29 Sira makore pei mangarubak i Yesu yako ri raya ngkota etu pei mangkeni Ia njo’u wo’o mpanaa to re’e ri pantana to ri awe ngkota nsira etu. Sira damampanasoka yau i Yesu yako ri wo’o mpanaa etu.
30 Pei taa mawali apa i Yesu malinja liu oyo ntau boros etu panewa polas yako ri lipu etu.
31 Wali i Yesu yau wo’u lo’u Kapernaum, kota to la’u propinsi Galilea. Rata la’u ria, ojo karatanya Eo Rapandoo, Ia yau mampotunde tau nja’u banua to napampotunde nto Yahudi la’u ria.
32 Wali sira ipu rayanya mangandonge anu to Ia mampotundeka sira etu, apa Ia magombo ewa tau to nawaika i mPue Allah kuasa.
33 Wali tempo i Yesu mampotunde ri raya banua etu, tempo etu nja’u seja ngkai to naposuak measa, nosa to maja’a kojo. Ngkai etu maroso loonya kaboo,
34 ia manganto’o, “O Yesu to Nasaret, kesaa Komi damangika resi kami to measa? Wimba, Komi bara ma’i mampakaja’a kami? Aku kunsani Komi. Komi semo Tau anu Mapasing yako resi i Pue Allah!”
35 Pei i Yesu mamporentang measa to re’e resi ngkai etu. Ia manganto’o, “Karoti pei piyaimo yako resi ngkai si’i.” Wali measa etu mangika ngkai etu tisiba yau ri wawo ntana ri oyo ntau boros, panewa ia mampiyaika ngkai etu pei ia taa mangawelang.
36 Wali tempo tau boros mangkita palaong etu sira paka ipu kojo rayanya pei manganto’o samba’a pei samba’a, sira manganto’o, “Gete gombo ntau si’i! Bae kojo kuasaNya pasi karosoNya tempo Ia mamporentang measa, see naka sira miyai yako resi tau!”
37 Wali kareba mangkonong Ia natikareba-rebamo juku ri lipu ntau ri awe ngkota etu.
38 Wali i Yesu masuwu muni yako ri banua napampatunde nto Yahudi, panewa Ia yau njo’u banua i nSimon. Nja’u banua etu re’e temanua i nSimon to we’a, ia wojo mapari kojo. Wali tempo i Yesu masua, tau to nja’u raya banua etu, sira mamporapika resi Ia see Ia mangansawang tau we’a etu.
39 Wali i Yesu Ia yau resi tau we’a masaki etu. Ia makore ri awenya pei manganto’oka wojo etu pandooka. Wali tempo etu semo temanua i nSimon ia roo muni wojo, wali ia mansaka mambangu pei mampalinggona sira.
40 Wali yako etu, ojo kawurinya rao, ma’i samparia tau to re’e yununya to re’e panyaki mpangaya-ngaya. Sira ma’i mangkenika i Yesu tau to masaki etu. Wali i Yesu mamposaka paleNya ri wawo ntau to masaki etu samba’a pei samba’a pei mampakatao muni sira.
41 Pasi boros seja tau to naposuak measa, Ia mangarubak yau measa yako resi sira. Pei tempo measa etu miyai, sira maroso loonya kaboo, to’onya, “Komi semo Ana i mPue Allah!” Naka pei sira manganto’o gombo etu apa sira mangansanika Ia semo i Kerisitu, Makole parajanji i mPue Allah. Pei i Yesu manganseko measa etu pasi taa mangabiaka sira magombo wo’u.
42 Wali ojo kaeonya rao i Yesu masuwu yako ri banua i nSimon. Ia yau njo’u tampa to tare tau mangkaroos. Yako etu ma’i tau boros mangaliwu i Yesu. Ojo parata nsira Ia, sira rani manta’amaka Ia see Ia taa mampiyaika lipu nsira.
43 Pei Ia manganto’oka sira, “Kareba matao mangkonong ewa wimba i Pue Allah mawali Makole nto lino, kareba etu taa maya taa Aku mampakarebaka njo’u kota-kota to yusa seja, apa etu semo sabanya naka pei Aku napokau i mPue Allah.”
44 Wali yako etu i Yesu mampakarebaka tau nja’u banuabanua to napampotunde nto Yahudi juku ri propinsi Yudea.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA