Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Iatonna ma’taun sangpulo limamo tu kadatuanna datu kapua Tiberius tonna Pontius Pilatus to maraa dio Yudea, na Herodes datu dio Galilea, na Filipus siulu’na, datu dio Iturea sia lan parenta Trakhonitis, na Lisanias datu dio Abilene;

² tonna Hanas sola Kayafas Tominaa Kapua, narampoimi kadanNa Puang Matua tu Yohanes, anakna Zakharia, dio padang pangallaran.

³ Saemi Yohanes lako lili’na salu Yordan, umpa’pangadaran kadidioran tanda pengkatobaran, tu napotete kadipa’deian kasalan,

⁴ susi tu lan sura’ pa’parundena nabi Yesaya, kumua: Den gamaranna tau metamba-tamba dio padang pangallaran: Pasakka’mi tu batattaNa Puang, ranteimi tu lalanNa!

⁵ Mintu’na lombok la dibumbun sia mintu’na tanete na buttu-buttu la dirantei, sia iatu ma’lekko-lekkona la dipakalolo, sia iatu tang marantena la dirantei,

⁶ sia mintu’na ma’rupa tau la untiro kasalamaran dio mai Puang Matua.

⁷ Nakuami lako to buda, tu to sangsunammo la nadio’; E bati’ ula’ rame, mindara umpatudukomi umpallaian kalemi dio mai kasengkean la sae undinna?

⁸ Iamoto dadi pasombomi tu bua sitinayanna katobaran sia da mikua lan penaammi kumua: Abraham kami tu ambe’ki belanna kukua lako kalemi, kumua iatu Puang Matua matoto’ umpadadianni anak Abraham te mai batu.

⁹ Nakampai bangmo uase tu garonto’ kayu; iamoto umba-umba tu kayu tang membua melo dilelleng nadibuang tama api.

¹⁰ Mekutanami tu to buda lako nakua: Iake susito, apa tu sipatu la kipogau’?

¹¹ Nakuami mebali lako: Minda tu unnampui bayu da’dua, benni misa’ tu tang unnampuinna bayu, sia iatu to ma’kinallo, la susi dukato.

¹² Saemi tu passima la morai didio’, nama’kada nakua lako: O guru! apara tu sipatu la kipogau’?

¹³ Nakuami Yohanes lako: Da mipala’bii mipalaku tu mangkanna disuangkomi.

¹⁴ Dennomi surodadu mekutana lako, nakua: Na iatu kami, apara tu la kipogau’? Nakuami lako: Moi misa’ tau da mipakario-rioi, sia da mialai apanna tau sia pasilasan bangmi tu gadimmi.

¹⁵ Iatu to buda ma’peagi bang, nasanga-sanga lan penaanna tu diona Yohanes kumua: ba’tu tang iapa te tu Mesias.

¹⁶ Mebalimi Yohanes lako mintu’ tau, nakua: Tonganna kudio’komi uai, apa la sae pole undinna tu To ondong Ia kuasanNa na aku, moi ulang lapik lentekNa tang sipatu dukana’ la umbukai. Iamo la undio’komi Penaa Masallo’ sia api.

¹⁷ Diomo Natoe tu barangNa, la Napemata’pii tu panglullu’Na anNa rampunni tama pa’pannian tu malapu’na, apa iatu langkona sola ongkanna la pura Naballa api tang pa’de-pa’de.

¹⁸ Ba’tu pira-pirapa kada senga’ naadaranni lako sia napangadaran tu Kareba kaparannuan lako to buda.

¹⁹ Apa iatu Herodes datu sangtepona tondok, tonna mangkamo Yohanes umpakilalai tu diona Herodias, bainena siulu’na, sia belanna mintu’na kakadakean napogau’ Herodes,

²⁰ naranganni pissanoi tu kakadakean iate napogau’ untarungku Yohanes lan pa’tarungkuan.

²¹ Den pissan tonna popedio’ nasang kalena tu tau, Yesu didio’ duka, marassanmo massambayang, natibungka’ tu langi’.

²² Pakalan Nasonglo’ tu Penaa Masallo’ dao mai langi’ lako Kalena mempaan susi bu’ku’; anna sae tu gamara dao mai langi’ ma’kada kumua: Kamumo Anak Pa’kaboro’Ku; dio dukamo Kalemi nanii kasendeangKu.

²³ Iatu Yesu tonna randukmo ma’pangada’, agi-agi tallungpulomo taunNa; nasangami tau, iamo anakna Yusuf, anakna Eli,

²⁴ anakna Matat, anakna Lewi, anakna Malkhi, anakna Yanai, anakna Yusuf;

²⁵ anakna Matica, anakna Amos, anakna Nahum, anakna Hesli, anakna Nagai;

²⁶ anakna Maat, anakna Matica, anakna Semei, anakna Yosekh, anakna Yoda;

²⁷ anakna Yohanan, anakna Resa, anakna Zerubabel, anakna Sealtiel, anakna Neri;

²⁸ anakna Malkhi, anakna Adi, anakna Kosam, anakna Elmadam, anakna Er;

²⁹ anakna Yesua, anakna Eliezer, anakna Yorim, anakna Matat, anakna Lewi;

³⁰ anakna Simeon, anakna Yehuda, anakna Yusuf, anakna Yonam, anakna Elyakim;

³¹ anakna Melea, anakna Mina, anakna Matata, anakna Natan, anakna Daud;

³² anakna Isai, anakna Obed, anakna Boas, anakna Salmon, anakna Nahason;

³³ anakna Aminadab, anakna Admin, anakna Arni, anakna Hezron, anakna Peres, anakna Yehuda;

³⁴ anakna Yakub, anakna Ishak, anakna Abraham, anakna Terah, anakna Nahor;