Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kon taong impuḷuh bo lima kom pinomarentaan i Kaisar Tiberius, wakutu ing ki Pontius Pilatus nobalií gubernur kom butaí in Yudea bo ki Herodes in raja kong Galilea, ki Pilipus ki utatnya in raja kon Iturea bo Trakhonitis, ki Lasanias in raja kon Abilene.

² Tungkuḷ intua imang moḷoben ing ki Hanas bo ki Kayapas. Kon taong tatuata ki Allah nosingog takin nomakeí ko'i Yohanes inta ki adií i Zakaria. Ki Yohanes namangoi nongkon padang gurun.

³ Ki Yohanes minaya-mayak makow im bayongan lipuí inta kon diugmai Ongkag in Yordan bo nopobaḷuí, "Pogogaidon mogaid kom dosa mita bo pokibaptisdon simbaí ampungandon i Allah im bayongan taḷaímu."

⁴ Soaáḷ tatua náonda bo inta aim pinais kom bonu im buk i Nabi Yesaya nana'a: "Oyuíon singog in intau inta mopobaḷuí nongkon padang gurun, 'Sadiadon in daḷan ko'i Tuhan, tulidon in daḷan ko'i-Nia.

⁵ Toko bumbunai in lembong mita, bo pomuḷoi im buḷud bo inta notombuḷud in toko'tondodaidon. Daḷan inta nongobelung toko'tulidon, bo inta nongo'tontudu tokotondodaion.

⁶ Simbaí komintan intau moko'ontong ko'i Allah moposaḷamat kom bayongan intau!'"

⁷ Ki Yohanes noguman kom bayongan intau inta namangoi noki'baptis ko'inia nana'a, "Hei mo'ikow intau moromuí, ki ine in noguman kon mo'ikow ing kotaliban in hukuman i Allah inta kon singgai mo'iduduimai na'a?

⁸ Pogumanku ko'i monimu, 'Popo'ontongpa muna in oaíid monimu mopia, saḷaku tanda kom mo'ikow in totu-totu'u bidon nogogai nogaid kon inta diaí mopia. Bo dona'aipa muna moguman im mo'ikow kong ki Abraham ing ki amaí nami! Simbaí pogumanku kosilangon ko'i monimu, batu mita tana'a im mota'aubií aidan i Allah ki adií mita i Abraham!

⁹ Boliung aindon sinadia makow pomupuḷ kom pangkoi dapot in uakatnya mita. Pomuḷoi im pinomuḷa inta diaí mopomungai im bungai inta mopia, toko-pupuḷon bo tubaían kon tuḷu.'"

¹⁰ Daí intau moaíntoí kon tua noliboí ko'inia nana'a, "Aka natua yo onu im musti aidan nami?"

¹¹ Ki Yohanes notubag, "Aka ki'ine ing koḷambung doyowa, yo musti in sia mobogoi in ḷambung tobatuí kon intau inta diaí koḷambung; naí doman tua, aka ki'ine in oyuíon ko ka'anon, yo ogoiaibií in intau inta diaí kokaanon."

¹² Wakutu intua oyuíon doman in intau mita inta mononagih kom pajak namangoi noki'baptis ko'i Yohanes. Mosia noliboí, "Pak guru, onu im musti aidan nami?"

¹³ Tubagnya ko'i monia, "Dona'ai monagih mo'iliu kononu inta ain sinantuí ko'i monimu."

¹⁴ Oyuíon doman in tontara noliboí, "Yo aka kami, onu in aidan nami?" Tubag i Yohanes, "Dona'ai mogagow bo dona'ai momakisa kon intau poḷat moponapud in inta diaí mita totu'u. Pakeídon ing gajimu tontanií."

¹⁵ Ko wakutu intua intau mita nomangkoidon nolibo-liboían, degaí ki Yohanes na'a in Raja Mopoposaḷamat inta inoḷat makow monia.

¹⁶ Tuamai ki Yohanes noguman ko'i monia komintan, nana'a, "Aku'oi im Mopobaptis ko'i monimu in tubig, ta'e mo'iangoibií in intau inta moḷobe-ḷoben nongkon inakoí. Umpakah tongaí mobukaí kon togot in sapatunya yo diaí kobalií in aku'oi. Sia tua im mopobaptis ko'i monimu in Roho i Allah bo tuḷu.

¹⁷ Digu kokada-kadai-Nyadon sim poguaban kong gandum dapot im modarit. Gandum inta nodaritdon tontaniíon-Nya bo taguíon kon tampatnya, ta'e bayongan pangkoinya in tubaían-Nya kom bonu in tuḷu inta diaí mopio-piong."

¹⁸ Norupa-rupamai in tonggina i Yohanes ko wakutu in sia nopoyaput in Habar Mopia.

¹⁹ Tongaí naonda in sia nononggina ko'i Herodes raja ing Galilea inta mongibog ko'i buḷoi i utatnya ki Herodias, bo nonogur doman kon oaíidnya mita ibanea inta diaí mopia,

²⁰ tongaí nokodugang kon romuí i Herodes nodapot ing ki Yohanes pinobonunya kom ponjara.

²¹ Naonda in nodaitdon binaptis in intau mobayong kon tua, ki Yesus namangoi doman noki'baptis. Koyogot im baptison, Sia nosambayang bo ḷangit nobukat,

²² bo Roho i Allah noponag ko'i-Nia naonda bo ḷagapan paḷoma bo kino'dongogandon in singog nongkon ḷangit noguman nana'a, "Ikow ing ki Adií-Ku inta kino'tabi-Ku. Ikow ing kino'ibog-Ku."

²³ Ki Yesus nomangkoidon nogaid kon oaíidan-Nya wakutu in Sia umurdon degaí toḷu nopuḷuh notaong. Kai'n intau Sia na'a ing ki adií i Yusup, inta ki adií i Eli,

²⁴ ki adií i Matat, adií i Lewi, ki Lewi ki adií i Melkhi, adií i Yanai inta ki adií i Yusup,

²⁵ adií i Matica, ki Matica ki adií i Amos inta ki adií i Nahum adií i Hesli inta ki adií i Nagai,

²⁶ adií i Maat inta ki adií i Matica, ki Matica inta ki adií i Simei, ki adií i Yosek adií i Yoda

²⁷ inta ki adií i Yohanan adií i Resa inta ki adií i Zerubabel, adií i Sealtiel inta ki adií i Neri,

²⁸ ki Neri inta ki adií i Malkhi ki adií i Adií, ki adií i Kosam inta ki adií i Elmadam, adií i Er,

²⁹ ki adií i Yesua, inta ki adií i Eliezer, ki adií i Yorim adií i Matat ki adií i Lewi,

³⁰ inta ki adií i Simeon adií i Yohuda, inta ki adií i Yusup, adií i Yonam, ki adií i Elyakim,

³¹ inta ki adií i Melea, adií i Mina inta ki adií i Matata, adií i Natan ki adií i Daud,

³² ki adií i Isai, adií i obed ki adií i Boas, ki adií i Salmon adií i Nahason,

³³ inta ki adií i Aminadab adií i Admin, inta ki adií i Arni adií i Hezron ki adií i Peres adií i Yohuda,

³⁴ inta ki adií i Yakub, ki adií i Ishak adií i Abraham, inta ki adií i Terah ki adií i Nahor,

³⁵ adií i Serug, inta ki adií i Rehu, adií i Peleg, ki adií i Eber inta ki adií i Salmon,

³⁶ inta ki adií i Kenan adií i Arpakhasad, adií i Sem, ki adií i Nuh inta ki adií i Lamekh,

³⁷ inta ki adií i Metusalah, adií i Henokh, ki adií i Yared inta ki adií i Mahalael, adií i Kenan,

³⁸ ki adií i Enos inta ki adií i Set ki adií i Adam inta ki adií i Allah.

Lukas

Video Lukas 03

Ikuti Kami:

KONTAK | PARTISIPASI | DONASI