Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Di tawun nan kalimo baleh, dari pamarentahan Kaisar Tiberius, Pontius Pilatus manjadi gubenur di Yudea, Herodes mamarentah di Galilea. Filipus, dunsanak Herodes mamarentah di wilayah Iturea, sarato jo di Trakhonitis, sadangkan Lisanias mamarentah di Abilene.

² Nan manjabaik imam-imam basa iyolah Hanas jo Kayafas. Di tawun itulah Allah bakato di padang pasie, kabake Nabi Yahya anak dari Zakharia.

³ Mangko payilah Nabi Yahya kian kumari disadonyo daerah sungai Yordan untuak mambaritokan kaba dari Allah. Nabi Yahya ma imbau-i urang supayo bi batobaik, "Batobaiklah dari doso angku-angku, angku-angku musti dipamandikan, supayo Allah buliah ma ampuni doso angku-angku."

⁴ Itu samo jo apo nan lah tatulih di dalam kitab Nabi Yesaya: "Ado urang ba imbau-imbau di padang pasie, 'Sadiyokanlah jalan untuak Tuhan, ratokanlah jalan untuak Baliau.

⁵ Satiyok lurah ka ditimbun, satiyok gunuang jo bukik ka didatakan. Labuah nan bakelok-kelok ka diluruihkan, jalan nan balakuak-lakuak ka didatakan.

⁶ Kasadonyo urang di ateh dunia ko ka maliyek Allah manyalamaikkan umaik manusia!'"

⁷ Sambuah urang nan bi tibo kabake Nabi Yahya untuak mintak dipamandikan. Nabi Yahya mangatokan kabake urang-urang tu, "Angku-angku adolah urang jahek! Siya urang nan mangatokan, baraso angku-angku dapek lapeh dari ukunan, nan dari Allah?

⁸ Panampakkanlah jo karajo angku-angku, baraso angku-angku iyo lah batobaik dari doso! Jan sampai ado di antaro angku-angku nan mangatokan, baraso Nabi Ibrahim adolah niniak muyang angku-angku. Kana-ilah apo nan ambo katokan ko: Dari batu nan ado ko, Allah bisa mambuwek katurunan untuak Nabi Ibrahim!

⁹ Kapak lah tasadiyo untuak panabang kayu sampai ka urek-ureknyo. Satiyok batang kayu nan indak ma asiekan buwah nan elok, ka ditabang, sudah tu di ambuangkan masuak api."

¹⁰ "Jikok baitu, apo nan musti kami karajokan?" kecek urang-urang tu kabake Nabi Yahya.

¹¹ Nabi Yahya manjawab, "Urang nan mampunyoi baju duwo alai, inyo musti ma agiahkan bajunyo salai, untuak urang nan indak babaju; baitu pulo, urang nan lai ado nan ka dimakan, inyo musti mambagi makanannyo tu, jo urang nan indak ado nan ka dimakan."

¹² Tukang mintak pajak, bi tibo pulo kabake Nabi Yahya, untuak mintak dipamandikan. Inyo bi batanyo, "Angku guru, apo nan musti kami karajokan?"

¹³ Nabi Yahya manjawab, "Janlah angku-angku mamintak pajak, labiah daripado nan lah di agakkan."

¹⁴ Ado pulo saradadu nan batanyo, "Kami baa pulo caronyo ngku? Apo nan musti kami karajokan?" Nabi Yahya manjawab, "Janlah angku-angku mamangua urang, siya juwo pun urangnyo, janlah mamintak pitih urang, jo tuduahan nan palasu. Cukuikkan sajolah gaji angku-angku!"

¹⁵ Dikutiko itu urang muloi batanyo-tanyo, apokoh baliau ko, Rajo Panyalamaik nan dinanti-nantikan.

¹⁶ Itulah sababnyo, mangko Nabi Yahya mangatokan kabake sadonyo urang-urang tu bakcando iko, "Ambo mampamandikan angku-angku jo ayie, tapi saketek ari lai, ka tibo Urang nan labiah basa daripado ambo. Untuak mambukak tali tarompa-Nyo sajo, ambo indak patuik. Baliau ka mampamandikan angku-angku jo Roh Allah sarato jo api.

¹⁷ Di tangan-Nyo ado tampiyan untuak panampi kasadonyo gandun-Nyo sampai tareh. Nama nan gandun ka dikumpuakan-Nyo masuak lumbuang, tapi, nama nan dadak ka dibaka-Nyo dalam api nan indak namuah pudua!"

¹⁸ Bakcando itulah Nabi Yahya manasiyaik-i urang, jo bamacam-macam caro, dikutiko baliau mambaritokan Injil.

¹⁹ Tapi Rajo Herodes, panguwaso di Galilea, inyo diparingekkan dek Nabi Yahya, parkaro inyo mampabini si Herodias jando karek-annyo, sarato jo sagalo karajo-karajo jahek nan lah dipabuweknyo.

²⁰ Tapi, malah rajo Herodes manambahi karajo jaheknyo, inyo masuakkan Nabi Yahya ka dalam pinjaro.

²¹ Sasudah kasadonyo urang dipamandikan, mako Isa Almasih dipamandikan pulo. Kutiko Baliau sadang badowa, mako tabukaklah langik,

²² Roh Allah turun kabake Baliau barupo buruang marpati. Sudah tu tadangalah suwaro dari Allah, nan mangatokan, "Angkaulah Anak-Den, nan Den kasiahi. Angkau manyanangkan ati-Den."

²³ Dikutiko Isa Almasih mamuloi karajo-Nyo, kutiko itu Baliau lah ba umua kiro-kiro tigo puluah tawun. Sacaro layie urang bapandapek, Baliau adolah anak Yusuf, anak Eli,

²⁴ anak Matat, anak Lewi, anak Malkhi, anak Yanai, anak Yusuf,

²⁵ anak Matica, anak Amos, anak Nahum, anak Hesli, anak Nagai,

²⁶ anak Maat, anak Matica, anak Simei, anak Yosekh, anak Yoda,

²⁷ anak Yohanan, anak Resa, anak Zerubabel, anak Sealtiel, anak Neri,

²⁸ anak Malkhi, anak Adi, anak Kosam, anak Elmadam, anak Er,

²⁹ anak Yesua, anak Eliezer, anak Yorim, anak Matat, anak Lewi,

³⁰ anak Simeon, anak Yehuda, anak Yusuf, anak Yonam, anak Elyakim,

³¹ anak Melea, anak Mina, anak Matata, anak Natan, anak Daud,

³² anak Isai, anak Obed, anak Boas, anak Salmon, anak Nahason,

³³ anak Aminadab, anak Admin, anak Arni, anak Hezron, anak Peres, anak Yehuda,

³⁴ anak Yakub, anak Ishak, anak Ibrahim, anak Terah, anak Nahor,

³⁵ anak Serug, anak Rehu, anak Peleg, anak Eber, anak Salmon,