Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ri taung makasampuloa allima ammarenta Karaeng Tiberius, Pontius Pilatus a’jari guburnur ri Yudea; na Herodes ammarenta ri Galilea; na Filipus, sari’battanna Herodes, ammarenta ri Iturea siagang Trakhonitis; na Lisanias ammarenta ri Abilene.

² Na a’jari imang-imang lompoa, iamintu Hanas siagang Kayafas Iaminjo taunga Na’bicara Allata’ala ri parang lompoa mae ri Yohanes, ana’na Zakharia.

³ Jari a’lampami Yohanes mange ri sikontu daera a’reppeseka ri Binanga Yordan, na napabattu biritta battua ri Allata’ala. Akkiok-kio’mi Yohanes nakana, "Toba’ ngaseng mako battu ri dosa-dosanu, siagang musti nije’nekko, sollanna Napammopporangko Allata’ala."

⁴ Kammaminjo niaka tattulisi’ lalang ri kitta’ Na’bi Yesaya angkanaya, "Nia’ tau akkiok-kio’ ri parang lompoa, angkana, ‘Pasadiai oloanNa Batara, lappari oloang laNaoloa.

⁵ Lanitambungi sikamma ka’bunga lanilappari sikamma buluka siagang bontoa Parallui nilambusi oloang a’lekko-lekkoa, na lanilappari oloang akkali’-kali’bonga.

⁶ Lanacini’mi sikontu bonena linoa Napasalama’ Allata’ala rupataua!’"

⁷ Jaimi tau mae ri Yohanes untu’ nije’ne’. Nakanamo Yohanes ri ke’nanga, "Ikau ngaseng tau ja’dalaka! Inai ampauangko angkanaya lakkullei nuliliang hukkungang labattua ri Allata’ala?

⁸ Pappicinikammi rolong lalang ri panggaukannu, angkanaya ma’nassa toba’ mako battu ri dosa-dosanu! Teako angkanai kaboe-boenu anjo Abraham. U’rangi angkanaya: Manna anne batu-batua akkulle tongi Napa’jari Allata’ala sossoranna Abraham!

⁹ Sadiami pangkuluka untu’ lanipake anta’bangi poko’ kayua sa’genna ri aka’-aka’na. Sikamma poko’ kayu tenaya na’rappo baji’, lanita’bangi nampa nipela’ antama’ ri pepeka."

¹⁰ Akkuta’nammi taua ri Yohanes angkana, "Jari apa musti nagaukang ikambe?"

¹¹ Appialimi Yohanes nakana, "Tau niaka ruang lawara’ bajunna, musti napassareangi silawara’ mae ri tu tenaya bajunna. Na tau niaka kanrena, musti nabagei tongi tu tenaya kanrena."

¹² Battu tommi pasingara’ rentea mae ri Yohanes ero’ nije’ne’. Akkuta’nammi ke’nanga angkana, "O, Pa’ Guru, apa musti nagaukang ikambe?" Appialimi Yohanes nakana,

¹³ "Teako la’bi batenu assingara’ doe’ sima situru’ le’baka nipattantu."

¹⁴ Nia’ tommo surudadu akkuta’nang angkana, "Antekamma anne ikambe? Apa musti nigaukang?" Appialimi Yohanes nakana, "Teako paccoki taua, siagang teako garattaki taua lanri ero’na nualle passa doe’na. Kasukkurammi gaji nugappaya!"

¹⁵ Pakkaramulami taua assikuta’-kuta’nang, angkana maka iaminne Yohanes Karaeng Mappasalama’ salloamo natayang ke’nanga.

¹⁶ Jari nakanamo Yohanes ri ke’nanga, "Inakke je’ne’ kupake anje’nekko, mingka nia’ labattu tau lompoanganga na inakke. Manna alla’gasia otere’ sapatuNa tena todong kusiratang. Iami sallang lanje’nekko siagang RohNa Allata’ala siagang pepe’.

¹⁷ Nia’mi lalang limanNa pa’dinginga, untu’ laNapake antapi sikamma berasaka sa’genna tangkasa’. LaNapasse’rei berasaka lalang ri pammolikanna; mingka awanga laNatunui ri pepe’ tenaya nalammari rinrana!"

¹⁸ Kammaminjo, na’rupa-rupamo cara napake Yohanes ampakaingaki anjo taua, na napabattu Kabara’ Bajika.

¹⁹ Mingka napakainga’mi Herodes, ammarentaya ri Galilea ri passala’ pa’buntinganna siagang Herodias. Anjo Herodias bainenna sari’battanna niarenga Filipus. Kammayatompa ri passala’ kaja’dallang maraenga, le’baka nagaukang Herodes.

²⁰ Mingka pila’ natambaiji kaja’dallanna Herodes, lanri napantama’na Yohanes ri tarungkua.

²¹ Le’ba’na ngasemmo anjo taua nije’ne’, nije’ne’ tommi Isa. Na ri wattunna appala’ doang tassungkei langika,

²² na manurummo RohNa Allata’ala irateanganNa, sangkamma jangang-jangang bodobangkeng. Nampa nia’ kalangngerang sa’ranNa Allata’ala battu ri suruga angkana, "IKaumi AnakKu Kukamaseanga. IKaumi ampakasannangi atingKu."

²³ Ri wattunna Napakkaramulamo jama-jamanNa Isa, kira-kira tallumpulo taungi umuru’Na. Manuru’ panggappana taua iaminne pattottorang boe-boena Isa: Yusuf, Eli, Matat, Lewi, Malkhi, Yanai, Yusuf, Matica, Amos, Nahum, Hesli, Nagai, Maat, Matica, Simei, Yosekh, Yoda, Yohanan, Resa, Zerubabel, Sealtiel, Neri, Malkhi, Adi, Kosam, Elmadam, Er, Yesua, Eliezer, Yorim, Matat, Lewi, Simeon, Yehuda, Yusuf, Yonam, Elyakim, Melea, Mina, Matata, Natan, Daud, Isai, Obed, Boas, Salmon, Nahason, Aminadab, Admin, Arni, Hezron, Peres, Yehuda, Yakub, Ishak, Abraham, Terah, Nahor, Serug, Rehu, Peleg, Eber, Salmon, Kenan, Arpakhsad, Sem, Nuh, Lamekh, Metusalah, Henokh, Yared, Mahalaleel, Kenan, Enos, Set, Adam, ana’Na Allata’ala.

²⁴ (3:23)

²⁵ (3:23)

²⁶ (3:23)

²⁷ (3:23)

²⁸ (3:23)

²⁹ (3:23)

³⁰ (3:23)

³¹ (3:23)

³² (3:23)

³³ (3:23)

³⁴ (3:23)

³⁵ (3:23)