Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali ojo pandoonya rotai nja’u kota Epesus, i Paulus mampasiromunaka anaguru i mPue Yesu. Ia magombo mampakaroso raya nsira panewa roo see ia masimang dayau njo’u propinsi Makedonia.
2 Rata nja’u Makedonia etu, ia malinja-linja mayunu-yunu resi tau to maroo nja’u ria. Ia boros gombonya mampakaroso raya nsira. Wali yako etu ia polas wo’u rata nja’u tana Yunani.
3 Nja’u tana Yunani etu ia maroo-roo togo mbuya kasaenya, panewa ia mampakaroso damalayag wo’u njo’u propinsi Siria. Pei tempo etu ia re’e mangandonge kareba mangkonong songka nto Yahudi damampopate yau ia. Wali ia taa mawali yau njo’u propinsi Siria. Ia mangawali songkanya damawolili muni liu ri propinsi Makedonia.
4 Pasi re’e pitu tau to mangalulu ia. Tau etu sanganya samba’a i Sopater, ana i Pirus to yako kota Berea. Pasi re’e seja i Aristarkhus sira dua i Sekundus to yako kota Tesalonika. Pasi re’e seja i Gayus to yako kota Derbe, pasi i Timotius, panewa re’e seja i Tikhikus sira dua i Tropimus to paka yako propinsi Asia.
5 Sira pitu etu matiruyu mangampea kami nja’u kota Troas.
6 Wali ojo karoonya roa to napangangkoni nto Yahudi roti to tare raginya, kami malayag yako ri kota Pilipi panewa ojo kagananya lima mbengi kami simparata wo’u pei sira pitu nja’u kota Troas. Wali kami re’e maroo-roo nja’u ria pitu mbengi kasaenya.
7 Wali tempo etu rata wuri Minggu kami siromu mangkoni sindara-ndara mangendo kapate i mPue Yesu. Tempo etu i Paulus mampogomboka kami. Ia masae kojo magombo rata ntongo wuri, apa eo rao ia dameyoko wo’u. Wali tempo kami siromu etu, kami re’e ri juya to katogo ntampenya pasi boros lampu to mampakareme ndate ria.
8 (20:7)
9 Wali tempo i Paulus magombo etu, re’e samba’a tau to mangurawa to sanganya Eutikhus, ia matunda-tunda ri jendela to katogo ntampenya etu. Wali ngkai etu mawali yore kojo matanya mampeas i Paulus magombo masae kojo. Wali ia yore denat kojo see naka ia masou yako ndate jendela ri juya katogo ntampenya etu tudu la’u tana. Yako etu re’e tau to yau mangokotaka ia pei ia matem.
10 Pei i Paulus mana’u yako ndate juya etu panewa ojo karatanya ri awe ntau mate etu ia mo’o yau ri wawonya pei mansokowaka ia. Ia manganto’oka tau boros to siromu ri awenya, to’onya, “Ne’e masusa raya ngkomi apa ngkai si’i la’uja nosanya.”
11 Wali roo etu i Paulus mapone muni wo’u ndate juya etu pei mangampesu-mpesutimo roti panewa mangkoni sindara-ndara pei sira. Pei roo see ia magombo-gombo wo’u rataka eo, panewa ia meyoko.
12 Wali tau nja’u ria mangkeni ngkai to mangurawa to tuwu muni etu, sira mangkeni njo’u banuanya. Sira masanang muni rayanya apa ia la’u muni nosanya pasi sira tamo muni mawo rayanya.
13 Wali kami yau mapone ri bangka panewa malayag matiruyu njo’u kota Asos panewa nja’u ria i Paulus damapone seja ri bangka mami. I Paulus semo to nangansongka ewa wetu apa ia rani malinja mbiti yako ri kota Troas rata nja’u Asos.
14 Wali yako etu kami simparata pei i Paulus nja’u Asos panewa ia mansaka mapone ri bangka. Yako etu kami malayag wo’u rata nja’u kota Metilene.
15 Yako nja’u Metilene kami malayag wo’u panewa eo rao wo’u rata ri tango mpulo Khios. Wali yako etu eo rao wo’u kami liu ri pulo Samos panewa eo rao wo’u rata nja’u kota Miletus.
16 Ewa pampobuuka i mPaulus ia taa rani liu mandoo nja’u kota Epesus apa ia mampobuuka ane mandoo nja’u ria ojo pura yau temponya ri propinsi Asia. Naka pei ia taa rani ewa see apa ia mangansongka dayau ndeku Yerusalem see ane bara maya ia nda’a nda’a ria ri katawanya temponya Roa Pentakosta.
17 Wali tempo nja’u nja’u kota Miletus i Paulus mampotuu resi ketua-ketua ntau to mangaya i Pue Yesu nja’u Epesus see sira dama’i simparata pei ia ri Miletus etu.
18 Wali ketua etu mangampago ia panewa ojo paratanya, i Paulus manganto’oka sira, to’onya, “A’i-a’i, komi mangansani ewa wimba lengkongku tempo aku maroo-roo ri oyo ngkomi yako ri karatangku ri propinsi Asia seore.
19 Tempo etu aku taa bae-bae rayangku pasi tempo etu aku tongo ngkatumangingku mangika palaong i mPue. Ewa wetu inikangku nempo mangarata soba apa saba songka nto Yahudi to rani mampakaja’a aku.
20 Pasi komi nunsani seja aku taa meka mampotundeka komi samparia anu to bae batuanginya resi komi. Samparia etu aku mampotundeka komi tempo ri tango ntau boros pasi ri raya banua ngkomi samba’a pei samba’a.
21 Tempo etu aku sangkani mampatiendoka komi to Yahudi pasi komi to si’a to Yahudi see komi mangandolika tangomu resi i Pue Allah pasi mangaya i Pue ngkita, i Yesu Kerisitu.
22 Wali a’i-a’i, si’i-si’i aku dayau ndeku Yerusalem mangalulu porenta i Nosa Mapasing resi aku. Pei aku taa kunsani bara kesaa to damawali resi aku tempo aku nda’a nda’a ria
23 kasimbalinya yako to room napaponsanika yami i Nosa Mapasing aku. Apa ponto-ponto kota to kukarata Ia mampatiendoka aku mangkonong palaong to damawali resi aku nda’a Yerusalem, Ia manganto’o, ‘Korom daratarungku pasi darasesai.’ Etu semo to to’oNya resi aku.
24 Pei aku taa mampobuuka bae batuanginya katuwungku, apa to bae batuanginya resi aku mampakaroo palaong to nasarumakaka i mPue Yesu aku. Palaong etu semo mampakareba kareba matao mangkonong kanoto i mPue Allah. Wali see naka aku tiroo dayau ndeku Yerusalem.
25 Wali a’i-a’i, aku roomo mampakarebaka resi komi samparia mangkonong tempo i Pue Allah mawali Makole nto lino. Pei si’i-si’i aku kunsani yako tempo si’i komi tamo damangkita wo’u aku.
26 See naka aku mampakanasaka komi seo si’i ane bara re’e tau to yako ri oyo ngkomi damangarata huku to singkasaenya, si’a salangku,
27 apa aku taa meka seore mampakarebaka resi komi samparia songka i mPue Allah.
28 Wali jagai kojo koro ngkomi pasi jagai seja samparia tau to mangaya i Pue Yesu apa i Nosa Mapasing room mansarumakaka resi komi mampasilonga tau etu. Wali kampang sira ewa naika nto pangkampang domba mangkampang dombanya. Apa tau to mangaya roomo inolika yau i mPue Allah raa nu anaNya.
29 Wali jagai kojo sira apa aku kunsani payungku aku dameyoko yau si’i, dama’i tau to maja’a damampakaja’a komi ewa naika asu maila to maja’a kiranya mampakaja’a yau domba.
30 Pasi yako ri oyo ngkomi semo re’e bara sawei mba’a tau to damampotundeka komi anu to taa monso. Tau etu damangamomis anaguru i mPue Yesu sampe anaguru etu damangalulu yau songka nsira.
31 Wali see naka jagai kojo. Pasi ne’e mangkalingan samparia patiendongku. Apa togo nto’u kasaenya wuri eo aku tare pandoonya mampatiendoka komi samba’a pei samba’a. Tempo etu boros ngkani aku tumangi apa mamporayang kojo komi, pei nempo ewa see aku taa mandoo mampatiendoka komi.
32 Wali a’i-a’i, si’i-si’i aku makai-kai mansarumakaka komi resi i Pue Allah see Ia semo damangangkampang. Pasi aku mampokaika komi see komi damangkongko kojo kareba mangkonong kanoto i mPue Allah. Apa Ia nakurang mampakaroso raya ngkomi pasi mangawaika komi tila to room napakatantuka i mPue samparia tau to Ia puenya.
33 Wali tempo aku maroo resi komi seore aku tare mamporani doi ngkomi bara pake ngkomi.
34 Komi semo mangansani aku tare mamporapi bara kesaa yako resi komi, pei yako palaongingku semo aku mangarata samparia to kupake pasi to napake nu yunungku seja.
35 Wali samparia palaong to aku mangika etu mawali tondong resi komi, see komi mangansani seja ewa wimba raika mapalaong see mangansawang yunu ngkita to ri raya ngkasusa. Pobuuka kojo gombo i mPue Yesu to manganto’o, ‘To sanang-sanang mangansora sa’e sakowa tau to rasora.’”
36 Wali ojo karoonya i Paulus magombo etu, ia mambokotu pasi ia makai-kai sindara-ndara pei samparia yununya yako Epesus etu.
37 Roo etu samparia sira tumangi, sira mangansokowaka i Paulus pasi manganengu-nengu ia.
38 To mampakamawo raya nsira etu gombo i mPaulus manganto’o, “Yako tempo si’i komi tamo damangkita wo’u aku.” Wali yako etu sira yau mangantambo i Paulus ungka ri bangka.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA