Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sesampun keadaan lẽq Epesus tentrem malik, Paulus ngumpulang jemaah dait neguqang angen ie pade. Terus Paulus bepamit lẽq dengan-dengan nike, dait ngelanjutang kelampanne ojok Makedonia.

² Paulus datengin daẽrah-daẽrah Makedonia, dait luwẽq ngebẽng nasẽhat lẽq dengan-dengan saq percaye lẽq Deside Isa dait ngebẽng ie pade semanget. Beterus ie lumbar ojok Yunani.

³ Telu bulan ngonẽqne ie ndot lẽq derike. Sewaktu ie kenyeke berejap gen belayar ojok Siria, araq berite bahwe dengan-dengan Yahudi kenyeke mupakat gen nyematẽq ie. Keranaq nike ie mutusang gen tulak langan Makedonia.

⁴ Sopater bije Pirus saq asalne lẽman Berea lumbar bareng kance ie; maraq nike ẽndah Aristarkus dait Sekundus dengan lẽman Tesalonika, dait Gayus dengan Derbe, Timotius, Tikikus dait Tropimus, dengan-dengan lẽman propinsi Asia.

⁵ Ie pade lumbar bejulu ngantih lẽq Troas.

⁶ Sesampun Perayaan Ruti Ndẽq Beragi, tiang pade belayar bilin Pilipi. Sesampun lime jelo, tiang pade bekumpul malik kance ie pade lẽq Troas. Lẽq derike tiang pade ndot pituq jelo ngonẽqne.

⁷ Lẽq jelo penembẽq dalem minggu nike, sewaktu tiang pade bekumpul jari bareng-bareng bekelor, Paulus bebaos kance semeton-semeton seiman lẽq derike, sẽngaq ie beniat gen berangkat lẽq jemaqne.

⁸ Lẽq kamar atas taoq tiang pade bekumpul nike araq luwẽq dilah saq nyale.

⁹ Sopoq terune aranne Eutikus tokol lẽq jendẽle. Sẽngaq Paulus ngonẽq gati bebaos, terune nike jari ngantok gati jangke ie ketindoqan lẽq jendẽle nike, terus ie geriq lẽman tingket saq ketelu. Waktu ie teangkat siq dengan-dengan, terune nike sampun milinang.

¹⁰ Laguq Paulus turun ojok bawaq, terus rebaqang diriqne lẽq atas terune nike dait kapongne. Basen Paulus, "Ndaq kuatir, ie masih idup!"

¹¹ Beterus Paulus taẽk malik ojok atas, dait bagi-bagiang ruti, terus ie pade bekelor bareng-bareng. Sesampun inggas bekelor, Paulus bebaos malik kance dengan-dengan nike jangke dateng subuh. Beterus Paulus berangkat.

¹² Dengan-dengan jauq ulẽq terune saq sampun idup nike ojok balẽne. Ie pade merase seneng dait tehibur.

¹³ Tiang pade juluan lumbar ojok kapal, terus belayar ojok Asos jari bait Paulus lẽq derike sesuai kance pesen lẽman ie, sẽngaq ie mẽlẽ lumbar ojok derike langan darat.

¹⁴ Sesampun bedait lẽq Asos, Paulus taẽk ojok kapal terus tiang pade belayar ojok Metilene.

¹⁵ Lẽman derike tiang pade belayar malik, dait jemaqne dateng lẽq taoq saq berandangan kance pulao Kios. Jemaqne tiang pade dateng lẽq Samos, dait karing sejelo malik dateng lẽq Miletus.

¹⁶ Paulus sampun mutusang ndẽqne nyelaloq lẽq Epesus, adẽqne ndẽq sie-sieang waktu lẽq daẽrah Asia. Lamun iniq Paulus mẽlẽ becat-becat dateng lẽq Yerusalem lẽq Hari Raye Pentakosta.

¹⁷ Lẽman Miletus Paulus ngirim berite ojok Epesus jari tunas pare pemimpin jemaah lẽq derike dateng bedait kance ie.

¹⁸ Sesampun ie pade dateng, Paulus bebase lẽq ie pade, "Semeton-semeton sampun nenaoq berembẽ tiang idup sengonẽq niki lẽq antare side pade lẽman jelo penembẽq tiang dateng lẽq Asia.

¹⁹ Siq kerendahan atẽ dait sedih gati, tiang ngelayanin Tuhan lẽq tengaq-tengaq penderitean saq tiang alamin lantaran rencane jahat dengan-dengan Yahudi saq mẽlẽ nyematẽq tiang.

²⁰ Side pade sampun nenaoq bahwe tiang secare terus-terang nyampẽang lẽq side pade napi saq bemanpaat umaq side pade. Tiang ngajah side pade lẽq taoq-taoq dengan luwẽq dait lẽq balẽ-balẽ.

²¹ Tipaq bangse-bangse Yahudi dait dengan bangse-bangse lain, selapuqne tiang peringet adẽq ie pade tobat lẽman dose-dosene dait parek ojok Allah, serte beriman lẽq Junjungante Saq Mulie Deside Isa.

²² Mangkin jari taat lẽq prẽntah Roh Suci, tiang lalo ojok Yerusalem. Dait tiang ndẽq ngerti napi saq gen nimpe tiang lẽq derike.

²³ Tiang cume nenaoq bahwe lẽq sebilang kote, Roh Suci sampun secare teges nyampẽang lẽq tiang, bahwe tiang gen tame bui dait gen menderite.

²⁴ Laguq tiang ndẽq peduli lẽq idup tiang niki, asal tiang bau nutuqang tugas saq tepercayeang siq Junjungan Saq Mulie Deside Isa tipaq tiang dait asal tiang tetep setie jangke penutuq idup tiang jari beriteang Kabar Solah mengenai rahmat Allah nike.

²⁵ Dait mangkin tiang nenaoq, side selapuq saq sampun tiang datengin jari nyampẽang berite mengenai Kerajaan Allah, ndẽq gen bedait kance tiang malik.

²⁶ Keranaq nike mangkin secare teges tiang sampẽang tipaq side pade bahwe lamun araq lẽq antare side pade saq binase ẽraq, nike ndẽqne salaq tiang.

²⁷ Tiang ndẽq uwah bilin tugas tiang jari jelasang selapuq rencane Allah tipaq side pade.

²⁸ Side pade harus jagaq diriqde dait jagaq ẽndah selapuq jemaah saq sampun tepercayeang lẽq side pade siq Roh Suci jari tejagaq; sẽngaq side pade sampun teangkat jari pengawas jemaah nike. Side pade harus jagaq jemaah Allah nike maraq pengarat jagaq dombe-dombene, sẽngaq Allah sampun jariang jemaah nike jari dowẽ-Ne siq daraq Bije-Ne mẽsaq.

²⁹ Sesampun tiang bilin, pasti gen dateng serigale-serigale saq galak ojok tengaq-tengaq side pade. Dait dengan-dengan saq side pade jagaq nike gen jari mangse serigale-serigale nike.

³⁰ Malahan lẽq antare side mẽsaq ẽndah gen araq dengan-dengan saq gen nyampẽang berite saq ndẽq kenaq. Hal nike ie pade laksaneang adẽq dengan-dengan saq sampun percaye lẽq Deside Isa jari sesat dait turut ie pade.

³¹ Keranaq nike, side pade bejage-jage! Inget bahwe telu taun ngonẽqne, siq luwẽq nyugulang aiq mate, peteng menah, tiang ndẽq engkah-engkahne ngajah sebilang dengan lẽman side pade.

³² Mangkin tiang serahang side pade ojok Tuhan dait tipaq berite rahmat-Ne saq bekuase neguqang side pade dait ngicanin side pade paice jari warisan saq tetentuang umaq selapuq dengan saq sampun Ie suciang.

³³ Tiang ndẽq uwah harepang emas, perak atao kelambi lẽman sai juaq.

³⁴ Side mẽsaq nenaoq bahwe siq ime tiang mẽsaq tiang begawẽan jari keperluan tiang mẽsaq dait batur-batur saq milu kance tiang.

³⁵ Lẽq dalem selapuq hal tiang sampun ngebẽng teladan tipaq side bahwe siq begawẽan pacu-pacu maraq niki, ite harus tulung dengan-dengan saq lemah. Sẽngaq ite harus inget lẽq napi saq sampun temanikang Junjungan Saq Mulie Deside Isa, 'Bahagiean ite ngebẽng ketimbang nerimaq.'"

³⁶ Sesampun bebase maraq niki, Paulus bareng dengan-dengan nike sujut bedo'e.

³⁷ Ie pade selapuq nangis sambil ngapong ie dait siduk ie.

³⁸ Ie pade sedih terutame lantaran Paulus bebase bahwe ie pade ndẽq gen serioq ie malik. Terus ie pade ngatong Paulus jangke dateng kapal.

Kisah Para Rasul

Video Kisah Para Rasul 20

Ikuti Kami:

KONTAK | PARTISIPASI | DONASI