Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nalinopa kagado ri ngata Efesus, i Paulus nompasiromu topomparasaya ri sia bo notesa nompakaroso rarara. Naupu sia, ia nopalakanamo pade nipapolana polipana hau ri propinsi Makedonia.

² Riara mpolipana, ia nompesayo ngata-ngata ri Makedonia bo nompakaroso rara ntopomparasaya hamai ante mpengaya-ngaya pepangajari. Naupu haitu, napolamo ia hau ri propinsi Akhaya, tana ntoYunani.

³ Talu-mbula kasaena ia nonturo ri sia. Naupu sia, ia nonia mesavi kapala ntasi hau ri propinsi Siria. Tapi dopame ia nalai, niepena kareba naria *toYahudi ri sia nasintuvu mompatesi ia ri dala. Jadi nipakatantuna manjili mantuntuni dala kabatana moliu ri propinsi Makedonia.

⁴ Naria bara sako-ndua tona nomporoa i Paulus, haitumo, i Sopater ana i Pirus lako ri ngata Berea, i Aristarkhus bo i Sekundus toTesalonika, bo i Gayus lako ri ngata Derbe. Naria muni i Timotius, i Tikhikus bo i Trofimus, lako ri propinsi Asia pura.

⁵ Ira papitu nokolu ka kami bo i Paulus, bo nipopeara ri ngata Troas kami.

⁶ Naupu haitu pade nituntuni kami dala kabatana sampe ri ngata Filipi. Naliutaka eo mbaso ntoYahudi niuli Posusa Roti Ledo Noragi, kami nesavi kapala lako ri ngata Filipi. Lima-mbongi kami ri dala pade nosintomu ante roa-roa kami ri ngata Troas. Jadi kami nonturo ri sia saminggu kasaena.

⁷ Bongi Aka, kami nasiromu nangande nosanggani-nggani ante topomparasaya ri ngata Troas. I Paulus notesa sampe tanga bongi, apa patujuna maile mpadondona mompapola polipana.

⁸ Tombi nikasiromu kami haitu, ri tombi katatalu-unjuna. Nadea poindo nitunju ri sia.

⁹ Naria saito kabilasa nosanga i Eutikhus nonturo ri pelaba. Naroyo mpuu matana apa i Paulus ledo naupu-upu notesa. Nasae-sae kabilasa haitu namonjomo sampe nanavu lako ri pelaba ntombi katatalu-unjuna haitu hau ri tana. Tona nanau nanganggataka ia, nikavara namatemo.

¹⁰ Tapi i Paulus nanau hau ri tambena bo nekadungga ntuobo ri bavo kabilasa haitu, bo nikapuina. Nanguli i Paulus ka todea nombatagui tomate haitu, "Nee masusa raramiu, da matuvu ia!"

¹¹ Naliu haitu, nompene vai i Paulus hau ri tombi nikasiromura haitu, bo nitubi-tubina roti bo ira nangande nosanggani-nggani. Naupu nangande, notesa vaimo ia sampe naeo. Naupu haitu nalaimo ia.

¹² Kabilasa namate nanavu haitu, natuvumo bo nikeni nu roana manjili ri banuana, bo nadamba mpuumo rarara pura-pura.

¹³ Kami nesavi kapala mbaso bo nokolu hau ri ngata Asos mosinggavaka i Paulus sumai. Nipakatantu i Paulus ivesia, apa ia madota modala ri kabatana.

¹⁴ Nosinggavapa kami ante i Paulus ri ngata Asos, nesavi kapala sangganimo kami pura-pura hau ri ngata Metilene.

¹⁵ Lako ri sia nokapala vaimo kami, bo kamailena nakavamo kami ri tana nosinjambote nte levuto Khios. Bo kamailena vai nakavamo kami ri levuto Samos. Naliu sia, sambongipa nakavamo kami ri ngata Miletus, pesampo nu ngata Efesus.

¹⁶ Lako ri pamula polipa kami, i Paulus nompakatantu domo ia mesai ri ngata Efesus, ala nee masae gaga ri propinsi Asia. Apa nasara rarana hau mantuntuni eo mbaso Pentakosta ri ngata Yerusalem.

¹⁷ Nakavapa ri ngata Miletus, i Paulus nompakatu kareba hau ri ngata Efesus nompokio pakeni ntopomparasaya sumai, makava mosinggava ante ia ri ngata Miletus.

¹⁸ Nakavapa ira, nangulimo i Paulus, "Sampesuvu-sampesuvuku! Nisanimiu berimba katuvuku nte komiu, lako ri kakavaku pamulana ri propinsi Asia hitu sampe sii-sii.

¹⁹ Yaku nokarajaa ri sii ka i Pue Yesus ante ede raraku bo nadea uve mataku. Nadea susa bo pari nirasaiku, sabana nia ntoYahudi mompatesi yaku.

²⁰ Nisanimiu ledo nakaja raraku nompasimbayu anu noguna ka komiu. Yaku batena nompatuduki komiu ri kasiromu ntodea, bo ri banua-banuamiu.

²¹ Yaku nasaro nompainga komiu pura-pura, toYahudi bo tona ledo toYahudi, ala komiu majea lako ri dosamiu bo matundu nte Alatala bo momparasaya Tuputa Yesus.

²² Hitupa yaku hau ri ngata Yerusalem nangoseaka parenta Nosa Gasa nu Alatala ka yaku. Dopa nisaniku nuapa pura majadi nte yaku hamai.

²³ Aga nisaniku ri umba-umba ngata nikalauku, Nosa Gasa nompopaisani ka yaku, yaku rasuaraka riara ntarunggu bo mombarasai kasusa bo kapari ri ngata Yerusalem.

²⁴ Tapi ledo kupotove katuvuku hitu. Nau yaku mpuu-mpuu rapatesi, ledo makuya, asaa kupakaupu pokarajaa nidekei i Pue Yesus ka yaku mompatolele Kareba Belo anu nombatesa kabelo nu Alatala nte kita.

²⁵ Sampesuvu-sampesuvuku. Nitunggaikumo komiu bo nipatudukikumo Poparenta nu Alatala ka komiu pura-pura. Bo sii-sii nisaniku domo rakitamiu hanupa lenjeku.

²⁶ Jadi eo hitu kuuli ka komiu ante raraku mpuu-mpuu, ane rapana maria komiu rapopogaa lako nte Alatala sampe ri kasae-saena, salamiu mboto.

²⁷ Apa, ledo nasau raraku nompatuduki ka komiu, pura-pura nia nu Alatala ka kita.

²⁸ Komiu kana mombajagai karomiu mboto. Jagai muni todea topomparasaya, anu niparasayaka Nosa Gasa ka komiu. Komiu kana mompiara todea nu Alatala, nasimbayu mpo topoevu nompiara bimbana. Apa Tuputa Yesus namate bo raaNa natiti mombasompo dosata ala kita majadi todeaNa.

²⁹ Nisaniku malai yaku lako ri sii, kana makava tona nadaa anu mompakasusa todea anu nipiaramiu, nasimbayu mpo asulaku makava mombabaga bimba.

³⁰ Lako nte komiu mboto meumba tona mompatuduki anu ledo nakana. Rapoviara ivesia ala topangoseaka i Yesus domo mangoseaka dala nakana, tapi mangoseaka iramo.

³¹ Jadi komiu kana mainga! Toramo, sampesuvu-sampesuvuku. Talu-mpae kasaena, eo bongi yaku ledo nenonto nompatuduki bo nompainga komiu saito-saito, bo nadea uve mataku natiti.

³² Jadi sampesuvu-sampesuvuku, hitupa yaku nekakai nte Alatala nerapi Iamo mombajagai komiu. Bo kuuli ka komiu, oseakamo tesa nu Alatala anu nompopaisani kabelo nu Alatala ka kita. Aga Iamo nakuasa mompakaroso pomparasayamiu bo mombadekei belo nipakasadiaNa ka tona nipelisiNa majadi todeaNa ka komiu.

³³ Ledo ria sanggania nario mataku ka doi bara ka pakea ntona.

³⁴ Nisanimiu mboto yaku nokarajaa ante paleku mboto ala kuali mboto anu niparaluuku bo anu niparaluu roa-roaku.

³⁵ Riara mpengaya-ngaya, katuvuaku najadi jonjo ka komiu, haitumo, kita kana mokarajaa ala rapakuleta mombatulungi tona ledo nompakule nokarajaa. Kita kana mompariara tesa i Pue Yesus anu nanguli: 'Nadambapa tona nombadekei pade tona nantarima.'"

³⁶ Naupupa i Paulus notesa, nantaputumo ia nosanggani-nggani ante pura-pura ira lako ri ngata Efesus bo nosambaya.

³⁷ Notumangi puramo ira. Nikapuira i Paulus bo niekira, mpo tona nosampesuvu mogaa.

³⁸ Nabuku mpuu rarara, sabana i Paulus nanguli ka ira, "Domo rakitamiu hanupa lenjeku!" Naliutaka sia, nikenira kami sampe ri kapala.

Kisah Para Rasul

Video Kisah Para Rasul 20

Ikuti Kami:

KONTAK | PARTISIPASI | DONASI