Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kareb ria' ineh pangeh nugka' idi Paulus nenawar nelun manu ineh idi neperiteteng nedeh. Idi pangeh ieh nemala, "Do' tudo muyuh," idi ieh iné' déi' Makedonia.
2 Ieh nelemaba amung-amung babpat ineh idi nengubuk nelun mula' dengan bada'neh. Pangeh ineh ieh iné' Akaya,
3 idi tudo déi' teluh bulan kinioneh. Kareb ieh sikal amé' déi' Siria idi ieh nekali' lun Yahudi nenganau' aceh gayam sikal metueh rat neneh. Ngaceku ineh ieh nelemubed lemaba bawang Makedonia.
4 Sopater Pirus rat Beria nemaya' neneh; kudeng ineh teh Aristarkus idi Sekundus rat Tesalonika, Gayus rat Derbi, Timotius, Tikikus idi Tropimus rat tana' Asia.
5 Ideh nenalan atun idi nenganét nekai déi' Troas.
6 Kai pana' nenalan maya' kapal rat Pilipi muci ratnan Aco rayeh Ruti luk Na Lamud. Idi bang limeh aco kai iné' matun nedeh déi' Troas idi netudo déi' seminggu.
7 Kareb aco luk pun-pun bang minggu ineh, idi kai netebubpun nemuri' ruti. Idi Paulus nemada' nelun manu macing tangal dacem, ngaceku ieh sikal nalan maya' kapal kenebpa.
8 Idi inan tuda'-tuda' lapung bang takep luk déi' parung, ieh ineh su luk inan kai tebubpun.
9 Idi inan seburur anak adi' ngadanneh Utikus, luk tudo munung tabuk idi luk nerudap ngaceku Paulus pelaba io bada'; idi ngaceku ieh pelaba rudap, idi ieh nebpeh rat luun parung luk keteluh, idi petacu naté. Idi ideh nengalap neneh.
10 Idi Paulus netemurun idi nengapel neneh, keburi'neh, "Aleg mesusa', mulun tieh!"
11 Idi ieh nelemubed iné' déi' parung idi ieh nemuri' ruti idi nekuman, idi ideh nepegayam macing aco masat, idi Paulus nenalan.
12 Idi ideh nenguit anak adi' ineh muli' dengan do'; idi amung-amungdeh inubuk peh.
13 Idi kai iné' umak bang kapal, idi nenala iné' Asos, sikal amé' ngalap ni Paulus déi', maya' kudeng luk bilaneh, ngaceku ieh sebuleng sikal maya' tana'.
14 Kareb ieh nepapu' nekai déi' Asos idi kai nenawar neneh umak bang kapal, idi iné' Mitilini.
15 Kai nenalan rat déi', idi kenebpa kai iné' muneng ku pulau Kios; idi kesoriak kai nacing déi' Samos, idi keso sedéi' di kai nacing déi' Militus.
16 Ngaceku pian Paulus nalan maya' kapal lemaba Epesus, pelé ieh na mio déi' bawang Asia ngaceku ieh sikal miket, kudeng ieh miak macing déi' Yerusalim kareb Aco Rayeh Pentakosta.
17 Idi rat Militus Paulus nengecuk lun Epesus nawar lun rayeh-rayeh sidang ineh papu' neneh.
18 Kareb ideh nacing idi Paulus nepebala nedeh, "Muyuh kali', ratnan kudeng apeh lawéku seruked ui tudo dengan muyuh rat pun-pun ui nacing déi' tana' Asia.
19 Ui nengakem kuan Tuhan dengan mebeneh niat idi tangi', sagan pana' inan tuda'-tuda' luk nutun ratnan gayam lun Yahudi luk nacing negku.
20 Muyuh kali' ratnan ui na nengalum anun-anun luk petulu badén kuan muyuh, kareb ui nemada' idi ngubuk nemuyuh pa kiung lun mula' idi bang ruma'-ruma' muyuh.
21 Ui nemaré kali' kuan lun Yahudi idi lun pupu baken ratnan lumi inan Allah, idi manu inan Tuhan tau Yésus Keristus.
22 Idi nekini, ui maya' kuyut Roh Meligan amé' Yerusalim, idi na ui kali' luk mangun kuanku déi'.
23 iamo' ui kali' Roh Meligan maré kali' kuanku bang anid-anid bawang, ratnan ui tetupin idi uen ngedereh.
24 Iamo' na tu ui ngerawé niatku inan raga kuan bururku sebuleng, kudeng ui miak ngeriput luk ruenku, idi mangeh kekamenku luk ilapku ratnan Tuhan Yésus, ieh ineh pad ui mada' Bala luk Do' ratnan katu Allah.
25 "Ui pangeh nengikak idi nemada' amung-amung muyuh ratnan Imet Allah. Idi nekini ui kali' idi muyuh na miak nier kiungku teh.
26 Ngaceku ineh bang aco sini ui maré kali' nemuyuh, kudeng sebuang muyuh meraruh, na ui mesala' pa kiung Tuhan.
27 Ngaceku na ui nengalum anun-anun, iamo' ui nemada' kuan muyuh amung-amung luk pian Allah.
28 Matar burur muyuh sebuleng idi amung sengeriudan ineh. Ngaceku muyuh mangun ku lun matar sidang maya' ecuk Roh meligan. Do' muyuh ngasa' sidang Allah, luk pangeh inuli' dengan dara'Neh sebuleng.
29 Idi ui kali' muci ratnan ui necan nemuyuh, idi inan teh tuda'-tuda' bungalé luk mesangit sikal semuet arang muyuh, idi luk na méi' inan sengeriudan ineh.
30 Idi rat arang muyuh sebuleng pana' miak tumui tuda'-tuda' lemulun luk mada' bada' luk tekilu', pad ngeruid niat lun manu ineh maya' nedeh.
31 Matar do'-do', idi ngerawé ratnan teluh lak kinioneh, tebaco kedangan, ui na ucu' nemada' anid-anid burur dengan abpa' matehku.
32 "Idi nekini ui maré nemuyuh kuan Allah idi kuan bala katuNeh ineh. Ieh luk melalud ngeraben nemuyuh idi maré kuan muyuh peruan luk tinina' kuan amung pupuNeh.
33 Na ui nelili ku pirak, amas, idi ayung muyuh teh.
34 Muyuh sebuleng kali' ticu'ku ini pangeh mekél ngakem idi ngalap luk pianku idi luk pian lun denganku pana'.
35 Bang amung-amung kekamen ini ui pangeh nengegala' kuan muyuh kudeng apeh tau petulu mekél ngedengan lemulun luk masi' idi mesusa'. Ngerawé bala Tuhan Yésus, 'Meluun rayeh peruan kuan lemulun luk maré ratnan lemulun luk ngalap.'"
36 Kareb Paulus pangeh nepebala kudeng ineh, idi ieh netekeradung idi nesembayang dengan amung-amung lemulun ineh.
37 Idi amung-amungdeh pana' nangi' idi nengapel ni Paulus idi nepetabi' neneh.
38 Ideh pelaba susa' niat ngaceku balaneh ineh, ratnan ideh na miak nier kiungneh baruh peh. Idi ideh nenated neneh semuet bang kapal.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA