Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Naonda ing ka'ada'an kon Epesus no'onowdon bui, ki Paulus nogoinií kon dumoduduinya mita bo sinonggina'an. Onda intua nogumandon sia kom mayak im Makedonia.
2 Kom Makedonia sia minaya-mayak makow in lipu-lipuíannea bo nokipodungkuḷ kon intau mita inta mopirisaya ko'i Yesus bo poḷat nononggina ko'i monia simbaí umuran mopirisaya. Onda intua minayak in Yunani.
3 Naonda in nogutun kon tua toḷu nobuḷan, ki Paulus sinumakoidon bui kon uangga bo minayak in Siria, ta'e ko wakutu intua umuranpabií doman roncana'an makow limodon intau Yahudi in sia. Tuamai nobui in sia nongin Makedonia.
4 Sia sinakinan i Sopater, ki adií i Pirus intau im Berea, bo i Aristarkhus, bo i Sekundus intau in Tesalonika, bo i Gayus intau in Derbe. Ki Timotius, ki Tikhikus bo ki Tropimus doman takin intau mita inta nongkon Asia.
5 Mosia tua inumuna bo nogoḷat ko'inami kon Troas.
6 Ta'e naonda in nopaḷutdon singgai moḷoben Roti Diaí Koragi tatua, kami nongkon Pilipi sinumakoi kon uangga. Opat nosinggai im binaya'an nami bo no'iyaput kon Troas bo noyodungkuḷ monia kon tua. Pitu nosinggai ing kami kon tua.
7 Doḷom diminggu kami noyosipun sim monga'an moyotakin im bayongan ginaḷum mita kon tua. Ki Paulus nososirita'anpa makow im bayongan intau inta mopirisaya kon tua, sin roncananya mayakdon bui in sia mopo'ikoḷomai kon singgai. Mosia nogonguman nodapot no'onggot kon doḷom.
8 Kom bonu in ruangan inta pinoyosipunan nami nobayong in togaí pinoyongkit.
9 Kon tua oyuíon tobatuí tayamobiag ilimituí makow kon jandela, ki Eutikhus in tangoinya. Lantaran totok no'onggot pinongongumanan monia takin Paulus, daí sinomposiugdon totok in tayamobiag tatua, bo noḷoḷot bo noḷabuí monag in sia nongkon tingkat intoḷunya. Naonda im binuatdon monia, sia minatoidon.
10 Daí noponag ing ki Paulus. Ko'uli-ulidpa in tayamobiag tatua bo inumumpag poḷat ginakapannya bo noguman kon intau mita kon tua, "Dika molia-liau ing gina, sin nobiagpabií in sia na'a!"
11 Onda intua nodaitdon bui noponik kon ruangan inta pinoyosipunan monia im mosia komintan bo nonga'an noyotakin. Nopaḷut makow iningguputanpa doman i Paulus in o'umannya dapot modiug mobayag. Onda intua minayakdon sia.
12 Intau mita nodiadon nobui kon tayamobiag kon baḷoinya takin kobiag-biagbidon. Nopia totok ing gina monia poḷat no'inggamaí in robonoḷ mita in dodob monia.
13 Kami sinumakoi kong kapaḷ bo minayak muna in Asos, sim moroncana motomu ko'i Paulus kon tua, sin sia ain nongoyow muna, sin wakutu intua sia mo'ibog maya-mayak mongin toba.
14 Naonda in noyodungkuḷ kon Asos, ki Paulus sinumakoidon kong kapaḷ bo kami minayakdon kom Metilene.
15 Nongkon tua kami iḷumeag bui, bo nopo'ikoḷomai kon singgai kami no'iyaputdon in tampat inta noyogintayowanmai im pulau Khios. Nopotouma'mai kon singgai kami no'idapotdon in Samos bo singgai no'iduduimai kami no'iyaputdon kom Miletus.
16 Ki Paulus nogamaídon kong kaputusan kon diaídon mongandup kon Epesus, simbaí diaí tongaí moḷumbuí ko wakutu. Sin sia limikat simbaí ḷagidon modapot in Yerusalem kon singgai moḷoben poraya'an kon singgai Pentakosta.
17 Wakutu in sia kom Miletuspa, sia nopotabaídon in intau tobatuí minayak in Epesus moguman simbaí bayongan intau inta aim binalií itoi kon jama'at tatua mamangoi im Miletus mokipodungkuḷ ko'inia.
18 Naonda im mosia no'iangoi, ki Paulus noguman ko'i monia, "Utatku mita, kinota'auan bidon monimu naonda ing kobobiagku wakutu in aku'oi kon sigadpa monimu pinangkoipamai kon singgai dungkuḷ aku'oi no'idapotmai kon Asia na'a.
19 Aku'oi notuḷung ko'i monia takin sanang gina takin nokopo'ompaí kon dodia, poḷat doman noḷabu' in ḷuaí mogaid kon oaíidan inta pinoki aid i Tuhan. Akuoi nogaid umuran doman mokorasa kon roriga sin tantuí moyogintayow makow in roncana mora'at im intau mita Yahudi.
20 Ta'e umpakahbií natua yo diaíbií dodai onda aku'oi nogogai nopota'au kon onu inta mokobaraguna ko'i monimu. Tua komintan aim pinota'auku ko'i monimu bo ain doman sinunduíku ko'i monimu kon tayowon intau mobarong andeka kom baḷo-baḷoiannya.
21 Aku'oi umuran doman noponorop kon intau mita in Yahudi bo bangusa ibanea simbaí mosia mogogaidon mogaid kon dosa mita monia bo mamangoi ko'i Allah poḷat mopirisayadon ko'i Yesus Kristus ki Tuhan naton.
22 Bo tana'a makow aku'oi im mustibií dumudui kong ko'ibog in Roho i Allah inta nodia mayak in Yerusalem. Bo kon tua diaípabií kota'auanku mongo onu im mobalií ko'inakoí.
23 Tongaí Roho i Allah aindon noguman ko'inakoí ko wakutu in aku'oi tumu'ot magií makow kong kota-kotaíannya, kon ponjara in nobalií tampatku bo roriga in umuran mogoḷat makow.
24 Ta'e tua in diaíbií hirauonkumai matoi kabií asaḷ bo oaíidan inta pinoki aid i Tuhan Yesus ko'i nakoí moḷapatku aidan bo ginaku in umuran motantuí modapot ing kopaḷutan kobiaganku na'a kon aku'oi in mustibií mopoyaput in Habar Mopia inta aim pinonotabi i Allah ko'i naton.
25 Bo tana'a ing kinota'auanku bidon kong kita in diaí bidon moyodungkuḷ bui. Mo'ikow komintan aindon binaya'anku pinopoyaputan in Habar kon naíonda ing ki Allah momarentah saḷaku Raja.
26 Tuamain singgai na'a im pogumankudon ko'i monimu, aka oyuíon ing kon sigad monimu nion im mobodito, yo tua in de'eman bidon taḷaíku.
27 Sin diaíbií kon dodai onda aku'oi moḷagui mopohabar im bayongan roncana i Allah ko'i monimu komintan, sin tuabií in oaíidanku.
28 Manangka intua yo mokopopiadon im mo'ikow bo umuran moḷukad kon awak monimu bo poḷat doman ḷukadai im bayongan umat i Allah inta aim pinosarahkan i Allah ko'i monimu simbaí ḷukadan. Sim mo'ikow nion ain sinantuí in Roho i Allah mobalií moḷoḷukad bo mononompia kon umat i Allah inta ain sinobus-Nya in duguí i Adií-Nya tontanií.
29 Kota'auankubi' kon naonda in aku'oi mayak, intau mita mora'at inta mo'ibog momoguya'at kon roncana i Allah im mamangoi kon yuaí-yuaík monimu. Bo diaíbií in tabi monia tua momogutuí kon umat i Allah.
30 Sedang bo oyuíonbií doman intau mita kon sigad monimu im mobalií intau mita inta mopota'au in habar diaí totu'u. Mosia monia natua simbaí intau mita inta ain nopirisaya ko'i Yesus mo'iḷale bo dumudui ko'i monia.
31 Tuamai umuran kiḷuka-ḷukadmai bo toropdon saḷaḷu kon aku'oi in toḷu notaong, doḷom bo singgai diaíbií dodai onda nogogai nononggina ko'i monimu komintan takin ko'omba-ombaḷ doman.
32 Bo tana'a makow im posarahkankudon mo'ikow ko'i Tuhan simbaí Sia moḷukad ko'i monimu bo baí mo'ikow umuran kumadai makow kon totabi-Nya. Ki Allah in nopuling kawasa inta mokorigon ko'i monimu bo Sia mobogoi ko'i monimu im barakat mita inta ain sinadia-Nya kom bayongan umat-Nya.
33 Diaípabií kon dodai onda aku'oi nohaga in doit andeka pakeang nongkon intau ibanea.
34 Kinota'auan bidon monimu tontanií, kon aku'oi in noramiji bidon tontanií motayak kon onu im pakeíonku bo onu doman pakeíon in yobayatku mita inta topobayaíanku.
35 Tua komintan inaidanku simbaí mo'ikow mo'ibog dumayan ko'i nakoí, sin aka kita mogaid mokoporajing tua im mangalenya kita ain notuḷung kon intau mita inta nongoyangkoí. Mustibií toropon makow in na'a: 'Mopi-piabií kom mobogoi daripada motarima.'"
36 Nosingog makow kon natua, ki Paulus bo bayongan intau kon tua sinumungkud bo nosambayang.
37 Mosia nongombaḷ komintan poḷat nonggakap bo nongayok ko'i Paulus bo noguman ko'inia kom mokopopiadon in kon daḷan.
38 Nokuyang totok ing gina monia sim mosia ain nokodongog kon singog i Paulus kon diaí bidon bui moyodungkuḷnya im mosia komintan. Bo inatodon monia in sia nodapot ing kapaḷ takoiannya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA