Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sewaktu sampun wayene jelo Pentakosta, selapuq dengan percaye bekumpul lẽq sopoq taoq.

² Selung-selung kedengahan suare lẽman langit maraq angin saq keras. Balẽ taoq dengan-dengan nike kenyeke melinggih selapuqne penoq siq suare nike.

³ Beterus ie pade serioq ẽlaq-ẽlaq maraq nyale api lampaq ojok embẽ-embẽ, dait nyontoq tipaq ie pade sopoq-sopoq.

⁴ Ie pade selapuq tepenoqin siq Roh Suci, dait mulai ngeraos kadu macem-macem base saq lain. Ie pade ngeraos maraq saq teicanin siq Roh nike tipaq ie pade jari teucapang.

⁵ Lẽq waktu nike luwẽq dengan Yahudi saq solẽh, lẽman macem-macem negeri lẽq seantẽro dunie, ndot lẽq Yerusalem.

⁶ Sewaktu kedengahan suare nike, luwẽq gati dengan-dengan bekerimpun. Ie pade selapuq bingung dengah dengan-dengan percaye nike ngeraos kadu base ie pade sopoq-sopoq.

⁷ Ie pade bengaq dait takjub terus bebase, "Tekan dengan-dengan saq ngeraos niki selapuqne dengan-dengan Galilea?

⁸ Segerah ite dengah ie pade ngeraos kadu base saq ite kadu lẽq negeri asalte?

⁹ Ite dengan-dengan lẽman Partia, Media, Elam, lẽman Mesopotamia, Yudea dait Kapadokia; lẽman Pontus dait Asia,

¹⁰ lẽman Prigia dait Pampilia, lẽman Mesir dait daẽrah-daẽrah Libia dẽkẽt Kirene; lẽq antare ite araq saq dateng lẽman Roma,

¹¹ araq dengan-dengan Yahudi dait araq ẽndah dengan bangse-bangse lain saq sampun tame agame Yahudi; araq ẽndah saq dateng lẽman Kreta dait Arab. Ite selapuq dengah ie pade ngeraos kadu basente sopoq-sopoq mengenai hal-hal saq ajaip saq telaksaneang siq Allah!"

¹² Ie pade selapuq bengaq dait takjub terus beketuan sopoq kance saq lain, "Napi artine niki?"

¹³ Laguq araq ẽndah dengan-dengan saq nyindir. Basene, "Dengan-dengan nike kenyeke bowos siq anggur manis!"

¹⁴ Beterus Petrus nganjeng bareng solas rasul saq lain, dait bebase tipaq dengan luwẽq nike siq suare saq belẽq, "Semeton-semeton, dengan-dengan Yahudi dait selapuq dengan saq ndot lẽq Yerusalem! Dengahang pacu-pacu, sẽngaq hal niki perlu tiang jelasang lẽq side.

¹⁵ Dengan-dengan niki ndẽqne bowos, maraq saq side pade paran; sẽngaq mangkin baruq jam siwaq kelẽmaq.

¹⁶ Laguq mengenai hal niki Allah sampun bemanik langan Nabi Yoel:

¹⁷ Allah bemanik, 'Lẽq ahir jaman Tiang gen curahang Roh Tiang ojok selapuq dengan. Bije-bijende saq mame-mame dait bije-bijende saq nine gen benubuat. Terune-terunende gen serioq hal-hal ajaip saq Tiang petitoqang tipaq ie pade. Dengan-dengan toaqde gen mauq impi saq Tiang icanin tipaq ie pade.

¹⁸ Tipaq pelayan-pelayan Tiang ẽndah -- saq mame-mame dait saq nine-nine --, gen Tiang curahang Roh Tiang lẽq jelo-jelo nike. Ie pade gen benubuat.

¹⁹ Tiang gen miaq keajaipan-keajaipan lẽq atas, lẽq langit, dait hal-hal luar biase lẽq bawaq, lẽq gumi; daraq dait api, gumpelan pendet.

²⁰ Jelo gen jari peteng, bulan jari bẽaq maraq daraq sendẽqman Jelo Tuhan, jelo saq belẽq dait mulie nike rauh.

²¹ Lẽq waktu nike, dengan saq bekuih tipaq Tuhan gen teselametang.'

²² Dengan-dengan Israel! Pade dengahang napi saq tiang sampẽang niki: Deside Isa dengan Nazaret nike sampun tetentuang siq Allah umaq side. Nike nyate gati lẽq keajaipan-keajaipan dait hal-hal luar biase saq Allah laksaneang lẽq tengaq-tengaq side pade langan Deside Isa nike. Selapuqne nike side mẽsaq sampun nenaoq.

²³ Sesuai maksut dait rencane Allah mẽsaq, Ie mutusang jari nyerahang Deside Isa tipaq side pade. Dait sewaktu Deside Isa teserahang, side pade nyematẽq Ie siq care ngalurang dengan-dengan jahat pakuq Ie lẽq kayuq salib.

²⁴ Laguq Allah ngidupang Ie malik lẽman tengaq-tengaq dengan-dengan ninggal. Ie tekalahang siq kematẽan, laguq Allah ngelepasang Ie, sẽngaq ndẽq mungkin Ie tetep tekuasein siq kematẽan.

²⁵ Mengenai Deside Isa niki, Daud sampun bebase, 'Tiang serioq Tuhan tetep lẽq julun tiang; Ie araq lẽq sedi kanan tiang, adẽq tiang ndẽq teguncang siq napi juaq.

²⁶ Keranaq nike angen tiang besukecita, biwih tiang ngucapang nyanyian; dait awak tiang niki gen ndot dalem pengharepan.

²⁷ Sẽngaq Deside nẽnten menengang jiwen tiang ndot dalem dunie dengan matẽ. Deside nẽnten menengang Dengan Suci Deside binase.

²⁸ Deside sampun nyatayang tipaq tiang langan saq nuju idup saq sejati. Sukecite tiang belẽq gati, sẽngaq Deside araq bareng tiang.'

²⁹ Semeton-semeton, ijinang tiang ngeraos secare terus terang mengenai Daud, bapaq leluhurte nike. Ie sampun ninggal dait sampun temakamang ẽndah; makamne masih araq lẽq tengaq-tengaqte jangke mangkin.

³⁰ Allah sampun bejanji tipaq Daud, siq sumpah, bahwe salaq sopoq dengan lẽman keturunanne gen teangkat siq Allah jari raje. Sẽngaq Daud wikanang janji nike dait lantaran ie ẽndah nabi,

³¹ ie wikan ẽndah napi saq gen telaksaneang siq Allah. Jari ie sampun benubuat bahwe Almasih saq tejanjiqang siq Allah, gen idup malik lẽman ninggal. Daud bebase, 'Ie nẽnten temenengang lẽq dalem dunie dengan-dengan matẽ; rage-Ne nẽnten gen ancur dait bis.'

³² Deside Isa niki saq teidupang malik lẽman ninggal siq Allah. Tiang pade selapuq sampun nyaksiang mẽsaq hal nike.

³³ Ie teangkat lẽq jabatan saq atas dait teicanin Roh Suci saq sampun tejanjiqang siq Bapa. Dait saq side pade dengah dait serioq mangkin niki, Roh nike saq Ie curahang tipaq tiang pade.

³⁴ Daud mẽsaq nẽnten taẽk ojok sorge, laguq Daud bebase, 'Tuhan bemanik tipaq Junjungan tiang Saq Mulie:

³⁵ Melinggih lẽq sedi kanan Tiang, jangke Tiang miaq musuh-musuh Deside takluk lẽq Deside!'

³⁶ Keranaq nike selapuq dengan Israel harus nenaoq pacu-pacu bahwe Deside Isa saq side pade pakuq lẽq kayuq salib nike, Ie ẽndah saq sampun tejanjiqang siq Allah jari Junjungan Saq Mulie dait Almasih!"

³⁷ Sewaktu dengan-dengan nike dengah hal nike, angen ie pade jari osah. Terus ie pade beketuan lẽq Petrus dait rasul-rasul saq lainne, "Semeton-semeton, napi saq harus tiang pade piaq?"

³⁸ Jawab Petrus, "Pade tobat lẽman dose-dosende. Dait side pade sopoq-sopoq harus tebaptis dalem pesẽngan Deside Isa Almasih, adẽq dose-dosende teampunin. Make side pade gen nerimaq paice Roh Suci lẽman Allah.

³⁹ Sẽngaq saq tejanjiqang siq Allah, nike umaq side dait keturunande, dait umaq dengan-dengan saq araq lẽq taoq-taoq saq jaoq -- selapuq dengan saq temanikang siq Allah, Tuhante jari parek tipaq Ie."

⁴⁰ Maraq nike Petrus jelasang lẽq ie pade. Dait siq luwẽq ucapan lain malik ie ngebẽng sopoq kesaksian dait ngebẽng nasẽhat, dait basene: "Serahang diriqde adẽq teselametang lẽman keturunan saq jahat niki."

⁴¹ Luwẽq dengan percaye lẽq napi saq gen tesampẽang siq Petrus, terus ie pade tebaptis. Make jumlah dengan percaye lẽq jelo nike beromboq malik telu iyu dengan.

⁴² Ie pade pacu-pacu berajah lẽman rasul-rasul dait tetep bekumpul bareng-bareng. Ie pade bekelor bareng-bareng dait bedo'e bareng-bareng.

⁴³ Luwẽq gati keajaipan saq tepiaq siq rasul-rasul nike sehingge selapuq dengan takjub dait takut.

⁴⁴ Dengan-dengan percaye nike selapuqne tetep besopoq dait napi saq ie pade ẽpẽang, ie pade kadu bareng-bareng.

⁴⁵ Ie pade jual barang-barang dait selapuq dowẽn ie pade, terus bagi-bagiang kẽpẽngne lẽq antare ie pade selapuqne menurut keperluanne sopoq-sopoq.

⁴⁶ Sebilang jelo ie pade tetep bekumpul lẽq Gedẽng Allah. Ie pade bekelor bareng-bareng, siq angen saq gembire dait tulus atẽ lẽq balẽ-balẽ ie pade.

⁴⁷ Ie pade tetep memuji-muji Allah dait tedemenang siq selapuq dengan. Sebilang jelo jumlah ie pade tetep beromboq sẽngaq Junjungan Saq Mulie ngicanin tipaq ie pade dengan-dengan saq teselametang.

Kisah Para Rasul

Video Kisah Para Rasul 2

Ikuti Kami:

KONTAK | PARTISIPASI | DONASI