Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ia tonna pangramean Pentakostamo, sirempun ngasanmi to tomatappa'.

² Ta'pa ssa'dingmi oni jao mai langi', susi oni angin bara' mangngumbuk, lumbun lan joo bola nanii sirempun.

³ Ngkitami susi api dukku mangrupa lila mangngulala' nta'pai simesa'-mesa'i.

⁴ Nakuasai ngasanmi Roh Allataala namangkada mpake mangrupa-rupa basa to silaen-laenan. Pada mangpaui situru' apa to napatujuanni Roh Allataala la napau.

⁵ Ia joo wattu budamo to-Yahudi ratu jio mai mangrupa-rupa tondok lan lili'na lino la ssompa Puang Allataala jao kota Yerusalem.

⁶ Ia tonna sa'dingmi joo oni, gaja buda tau ratu ntalimbungngi. Sijangngaran ngasan ssa'dingngi tuu lako tomatappa' mangkada mpake basana sola ngasanni.

⁷ Liwa'i takkajanna' nakua, "Oo, tangto-Galilea ngasanraka tee mangkada?

⁸ Matumbai ia antapada ssa'dingngi mangkada mpubasa basata', basa jio mai tondokkota',

⁹ kita' to-Partia, Media, Elam, Mesopotamia, Yudea na Kapadokia, to jio mai Pontus na Asia,

¹⁰ Frigia na Pamfilia, Mesir na to jio mai Libia sikandoppi'na Kirene, na denki' to ratu jio mai kota Roma.

¹¹ Denki' to-Yahudi, na den tooki' to bangsa tangngia to-Yahudi apa mangngagama to-Yahudimiki'. Denki' to jio mai tana Kreta na den tooki' to jio mai tana Arab. Tasa'ding sola ngasan mangkada mpake basata' mpaui to apa mejangngaran napugauk Puang Allataala."

¹² Sijangngaranni napussak ntangngahhi joo apa jaji, napada sikutana nakua, "Apara ia battuananna tee?"

¹³ Apa den too to mpelle'ri nakua, "Aa, mipesa'dingngi ori tuu mati', na tomalango nniso' anggoro'."

¹⁴ Ke'dehmi Petrus sola joo sangpulo mesa rasulu' laen, naandongngii mangkada mpangpeissenanni lako tobuda nakua, "Ee, kamu' to kupusile'to, la kamu' to-Yahudi na kamu' sola ngasan to ntorroi kota Yerusalem! Pesa'dingngi meloi tee kadangku'.

¹⁵ Te'da namalango tee tau susi to passanganmi, sanga mane' tatte' kasera tuka' allo.

¹⁶ Apa ia tee apa mikita sola misa'ding, mangkamo napau Nabi Yoel tonna anu',

¹⁷ 'Nakua Puang Allataala: Sininna rupa tau la kuparatuan ngasan Roh-Ku', ke tampakkanami lino. Ia to anakkami la muane la baine la mpauan kamu' apa to mangka kupauanni. Ia to tokallolomi la ngkita apa to kupakitanni. Ia to tomatuammi la mangtindo mputindo tindo la kubenni.

¹⁸ Ia joo wattu la kuparatuanni Roh-Ku' to taung-Ku' la muane la baine la mpangpeissenanni to apa mangka kupauanni.

¹⁹ La mpadenna' buda apa mejangngaran jao langi', na apa liwa' makalaen-laen lan tee lino, susi rara, api, saleu' na rambu.

²⁰ La memmapattang to allo, na memmalellang to bulan susi rara ke la nadete'mi allo-Na Puang, allo matonggo na mala'bih.

²¹ Ia joo wattu, ia to tometa'da tulung lako Puang la dipasalama'.'"

²² Mpatarruhmi kadanna Petrus nakua, "Ee, tokupusile'to to-Israel! Pesa'dingngii tee kadangku'. Ia joo Puang Isa to-Nazaret mangkamo napilei naangka'i Puang Allataala menjaji Raja Mangpasalama' lako kalemi. Manassa joo, nasaba' nabenmo kuasa mpugauk tanda mejangngaran na tanda to te'da susinna lan tangnga-tangngami susi to miissenmo kamu'.

²³ Mangkamo napangben Puang Allataala lako kalemi ammipangpebunoanni lako togaja' napampangngi. Apa sitonganna ia joo situru'mo akkatta-Na Puang Allataala mellao jiona mai.

²⁴ Apa napatuo pole'mi Puang Allataala jio mai kamatean. Nala'paranmo Puang Allataala, moi naamma'i kamatean, sanga te'da lalo nakullei to kamatean la ntaloi tarruhhi.

²⁵ Den napau joloi Raja Daud tonna anu' to Puang Isa nakua, 'Tuli kukita lindo to Puang jio oloku', jio bang sa'deku' ssolanna', dikua anna te'da kutiapa-apa.

²⁶ Iamo joo gaja sannang penawangku', angkumakkelong mpukelong pangpujian, anna ia tee batang kaleku', parannu mangtajan lan lamunan.

²⁷ Nasaba' te'da taeloranna' torro lan lino tomate, na te'da too taeloran batang kaleku' la buruk lan lamunan, sanga Aku'mo kaunan-Ta' to mangka tapilei.

²⁸ Mangkamo' tapakitan to lalan mangnguju lako katuoan tongan. Liwa'na' mario nasaba' da'tanna' taampai.'"

²⁹ Mpatarruhpa kadanna Petrus nakua, "Ee, todipusile'to, baranina' mpau maruruh bangngi lako kamu' to Raja Daud tojolota', kumua mangkami mate na mangka toomi dilamun. Den unapa to lamunanna takita ratu lako too allo.

³⁰ Apa naissenmo, sanga mesa'i nabi, to apa la jaji keanu'. Na mangkamo nabasse Puang Allataala kumua, 'La kuangka'i to bati'mu menjaji raja ssulleko.'

³¹ Iamo joo napau joloi Raja Daud kumua ia to Raja Mangpasalama' la tuo pole'. Nakua, 'Te'da nadieloran torro lan lino tomate, na te'da too nalaburuk to batang kale-Na lan lamunan.'

³² Ia joo Puang Isa iamora napatuo pole' Puang Allataala jio mai kamatean. Na iamora joo to mangka kikita kipangpeissenanni sola ngasan.

³³ Ia tonna pamatandei Puang Allataala napajioi sa'de kanan-Na, nabenni Roh Allataala to Puang Isa susi to dipau jolo, na Iamo mparatuankan joo Roh, susi tee misa'ding sola mikita too.

³⁴ Te'da ia na Raja Daud to mende' suruga, apa nakuara ia mangkada: Nakua Puang Allataala mangkada lako Puangku', 'Cumadokkoko ntee sa'de kanan-Ku',

³⁵ angkupupentalo ngasanni to ewalim-Mu mukuasaii.'"

³⁶ Mpatarruh omi kadanna Petrus nakua, "Iamo joo naparallu kamu' to-Israel nnissen tonganni kumua ia to Puang Isa mangka mipampang, Iamo napilei Puang Allataala menjaji Puang na menjaji too Raja Mangpasalama'."

³⁷ Masussami penawanna to tobuda tonna sa'dingngi, anna kutanaii to Petrus sola to rasulu' laenna nakua, "Ee, todipusile'to, ianna susi joo naapamo la kipugauk?"

³⁸ Napebalii Petrus nakua, "Mengkatoba' kamu' jio mai dosami, ammipada mpangben kalemi dijio' mpau sangan-Na Puang Isa Almaseh anna dampangan kamu' Puang Allataala, naben too kamu' Roh Allataala.

³⁹ Jajii susi joo, sanga kamu' napatujui joo basse-Na Puang Allataala sola bati'mi sola sininna to tomambela, to napilei Puang Allataala."

⁴⁰ Susimi joo napamanassanni Petrus, na budapa to kada laen nanii Petrus mpangngingaranni to tobuda nakua, "Mengkatoba' kamu'! Danggi' mituru' togaja' to tuo tee wattu, dikua danggi' nakanna kamu' pangsessa jio mai Puang Allataala."

⁴¹ Buda tau ngkatappa'ii to pangngajahna Petrus anna dijio'. Kerangngan omi budanna to tomatappa' joo allo agi-agi tallung sa'bu.

⁴² Nalundukki tarruh melajah lako rasulu' to tau. Na tuli sirempun too kumande sola, mpugauk Kakumandean Macero na massambajang.

⁴³ Liwa' buda tanda mejangngaran napugauk rasulu', anna jangngah to tobuda na malaja' too.

⁴⁴ Sangnginawa tarruhhi sola ngasan to tomatappa', na ia to apa naampui napuapai sola ngasan.

⁴⁵ Ianna den mbaluk apanna ba'tu ewananna, natawa-tawanni solana to allinna situru' kaparalluanna simesa'-mesa' tau.

⁴⁶ Allo-allo tuli sangnginawa llundukki kasirempunan lan Bola Puang Allataala. Napasilele to bolana nanii sirempun mesa' penawa sipakario-rio kumande na ngkande roti mpengngingaranni kamatean-Na Puang Isa,

⁴⁷ na mpakala'bih Puang Allataala. Napumasannang ngasan tau. Allo-alloi tuli napakerangnganni Puang Allataala to todipasalama'.

Kisah Para Rasul

Video Kisah Para Rasul 2

Ikuti Kami:

KONTAK | PARTISIPASI | DONASI