Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Naonda in singgai Pentakosta, inta singgai ilimadon nopuḷuh nongkon kino sintakan i Yesus, bayongan intau mopirisaya noyosipun kon tampat tobatuí.
2 Dalií bo kino dongogan singog nongkon ḷangit naíonda bo tompot nogirup noropot sinumu'ot kom baḷoi inta ilituían makow monia tua.
3 Bo inontong monia in dilaí mita naíonda bo dokot in tuḷu dumakit magií makow bo poḷat dinumompaí ko'i monia komintan.
4 Mosia tua komintandon kinawasa'an in Roho i Allah. Daí nomangkoidon mosia nosingog nomakeí im bahasa intau ibanea. Mosia nosingog podudui im bahasa inta inogoi in Roho i Allah singogon.
5 Ko wakutu intua noaíntoí intau in Yahudi inta nongkon bayongan butaí kon dunia na'a in nogutun kon Yerusalem. Mosia tua intau inta motoindudui kom parentah i Allah.
6 Naonda in nokodongog kon singog tatua, nobayong totok intau namangoi noyolipung. Mosia nongoherang nokodongog kon rasul mita tatua nosingog nomakeí im bahasa monia tontanií.
7 Nongo'itongaw bo nongoherang im mosia bo nosingog, "Kinota'auan nami intau mita inta nosingog tanion intaubií ing Galilea!
8 Yo nongonubií sin dongogon naton mosia momakeíbií im bahasa inta pakeíonmai naton kom butaí naton tontanií;
9 Kita na'akan, intaubií im Partia, Media, Elam, Mesopotamia, Yudea, Kapadokia, Pontus, Asia,
10 Prigia, Pampilia, Mesir bo butaí mita inta kon Libia inta kon diug ing Kirene. Bo oyuíon doman in mokokiaíngoi nongkon Rum.
11 Oyuíon intau mita in Yahudi, bo oyuíon doman intau nongkon lipuí ibanea inta sinumu'otdon kon agama Yahudi. Oyuíon doman intau inta namangoi nongkon Kreta bo Arap. Dinongogdon naton komintan im mosia tua nosingog takin nomakeí im bahasa naton, bo nopota'au in soaáḷ mita mokoherang inta inaidan i Allah!"
12 Daí noherang bo nobingung im mosia komintan bo nosiliboían, "Onubií degaí mangale in tana'a?"
13 Ta'e, oyuíon doman intau mita kon tua in tongaí noningkule, kai monia, "Ah, intau mita tatua tongaíbií noḷoḷangu in anggur!"
14 Daí ki Petrus takin rasul taya mopuḷuh bomitaí sinimindog bo nosingog kon tayowon intau moaíntoí inta kon tua. Noropot in singognya noguman ko'i monia nana'a, "Hei intau mita in Israel bo bayongan intau inta nogutun kon Yerusalem! Indongogai kopia! Pogumankudon ko'i monimu, kon
15 intau mita tana'a in diaíbií noḷoḷangu, naí kai'n singog monimu; sin tana'a im bagupabií jam sambilan doḷo-doḷom.
16 Tongaí soaáḷ tana'a aim bidon muna pinota'au i Allah inta pinoyaput i Nabi Yoel nana'a:
17 'Kon singgai tumi, Aku'oi mobogoi in Roho-Ku kom bayongan intau. Ki adiímu mita ḷoḷaki bo ki adiímu mita bobay im mopota'aubií ko'i monimu in soaáḷ mita inta pinota'au-Ku ko'i monia. Intaumu mita inta nongogu'odapa moko'ontong kon soaáḷ mita inta po'ontong-Ku ko'i monia. Guyangamu mita in tumogoindopbií kon togo'indop inta ogoi-Ku ko'i monia.
18 Naí doman tua in bobantung-Ku mita -- ḷoḷaki bo bobay --, kon singgai mita tatua, ogoian-Ku in Roho-Ku. Sahingga mosia mopota'u in onu inta pinoguman-Ku ko'i monia.
19 Bo Aku'oi im mogaid kon oaíidan mita inta totok im mokoherang kon ḷangit, bo tanda mita kon butaí na'a; bo oyuíonbií in duguí bo tuḷu, bo poyok mobunod.
20 Mata in singgai mobalií mosindip, buḷan mosimpuya naíonda bo duguí kon wakutu in diaípa mo'iangoi in singgai i Tuhan, singgai inta totok im moḷoben bo momulia tua.
21 Kon singgai tatua ki ine im mokuani kon tangoi i Tuhan mosia im posaḷamaton.'
22 Utatku mita intau Israel! Indongogai in singogku tana'a: Makusudku tua ing ki Yesus intau in Nazaret. Sia pinotabaí i Allah mamangoi ko'imonimu. Tua im monyata ko'i monimu sin Sia ain nogaid kon oaíidan inta mokoherang totok bo nopo'ontong in tanda mita inta nongkon i Allah. Tua mita inaidan-Nya kon yuaí-yuaík monimu bo tua ing kinota'auanbií monimu.
23 Bo pinodudui in roncana i Allah ko'i-Nia, Sia pinosarahkan ko'imonimu. Sia pinopopakuí monimu kong kayu pinoyotalempang bo pinomayak makow ilimod in intau mita inta mongoromuí.
24 Ta'e Sia biniag bui i Allah. Sia pinilatan nongkon roriga im popatoi, sin diaíbií mota'au aka Sia umuran kom bonu ing kawasa im popatoi.
25 Sin Sia aim bidon pinota'au muna i Daud, nana'a, 'Aku'oi noko'ontong ko'i Tuhan umuran kom munaku; Sia umuran moḷukad makow ko'inakoí, simbaí aku'oi diaí kogangguan in rupa-rupa.
26 Tuamai ginaku umuran moḷunganga, bibigku umuran mopoyaput in dodayow: bo awakku umuranbií mosanang mogoḷat makow kom bonu in tampat inta pinogogayanku pangabisan.
27 Sin diaíbií pomayak-Mu makow rohoku ing kotaḷaían kon dunia intau minatoi. Bo diaíbií doman pomayak-Mu makow in ata-Mu inta umuran kodu-kodudui im mo'indoi kong koyoyangan in awak.
28 Ikow in ain nopota'au in daḷan mopobayak ing kobiagan mononoi ko'inakoí. Moḷunganga totok ing ginaku sin Ikow in umuran kotaki-takinku.'
29 Utatku mita, baí singogonkudon kotarangon ko'i monimu in soaáḷ ki Daud, ki mogoguyang naton. Sia aim minatoi bo iḷobongdon doman; pinoḷobongan ko'nia umuranpa oyuíon kon sigad naton dapot kom masa in tana'a.
30 Sia na'a in tobatuí nabi inta nonota'au kong ki Allah aindon nodandi pinodoyon kon ibot ko'inia kon oyuíon ing katurunannya im baliíon i Allah Raja.
31 Tuamai, pinota'audon muna i Daud kon Raja Mopoposaḷamat tatua im buibií mobiag. Nana'a ing kainia, 'Sia in diaíbií pomayak makow ing kotaḷaían kom bonu in dunia intau minatoi; awak-Nya in diaíbií moyoyang bo modait.'
32 Ki Yesusbií na'a inta aim biniag i Allah nongkon kinopatoian. Kami na'a in noko'ontong tontanií kon tua komintan.
33 Sia sinintak bo inogoian in tampat pomomarenta'an inta moḷantud, bo inogogian i Allah ing kawasa, bo notarima kon Roho i Allah inta aim pinodandi tua, bo Roho doman tatua in inogoi-Nya ko'inami na'a, tuata inta inontong bo dinogog monimu kon na'a,
34 Ki Daud tontanií diaíbií namonik in soroga, ta'e sia nosingog nana'a, 'Ki Tuhan noguman ko'i Tuanku:
35 lituídon kon dotaí ing koḷanan-Ku, modapot im bayongan saturumu baliíon-Ku tumungkud kon tayowon-Mu!'
36 Manangka intua bayongan intau Israel musti monota'au totok kong ki Yesus inta aim pinopopakuí monimu kong kayu pinoyotalempang binalií bidon i Allah Tuhan bo Raja Mopoposaḷamat!"
37 Naonda im mosia nokodongog kon singog i Petrus tatua noliai ing gina monia. Bo noliboí im mosia ko'i Petrus bo kon rasul mita ibanea, "Utat mita onu degaí im musti pomia'an nami?"
38 Ki Petrus noguman ko'i monia nana'a, "Pogogaidon mogaid kon dosa im mo'ikow bo poki baptisdon kom bonu in tangoi i Yesus Kristus simbaí modait ampungan in dosa. Bo mo'ikow motarima kon Roho i Allah.
39 Sim mo'ikowbií bo ki adiímu mita bo bayongan intau inta kon tampat nongoyayuk -- tuatabií mita in intau inta inoinií i Tuhan simbaí mamangoi ko'i-Nia, tuabií im pinopomakusudan dandi i Allah tatua."
40 Natuata pinogoginsilang i Petrus ko'i monia. Bo nobarongpa doman in tongginanya ibanea inta monongganut ko'i monia simbaí umukatdon kom bangusa mita inta mora'at inta toko hukumon i Allah.
41 Noaíntoí in intau nopirisaya kon inta pinoguman i Petrus bo poḷat nokibaptis. Dodai intua intau inta nopirisaya nodugangdon toḷu noribu ing kobayongea.
42 Mosia morajing totok mokidongog kon onu in sinunduí in rasul mita tatua bo umuran moyosipun moyotakin monga'an bo mosambayang.
43 Nobayongdon totok in soaáḷ mita mokoherang inaidan in rasul mita tatua sahingga mopia ing gina monia bo mo'ondok doman.
44 Intau mita inta mopirisaya tatua umuran nobiag notobatuí bo onu in oyuíon ko'i monia pakeíon doman monia moyotakin.
45 Bo umuranbií oyuíon ing kon sigad monia tua im mopotaḷui ing kapunya'an monia bo sila-silaion makow kon intau mita podudui ing kaparaḷuan monia.
46 Pomuḷoi in singgai mosia moyosipun kom Baḷoi Tuhan. Mosia monga'an doman moyotakin kom baḷo-baḷoiannya. Tua komintan inaidan monia takin pia ing gina bo takin doman dodia inta mo'ompaí.
47 Mosia umuran modayow ko'i Allah. Kobobiag monia totu'u mokosanang kong gina im bayongan intau. Pomuḷoi in singgai tantuí dugangan i Tuhan ing kobayong monia, intau mita inta posaḷamaton-Nya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA