Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kutiko lah tibo ari Pentakosta, kasadonyo urang ba iman bakumpua di satu tampaik.

² Indak disangko-sangko tadangalah bunyi dari langik, nan samo jo bakcando bunyi limbubu nan mambuso. Rumah tampaik urang-urang tu sadang bi duduak, lah panuah dek bunyi limbubu tu.

³ Urang-urang tu bi manampak bakcando lidah-lidah, saroman jo nyalo api, manjala kian kumari, sudah tu inggok ka urang tu surang-surang.

⁴ Kasadonyo urang tu dikuwasoi dek Roh Allah, inyo muloi bi mangecek jo babagai-bagai bahaso. Apo nan inyo sampaikan, sasuwai jo apo nan dikatokan dek Roh tu kabake inyo.

⁵ Kutiko itu sambuah urang Yahudi, dari babagai-bagai nagari di dunia ko, nan tingga di Yerusalem. Inyo adolah urang-urang nan patuah kapado Allah.

⁶ Baru mandanga bunyi nan bakcando itu, sambuah urang nan bi tibo ba-uruang. Inyo bi takajuik dek mandangakan urang-urang ba iman tu, mangecek jo bahaso nagari inyo surang-surang.

⁷ Inyo sabana tacangang, inyo sabana eran, mako inyo bi bakato, "Urang-urang nan mangecek ko, kasadonyo inyo kan urang Galilea, iyo ndak?

⁸ Baa ko nan sabananyo, baa mangko kito dapek mandangakan inyo mangecek jo bahaso nagari kito surang-surang?

⁹ Kito ko urang dari Partia, Media, Elam; dari Mesopotamia, Yudea sarato jo Kapadokia; dari Pontus sarato jo Asia,

¹⁰ dari Frigia jo Pamfilia, dari Mesir jo daerah-daerah Libia dakek Kirene; ado pulo diantaro kito ko nan datang dari Roma,

¹¹ ado urang-urang Yahudi, ado pulo urang-urang banso lain nan lah masuak agamo Yahudi; ado pulo nan datang dari Kreta sarato jo dari Arab. Kito lah samo-samo mandangakan, urang-urang tu bi mangecek jo bahaso kito surang-surang, tantang parkaro-parkaro nan ajaib nan lah dipabuwek dek Allah!"

¹² Dek sangaik tacangang, dek sangaik eran, inyo bi batanyo sasamo inyo, "Apokoh aratinyo nan lah kito danga, sarato jo nan lah kito liyek ko?"

¹³ Tapi ado pulo urang-urang nan mancimeehkan. Inyo bi mangatokan, "Jan di iyokan pulo, urang-urang tu sadang bi mabuak tu!"

¹⁴ Mako tagaklah si Petrus, samo-samo jo rasul nan sabaleh lai, kudian inyo bakato kabake urang nan banyak tu. Jo suwaro nan lantang inyo mangecek, "Sudaro-sudaro urang-urang Yahudi, sarato jo kasadonyo nan tingga di Yerusalem ko! Dangakanlah elok-elok, dek karano iko adolah parkaro nan sangaik paralu, nan ka ambo jalehkan kabake angku-angku.

¹⁵ Urang-urang nan mangecek jo babagai-bagai bahaso cako, jan angku-angku sangko inyo tu mabuak, inyo tu indak mabuak doh; dek karano kiniko, ari baru pukua sambilan pagi.

¹⁶ Sabananyo apo nan tajadi kiniko, sa isuak lah di agiah tawu dek Allah, malalui Nabi Yoel:

¹⁷ Allah mangatokan, 'Isuak di akie jaman, Aden ka mancurahkan Roh-Den, kabake sadonyo urang. Anak-anak angkau nan laki-laki, sarato jo anak-anak angkau nan padusi, ka ma agiah tawu kabake angkau, sagalo parkaro nan lah Den baritawu kabake inyo. Anak-anak mudo angkau, ka manampak sagalo parkaro, nan ka Den paliyekkan kabake inyo. Urang-urang angkau nan lah tuwo, ka bi barasiyan, iyolah rasiyan nan ka Den barikan kabake inyo.

¹⁸ Kabake pisuruah-pisuruah-Den pun -- biya laki-laki biyapun padusi -- ka Den curahkan Roh-Den di maso itu. Inyo ka ma agiah tawu, sagalo parkaro nan ka Den agiah tawu kabake inyo.

¹⁹ Aden ka mampabuwek sasuatu nan ganjie di ateh langik, sarato jo parkaro-parkaro nan luwa biaso di bumi ko; ado darah sarato jo api, ado asok nan bagumpa-gumpa.

²⁰ Matoari ka manjadi galok, bulan ka manjadi sirah bakcando darah, sabalun tibo Ari Tuhan, ari gadang nan mulie tu.

²¹ Dikutiko itu, urang nan lai basaru kabake Tuhan mako inyo ka disalamaikkan.'

²² Sudaro-sudaro urang Israel! Dangakanlah apo nan ambo katokan ko: Isa Almasih urang Nazaret tu, lah di agiah tugeh dek Allah untuak sudaro. Tandonyo Baliau lah mandapek tugeh, kito dapek maliyek sacaro jaleh, malalui sagalo mukjizat, sarato jo malalui sagalo parkaro luwa biaso, nan lah dipabuwek dek Allah di adok-an angku-angku, malalui Baliau. Kasadonyo tu angku-angku sandiri lah tawu.

²³ Sasuwai jo rancana-Nyo sandiri, Allah lah ma ambiak kaputusan untuak manyarahkan Isa Almasih kabake angku-angku. Baru Baliau lah disarahkan, angku-angku mambunuah Baliau, angku-angku padiyakan sajo Baliau disalibkan dek urang-urang nan durako kapado Allah.

²⁴ Tapi Allah ma iduikkan Baliau baliak, di antaro urang-urang nan lah mati. Baliau dilulua dek mauik, tapi Allah malapehkan Baliau, dek karano indak mungkin Baliau ka sataruihnyo dikuwasoi dek mauik.

²⁵ Tantang diri Isa Almasih ko, Nabi Daud panah mangatokan, 'Ambo manampak Tuhan tatap bajalan di adok-an ambo; Baliau mangawani ambo, supayo ambo jan digaduah dek siya-siyanyo.

²⁶ Itu mangkonyo ati ambo basukocito, muluik ambo mandendangkan puji-pujian: tubuah ambo ko tanang mananti, jo raso aman di dalam kubua.

²⁷ Dek karano, Angkau indak mampadiyakan jiwa ambo dilulua dek alam mauik. Angkau pun indak mampadiyakan pisuruah Angkau nan satiya, tandeh dek binaso.

²⁸ Angkau lah manunjuakkan kabake ambo, jalan nan manuju iduik nan sajati. Sukocito ambo maruwah-ruwah dek karano Angkau tatap ado samo-samo jo ambo.'

²⁹ Sudaro-sudaro, ijinkanlah ambo mangecek sacaro bataruih tarang, tantang Nabi Daud niniak muyang kito. Inyo lah mati, lah dikubuakan; kubuarannyo dapek juwo lai kito kasani sampai kiniko.

³⁰ Allah lah bajanji kabake inyo sacaro jo basumpah, baraso salah surang dari katurunannyo ka di angkek dek Allah manjadi Rajo. Dek karano inyo lah mangatawui janji tu, inyopun adolah surang nabi,

³¹ inyo tawu pulo apo nan ka dipabuwek dek Allah. Dek karano itu inyo lah banubuat, baraso Rajo Panyalamaik nan dijanjikan dek Allah tu, ka iduik baliak sasudah mati. Nabi Daud lah mangatokan, 'Baliau indak ka dipadiyakan doh tatap di alam mauik; tubuah-Nyo indak ka binaso, sarato indak ka ngingih.'

³² Itulah Inyo Baliau, Isa Almasih nan lah di iduikkan baliak dek Allah, sasudah Baliau mati. Kasadonyo kami lah maliyek sandiri kajadian tu.

³³ Baliau di angkek ka tampaik nan sangaik tinggi, di agiah kakuwasoan dek Allah, Baliau manarimo Roh Allah nan lah dijanjikan dek Bapak. Nan angku-angku danga, sarato jo nan angku-angku liyek kiniko, adolah Roh nan itu juwo, nan lah Baliau curahkan kabake kami.

³⁴ Nabi Daud sandiri indak nayiak doh ka sarugo, tapi inyo mangatokan, 'Tuhan bakato, kabake Tuhan ambo:

³⁵ Duduaklah di subalah suwok Den, sampai Den pabuwek musuah-musuah Angkau tunduak kabake Angkau!'

³⁶ Itulah sababnyo, kasadonyo urang Israel musti sabana-bana tawu andaknyo, baraso Isa Almasih nan angku-angku salibkan tu, Baliau tu pulolah nan lah dijadikan dek Allah, manjadi Tuhan sarato Rajo Panyalamaik!"

³⁷ Kutiko urang-urang tu mandangakan apo nan dikatokan dek si Petrus tu, atinyo sangaik galisah. Mako inyo bi batanyo kabake si Petrus, sarato kabake rasul-rasul nan lain, "Sudaro-sudaro, apo nan musti kami pabuwek?"

³⁸ Petrus manjawab, "Batobaiklah dari doso angku-angku. Andaklah satiyok angku-angku dipamandikan ateh namo Isa Almasih, supayo doso angku-angku di ampuni. Mako angku-angku ka manarimo adiyah Roh Suci dari Allah.

³⁹ Dek karano nan dijanjikan dek Allah tu, adolah untuak angku-angku jo katurunan angku-angku, sarato jo untuak urang-urang nan barado di tampaik-tampaik nan jauah -- iyolah kasadonyo urang nan dipanggie dek Allah Tuhan kito, supayo datang kabake Baliau."

⁴⁰ Bakcando itulah si Petrus manarangkan kabake urang-urang tu. Sambuah lai kato-katonyo nan lain, nan inyo usawokan pulo, supayo urang-urang tu malapehkan diri dari banso nan jahek ko, banso nan ka di ukun dek Allah.

⁴¹ Sambuah urang nan bi picayo kabake apo nan dikatokan dek si Petrus, mako urang-urang tu bi dipamandikan. Di ari nan sahari tu, mako batambahlah urang nan ba iman, sabanyak tigo ribu urang lai.

⁴² Urang-urang tu bi takun taruih baraja jo rasul-rasul, sarato tatap bakumpua basamo-samo. Inyo makan basamo-samo, sarato badowa basamo-samo.

⁴³ Sabana sambuah mukjizat nan lah dipabuwek dek rasul-rasul tu, sainggo kasadonyo urang bi tacangang, sarato bi tabik takuik.

⁴⁴ Kasadonyo urang-urang ba iman tu tatap basatu, apo nan inyo punyoi, inyo pakai basamo-samo.

⁴⁵ Inyo bi manjuwa-i barang-barang sarato arato miliaknyo, sudah tu pitihnyo dibagi-bagikan di antaro inyo kasadonyo, manuruik kaparaluan inyo surang-surang.

⁴⁶ Satiyok ari inyo tatap bakumpua di Rumah Tuhan; sacaro jo balega-lega disatiyok rumahnyo, inyo ma adokan makan basamo-samo basukocito, inyo bi randah ati.

⁴⁷ Inyo taruih mamuji-muji Allah, inyo disukoi dek kasadonyo urang. Satiyok ari bilangannyo taruih batambah, dek karano Tuhan ma antakan kabake inyo urang-urang nan sadang disalamaikkan.

Kisah Para Rasul

Video Kisah Para Rasul 2

Ikuti Kami:

KONTAK | PARTISIPASI | DONASI