Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kareb macing Aco Pentakosta, idi amung-amungdeh netebubpun bang aceh ruma.
2 Idi denak-denak inan uni rat bang langit, ayuneh kudeng uni bui luk rayeh luk manu' amung ruma' luk inandeh tudo ineh.
3 Idi ideh nenier tuda'-tuda' dila' mepad kudeng apui ayudeh, luk patad-patad, idi netudo luun anid-anid burur lemulun ineh.
4 Idi amung-amungdeh pana' mepanu' ku Roh Meligan, pad ideh nengimun peburi' dengan raput-raput buri' kareb Roh ineh nemaré nedeh peburi'.
5 Idi inan tuda'-tuda' lun Yahudi luk tudo déi' Yerusalim, luk mepicet bang sembayangdeh, luk nacing rat anid-anid bawang bang tana' ini.
6 Kareb ideh neninger uni ineh, idi lun mula' nepamung, idi ideh mawa ngaceku anid-anid bururdeh neninger rasul-rasul ineh pebala dengan buri'deh sebuleng.
7 Lun mula' ineh lingo-lingo idi mawa, keburi'deh, "Siruh, bakenké lemulun luk pebala ini lun Galilia?
8 Kudeng apehké tau ninger nedeh, anid-anid pebala bang buri' tau sebuleng?
9 Tau ini rat Partia, Midia, Elam, Mesopotamia, Yudia, Kapadokia, Pontus, idi Asia,
10 rat Prigia idi Pampilia, rat Masir idi babpat-babpat Libia luk muneng ku Kiréne; inan teh arang tau rat Rum;
11 inan teh lun Yahudi, idi lun pupu baken luk maya' sembayang lun Yahudi; idi sebuang tau ini rat Kriti idi Arabia, iamo' amung tau ninger lemulun ineh pebala bang buri' tau sebuleng ratnan kekamen Allah luk melalud."
12 Idi amung-amungdeh lingo-lingo idi megagau idi pebala seburur inan seburur, "Anunké ilungneh ini?"
13 Iamo' lun baken situnga, keburi'deh, "Lun ini mabuk."
14 Idi Pétrus netuped dengan pulu' aceh rasul luk baken idi nemada' nelun mula' dengan rayeh bala, kebalaneh, "O lun Yahudi idi amung muyuh luk tudo déi' Yerusalim, ninger balaku ini idi nima' negku ngelio ilung ini.
15 Lemulun ini na mabuk, kudeng terawé muyuh, ngaceku nekini tangal mudik aco mo'.
16 Iamo' ini bala luk bida' Nabi Yoél:
17 'Idi Allah pebala: Kareb aco kekiped Ui sikal ngutang Rohku kuan amung lemulun, pad anak-anak muyuh deléi idi decur miak mada' luk barén Allah, idi anak adi' muyuh miak nier tuda'-tuda' luk siren, idi lun mengered nginupi raput-raput nupi.
18 Idi luun demulun-demulunKu, deléi idi decur pana', Ui sikal ngutang RohKu kareb ineh teh, pad ideh pana' mada' luk barén Allah.
19 Ui nganau' kekamen luk nan mawa bang langit, idi tanu'-tanu' luun tana' pana'. Ieh ineh dara', apui, idi rabpun luk mitem;
20 mateh aco mangun medacem, idi bulan mesia' kudeng dara', kareb nateh Aco Tuhan macing, ieh ineh aco luk rayeh idi luk meligan teh.
21 Kareb ineh, idé-idé luk nawar ngadan Tuhan miak uen ngulun peh.'
22 "O lun Israil, ninge muyuh bala ini: Yésus lun Nasarét ineh pangeh imo Allah. Amung ini ginala'Neh kuan muyuh dengan kekamen luk melalud, kekamen luk nan mawa, idi tanu'-tanu' pana' luk inau' Allah dengan ticu' Yésus arang muyuh. Muyuh sebuleng kali' amung ineh.
23 Allah, maya' pian idi ilehNeh sebuleng, pangeh nemutut ratnan Yésus barén bang palad muyuh. Idi muyuh nengaté Neneh kareb muyuh nenima' lemulun luk dat nalib Neneh.
24 Idi Yésus ineh tinui Allah idi pinuitNeh ratnan dereh até, ngaceku até na miak ngimet Neneh.
25 Ngaceku Daud nemala ratnan Ieh kudeng ini: 'Ui pangeh nenier Tuhan megéi' pa kiungku; Ieh idi pa tinuehku, pelé ui na mesusa'.
26 Ngaceku ineh niatku geregan idi dila'ku panu' ku awang; idi teh bururku miak merapet,
27 ngaceku na Iko maré niatku bang su inan até; idi na Iko maré DemulunMu luk meligan ruen melu.
28 Iko pangeh nemada' negku dalan ulun, idi ui mepanu' ku awang, ngaceku Iko idi denganku.'
29 "O kinanak-kinanakku, ui mekuu' pebala nemuyuh ratnan tepun tau Daud. Ieh naté idi tinanem, idi teh tanemneh arang tau macing aco sini teh.
30 Ieh ineh aceh nabi, idi pangeh nekali' pejani' Allah neneh: Allah nepebulung ratnan Ieh sikal nganau' aceh inul Daud mangun ku raca', mepad kudeng Daud,
31 Daud nekali' luk ruen Allah, pad ieh nepebala ratnan tui Keristus, kebalaneh, 'Na Ieh tican bang su inan até; idi bururNeh na miak melu.'
32 Idi Yésus ini luk tinui Allah ratnan até, idi amung tau mangun ku lun nekali' Neneh.
33 Ieh pangeh kinikit, pad tudo pa tinueh Allah, idi Ieh nengalap rat Neneh Roh Meligan, idi inutangNeh Roh ineh maya' kudeng jani' TamanNeh, idi luk sinier muyuh idi luk pindenger muyuh nekini, ieh ineh baréNeh luk inutangNeh kuan kai.
34 Daud sebuleng na numak iné' surga; iamo' ieh nepebala: 'Tuhan pangeh nepebala kuan Tuhanku: Tudo Iko pa tinuehKu,
35 pad Ui nganau' amung bunu'Mu mangun ku tapin kukudMu.'
36 "Ngaceku ineh do' amung-amung lun Israil kali' dengan megala' ratnan Allah pangeh nenganau' Yésus luk sinalib muyuh ineh mangun ku Tuhan idi Keristus."
37 Kareb lun mula' neninger bala ineh, idi niatdeh nesigio idi mesusa', idi kebaladeh ni Pétrus idi rasul-rasul luk baken ineh, "O kinanak-kinanak, anunké luk miak ruen kai?"
38 Idi keburi' Pétrus nedeh, "Do' amung-amung muyuh uren, idi rerebpen bang ngadan Yésus Keristus, pelé muyuh ngalap do' ratnan sala' muyuh; idi muyuh miak ngalap baré Allah, ieh ineh Roh Meligan.
39 Ngaceku Allah nepejani' baken kuan muyuh mo' iamo' kuan inul muyuh pana', idi teh kuan lemulun luk mado, ieh ineh idé-idé luk darin Tuhan Allah tau amé' Neneh."
40 Idi Pétrus nengubuk nedeh idi nemada' nedeh dengan mula' bala luk baken, keburi'neh, "Ngulun burur muyuh ratnan ukum luk macing kuan pupu luk tekilu' ini!"
41 Mula' lemulun manu ku balaneh pad ideh rireb peh. Kareb aco ineh teh inan lélé teluh ngeribu burur luk nemaya' nedeh.
42 Idi ideh pana' lutep ninger bada' rasul-rasul idi ideh perurum seburur dengan seburur, pamung kuman, idi sembayang teh.
43 Amung lemulun matot ku tanu'-tanu' idi kekamen luk nan mawa luk inau' rasul-rasul ineh.
44 Amung-amung lun manu ineh serurum idi binawehdeh bibpat kuan amung-amungdeh.
45 Ideh nemasui binawehdeh idi amung luk ideh kuan, idi nemaré babpat kuan amung-amung lemulun, maya' ran niatdeh.
46 Anid-anid aco ideh tebubpun bang Ruma' Allah, idi pamung kuman bang ruma'deh sebuleng, dengan awang idi mebeneh niat.
47 Ideh nengubur Allah, idi amung lemulun mawang niat nedeh. Idi anid-anid aco Tuhan nengula' rurumdeh ngaceku ratnan lemulun luk ngalap ulun luk meruked.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA