Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nanggava eo mbaso ntoYahudi anu niuli Eo Pentakosta, pura-pura topangoseaka i Yesus ri sia nasiromu ri sangu banua.

² Sampesanika niepera moni lako ri langi eva vuu mpoiri narimboso. Moni haitu niepe ri umba-umba riara banua nikasiromura haitu.

³ Bo nikitara eva vaya nu apu nolenje mpo dila nakamburaka nasindele ri umba-umba bo netuu nte ira saito-saito.

⁴ Ira pura-pura nikuasai Nosa Gasa nu Alatala bo nompamulamo notesa ante mpengaya basa ntanina nisovadakara nangoseaka anu nidekei nu Nosa Gasa ka ira.

⁵ Tempo haitu nadea *toYahudi ntanina lako ri ngata-ngata ri njumangu dunia nonturo ri ngata Yerusalem. Ira haitu tona natundu nte Alatala.

⁶ Tempo niepe ntona moni eva vuu mpoiri haitu, nadea mpuu tona nakava nasiromu. Natekaja ira sabana niepera basara mboto namala nipotesa ntopangoseaka i Yesus.

⁷ Nahera bo nokumaa mpuu ira nosimpotesa, "Berimbamo hii? Tona notesa-tesa haitu toGalilea pura!

⁸ Berimba sampe niepeta ira notesa ante basa lako ri ngatata mboto?

⁹ Kita hii tona lako ri umba-umba, lako ri tana Partia, Media, Elam, lako ri tana Mesopotamia, Yudea bo Kapadokia. Naria muni lako ri tana Pontus bo Asia,

¹⁰ lako ri tana Frigia bo Pamfilia, lako ri tana Mesir bo lako ri tana Libia napara ngata Kirene. Naria muni lako ri ngata mbaso Roma.

¹¹ Sanu kita toYahudi bo sanu nesua agama Yahudi. Naria tona nakava lako ri levuto Kreta bo lako ri tana Arab. Kita hitu tona lako ri mpengaya basa, tapi niepeta ira nombatesa kabaraka-kabaraka nipovia nu Alatala ante basa mpengaya-ngaya!"

¹² Nokumaa puramo ira bo naingu mpuu rarara sampe nosipekutana-tana, "Nuapa batuana kajadia hitu?"

¹³ Tapi naria muni tona ntanina hamai aga nepongei-ngeika. Ira nanguli, "Ah, tona haitu, bara nalangu!"

¹⁴ Nangepe tesa ntona haitu, neanggamo i Petrus nosanggani-nggani ante sapulu saito suro ntanina, bo notesamo ia ka todea ante suara namangga. Niulina, "Sampesuvu-sampesuvuku toYahudi, bo pura-pura toponturo ri ngata Yerusalem! Epemo pakabelo-belo, kupakalanto ka komiu batuana anu najadi ri sii pangane.

¹⁵ Kami hii ledo nalangu eva nibatamiu. Dopa tempo panginu, da tinti sasio mpadondona.

¹⁶ Tapi kajadia pangane, haitumo peonga nu Nosa Gasa nijanji nu Alatala nangoseaka tesaNa nipapola Nabi Yoel nggaulu, ivei:

¹⁷ 'Alatala notesa: Ri tempo napara kaupu nu dunia bara maipia, Kupopanau NosaKu ka pura-pura manusia. Ana-anamiu, langgai bo mombine, mompasimbayu tesaKu ka komiu. Kabilasa-kabilasamiu manggita anu Kupopakita ka ira. Bo totua-totuamiu mangipika anu Kupopangipika ira.

¹⁸ Sampe batua-batuaKu muni, langgai bo mombine, Kudekeika Nosa Gasa ri tempo nijanjiKu haitu. Bo ira mompasimbayu pura-pura anu Kuuli ka ira.

¹⁹ Kupopakita ka komiu kabaraka-kabaraka ri langi bo tanda-tanda nipokumaaka ri dunia. Maria raa bo apu bo unu nu apu.

²⁰ Mata nu eo mabali majadi malanda, bula majadi eva raa, dopame makava eo mbaso anu ledo ria kasimbayuna, haitumo Eo Tupu mombatangara manusia.

²¹ Bo isema-sema mekakai nte Tupu, ia kana rapakasalama.'"

²² I Petrus nompakapola tesana ivei: "Sampesuvu-sampesuvuku *toIsrael! Pariaramo tesaku hitu! Alatala nompopakita ka komiu pura-pura, Ia mpuu-mpuu nompelisi bo nantudu i Yesus toNazaret, sabana nidekeikaNa kuasa movia kabaraka bo tanda-tanda nipokumaaka. Nisanimiu mboto tesaku hitu nakana, sabana kajadia haitu pura-pura najadi ri tatangata.

²³ I Yesus haitu nidekei nu Alatala ka komiu bo nipatesimiu Ia. Ia nidekeimiu ka tona nadaa nombapaku Ia ri *kayu salib. Tano mai, anu najadi haitu nangoseaka nia nipakatantu nu Alatala lako ri pamulana, apa nisaniNa mami lako ri pamulana anu majadi ante i Yesus.

²⁴ Komiu nompatesi i Yesus, tapi Alatala nompakatuvu mpanjili Ia lako ri kamateNa. NikabasakaNa Ia lako ri kuasa kamatea, sabana Ia ledo ntoto namala rataamaka ri ponturo ntona namate.

²⁵ Magau Daud nggaulu nombaboto i Yesus matuvu mpanjili ivei: 'Nikitaku Tupu nasaro nombajagai yaku. Ia ri sabingga ngganaku mombatulungi yaku ala yaku ledo molengga ragoya nuapa-nuapa.

²⁶ Haitumo sampe nadamba raraku, bo sumbaku nombasovadaka tesa-tesa petoiya. Bo karoku muni manjarumaka kuasaMiu,

²⁷ Sabana, ledo rapalambaMiu yaku maboli ri *ponturo ntomate. Ledo rapalambaMiu karobataku maboli riara dayo sampe mapopo majadi avu, sabana Yaku batuaMiu nipelisiMiu.

²⁸ NituduakaMiu ka yaku dala matuvu mabelo sampe ri kasae-saena. Melabipa kadamba raraku apa Komiu nosanggani-nggani ante yaku.'"

²⁹ I Petrus nompapola tesana ivei; "Sampesuvu-sampesuvuku, kuuli pakalanto ka komiu, i Daud, magau ntotuata namate bo nitana. Dayona da namala nikita sampe eo hitu. Jadi natantu ledo karobatana mboto anu nipatujuna.

³⁰ Alatala nojanji bo nipakarosoNa ante *sumpa, kana maria saito lako ri muli i Daud mboto raanggataka majadi magau bara maipia. Nisani i Daud pojanji haitu bo ia muni *nabi, jadi nisanina anu rapovia nu Alatala. Nibotona Magau Topepakasalama anu nijanji nu Alatala matuvu mpanjili lako ri kamateNa. I Daud nanguli: 'Ia ledo rapalamba maboli ri ponturo ntomate, karobataNa ledo maboli riara dayo sampe mapopo majadi avu.'

³¹ (2:30)

³² I Yesusmo hii niuli i Daud pangane, sabana Iamo tona nipakatuvu nu Alatala mpanjili. Kami pura-pura hii najadi sabiNa, sabana kami mboto nanggita i Yesus natuvu mpanjili.

³³ Ia nianggataka nu Alatala ri ponturo nibila ri sabingga nggana nu Alatala ri suruga. Bo nitarimaNa Nosa Gasa nijanji nTuamaNa, Alatala. Jadi sampesuvu-sampesuvu, pangane nikitamiu bo niepemiu kami notesa nte mpengaya basa. Haitu najadi sabana kuasa Nosa Gasa anu nipopanau i Yesus ka kami.

³⁴ Jadi patuju nu tesa Magau Daud pangane, ledo nanguli karona mboto, sabana natantu ledo i Daud natuvu mpanjili bo neore hau ri suruga. Tapi i Daud nanguli ivei: 'Tupu nanguli ka Pueku: Ponturomo ri sabingga ngganaKu

³⁵ sampe Kupopekou pura-pura baliMu nte Iko.'"

³⁶ Bo i Petrus nompakaupu tesana, bo nanguli, "Jadi sampesuvu-sampesuvu, haitumo sampe kita toIsrael pura-pura, kana rasanita mpuu-mpuu, i Yesus hitumo anu nipakumiu ri kayu salib, Iamo nipelisi nu Alatala majadi Tupu bo Magau Topepakasalama!"

³⁷ Tempo todea nangepe tesa i Petrus haitu, nasilonto ntoto riarara. Bo nipekutanara nte i Petrus bo suro-suro ntanina, "Sampesuvu-sampesuvu, ane ivesia, nuapa masipato rapovia kami?"

³⁸ Nesanamo i Petrus, "Kajeamo lako ri dosa-dosamiu, bo komiu saito-saito kana radiu, tandana komiu nomparasaya i Yesus Kristus, bo Alatala mombaampungi komiu bo mombadekei Nosa GasaNa ka komiu.

³⁹ Apa Alatala nojanji mombadekei Nosa Gasa ka komiu pura-pura, bo ka muli nu mulimiu, bo ka tona ri ngata nakavao. PojanjiNa haitu ka pura-pura tona nipokio nTuputa Alatala majadi todeaNa."

⁴⁰ Ledo aga ivesia tesa i Petrus, tapi ante nadea tesa-tesa ntanina nipatudukina bo nipaingana todea. Niulikana ira, "Kajeamo bo rapakasalama, ala komiu ledo rapambela pehuku nu Alatala anu rapambela ka tona nadaa ri ngata hitu anu nompatesi i Yesus!"

⁴¹ Naupu nangepe tesa i Petrus, nantambaimo kadea ntona nomparasaya i Yesus, bo ira nidiu, tandana ira topangoseaka Ia. Bo ri eo haitu tona nomparasaya i Yesus natetambai talu-njobu kadeana.

⁴² Topangoseaka i Yesus nabaru haitu natutu mpuu nangepe pepatuduki nu suro-suro, bo ira nasaro nasiromu nosanggani-nggani. Ira nasaro nangande nosanggani-nggani nombatubi roti mantora kamate i Yesus, bo nosambaya nosanggani-nggani.

⁴³ Nadea mpuu kabaraka bo tanda-tanda nipokumaaka nipovia nu suro-suro sampe nokumaa bo naeka todea.

⁴⁴ Pura-pura topomparasaya nosangu rara, bo nuapa-nuapa naria ante ira nipakera mpasanggani-nggani.

⁴⁵ Nasaro naria ira nompobalu kakalumanara bo mbara-mbarara, bo doina haitu nibagi-bagi ka ira pura nangoseaka anu niparaluura.

⁴⁶ Eo-eo ira nasiromu ri doyata Banua nu Alatala. Ira notava-tava nasiromu ri banuara notubi-tubi *roti nantora i Yesus, bo nangande nosanggani-nggani ante damba rarara bo ante liangu rara.

⁴⁷ Ira nasaro nombatoiya Alatala bo pura-pura todea ntanina nompodamba ira. Bo eo-eo nantambai kadea ntona nipakasalama nu Alatala.

Kisah Para Rasul

Video Kisah Para Rasul 2

Ikuti Kami:

KONTAK | PARTISIPASI | DONASI