Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sarạeng nịdating u ěllon Pentakosta e, kal᷊awọu taumata mạngimang e nẹ̌tampung su sěmpalang.
2 Sěngkělěndịu piạ tingihẹ̌ kinaringihẹ̌ bọu l᷊angị kere tatiụ u anging maihạ. Bal᷊e pinẹ̌tampungang i sire nahungkaiang e měngkatewe napenẹ u tingihẹ̌ ene.
3 Mase i sire nakasilọ e manga lila měngẹ̌ngawẹ putung nẹ̌daraẹ su apan tampạ mase rimorọ su pusig'i sire sěngkatau-sěngkatau.
4 I sire kěbị e nipẹ̌karadiahangengu Rohkẹ̌ u Ruata, kụ nanětạ e němpẹ̌bisara su ral᷊ungu haghing bera wal᷊ine. I sire němpẹ̌bisara timuhụewe karadiahangu Rohkẹ̌ e apa hinong iweran sire.
5 Su tempo ene lawọ taumatan Yahudi, wọu kal᷊awọu haghing banua su kaguwạu dunia e němpẹ̌tanạ su Yerusalem. I sire kai taumata masasatia su Mawu Ruata.
6 Ene kinaringihe tingihẹ̌ ene, mal᷊awọ kahěngang taumata natampung. I sire kěbị e himěkosẹ̌ nakaringihẹ̌ manga rarolohang e němpahumbisara su werang sire sěngkatau-sěngkatau.
7 Mạherang dingangu rụdal᷊inaụ, i sire kapẹ̌bisarane, "I sire měbẹ̌bisara ini e kěbị tau Galilea arau ěng?
8 Kereapa ngae karariadine hakịu i sire nakawisara su haghing berang banuang kitẹ sěngkatau-sěngkatau e?
9 I kitẹ asal᷊e kawe wọu Partia, Media, Elam; bọu Mesopotamia, Yudea, ringangu Kapadokia, wọu Pontus dingangu Asia,
10 bọu Prigia ringangu Pampilia, bọu Misirẹ̌ dingangu wahageangu ěntanan Libia rěduhu Kirene; piạbe lai i kitẹ bọu Roma,
11 piạ tau Yahudi ringangu piạ l᷊ai taumatang kawanua wal᷊ine kụ seng nasowa agamang Yahudi; piạ l᷊ai riměnta wọu Kreta ringangu Arabẹ̌. I kitẹ kěbị e nakaringihẹ̌ si sire mạhumbisara su werang kitẹ sěngkatau-sěngkatau e, mạanun manga hal᷊ẹ̌ makadal᷊inaụ kẹ̌koateng u Mawu Ruata!"
12 Měngkaherang dingangu rụdal᷊inaụ i sire kěbị e kapẹ̌kakiwal᷊one sěmbaụ dingangu wal᷊ine, "Kai a mangal᷊ene ini e?"
13 Kai piạ l᷊ai taumata kụ měmpělẹ̌heghesẹ̌. I sire nẹ̌bera, "Ah, i sire ene tumbạewen niwukang!"
14 Mase i Petrus dimarisị dingang i sire manga rarolohang bal᷊ine, i sire mapul᷊o ěsa su kataune, bọu e nẹ̌bera su taumata l᷊awọ ene. Dingangu tingihe maihạ i sie nẹ̌bera, "Manga anạ u sěmbaụ, taumatan Yahudi ringangu patikụewen měmpẹ̌tẹ̌tanạ su Yerusalem! Daringihẹ̌ko pakapia, u hal᷊ẹ̌ ini e hinong takụ tualageng si kamene.
15 I sire ini e wal᷊inewe wukang, kere su tiněnnang kamene; batụu ini wuhụ e pukul᷊ẹ̌ sio mal᷊ukadẹ̌.
16 Kai ini e seng bọu nipaul᷊ị u Mawu Ruata su Nabi i Yo"el:
17 Duata e něhengetang, 'Su Ěllong Kiamatẹ̌ e, Iạ sarung maměmbing u Rohkẹ̌-Ku waugu patikụ taumata. Manga anạ i kamene; manga esẹ dingangu wawine e sarung měhabarẹ̌ si kamene apạeweng Takụ ihabarẹ̌ si sire. Apang manga rariọ mangangudạ e sarung makasilo apan Takụ pakịpandai si sire. Manga ghaghurang i kamene e sarung miping ipi sarung Takụ ipaipi si sire.
18 Su manga ěllang-Ku -- l᷊ai baẹbe esẹ arau wawine e --, sarung Takụ paměmbingangu Rohkẹ̌-Ku suapạeweng ěllọ e. Ia sire sarung měhabaru apang Takụ ihabarẹ̌ si sire.
19 Iạ e sarung mẹ̌koạ apang makạdal᷊inaụ dasị su l᷊angị e, ringangkewelain manga hal᷊ẹ̌ makạdal᷊inaụ tawẹ sihinge bawa su winangunang; sarung piạ daha ringangu putung, singangu, ringangu tipu.
20 Matangěllo e sarung marěndung, bul᷊ang sarung mẹ̌těngkahamụ kere raha kal᷊amonan Ěllon Mawu, ěllo masěllahẹ̌ dingangu mawantugẹ̌ ene e ruměnta.
21 Su tempo ene, i saing kụ měkẹ̌kui Mawu e sarung ipakasal᷊amatẹ̌.'
22 Manga anạ u sěmbaụ taumatang Israel! Pẹ̌daringihẹ̌ko apang takụ iwera ini: Mawu Yesus tau Nazaret ene seng nighěllirang u munarane kahian Duata e baug'i kamene manga anạ u sěmbaụ. Ene mal᷊ahẹ kahěngang su manga apạ e makạl᷊aherang dingangu manga hal᷊ẹ̌ makạdal᷊inaụ tawẹ sihinge kẹ̌koateng u Mawu Ruata e su tal᷊oarang kamene e nilahẹ si Yesus e. Kěbị ene i kamene hala seng masingkạ.
23 Natuhụewe su karakin'E hala, Duata e němutusu měnarakang i Yesus si kamene. Kụ piạ e i Sie nisarakang, i kamene kawe němate si Sie, bọu ene napakawalang taumata ral᷊akisẹ̌ e něnguruisẹ̌ si Sie.
24 Kaiso Mawu Ruata e napẹ̌biah'i Sie kapia wọu tal᷊oaran taumata nate. I Sie niselohu papate, arawe Ruata e něliwir'i Sie, u tawe ipakawala i Sie měngkate hanesẹ̌ su kawasang papate.
25 I Daud bọu měbẹ̌bera mạul᷊ịu i Yesus, 'Iạ e makạsilo Mawu kụ měngkai hanesẹ̌ su těngoku; i Sie rụděndingang si siạ, tadeạu iạ tawe ghuminuẹ̌ u apa-apa.
26 Hakịu ene iạ e rụl᷊uasẹ̌, dingangu mohongku e měgẹ̌giọen daralo, ringangu ghẹ̌siku e tạ konsange sarung měngẹ̌ngampal᷊ẹ̌ su ral᷊ungu lěbing.
27 Batụ u i Kau e tawe mapakawalan himukudẹ̌ku e su ral᷊ungu runiang taumata nate. I Kau e tawe mapakawalan ěllang'U satia e masilakạ dingang u mawinasa.
28 I Kau e seng naněbọu ral᷊eng si siạ e makakawunạ u pẹ̌bawiahẹ̌ tutune. Dal᷊uasẹ̌ku e mambeng mạhěmpal᷊iu ual᷊ingu i Kau e mang ene ringangku e.'
29 Manga anạ u sěmbaụ, gělirengkon loahe iạ tadeạu reng mẹ̌běke pakal᷊ahẹ mạanụeng Daud, i upung gaghurang i kitẹ e. I sie seng nate kụ selaing nilěbing; kụ lẹ̌bing e wẹ̌dangbe lai ene sutal᷊oarang kitẹ sarang orasẹ̌ ini e.
30 Mawu Ruata e seng nẹ̌kědo si Daud piạ salune, u sěngkatau wọu hěntone sarung ihengkẹ u Mawu Ruata makoạ datu. Ual᷊ingu i Daud e masingkạ u kědo ene ringangu i sie lai sěngkatau nabi,
31 i sie mal᷊aing masingkạ u apang kẹ̌koateng u Ruata. Kụ i sie seng bọu naněbal᷊u Ratu Měnanal᷊amatẹ̌ kụ seng nikẹ̌don Duata e, sarung mẹ̌biahẹ̌ kapia wọu kapapohonge. I Daud nẹ̌bera, 'I Sie tawe niwala kạtatanạ su ral᷊ungu tampạ u taumata nate; badang'E tawe mahenẹ dingangu tawe masue.'
32 I Yesus ini e niapẹ̌biahẹ̌ kapia wọu kapapohonge ual᷊ingu Ruata. I kami kěbị seng nakasahidi hala ene.
33 I Sie niapakaiang su kakaianenge marangẹ dingangu nionggotangu Ruata kawasa měnarimạ u Rohkẹ̌ u Ruata kụ seng nirianding Amang. Dingangu orasẹ̌ ini e rẹ̌daringihang dingangu pẹ̌pandaěng i kamene e ute kai Rohkẹ̌ ene kụ niwěmbing si kami.
34 I Daud sẹ̌sane tawe nahengkẹ sol᷊ong sorga, kai i Daud e nẹ̌bera u, 'Mawu e nẹ̌bera su Mawuku:
35 Kaiangko su koaneng-Ku, sarang Iạ mapakariadin sekẹ i Kamene e měmpẹ̌suba si Kamene!'
36 Kai ual᷊ingu ene hakịu patikụ taumatan Israelẹ̌ e hinong masingkạ kahěnga-hěngang u kai i Yesus nikuruis'i kamene, Mawu Yesus ene e mal᷊aing seng nirianding Duata makoạ Mawu ringangu Ratu Mananal᷊amatẹ̌!"
37 Ene apan taumata nakaringihẹ̌ hal᷊ẹ̌ ene, naung i sire e měngkate ghụgěnggang. Mase i sire němpẹ̌kiwal᷊o si Petrus dingangkewelain manga rarolohang bal᷊ine, "Manga anạ u sěmbaụ, kai mẹ̌kapurạ e tangu i kami?"
38 I Petrus simimbang, "Pěmpẹ̌tobate wọu manga rosang kamene. Kụ sěngkatau-sěngkatau e pakisahaniko su areng i Yesus Kristus, tadeạu rosang kamene e ampungang. Kụ i kamene e sarung makatarimạ u laonggọ u Rohkẹ̌ u Ruata e wọu anun Duata.
39 U apan nikědon Duata e kai waug'i kamene ringangu waugu pal᷊ahiteng kamene orelai waugu apan taumata kụ su tampạ mararau -- kụ kěbịewe apang nikuiangu Mawu Ruatang kitẹ e mědeạu mahunděnta su anun'E."
40 Kerene lai i Petrus něnualagẹ̌ si sire. Tangu ringangkewe lawọ l᷊ai wawerane wal᷊ine, i sie mạngansang si sire, tadeạu i sire mẹ̌těngkapěllọu watangeng i sire bọu l᷊imang umatẹ̌ makal᷊ubengkọ ini e kụ sarung ihukung u Mawu Ruata.
41 Mal᷊awọ taumata nangimang ual᷊ingu apan niwerang Petrus, kụ i sire nisahani. Tangu kakěpal᷊u taumata mạngimang e su ěllo ene saụewe lai natamba těllu hiwu su katuane.
42 Dingangu mạngiaking kahěngang i sire měngkai mạngěndung bọu manga rarolohang e ringangu měngkai hanesẹ̌ mětẹ̌tampung-sěngkapẹ̌tampung. I sire mạhungkaěng-sěngkakaěng dingangu mẹ̌kal᷊iomaneng-sěngkapẹ̌kal᷊iomaneng.
43 Mal᷊awọ kahěngang kal᷊aherang kinoạ u manga rarolohang e hakịu patikụ taumata e rụdal᷊inaụ dingangu mạtakụ.
44 Taumata mạngimang e kěbị-kěbị hanesẹ̌ mětẹ̌těngkasěmbaụ kụ apạeweng tẹ̌taghuaneng i sire e pẹ̌paketang sěngkapẹ̌pakẹ.
45 I sire měbẹ̌bal᷊ụ, manga apal᷊iwụ dingangu manga rarotong i sire, mase roitẹ̌ ipahiạ tuhụewe su pandungang u sěmbaụ-sěmbaụ.
46 Apang kal᷊aěllo i sire měngkate hanesẹ̌ mětẹ̌tampung su Wal᷊em Mawu, ringangu kụkaěng sěngkakaěng dingangu maral᷊uasẹ̌ orelai kasasanạu naung su manga wal᷊en sire.
47 I sire hanesẹ̌ měmpẹ̌dẹ̌dalo Mawu Ruata ringangu makạl᷊uasẹ̌ naungu patikụ taumata. Apang kal᷊aěllo e kal᷊awọu taumata mạngimang e hanesẹ̌ mạhuntinamba ual᷊ingu Mawu e seng něnarakang u taumata apang makạhombang kasasal᷊amatẹ̌ e si sire.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA