Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali re’e seore i Petrus sira dua i Yohanes yau makai-kai ri banua i mPue Allah ri jam togo rede eo, apa etu semo tempo napokai-kai nto Yahudi.
2 Wali ri wombo banua i mPue Allah, wombo to rato’oka Wombo Meyawa, ri wombo etu re’e samba’a tau langkai to malulu witinya. Ngkai etu malulu witinya yako ri pampoana. Wali ngkai etu ponto eo napangangkeni nu yununya pei naposaka nsira ri pipi nu wombo etu. Wali ia maroo-roo ri wombo etu see bara sema tau to yau njo’u ria ia damamporapi doi resi tau etu.
3 Wali ngkai to malulu witinya etu ia mangkita i Petrus sira dua i Yohanes damasuamo ri wombo banua etu. Wali ia mamporapi doi resi sira dua.
4 Tempo ia mamporapi doi etu, i Petrus sira dua i Yohanes mangalo’aka resi ia, panewa i Petrus manganto’oka ia, to’onya, “Lo’aka resi kami.”
5 Wali ngkai etu mangalo’aka kojo resi sira dua apa ia mampobuuka bara re’e to danawaika nsira ia.
6 Pei i Petrus manganto’o, “Resi kami taa kojo re’e doi, pei kesaa to re’e resi kami, to etu dakuwaika korom. Wali yako ri kuasa i Yesu Kerisitu to Nasaret, aku manganto’oka korom pakore pei palinja.”
7 Yako etu i Petrus mangkongko pale ngkai etu tondo ngkana pei mangansawang ia see ia damakore. Panewa witi pasi wuku yali ngkai etu mansaka mawali maroso.
8 Wali ia matambesi tudu ngkangkore panewa malinja-linja. Panewa yako etu ia mangalulu i Petrus sira dua i Yohanes masua ri raya banua i mPue Allah. Ia malinja matambesi-mbesi pasi ri rayanya ia malinja etu ia mangabarong i Pue Allah.
9 Wali samparia tau to nja’u nja’u raya banua etu sira mangkita ia malinjalinja pei matambesi-mbesi pasi sira mangandonge seja ia mangabarobarong i Pue Allah.
10 Sira nansani ngkai etu semo to sira mananya mangkita matunda marapi-rapi ri tango nu Wombo Meyawa ri banua i mPue Allah. Wali tau to mangkita ia malinja etu, sira ipu kojo rayanya pasi taa nansani to napobuuka apa sira mangkita ngkai to malulu witinya etu pei kodi majoli ia nakurang malinja.
11 Wali ngkai to rapakaroso witinya etu ia taa kojo rani mampiyaika i Petrus sira dua i Yohanes. Ia mangalu-lulu sira njo’u gandaria nu banua i mPue Allah, gandaria etu rato’oka Gandaria i Salomo. Wali tempo ngkai etu mangalulu i Petrus sira dua etu boros kojo tau kangguyu-ngguyu mangampago sira togo apa tau boros etu sira ipu kojo rayanya.
12 Wali tempo i Petrus mangkita tau boros to mampago sira etu, ia manganto’oka sira, to’onya, “A’i-a’ingku to Israel, maka pei komi ipu rayamu mangkita ngkai si’i malinja? Maka pei mangalo’aka kojo resi kami? Wimba, komi bara mampobuuka ngkai si’i naka pei nakurang malinja bara saba yako ri kuasa mami dua, bara saba yako lengko mami dua to mampakasanang i Pue Allah? Gete, si’a kojo kami to mampakatao ia.
13 I Pue Allah semo to mangika palaong to etu. Ia semo Allah to napue nu bue-bue ngkita tempo owi, etumo i Abraham, i Ishak, pasi i Yakub, apa sira mampakabae Ia. Wali i Pue Allah mampakatao witi ngkai si’i see to lino damangabarong kuasa nto PapolaongiNya, i Yesu. Wali i Yesu to na’angga i mPue Allah etu, Ia semo to nuposora yau ngkomi resi pomarenta. Pasi Ia semo to nupobo’o ngkomi ri tango i mPilatus tempo i Pilatus etu rani mangalapa muni Ia.
14 I Yesu etu Ia tare dosaNya pasi Ia sangkani mangika anu to singkonong pei i Pue Allah. Pei komi mampobo’o Ia, pei mamporapika resi i Pilatus see ia damangalapaka komi tau to yusa to re’e mampopate sa’e.
15 Panewa komi mampopate yau i Yesu anu pu’u ngkatuwu. Pei karoonya komi mampopate yau Ia i Pue Allah mangawangu muni Ia yako ri kapateNya. Pasi kami semo matamanasa palaong to etu.
16 Wali kuasa to yako i Yesu etu, kuasa etu semo to mampakaroso witi ngkai si’i. Palaong to nukita ngkomi etu pasi to manasa ngkomi, palaong etu mawali apa saba kami mangaya kuasa i Yesu etu. Wali apa saba kami mangaya kuasa i Yesu etu see naka ngkai si’i mawali masilonga koronya ewa to room nukita ngkomi samparia.
17 “Wali a’i-a’i, komi pasi kepala-kepala ngkomi re’e mampopate yau i Yesu seore, pei aku kunsani komi tempo etu taa mangansani batuanginya palaong etu.
18 Pei palaong to nuika ngkomi etu mangabanang gombo i mPue Allah to nato’o nto pantuntu tuntuNya tempo owi, apa sira manganto’o mangkonong i Kerisitu, Makole parajanji i mPue Allah, Ia damangarata kasesa.
19 Wali a’i-a’i, pajea pasi ndolika tangomu resi i Pue Allah see Ia maya mangalapa dosa ngkomi.
20 Apa ane ewa see Ia damangawaika komi kasanang ndaya to mampakaroso raya ngkomi. Pasi Ia damampokau i Yesu Kerisitu ma’i wo’u resi komi, apa i Yesu semo to Ia roomo mangampilis mawali Makole ngkomi.
21 Wali tempo si’i i Yesu ndatewa ndate saruga. Pasi matantu kojo Ia damaroo ndate ria sampe rata temponya i Pue Allah damangika samparia damawali bou. Palaong etu semo to room nato’oka yami nto pantuntu tuntu to Ia puenya tempo owi.
22 Apa pobuuka gombo i Musa, samba’a to pantuntu tuntu i mPue Allah tempo owi etu, tempo etu ia magombo mangkonong i Yesu, ia manganto’o, ‘I Pue Allah damangampilisika komi samba’a to pantuntu tuntuNya to yako ri oyo ngkomi. To pantuntu tuntu etu ewa aku si’i. Wali padongeka kojo samparia anu to nato’oka ntau etu komi.
23 I sema-sema to taa mampodongeka gombo to nato’o nto pantuntu tuntu etu, tau etu darapoga’aka yau yako resi tau to i Pue Allah puenya, pasi ia darapakaja’aka yau.’ Wali etu semo gombo i Musa.
24 “Pasi samparia yununya to pantuntu tuntu i mPue Allah seja, mula yako i Samuel rataka ri samparia to pantuntu tuntu to mangabolos wo’u, sira paka manganto’o yami mangkonong palaong to mawali ri tempo si’i.
25 Wali a’i-a’i, kita semo to mangantima parajanji i mPue Allah to nato’o yami nto pantuntu tuntuNya etu. I Pue Allah mamparajanjika bue ngkita tempo owi, i Abraham, Ia manganto’o, ‘Yako ri wiyaamu Aku damampakasanang samparia to lino.’ Wali a’i-a’i, kita to Yahudi semo to mangarata kasanang yako to naparajanjika i mPue Allah kita etu.
26 Wali i Pue Allah mangampilis to PapolaongiNya, i Yesu, panewa mampokau Ia ma’i resi kita ruyu, damampakasanang kita. Wali ewa si’i nikaNya mampakasanang kita, Ia mangansawang kita samba’a pei samba’a see kita rani mangandolika tangonta yako ri palaong ngkita to maja’a.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA