Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Samuza ma'õkhõ, me bõzi tõlu tanõ owi inõtõ wangandrõ, numalõ ba Nomo Zo'aya Wetero awõ Yohane.

² Ba mbawa gõli nifotõi "Bawa ndruhõ si Sõkhi", so samõsa ndra matua sombuyumbuyu i'otarai ba wa'atumbu. Ero ma'õkhõ so niha andrõ ba nahia da'õ wangandrõngandrõ buala ba niha si mõi ba Nomo Zo'aya.

³ Me i'ila niha andrõ ndra Fetero ba Yohane mõi bakha ba Nomo Zo'aya, i'andrõ ena'õ labe'e khõnia mbualara.

⁴ Lafaigi ia, aefa da'õ imane Fetero, "Faigi ndra'aga!"

⁵ Ifaigi ira niha andrõ fao fanõtõna wa labe'e khõnia mbuala hadia ia.

⁶ Ba hiza imane khõnia Fetero, "Ma'ifu lõ hadõi kefe khõgu. Hadia zi so khõgu da'õ ube'e khõu: Ba dõi Yesu Keriso banua Nazareta andrõ owaõwaõ!"

⁷ Maoso Wetero igogohe danga niha andrõ ba itolo ia wemaoso. I'anema'õ abõlõ gahe awõ mbu'u kawono niha da'õ.

⁸ Muzizio ia, ilau mowaõwaõ. Ifanõrõnõrõ ia. Numalõ ia ba Nomo Zo'aya awõ Wetero ba Yohane, ba ifanaokanaoka ia, isuno Lowalangi.

⁹ Fefu niha ba da'õ la'ila mowaõwaõ ia, ba lasunosuno Lowalangi.

¹⁰ Ba awena aboto ba dõdõra wa sangandrõngandrõ buala andrõ ia si daodao ba "Mbawa ndruhõ si Sõkhi" ba Nomo Zo'aya. Tobali sibai dõdõra ba ahõlihõli dõdõra wangila salua andrõ khõnia.

¹¹ I'o'õ manõ ndra Fetero ba Yohane niha andrõ. Ba me larugi ya'ira si datõlu andrõ golayama nifotõi "Olayama Zalomo", lahurufai ira niha fefu. Ahõlihõli dõdõra.

¹² Me i'ila niha sato andrõ Fetero, imane khõra, "He ya'ami niha Gizera'eli, hana wa ahõli dõdõmi ba zalua andre? Hana wa lõ aetu mifaigi ndra'aga? Hadia miwalinga mowaõwaõ niha andre bõrõ kuaso si so khõma, ma zui bõrõ me sangata'ufi Lowalangi ndra'aga?

¹³ Lowalangi nifosumange ndra tuada Aberahamo, Iza'aki ba Yakobo, zi no mamolakhõmi Enoni-Nia Yesu. Yesu andrõ nibe'emi ba danga ndra samatõrõ, nilaw̃ami fõna Wilato, me edõna i'efa'õ Ia Filato.

¹⁴ No si sõkhi ba ni'amoni'õ Ia. Ba hiza milaw̃a Ia awõ wa mi'andrõ khõ Wilato ba wangefa'õ khõmi niha samunu niha.

¹⁵ Mibunu Ia. Ba hiza Ya'ia andrõ gumbu wa'auri ba niha fefu. Ba no ifuli I'orifi Ia Lowalangi moroi ba wa'amate. No ma'ila samõsa da'õ.

¹⁶ Kuaso ba dõi Yesu andrõ zombali'õ abõlõ niha sombuyumbuyu andre. Hadia zi no mi'ila andre, alua bõrõ wa'afaduhu dõdõ ba dõi-Nia andrõ. Bõrõ wa'afaduhu dõdõ niha andre khõ Yesu wa no abõlõ ia mangawuli fõnami.

¹⁷ Ya'ami ira talifusõ! Aboto ba dõdõgu iada'e wa hadia nilaumi awõ nilau zalaw̃ami khõ Yesu andrõ, tenga milau ia bõrõ wa'aboto ba dõdõmi ngawalõ nilaumi andrõ.

¹⁸ Ba zi manõ alua zi no I'ombakha'õ Lowalangi me fõna khõ ndra sama'ele'õ fefu, wa lõ tola lõ'õ tefakao Razo Sangorifi nifabu'u andrõ.

¹⁹ Bõrõ da'õ mirõi horõmi, ba mifuli ami khõ Lowalangi, ena'õ I'efa'õ horõmi andrõ.

²⁰ I'ondrasi dania ami Lowalangi, ba misõndra dania wa'ohahau dõdõ ba wamati si bohou. Ifatenge So'aya khõmi Yesu, bõrõ me no Ihonogõi Lowalangi tobali Razo Sangorifi Ia khõmi.

²¹ Lõ tola lõ'õ torõi Ia ba zorugo irege Ibohouni fefu Lowalangi si mane niw̃a'õ-Nia khõ ndra sama'ele'õ me mbõrõta.

²² No imane Moze, 'Ifatenge khõmi Lowalangi So'aya ya'ami samõsa zama'ele'õ moroi ba soimi, si mane famatenge-Nia ya'odo. Lõ tola lõ'õ mifondrondrongo niw̃a'õ zama'ele'õ andrõ khõmi.

²³ Si lõ mame'e ba dõdõ niw̃a'õ zama'ele'õ andrõ, nitibo'õ moroi ba mbanua Lowalangi ba nifakiko.'

²⁴ Ira sama'ele'õ si no mame'e Turia soroi Lowalangi, i'otarai Zamueli ba ira sama'ele'õ tanõ bõ'õ si tohare furi Zamueli, fefu ira laturiaigõ ginõtõ andre.

²⁵ Fawu'usa li soroi Lowalangi nifa'ema ndra sama'ele'õ no soguna khõmi. Ba wawu'usa li Lowalangi nifa'ema ndra sama'ele'õ khõ ndra tuami, imane Lowalangi khõ Gaberahamo, 'Moroi ba nga'õtõu Ufahowu'õ fefu soi ba gulidanõ.' No khõmi wawu'usa li andrõ.

²⁶ Da'õ mbõrõ wa Ifili Genoni-Nia Lowalangi, ba Ifatenge we'amõi khõmi si fõfõna, ena'õ Ifahowu'õ ami. Ba wamahowu'õ-Nia andrõ wa mifalalini gera'erami ba mirõi lala wa'aurimi si lõ sõkhi."

Kisah Para Rasul

Video Kisah Para Rasul 03

Ikuti Kami:

KONTAK | PARTISIPASI | DONASI