Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Faik esa boema, Petrus no Yohanis leu leo Amak Manetualain Uman la'e li'u telu le'donoso na, fo ala hule-haladoi.

² Nai Lelesu Ina mata na, hapu lelesu esa na'de Lelesu Mana'a Hiik. Hapu touk esa nangatuuk nai ndia. Touk ia inan bongin te lu'uk so. Tunga faik lon leondia neu fo noke su'di bee ka neme hataholi mana masok leo Amak Manetualain Uman dale neu a.

³ Lelek fo touk ia nita Petrus no Yohanis masok leo Amak Manetualain Uman dale leu boema, ana nokes fo ala fen su'di bee ka.

⁴ Boema duas mete touk ia, de basa boema Petrus nafa'dan nae, "Mete leo ami mai!"

⁵ Boema touk ia taoafik neu duas nana namahena, neukose ana hapu hata esa neme duas mai.

⁶ Tehu Petrus nafa'dan nae, "Au doing ta sen esa boen. Tehu hata fo au anuun soona, neukose ndia nde au fen neu o a: No Yesus Kristus, fo hataholi Nazaret ndia koasa na, la'ok leona!"

⁷ Boema Petrus ho'u na tou lu'uk ndia lima kona na de nafofo'a falin. Tutika touk ia ei bu'u nala balakai leona.

⁸ Touk ia nakaboku de napadeik, boema ana la'ok neu mai. Basa boema ana sama-sama no Petrus no Yohanis de leu leo Amak Manetualain Uman dale leu. Ana la'ok ma nakaboboku, boema ana koa-kio Manetualain.

⁹ Basa hataholi la litan ana la'ok ma ana koa-kio Manetualain.

¹⁰ Boema ala bubuluk mandoo fai a hataholi mana mangatuuk manai Amak Manetualain Uma na Lelesu Mana'a Hii na mata na fo noke su'di bee ka, nde hataholi ndia. Hataholi sila la lita manda'dik ndia boema, ala dodoo doa kana, ma langan bekale hiik.

¹¹ Touk ndia ana tunga nahele Petrus no Yohanis. De lelek fo ala losa Amak Manetualain Uman na so'da na, fo loken soona lae, "Serambi Salomo", boema basa hataholi la mai, de lakamomotu la telus, nana ala dodoo doa kana.

¹² Lelek fo Petrus nita hataholi sila la boema nafa'das nae, "Hei hataholi Israe la lemin, tao le'e de tolanoo kala dodoo doak dede'ak ndia? Tao le'e de emi mete mahelek ami? Ade emi maedaenga hataholi ia ana la'ok hu ka nde ami koasa ma, do hu ka nde ami mamahele neu Manetualain?

¹³ Manetualain fo Abraham, Isak, ma Yakob sene do'o ka nde bee na ita bei ba'ikai nala Manetualain. Manetualain ndia namatutua-namadedema basa Ata na, fo nde Yesus Kristus. Yesus Kristus ndia nde emi fe henin leo mana koasa la neu, boema emi la'ba nana nai Pilatus matan, nai lelek fo Pilatus ana sanga po'i nana.

¹⁴ Yesus ndia malalaok ma malole, tehu emi la'ba nana, de emi makaseti Pilatus fo ana po'i fe emi, hataholi kanisak esa.

¹⁵ Boema tolanoo kala taomisan, te see ko na Ndia nde maso'da ka huu na, ba'eneu basa hataholi lala'ena. Tehu Manetualain tao naso'da fali kana neme mamate sa mai so. Ami nde sakasii matam dede'ak ndia.

¹⁶ Tolanoo kala mitan, ma emi mita hata da'di neu hataholi lu'uk ia so. Hataholi lu'uk ia, ana da'di hataholi balakaik, boema ana lea-hai so, nana namahele Yesus ma koasa na. Hu ka nde hataholi ia namahele Kristus, de ana lea-hai nai tolanoo kala basa-basam matan so.

¹⁷ Tolano-tolanoo ngala lemin! Besak ia, au bubuluk basa hata fo emi mo emi mauli-malanga mala taon soaneu Yesus. Emi tao tataos ndia nana emi ta bubuluk hata fo emi taon ndia fa.

¹⁸ Ma hu ndia de, ana da'di hata fo makahulu na Manetualain nafa'dan tunga basa nabi nala nae, Mane Mana Fe So'dak fo Ana helu ka muse Ana doidoso.

¹⁹ Hu ndia tolano-tolanoo ngala lemin, tukatei-saledale meme emi sala-singo mala mai leona, fo fali leo Manetualain mai, fo ela Ana kokaheni emi sala-singom sila la.

²⁰ Neukose Amak Manetualain mai neu emi, fo emi samane ma hapu namahokok. Ma neukose Manetualain nadenu Yesus Ana mai neu emi, nana Manetualain naketu basa, Ana da'di Mane Mana Fe So'dak soaneu emi.

²¹ Ana muse leo nai nusa so'da ka, losa Manetualain tao na basa hata lala'ena ala da'di beuk, sama leo Manetualain nafa'da basan, tunga nabi nala ndek makahulun eli.

²² Musa nafa'da hai nae, Manetualain fo emi Lamatua ma, neukose nadenu emi hataholim esa da'di nabi neu emi, sama leo nadenu au ia. Emi muse mamanene basa hata, fo nabi ndia nafa'dan neu emi a.

²³ Hataholi fo ana ta taoafik neu hata fo nabi ndia nafa'da ka fa soona, Manetualain si'uheni hataholi ndia neme hataholi kamahehele kala dalek mai, fo mopo-maten.

²⁴ Basa nabi fo landuku-lalosak hai halak maneme Manetualain mai, mulai neme Nabi Samue la, ma basa nabi fe'ek fo mana mai makabui kala basa-basas, ala tui-benga la'eneu le'do fai besak ia.

²⁵ Manetualain hehelu-balataan fo basa nabi la landuku-lalosa kana nde bee na, soaneu tolanoo kala. Nai hehelu-balataak fo Manetualain taon no emi ba'ikai mala ndia, Manetualain nafa'da Abraham nae leo ia, 'Neme o tititi-nonosim mai, neukose Au fe baba'e-papalak neu basa leoina manai daebafa ka lala'ena.' Hehelu-balataak ndia nde bee na soaneu emi boe.

²⁶ Hu ndia de Manetualain hele Ata na fo nadenun Ana mai nakahuluk neu emi, fo ela Ana fe baba'e-papalak neu emi. Ana fe baba'e-papalak ndia, eno na nde, Ana tao na tolanoo kala tukatei-saledale neme emi maso'da mangalau ma eno dalan mai."

Kisah Para Rasul

Video Kisah Para Rasul 03

Ikuti Kami:

KONTAK | PARTISIPASI | DONASI