Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kon singgai tobatuí wakutu in orasdon posambayangan sin aindon jam tiga ḷoḷabungea, ki Petrus bo ki Yohanes minayak sinumu'ot kom Baḷoi Tuhan.
2 Kon tua oyuíon in tobatuí ḷoḷaki inta lempeng nongkon no'ilahirpamai. Pomuḷoi in singgai umuran sia buligan intau pobayak in diugmai ngara im Baḷoi Tuhan, ngara tatua sinangoian "Ngara mogagah". Sia dinia minayak intua sin mopo'igum in totabi kon intau mita inta tumu'ot kom Baḷoi Tuhan tatua.
3 Naonda intau tatua noko'ontong ko'i Petrus bo ko'i Yohanes tumu'ot kom Baḷoi Tuhan tua, sia noki kotabi ko'i nayadua tua.
4 Daí inindoian nayadua tua bo noguman ing ki Petrus ko'inia, "Indoiaikah ing kami!"
5 Daí inindoian doman intau tatua im mosia takin nopo'igum totabi simbaí ogoian monia in onukadon.
6 Ta'e ki Petrus noguman ko'inia, "Aka doit yo diaíbií ing ko'inakoí na'a, ta'e onu ing ko'inakoí ogoikubií ko'inimu: Podoyon kon tangoi i Yesus Kristus intau in Nazaret tatua, mokobayakdon ikow!"
7 Bo kinadaiannya in lima koḷanan intau lempeng tatua bo sinuḷungan pinosindog. Daí kon dodaipa doman tatua bo norigondon in si'oḷ bo gonggoyamuk in si'oḷnya.
8 Bo dalií in sia iḷumanduk sinimindog bo poḷat minayak dinumudui ko'i monia sinumu'ot kom Baḷoi Tuhan tatua. Mayak sindaḷan ḷumansik in sia bo modayow ko'i Allah.
9 Komintan intau kon tua noko'ontong ko'inia nokobayakdon bo poḷat nodayow ko'i Allah.
10 Bo kinota'auandon monia kon intau tatua inta biasamai limituí kong ngara im Baḷoi Tuhan bo mopo'igumai in totabi kon intau inta tumu'ot kom Baḷoi Tuhan tatua. Totok nongoherang im mosia bo nongo'i-tongau in noko'ontong kon onu inta ain nobalií ko'inia tua.
11 Bo intau tatua umuran dumudu-dudui makow ko'i Petrus bo ko'i Yohanes. Bo wakutu in limituídon makow kon tampat inta sinangoi "Tampat Pobobarasanangan i Salomo", totokdon in tayatoḷu tua angoion lipungon im bayongan intau sim mopia totok ing gina monia.
12 Naonda ing ki Petrus noko'ontong kon intau mobayong tatua, sia nosingog ko'i monia nana'a, "Hei intau mita Israel nongonu sim mo'ikow moherangbií im moko'ontong kon tua komintan? Degaí kai monimu kamai daí intau tana'a in nokobayak lantaranbií kawasa bo kotoindudui nami ko'i Allah?
13 Ki Allah inta sinumbah i Abraham, i Ishak, i Yakub bo im mogoguyang naton tua ing ki Allahbií inta nopomulia kon simpal-Nya inta ki Yesus Kristus. Ki Yesus tua inta pinosarahkan bo inta diaí sinarima monimu kon tayowon i Pilatus umpakahbií kai Pilatus im buliandon in Sia.
14 Sia tua inta mokudus bo inta mobanar ta'e mo'ikow doií notarima ko'i-Nia sin intaubií moḷolimod ing ko'ibog monimu bulian saḷaku hadiah ko'i monimu.
15 Mo'ikow nolimodon ko'i-Nia inta pangkoi ing kobiagan im bayongan intau, ta'e bui bo biniag i Allah in Sia nongkon sigad intau minatoi. Bo kami na'a in noko'ontong tontanií kon tua komintan.
16 Bo lantaran intau tana'a nopirisaya kon tangoi i Yesus daí tuata in nokoroton kon intau inta inontong monimu tana'a. Lantaran intau tana'a nopirisaya ko'i Yesus daí nosehatdon bui in sia kon tayowon monimu komintan.
17 Utat mita! Tana'a kinota'auankudon kon onu inta inaidan monimu bo in itoimu mita ko'i Yesus lantaranbií diaí kinota'auan monimu onu inta pinomia monimu tua.
18 Ta'e natuabií in cara i Allah mogintompod kon onu inta aim pinota'au-Nya muna pinongin nabi-Nya mita inta kai-Nia, 'Mopoposaḷamat inta pinotabaí-Nya musti mokorasa kon roriga.'
19 Tuamai pokoratakdon kon raian bo pogogaidon mogaid kon dosa mita, simbaí ampungandon in dosamu tatua.
20 Bo baí ogoian i Tuhan ing kasanangan im mo'ikow, bo potabaí-Nya ing ki Yesus mamangoi ko'i monimu, sin nongkon pinomangkoianpabiímai, Siabií tua inta sinantuí i Allah moposaḷamat ko'i monimu.
21 Sia im mustipabií mogutun kon soroga modapot ing ki Allah monombagu kom bayongan yagi-yagi naí inta aim pinoguman-Nya kon nabi-Nya mita tungkuḷ intua.
22 Ki Musa pernah doman noguman nana'a, 'Ki Tuhan, ki Allahmu in nopotabaí ko'inimu kon tobatuí nabi inta nongkon butaí monimu tontanií, naonda bo nopotabaí in Sia ko'inakoí.
23 Bo intau inta doií mokidongog kon onu im poguman in nabi mita tatua, tokoputuíon kon sigad in umat mita i Allah.'
24 Bayongan nabi inta pernah nopoyaput in habar nongkon i Allah, pinangkoipamai nongkon i Samuel bo nabi mita inta namangoi no'iduduimai ko'inia, komintan doman nongonguman masa in tana'a.
25 Mo'ikowdon inta motarima kon onu inta aim pinoguman mita in nabi tungkuḷ intua bo mo'ikow im moko'ulií kon silai inta aim pinodandi i Allah kom mogoguyang naton, naí inta aim pinoguman-Nya ko'i Abraham nana'a, 'Lantaran katurunanmu daí bayongan intau kon dunia barakatan.'
26 Tuamai ki Allah nomilií kon simpaḷ-Nya, bo nopotabaí ko'i-Nia namangoi muna ko'i monimu, simbaí Sia momarakat ko'i monimu. Nana'a in cara-Nya nomarakat ko'i monimu, pinogogai-Nyadon im mo'ikow komintan mogaid kom mora'at naí inta biasamai aidan monimu."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA