Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bang seaco Pétrus idi Yahya numak Ruma' Allah kareb inan sembayang, ieh ineh tangal musul aco.
2 Idi inan selemulun luk meliai rat bang batek tinanneh luk binirir lemulun; idi inau'deh anid-anid aco tudo munung tanga' Ruma' Allah luk titen Tanga' luk Do', pad mutuh mo' rat nelun luk nesemuet bang Ruma' Allah ineh.
3 Kareb ieh nenier Pétrus idi Yahya semuet bang Ruma' Allah, idi ieh nemutuh mo' rat nedidueh.
4 Iamo' Pétrus idi Yahya nenier neneh idi nepebala, "Nier nekai do'-do'."
5 Idi ieh nenier nedidueh ineh merapet miak ngalap anun-anun rat nedidueh.
6 Idi keburi' Pétrus neneh, "Amas idi pirak na luk idi negku, iamo' anun luk inan negku, ineh ui miak maré kuanmu: dengan ngadan Yésus Keristus, lun Nasarét ineh, nalan iko!"
7 Idi Pétrus pana' nengimet ticu'neh pa tinueh idi nengegenang neneh. Idi kareb ineh petacu kukudneh idi bangilneh metueh peh.
8 Idi ieh nesikau' idi netuped, idi petacu nenalan, idi nesemuet bang Ruma' Allah dengan didueh, idi nenalan idi nesikau'-sikau' nengubur Allah.
9 Idi lun mula' ineh nenier neneh nalan idi ngubur Allah,
10 idi kareb ideh nengiti neneh, ngaceku ieh luk tudo mutuh mo' munung tanga' Ruma' Allah luk titen Tanga' luk Do' ineh, idi amung-amung lemulun ineh pelaba awa idi lingo-lingo ngaceku amung-amung luk pangeh mangun kuanneh.
11 Kareb uned lemulun ineh nengimet Pétrus idi Yahya, idi amung-amung lemulun mawa idi nupun nepamung nan tadur luk titen Tadur Selimun.
12 Kareb Pétrus nenier lun mula' ineh, idi ieh nepebala nedeh, "O lun Israil, ngudehké muyuh mawa ratnan lawé lemulun ini? Idi ngudehké muyuh ngerawé nekai nenganau' lemulun ini nalan dengan lalud idi do' kai sebuleng?
13 Ngaceku Tuhan Ibrahim, Isak, idi Yakub, ieh ineh Tuhan tepun tau, nengerayeh DemulunNeh Yésus luk biré bang palad lun rayeh muyuh idi luk tila' muyuh pa kiung Pilatus kareb ieh sikal muit Neneh.
14 Yésus ineh meligan idi matu. Iamo' muyuh nenala' Neneh idi nemutuh selemulun luk munu' puatin ku libalNeh.
15 Idi muyuh nengaté Lawa Ulun, iamo' Allah nenui Neneh rat arang lun naté, idi kai mangun ku lun nekali' ratnan amung ineh.
16 Dengan lalud ngadan Yésus, lun luk meliai ini inau' metueh. Luk sinier muyuh idi luk initi muyuh pangeh mangun ngaceku anu nan ngadanNeh ineh. Anu inan Yésus nengedo' lemulun ini pa kiung amung muyuh.
17 "Idi nekini, O kinanak-kinanakku, ui kali' idi muyuh nenganau' kudeng ini ngaceku na muyuh kali', idi lun luk ngimet nemuyuh pana' kudeng ineh teh.
18 Atun Allah nemada' dengan dila' nabi-nabi ratnan KeristusNeh uen ngedereh. Idi nekini bala ineh pangeh icingNeh.
19 Ngaceku ineh do' muyuh uren idi lumi inan Allah pad Ieh ngiu' sala' muyuh,
20 pad ulun muyuh uen Tuhan ngebaruh, pelé Allah ngecuk Yésus amé' nemuyuh, ieh ineh Keristus luk pinili'Neh kuan muyuh.
21 Idi Yésus tudo déi' surga pad macing kareb Allah ngebaruh luk amung-amung maya' kudeng luk bilaNeh dengan tang nabi-nabiNeh luk meligan bang kareb luk mon.
22 Musa pangeh nepebala, 'Allah Tuhan muyuh sikal ngikit aceh Nabi kuan muyuh rat arang pupu muyuh, mepad kudeng ui. Do' muyuh ninger amung-amung luk belénNeh.
23 Idé-idé luk na ninger bala Nabi ineh, miak uen ngatad ratnan pupu Allah idi pitayen.'
24 Idi amung-amung nabi luk nepebala, ngimun ratnan Semuil idi nabi-nabi luk muci, pangeh nemada' ratnan kareb ini.
25 Amung pejani' Allah luk icing nabi-nabi ineh, kuan muyuh, idi muyuh ngalap babpat bang pejani' luk biré Allah kuan tepun muyuh. Allah nepebala ni Ibrahim, 'Ratnan inulmu ineh amung-amung pupu bang tana' ini miak ngalap peruan.'
26 Idi Allah pangeh nengikit DemulunNeh, idi Ieh nengecuk Neneh amé' nemuyuh atun, pad ngeperuan nemuyuh idi nguit anid-anid burur muyuh uren ratnan kekamen muyuh luk dat."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA