Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Den pissen wattu tonna wattu passambajanganmo tatte' tallu soloh allo, namale Petrus sola Yahya lako Bola Puang Allataala.

² Den mesa' muane kupi' mammula jajinna, jio bang sikandoppi' babangan to disanga Babangan Ballo. Allo-allo tuli nabawa tau lako la meta'da-ta'da lako to tau mentama Bola Puang Allataala.

³ Ia tonna kitai to Petrus sola Yahya mentama Bola Puang Allataala, mengkamase-masei lako rrannuan sudakka.

⁴ Apa nakaje'jekki Petrus sola Yahya nakuanni, "Ee, kitakan!"

⁵ Nakaje'jekmi, sanga nasangai kumua la den apa nabenni.

⁶ Apa nakua Petrus, "Ee, mane! Te'da doi' kuampui, apa ia to kuampui la kubenko. Kupaui sangan-Na Puang Isa Almaseh to-Nazaret, 'Lumingkako!'"

⁷ Natoei Petrus to lima kananna napake'dehhi. Ta'pa memmawatang to ajena sola panglesoanna.

⁸ Ke'dehmi anna male lako male jio mai, namane' mentama rante Bola Puang Allataala sola Petrus na Yahya. Ia tonna lumingkamo mella'bu-la'bu too mpakala'bih Puang Allataala.

⁹ Jangngah ngasan to tau jio ngkitai lumingka sola mpakala'bih too Puang Allataala. Takkajanna'i, sanga naissen sola ngasan kumua ia joo tau to mengkamase-mase bang nabiasa cumadokko jio Babangan Ballo.

¹⁰ (3:9)

¹¹ Meundii joo tau lako Petrus sola Yahya. Ia tonna ratu sola tallu lako rante pentionganan disanga "Rante Sulaiman", siratuan ngasanmi to tau jangngah ntalimbungngi.

¹² Ia tonna kitai Petrus to tobuda nakuamo, "Ee, to-Israel, matumbari mijangngahra? Matumbari mikaje'jek tarruh bangkan? Misangaraka kumua kapakulleanki'ra ba'tu kamenturusanki' lako Puang Allataala anna wa'ding lumingka tee tau?

¹³ Ia to Puang Allataala nasompa tojolota' Nabi Ibrahim, Ishak na Yakub, Iamo mangka mpakala'bih Puang Isa, kaunan-Na. Iamo joo Puang Isa to mipangngolo lako tomangparenta, micia' too ntarimai tonna la lla'paranni Pilatus.

¹⁴ Moi na pesua mattantun-Na Puang Allataala to te'da nakasalan, apa cia' kamu' ntarimai ammipeta'dai lako Pilatus la la'paranni joo to mbuno tau.

¹⁵ Mangka mipangpebunoan, nasitonganna Iamo garonto'na katuoanna sininna tau. Apa napatuo pole'mi Puang Allataala jio mai kamatean, na kiissen kumua tongan joo, nasaba' kikita kami'.

¹⁶ Iamo mpalumingkai nasaba' kamatapparannamora lako Puang Isa, anna kuasan-Na mpemawatangngi pole'i to ajena tee tau miissen jolona kupi'. Ia joo kamatapparan mpamalekei jio olomi sola ngasan.

¹⁷ Ee, todipusile'to, kamu'mo sola torroan pekaamberanmi mpangpebunoan Puang Isa. Kuissen kumua ia mipugaukki susi joo, sanga te'da mipahangngi.

¹⁸ Apa moi nasusi joo, jajimi to apa pura napasan Puang Allataala to napau sininna nabin-Na tonna anu', kumua ia to Raja Mangpasalama' la gaja parri'.

¹⁹ Ee todipusile'to! Iamo joo la mpenassanni kamu' dosami mimengkatoba', mimenturu' lako Puang Allataala anna dita'dei to dosami,

²⁰ ammiperasai kamasannangan. La nasua Puang Allataala to Puang Isa, to pura napileimo tonna anu', ratu lako kamu', menjaji Raja Mangpasalama'mi.

²¹ La torroi jao suruga sanggenna nabarui Puang Allataala to pangpajajinna, susi to napasan nabin-Na tonna anu'.

²² Denmo napaui Nabi Musa kumua, 'La napadenan kamu' Puang Allataala mesa' nabi susi tee aku', napilei lan mai rapummi. Pesa'dingngi to apa la napauan kamu'.

²³ Ia to tau te'da napesa'dingngii to apa napau joo nabi, la disarakki jio mai umma'-Na Puang Allataala na disabu'i.'

²⁴ Sininna nabi mellao jio mai Nabi Samuel napangpeissenan ngasanmo apa to la jaji tee too.

²⁵ Kamu'mo bati'na joo nabi. Na ia to basse-Na, napaden Puang Allataala lako tojolomi, dipatuju lako kamu'. Ia tonna paui Puang Allataala to basse-Na lako Nabi Ibrahim, nakua kumua, 'La kubarakka'i to sininna bangsa lan tee lino, sanga bati'mu.'

²⁶ Iamo joo napatuo pole'i Puang Allataala to Puang Isa, kaunan-Na, nasuai male lako kamu' jolo', dikua nabarakka'i kamu', napupengkatoba' kamu', ammipada mpatorroi to panggaukan gaja'mi."

Kisah Para Rasul

Video Kisah Para Rasul 03

Ikuti Kami:

KONTAK | PARTISIPASI | DONASI