Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Naria saeo i Petrus bo Yohanes hau ri Banua nu Alatala tinti tatalu ede eo, haitumo tempo posambaya *ntoYahudi.

² Ri bobaa mbaso anu niuli Bobaa Nagaya, naria saito langgai napunggu mami lako ri pompoanaka. Eo-eo ia nikeni hau ri bobaa haitu ala mamala mantande palena merapi-rapi nte topoliu nesua hau mosambaya ri Banua nu Alatala.

³ Tempo nikitana i Petrus bo i Yohanes noliu mesua hau ri Banua nu Alatala, niulurakanamo palena merapi doi nte ira randua.

⁴ Jadi nikanotoramo topunggu haitu bo nanguli i Petrus ka ia, "Peintamo kami!"

⁵ Topunggu haitu nompeintaka ira bo nisarumakana bara maria anu radekeira ka ia.

⁶ Tapi nanguli i Petrus ka ia, "Yaku ledo naria doiku, tapi anu naria nte yaku, haitumo kudekei ka iko. Ante kuasa i Yesus Kristus toNazaret, polipamo!"

⁷ Pade nikangisi i Petrusmo pale nggana ntopunggu, bo nitulungina ia meangga. Kaliu-liu narosomo kadana ante buku dalina.

⁸ Ia kaliu-liu nekavantu bo neangga bo nompamula nolipa hau tumai. Naupu sia, nesuamo ia riara doyata Banua nu Alatala nosanggani-nggani nte i Petrus bo i Yohanes. Ia nolipa bo nekavantu-vantu nantoiya Alatala.

⁹ Pura-pura tona riara Banua nu Alatala nanggita ia nolipa bo nantoiya-toiya Alatala.

¹⁰ Pade nanotomo rarara, iamo toperapi nabiasa nonturo ri Bobaa Nagaya nerapi-rapi nte tona. Nokumaa bo natekaja ira nanggita anu najadi nte topunggu haitu.

¹¹ Topunggu pangane nantuntuni i Petrus bo i Yohanes njuu. Tempo ira tatalu nakava ri tambale ri Banua nu Alatala niuli Tambale Magau Salomo, pura-pura tona nangova hau nasiromu ri ngayora, apa natekaja ira nanggita topunggu haitu nolipamo.

¹² Tempo i Petrus nanggita todea gahaitu, niulikana ira, "Sampesuvu-sampesuvuku *toIsrael! Nakuya komiu nokumaa nanggita anu najadi pangane? Nakuya nikanotosikamiu kami? Natantu nisarumakamiu tona hitu nolipa sabana kabaraka kami mboto, atau sabana poagama kami naroso. Tapi ledo ntoto nakana!

¹³ Alatala anu nisomba ntotuata bo Nabi Abraham, i Ishak, bo i Yakub, Iamo nombabila bo nompakaoge BatuaNa i Yesus. I Yesus haitumo nidekeimiu ka pomarenta, bo Iamo nipoaramiu ri ngayo i Pilatus tempo i Pilatus madota mombakabasaka Ia.

¹⁴ Ia nanoa bo nabelo, tapi nipoaramiu Ia bo nisaravimiu i Pilatus mombakabasaka topepatesi ka komiu.

¹⁵ Komiumo nombatudu tona nompatesi Ia, tano Iamo topombadekei katuvu nabelo sampe ri kasae-saena ka manusia. Bo Alatala nompakatuvu mpanjili Ia lako ri kamateNa. Kami najadi sabiNa, sabana kami mboto nanggita i Yesus natuvu mpanjili.

¹⁶ Jadi sampesuvu-sampesuvu, nikitamiu topunggu hitu bo nisanimiumo ia. Ia nomparasaya i Yesus, jadi i Yesus nompakaroso kadana. Nikitamiu mboto, ia nabelo mpuumo sabana pomparasayana i Yesus.

¹⁷ Sampesuvu-sampesuvu, nau komiu bo totua-totua ngatata nompatesi i Yesus, nisaniku komiu novia anu haitu sabana ledo nisanimiu Iamo Magau Topepakasalama.

¹⁸ Nabi-nabi nggaulu anu niposumba nu Alatala nanguli Magau Topepakasalama kana mombarasai susa bo pari. Anu nipoviamiu hitu nompakadupa anu niuli nu Alatala ka nabi-nabiNa.

¹⁹ Jadi sampesuvu-sampesuvu, komiu kana majea lako ri dosa-dosamiu bo matundu nte Alatala ala dosa-dosamiu ralelakaNa.

²⁰ Bo Alatala mompakaroso bo mompakasana raramiu. Bo Ia muni mombatudu i Yesus makava nte komiu, sabana i Yesus hitumo nipelisi nu Alatala majadi Magau anu mompakasalama komiu.

²¹ I Yesus kana monturo ri suruga sampe makava tempona Alatala mompakabaru pura-pura, evamo nitesaNa ka nabi-nabi nipelisiNa nggaulu.

²² Sampesuvu-sampesuvu, naria tesa Nabi Musa nggaulu nombatesa i Yesus ivei: 'Tupumiu Alatala manganggataka saito lako ri sampesuvumiu mboto majadi nabi nasimbayu mpo yaku. Komiu kana mangoseaka nuapa pura raulina ka komiu.

²³ Isema-sema ledo mangoseaka anu rauli nu nabi haitu, ia kana rataniaka lako nte todea nu Alatala bo rapatesi.'

²⁴ Nabi-nabi ntanina anu nompasimbayu tesa lako nte Alatala nggaulu, nompamula lako ri Nabi Samuel sampe nabi-nabi natuvu purina, ira pura nombatesa anu najadi ri tempo sii-sii.

²⁵ Janji-janji nu Alatala anu nipasimbayu nu nabi-nabi, nambela komiu sii-sii. Pojanji nipovia nu Alatala nte totuamiu nggaulu nambela muni nte komiu. Alatala nojanji ka Nabi Abraham, totuata nggaulu ivei: 'Lako ri mulimu ngena, Kudekei belo ka pura-pura manusia ri dunia.' Jadi sampesuvu-sampesuvu, komiumo nantarima belo nijanji nu Alatala haitu!

²⁶ Haitumo sabana Alatala nanganggataka BatuaNa i Yesus, bo nantudu Ia tumai nte kita toYahudi ntani ruru, ala radekeiNa belo ka kita, haitumo, Ia manggeni kita majea lako ri pokaingguta nadaa."

Kisah Para Rasul

Video Kisah Para Rasul 03

Ikuti Kami:

KONTAK | PARTISIPASI | DONASI