Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nasiam saninangku, ulang ma ibagas na mangidah-idah bohi nasiam marhaporsayaon bani Tuhanta Jesus Kristus, na marmulia in.
2 Umpamani, roh ma sada halak partintin omas ampa na marpakeian na majenges hu parguruan nasiam, anjaha roh homa sada halak na miskin marhiou na marigat-rigat,
3 jadi dob ididah nasiam parhiou na majenges ai, gabe ihatahon nasiam hu bani, “Hundul ma ham ijon, bani sidearan on,” tapi bani na miskin ai ihatahon nasiam, “Ijai ma ham jongjong barang hundul ijon i lambung ni naheihon,”
4 ai lang domma mambahen parlegan-leganan nasiam ijai i tongah-tongah nasiam, anjaha manguhumi nasiam marhitei pingkiran na jahat?
5 Tangihon nasiam ma, ale sanina na hinaholongan, ai lang na masombuh i dunia on do ipilih Naibata, ase bayak sidea ibagas haporsayaon anjaha panean bani harajaon, na dob pinarbagah-Ni hinan bani na marholong ni atei Bani?
6 Tapi idoruni nasiam do na masombuh in. Ai lang halak na bayak in do na mangarsik-arsik anjaha na manarad-narad nasiam hu paruhuman?
7 Ai lang sidea do na pasambor-samborhon Goran na dear in, na dob ipartigorankon bani nasiam?
8 Sibahen na madear ma nasiam tongon, anggo gok idalankon nasiam titah ni Harajaon in, domu hubani hata ni Surat in, “Haholongi ma hasomanmin songon dirimu!”
9 Tapi, anggo sididah-idah bohi nasiam, na mardousa do nasiam ijai, gabe patalaron ni titah in ma nasiam songon sipanlanggar.
10 Porini pe idalankon sada halak haganup titah in, hape ilanggar sada, parsalah do ia bani haganup.
11 Ai Ia na mangkatahon, “Ulang ho marbangkis!” lanjar Ia do mangkatahon, “Ulang ho mamunuh!” Ase porini pe seng marbangkis ham, hape mamunuh do, panlanggar do ham bani titah in.
12 Bani parsahap atap horja pe ingat nasiam ma, siuhumon do nasiam bahenon ni titah hamardekaon in.
13 Ai uhum na so maridop ni uhur do bani na so mandalankon idop ni uhur, tapi monang do idop ni uhur marimbang uhum.
14 Aha ma gunani, nasiam saninangku, anggo ihatahon sada halak, adong bani haporsayaon, tapi seng dong pangkorjahonni?
15 Porini dong sanina atap botou na so marhiou anjaha hurangan bani sipanganon ari-ari,
16 gabe adong humbani nasiam na mangkatahon hu bani: “Laho ma nasiam ibagas damei, malas ma pangahap nasiam anjaha bosur ma nasiam,” hape seng dong ibere nasiam bani, aha ma gunani ai?
17 Haporsayaon in pe sonai do. Anggo seng dong horjani, na dob matei do ai ibagas dirini.
18 Tapi ra do adong halak na mangkatahon, “Bamu ma haporsayaon, bangku parhorjaan! Patuduhkon ham ma bangku haporsayaonmu, na so pala adong horjani, ase hupatuduhkon bamu haporsayaon in marhitei horjangku.”
19 Na porsaya do ham, sada do hansa Naibata. Dear ma ai. Setan-setan pe porsaya do anjaha hitir-hitir.
20 Tapi sihol ma botohonmu, ale jolma na oto, na so marguna do haporsayaon, anggo seng adong horjani.
21 Ai lang humbani horja do ipintori ompungta si Abraham, dob na binoanni ai si Isak, anakni ai, hu panggalangan?
22 Ididah ham ma ijai, na rap marhorja do haporsayaonni ampa pangkorjahonni, anjaha marhitei horja ai gabe gokan dear haporsayaon ai.
23 Jadi jumpah ma na hinatahon ni Surat in, “Ihaporsayai si Abraham do Naibata, anjaha ai ma ihira bani gabe hapintoronni, anjaha igoran do ia huan-huan ni Naibata.”
24 Ase idah nasiam ma, “Hun bani horja do ipintori jolma, seng humbani haporsayaon tumang.”
25 Sonai do age si Rahab, boru jalang ai, ai lang humbani horjani do ia ipintori, dob na jinaloni ai suruhan ai, anjaha isuruh sidea humbani dalan na legan?
26 Ai songon badan na so martonduy, matei do, sonai do matei age haporsayaon na so marhorja.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA